1. ¿Toni tikijtosnekij keman ika titajtouaj tein melauak?

“¿KENIUJ tikixmatik tein melauak?”. “¿Motatuan kiixmatiajya tein melauak keman tiyolik?”. “¿Uejkaujya timoajsi itech tein melauak?”. Xa techtajtanianij nejin oso tejuan tikintajtanianij oksekin. Sayoj ke ¿toni tikijtosnekij keman ika titajtouaj tein melauak? Miakpa, ika titajtouaj tein tikneltokaj, kemej tikueyichiuaj Dios uan kemej tinemij. Keman tikijtouaj ke se taltikpaknenkej moajsi itech tein melauak, tikijtosnekij ke kiixmati tein Biblia tamachtia uan kitakamati tein kijtoua. Nejon kipaleuia maj amo kineltoka tein motamachtia itech taneltokalismej tein amo melaujkej uan maj yolpaki itech nejin taltikpak kampa taixyekana Satanás (Juan 8:32).

2. Kemej kijtoua Juan 13:34, 35, ¿toni yekinika kichiua maj taltikpakneminij kinekikan moajsiskej itech tein melauak?

² ¿Toni yekinika kichiuak maj tiknekinij timoajsiskej itech tein melauak? Xa techyolnotsak tein kuali tein kichiuaj itaixpantijkauan Jiova (1 Ped. 2:12). Oso xa netasojtalis tein kinextiaj. Yejua nejin tein miakej okachi kiuelitakej keman yekinika yajkej se nechikol uan okachi kielnamikij ke tamachtilis tein motemakak. Uan nejin amo tikmoujkaitaj, porin Jesús kijtoj ke taltikpakneminij kinixmatiskiaj imomachtijkauan porin monextiliskiaj netasojtalis (xikonixtajtolti Juan 13:34, 35). Sayoj ke, komo tiknekij tikpiaskej chikauak totakuaujtamatilis, moneki tikchiuaskej okse taman.

3. ¿Toni ueliskia panos komo sayoj titakuaujtamatij iuan Dios porin tikitaj netasojtalis tein monextiliaj tokniuan?

 ³ Amo sayoj moneki titakuaujtamatiskej iuan Dios porin tikitaj netasojtalis tein monextiliaj akin kichiuaj kemej Cristo. ¿Keyej? Maj tiknemilikan ke se tokniuj, xa hasta se tayekankej oso se precursor, kichiua se ueyi tajtakol, techyolkokoua oso kikaua uan kiixnamiki tamachtilis tein melauak uan kijtoua ke tein timomachtiaj amo melauak. ¿Toni tikchiuaskiaj komo panoua nejin? ¿Tikauaskiaj Jiova? Nejin techmachtia ke komo sayoj titakuaujtamatij iuan Dios porin tikitaj tein oksekin kichiuaj uan amo porin kuali timouikaj iuan, totakuaujtamatilis amo chikauak yeski. Netasojtalis uan yolpakilis tein tikmachiliaj uelis techpaleuis maj titakuaujtamatikan. Sayoj ke no moneki kuali timomachtiskej Biblia, tikajsikamatiskej tein timomachtiaj uan tiktemoskej okachi tamachtilis uan ijkon senkis tikneltokaskej ke timomachtijtokej tein melauak. Tejuan moneki tiktemoskej tein techpaleuis maj tikneltokakan ke Biblia techmachtia akoni yekmelauj Jiova (Rom. 12:2).

4. Kemej kijtoua Mateo 13:3-6, 20, 21, ¿toni kinpanoua sekin keman kipiaj ouijkayomej?

⁴ Jesús kijtoj ke sekin kiseliskiaj tein melauak ika “miak pakilis”, sayoj ke amo takuaujtamatiskiajok keman kipiaskiaj kuejmolmej (xikonixtajtolti Mateo 13:3-6, 20, 21). Xa amo kiajsikamatij ke komo mochiuaj itatojtokakauan Jesús kipiaskej ouijkayomej (Mat. 16:24, TNM). Oso xa kinemiliaj ke se itatojtokakauj Cristo amo keman kipias ouijkayomej. Sayoj ke itech nejin tonalmej tinochin uelis tikpiaskej kuejmolmej. Itech tonemilis uelis mopatas seki taman tein kichiuas maj amo tiyolpakikanok (Sal. 6:6; Ecl. 9:11).

5. ¿Keniuj kinextiaj miakej itekitikauan Jiova ke kineltokaj ke tein momachtiaj yejua tein melauak?

