Mary uan itakatsin John a nemij itech se altepet kampa miakej de Filipinas youij tekititij uan yejuan kinnojnotsaj. Keman mochiujtoya ueyi kokolis COVID-19, Mary peuak kinmachtia miakej akin nemij itech okseki altepemej. ¿Keniuj kichiuak?

Mary kintajtaniaya akin kinmachtiaya: “¿Tikonixmati aksa akin no kineki momachtis Biblia?”. Komo kijtouayaj ke kemaj, kiniluiaya ox uelis kinixmatis. Keman ijkon kichiuaya, uelia okachi miakej kinnojnotsaya. ¿Keyej? Porin miakej akin kiuelitaj momachtiskej Biblia, no kintapouiaj ininchankauan uan inintasojikniuan tein momachtiaj. Maj tikitakan tein kipanok Mary.

Jasmin, semej akin Mary kimachtiaya Biblia, kipaleuij maj kinixmati nauin akin no kinekiaj momachtiskej. Semej de yejuan monotsa Kristine, yejua semi kiuelitaya uan kitajtanij maj kimachti ojpa itech semana. Keman Mary kitajtanij ox kiixmatia aksa akin no kinekia momachtis Biblia, Kristine kiluij: “Kemaj, nikneki xikinixmati notasojikniuan”. Seki semana satepan uelik iniuan tajtoj naui itasojikniuan akin kinekiaj momachtiskej. Satepan, Kristine kipaleuij Mary maj kinixmati oksekin, uan oksekin no ijkon kichiujkej.

Satepan ke Mary kinixmatik itasojikniuan Kristine, yejua kiluij ke kinekia maj ichankauan akin nemiaj Filipinas no momachtianij Biblia. Yejua ika, iuan tajtoj isiuapil Andrea. Yekinika, Andrea kinemilij: “Nejon itaixpantijkauan Jehová se yankuik taneltokalis. Amo kineltokaj Jesús uan sayoj kikuij Antiguo Testamento”. Sayoj ke keman yekinika momachtij, kiitak ke amo melauj nejon, keman momachtiaya, kijtouaya: “Komo Biblia ijkon kijtoua, kijtosneki ke melauak!”.

Satepan, Mary kinixmatik ome itasojikniuan Andrea uan se siuat akin iuan tekitia, uan yejuan no peuak momachtiaj Biblia. Uan no, Angela se iaui Andrea akin amo tachiaya, no ompa takaktoya keman kimachtiayaj uan Mary amo kimatia. Se tonal, Angela kiluij Andrea ke kinekia kiixmatis Mary para maj kimachtiani. Angela semi kiuelitaya momachtis. Achto ke panos se metsti kimatiaya miak textos, uan hasta kijtoj ke kinekia momachtis naujpa itech semana. Andrea kipaleuij iaui maj nochipa monechiko ika videollamada.

Keman kimachtiayaj Kristine, itakatsin Joshua, no ompaka mokauaya para takakis.  Keman Mary kiitak, kitajtanij ox no kinekia iniuan momachtis. Yejua kinankilij: “Kemaj, sayoj nikneki nitakakis. Komo teisa tinechtajtania, nikisteuas”. Sayoj ke Joshua niman peuak okachi kitajtania miak taman ke Kristine uan kijtoj ke no kinekia momachtis.

Miakej peuak momachtiaj sayoj ika tein kintajtaniaya Mary, uan yejua kiniluij seki tokniuan maj kinmachtianij sekin. ¡Mary peuak kinmachtia 28 itech naui altepemej!

Jasmin akin yekinika ika titajtojkej, moauij abril de 2021. Kristine moauij mayo xiuit 2022 uan axkan oksepa nemi Filipinas iniuan ichankauan. Omen akin Mary kinixmatik porin Kristine kipaleuij no moauijkejya. Seki metsti satepan ke Kristine moauij, Angela no moauij uan axkan precursora regular. Joshua, itakatsin Kristine, uan ininsiuapil Andrea, uan oksekin kisentokaj momachtiaj Biblia uan okachi motokiaj iuan Jehová.

Ne uejkauj, keman Jesús uan tatitanilmej nemiaj, miakej no kintapouiayaj ininchankauan uan inintasojikniuan tein momachtiayaj de Jesús (Juan 1:​41, 42a; Hech. 10:​24, 27, 48; 16:​25-33). Xa ueliskia tikontajtanis akin tikonmachtia oso akin techkakij keman tikinnojnotsaj ox kiixmatij aksa akin kiuelitaskia momachtis Biblia. Komo ijkon tikonchiua, xa no tikonajsis oksekin akin no kiuelitaskiaj momachtiskej.