⁵ Miakej itekitikauan Jiova kinextiaj ke kineltokaj ke tein momachtiaj yejua tein melauak. ¿Keniuj tikmatij? Porin kisentokaj takuaujtamatij iuan Jiova keman se tokniuj kinyolkokoua oso kichiua tein amo kuali (Sal. 119:165). Keman kipanouaj ouijkayomej, inintakuaujtamatilis okachi mochikaua (Sant. 1:2-4, TNM). ¿Toni techpaleuis maj no mochikaua totakuaujtamatilis?

6. ¿Keyej takuaujtamatiaj imomachtijkauan Jesús itech yekinika siglo?

⁶ Imomachtijkauan Jesús itech yekinika siglo takuaujtamatiaj iuan Dios porin kiixmatiaj iTajtol uan itamachtilisuan Jesucristo, oso “yek melau tanextililis” (Gál. 2:5). Nejin “yek melau tanextililis” yejua tamachtilis tein tikneltokaj itatojtokakauan Cristo, kemej kampa ika tajtoua inemilis Jesús tein kitemakak uan keman oksepa nemik. Tatitanil Pablo kineltokaya ke melauak nejin tamachtilis. ¿Keniuj tikmatij? Porin “kintaneltoktij in takakini ika ne Tajtoltsin de Dios ke monekia ma tajyouis uan [...] ma pankisas Cristo yoltok” (Hech. 17:2, 3). Imomachtijkauan Jesús itech yekinika siglo kineltokakej nejon tamachtilis uan kitemojkej kiajsikamatiskej iTajtol Dios ika inepaleuil yektikatsin espíritu. Kitemojkej kiitaskej ox nejon tamachtilis ualeuaya itech iTajtol Dios (Hech. 17:11, 12; Heb. 5:14). Amo sayoj netasojtalis uan yolpakilis tein kimachiliayaj kichiuaya maj takuaujtamatinij uan amo kitekitiliayaj Jiova sayoj porin kiuelitayaj yetoskej iniuan tokniuan, ta porin kiixmatiaj iTajtol Dios (Col. 1:9, 10).

7. ¿Keniuj techpaleuis totakuaujtamatilis?

⁷ Tamachtilis tein kipia iTajtol Dios amo keman mopata (Sal. 119:160). Kemej neskayot, amo mopata komo se tokniuj techyolkokoua oso kichiua se ueyi tajtakol. Uan amo no mopata keman tikpiaj kuejmolmej. Yejua ika  moneki kuali tikixmatiskej tein tamachtia Biblia uan tikneltokaskej ke melauak. Komo senkis titakuaujtamatij itech tein Biblia tamachtia amo tikauaskej Jiova keman tikpiaskej ouijkayomej. ¿Toni techpaleuis maj okachi titakuaujtamatikan ke tein tikneltokaj yejua tein melauak?

8. Kemej kijtoua 2 Timoteo 3:14, 15, ¿keyej Timoteo takuaujtamatia ke tein kineltokaya katka tein melauak?

⁸ Timoteo takuaujtamatia ke tein kineltokaya katka tein melauak. ¿Keniuj kimatik nejon? (Xikonixtajtolti 2 Timoteo 3:14, 15.) Imomaj uan iueyinan yejuan akin yekinika kimachtijkej “Tajkuilolamatsin de Dios”. Sayoj ke tikmatij ke yejua no momachtiaya iselti. Nejon kipaleuij maj ‘kiyekneltokaʼ ke tein ompa momachtiaya katka tein melauak. Ompa, Timoteo, imomaj uan iueyinan kiixmatkej itamachtilisuan Cristo. Timoteo semi kiyolnotsak netasojtalis tein kinextiayaj imomachtijkauan Jesús, uan kinekia yetos iniuan tokniuan uan kinyekpias (Filip. 2:19, 20). Sayoj ke tein kipaleuiaya maj takuaujtamati amo katka netasojtalis tein kinpialiaya oksekin, ta tein melauak tein momachtiaya itech iTajtol Dios, tein kipaleuiaya maj mochikaua ikuali uikalis iuan Jiova. Tejuan no moneki timomachtiskej tein Biblia tamachtia keman ika tajtoua Jiova uan tiknemiliskej keyej melauak.

9. ¿Katiyejua eyi tamachtilismej tein tayekantokej moneki tikneltokaskej ke melauak?

⁹ Achto moneki tikneltokaskej ke melauak eyi tamachtilismej tein tayekantokej itech Biblia. Yekinika, ke Jiova kichijchiuak nochi tein onkak (Éx. 3:14, 15; Heb. 3:4; Apoc. 4:11). Ojpatika, ke Biblia kipia itanemililuan Dios tein kineki maj kimatikan taltikpakneminij (2 Tim. 3:16, 17). Uan expatika, ke Jiova kinpia itekitikauan akin kiueyichiuaj uan kinixyekana Cristo: itaixpantijkauan Jiova (Is. 43:10-12; Juan 14:6; Hech. 15:14). Amo moneki tikmatiskej nochi tein kijtoua Biblia uan ijkon tikneltokaskej ke melauak nejin tamachtilismej, ta moneki itech titanemiliskej. Nejin  techpaleuis maj senkis titakuaujtamatikan ke tein tikneltokaj yejua tein melauak (Rom. 12:1, TNM).

10. Komo tikixmatijya tein melauak, ¿toni moneki tikchiuaskej?

¹⁰ Satepan ke tikneltokaj ke melauak tamachtilismej kampa ika motajtoua Jiova, Biblia uan itekitikauan Dios, moneki kuali tikuiskej iTajtol uan tikinnextiliskej oksekin ke melauak nejin tamachtilismej. ¿Keyej? Porin akin tikchiuaj kemej Cristo moneki tikinnextiliskej tein timomachtiaj akin techkakiskej (1 Tim. 4:16). * Uan keman tiktemouaj tikinpaleuiskej oksekin maj kineltokakan ke Biblia tamachtia tein melauak, totakuaujtamatilis okachi mochikaua.

11. ¿Keniuj tamachtiaya Pablo, uan keniuj uelis tikchiuaskej kemej yejua?

¹¹ Keman tatitanil Pablo kinmachtiaya oksekin, kitemouaya “kintaneltoktis de akoni ne Jesús [...] ika in tajkuilolamat de Moisés uan ika itenkopaka ne uejkautanauatiani” (Hech. 28:23). ¿Keniuj uelis tikchiuaskej kemej Pablo keman titamachtiskej ika Biblia? Amo sayoj moneki tikiluiskej akin tikmachtiaj tein kijtoua Biblia, ta moneki tikpaleuiskej maj itech tanemili tein momachtia, porin nejon kipaleuis maj motoki iuan Jiova. Amo tiknekij maj mochiua itekitikauj Dios porin techpoujkaita, ta porin kineltoka ke melauak tein momachtia itech Biblia kampa ika tajtoua toDios tetasojtakej.

12, 13. ¿Keniuj tetatmej uelis kinpaleuiskej ininkoneuan maj kisentokakan itech tamachtilis tein melauak?

¹² Tetatmej, tikmatij ke namejuan nankinekij maj nanmokoneuan kisentokakan itech tamachtilis tein melauak. Xa nankinemiliaj ke komo kipiaj kuali tasojiknimej itech nechikol, mochikauas inintakuaujtamatilis. Sayoj ke, amo sayoj kuali tasojiknimej kinpaleuis maj kineltokakan ke tein momachtiaj yejua tein melauak. No moneki maj kuali mouikakan iuan Dios uan maj senkis kineltokakan ke Biblia kijtoua tein melauak.

¹³ Komo nankinekij nankinmachtiskej nanmokoneuan tein melauak, moneki kiitaskej ke namejuan kuali nanmomachtiaj Biblia. Itech xitanemilikan tein nanmomachtiaj. Ijkon uelis nankinnextiliskej maj no kichiuakan nejon. Xikinnextilikan keniuj kikuiskej nepaleuilmej tein ika timomachtiaj, kemej nankinnextiliaj akin nankinmachtiaj ika Biblia. Ijkon nankinpaleuiskej maj kitasojtakan Jiova uan maj takuaujtamatikan iuan takeual takuaujtamach uan tamatkej, akin Jiova kiixtalijtok maj techmaka tamachtilis (Mat. 24:45-47). Amo sayoj  xikinnextilikan tamachtilismej tein tayekantokej, ta xikinpaleuikan maj kiixmatikan “tamachilisme den kachi ouijke” kemej uelis kiajsikamatiskej. Ijkon uelis mochikauas inintakuaujtamatilis (1 Cor. 2:10).

14. ¿Keyej moneki timomachtiskej tein moijtojka itech Biblia ke mochiuaskia? (No xikonita recuadro “ ¿Ueli tikmelauaj tein moijtojka itech Biblia ke mochiuaskia?”).

¹⁴ Tein moijtojka ke mochiuaskia satepan no moajsi itech iTajtol Dios uan techpaleuia maj okachi titakuaujtamatikan iuan Jiova. ¿Toni tein achto moijtojka ke panoskia techpaleuiani maj mochikaua totakuaujtamatilis? Xa itech titanemiliskej tein ika tajtouaj itamian tonalmej (2 Tim. 3:1-5; Mat. 24:3, 7). Sayoj ke okseki taman tein mochiuakya no uelis kichikauas totakuaujtamatilis. Kemej neskayot, ¿uelis tikmelauaskej keniuj mochiuani uan kisentoka mochiua tein moijtojka itech Daniel capítulo 2 uan 11? * Komo titakuaujtamatij porin tikneltokaj tein Biblia tamachtia, uelis titaxikoskej keman tikpanoskej ouijkayomej. Maj tikitakan ininneskayo tokniuan akin semi kintajyouiltijkej ompa Alemania itech Ojpatika Ueyi Neteuilis. Maski ijkuak amo senkis moajsikamatia nochi tein moijtojka ke panoskia itech itamian tonalmej, yejuan senkis takuaujtamatiaj itech iTajtol Dios.

15-17. ¿Keniuj nemachtil ika Biblia kinpaleuij tokniuan keman kintajyouiltijkej nazis?

¹⁵ Keman nazis taixyekanayaj ompa Alemania, miakej tokniuan kintsakkej kampa semi kintekitiltiayaj uan kintajyouiltiayaj. Hitler uan Heinrich Himmler, akin kinixyekanaya itateuijkauan Hitler, kintauelitayaj itaixpantijkauan Jiova. Se tokniuj siuat kijtoj ke Himmler kiniluij seki tokniuan siuamej akin tsaktoyaj: “¡NanmoJiova uelis taixyekanas ompa iluikak, sayoj ke nikan taltikpak tejuan titaixyekanaj! ¡Nankiitaskej akoni okachi uejkauas, namejuan oso tejuan!”. ¿Toni kinpaleuij itekitikauan Jiova maj amo kikauanij?

¹⁶ Nejon tokniuan kimatiaj ke iTekiuajyo Dios peuak taixyekana itech xiuit 1914. Uan  yejua ika kimatiajya ke kinixnamikiskiaj. Itekitikauan Jiova kimatiaj ke nion se tekiuajyot ueliskia kitsakuilis maj mochiua tein Dios kiixtalijtok. Hitler amo ueliskia kiixpolos taueyichiualis tein melauak nion kiixtaliskia se tekiuajyot tein ueliskia kiixpatas iTekiuajyo Dios. Tokniuan kimatiaj ke ueliskia panos tein yeski taman tein kichiuaskia maj itekiuajyo Hitler ixpoliui.

¹⁷ ¡Uan ijkon mochiuak! Seki xiujmej satepan, inintaixyekanalis nazis ixpoliuik uan Heinrich Himmler, akin kijtojka ke yejuan taixyekanayaj nikan taltikpak, choloj. Keman cholojtoya, moajsik iuan tokniuj Lübke, se tokniuj takat akin kiixmatia porin achto tsaktoya. Himmler, akin semi amo kuali momachiliaya, kiluij: “¿Toni panos axkan, Momachtijkej ika Biblia?”. Tokniuj Lübke kiluij ke itaixpantijkauan Jiova kimattoyajya ke inintaixyekanalis nazis ixpoliuiskia uan ke yejuan kinkixtiskiaj. Ijkuak, Himmler, akin miak taman kinijtouilijka itaixpantijkauan Jiova, amo kimatikok toni kijtos. Tepitsin satepan, momiktij. ¿Toni techmachtia nejin? Ke komo timomachtiaj Biblia uan tein ompa moijtoua ke mochiuaskia satepan, techpaleuis maj semi titakuaujtamatikan iuan Dios uan maj amo tikauakan keman tikpanoskej ouijkayomej (2 Ped. 1:19-21).

18. Kemej kijtoua Juan 6:67, 68, ¿keyej moneki tikpiaskej taixmatilis uan “kuali taixejekolis” tein Pablo ika tajtoj?

¹⁸ Tinochin moneki tiknextiskej netasojtalis tein kinixnextia akin yekmelauj kichiuaj kemej Cristo. Sayoj ke no moneki tikpiaskej taixmatilis uan “kuali taixejekolis” (Filip. 1:9). Komo amo tikpiaj, uelis tikneltokaskej “miak tataman tamachilisme” tein kiteixmatiltiaj “tamachtiani ten tanextilijtinemij ika ueyi takajkayaualis”, kemej akin kikaujkej uan kiixnamikij tamachtilis tein melauak (Efes. 4:14). Itech yekinika siglo, keman miakej imomachtijkauan Jesús kikaujkej, tatitanil Pedro senkis kijtoj ke Jesús kipiaya “tanextililisme ten kualkui ne nemilis nachipa” (xikonixtajtolti Juan 6:67, 68). Maski ijkuak, Pedro amo nochi kiajsikamatia tein kijtosnekia nejon tajtolmej, amo kikauak Jesús porin kiajsikamatik ke yejua katka Cristo. Komo tejuan no senkis tikneltokaj ke Biblia tamachtia tein melauak, senkis titakuaujtamatiskej iuan Dios keman tikpanoskej ouijkayomej uan tikinpaleuiskej oksekin maj mochikaua inintakuaujtamatilis (2 Juan 1, 2).