MIAKEJ kinemiliaj ke kinnamiki maj okachi kintakachiuakan ke oksekin oso maj kiselikan teisa tein okachi kuali. Uan maski kintakachiuajya kisentokaj kinemiliaj ke kinnamiki kiseliskej okseki taman. Sayoj ke amo tikmojkaitaj maj ijkon kichiuakan porin Biblia ipa kijtojka ke itech tonalmej keman tatamitiya miakej moueyimatiskiaj uan amo motasojkamatiskiaj (2 Tim. 3:2).

Desde ne uejkaujya miakej ipa moueyimatinij. Adán uan Eva kinemilijkej ke kinnamikia maj yejuan kiixtalianij toni tein kuali uan toni amo, uan yejua ika axkan tinochin titajyouiaj. Miak xiujmej satepan, tekiuaj Uzías de Judá kinemilij ke ueliskia kichichinos kopal itech templo maski amo kinamikia ijkon kichiuas (2 Crón. 26:​18, 19). Uan fariseos uan saduceos kinemilijkej ke kinnamikia maj Dios okachi kintatiochiuiani porin Abrahán katka ininuejkaujtat (Mat. 3:9).

Miakej moueyimatij, yejua ika komo amo timoyekpiaj no uelis peuas titanemiliskej kemej yejuan (Gál. 5:26). Xa tiknemiliskej ke technamiki maj techmakakan seki tekimej oso ke moneki okachi techtakachiuaskej. ¿Toni techpaleuis maj amo ijkon titanemilikan? Moneki achto tikajsikamatiskej keniuj tanemilia Jehová. Maj tikitakan ome taman tein Biblia tayolmajxitia.

Jehová kiixtalia toni technamiki maj toka kichiuakan. Maj tikitakan seki taman.

• Jehová kijtoua ke siuatsin moneki kitakachiuas itakatsin, uan tetakauj moneki kitasojtas isiuatsin (Efes. 5:33). Jehová kijtoua  ke akin monamiktijya sayoj itakatsin oso isiuatsin moneki kinextilis ke kitasojta (1 Cor. 7:3). Uan no, konemej moneki kintakamatiskej inintatuan, uan tetatmej moneki kintasojtaskej uan kinyekpiaskej ininkoneuan (2 Cor. 12:14; Efes. 6:2).

• Jehová techiluia ke moneki tikintakachiuaskej tayekananij itech nechikol porin semi tekitij (1 Tes. 5:12). Sayoj ke yejuan amo kinnamiki maj kinchiualtikan tokniuan tein yejuan kinekij (1 Ped. 5:​2, 3).

• Jehová kinkaua maj tekiuanij tajtanikan impuesto uan kineki maj tikintakachiuakan (Rom. 13:​1, 6, 7).

Jehová semi techtasojta uan techmaka miak taman maski amo technamiki. Kemej titajtakolejkej, technamiki maj timikikan (Rom. 6:23). Sayoj ke kemej Jehová nochipa tetasojta, techmaka miak taman tein kuali (Sal. 103:​10, 11). Tein yeski tekit tein tikpiaj itech nechikol uan tatiochiualismej tein tikseliaj, Jehová techmaka porin techiknelia maski amo technamiki (Rom. 12:​6-8; Efes. 2:8).

Maj amo peua titanemilikan kemej akin kinixyekana Satanás. Komo amo timoyekpiaj xa ueliskia tiknemiliskej ke technamiki maj tikselikan okachi miak taman ke oksekin. Se tonal, Jesús kitetapouij se taman tein kinextia ke niman ueliskia ijkon titanemiliskej. Ininka tajtoj seki tekitinij akin kinekkej tekitiskej nochi tonal uan kintaxtauiskiaj ika se tomintsin de plata. Satepan, akin kintakeuak kintemoj okachi tekitinij. Uan keman tapoyauik, nochin kintaxtauij ika sayoj se tomintsin de plata maski sekin tekitikej sayoj se hora. Sayoj ke akin kualkan peuak tekitij kinemilijkej ke monekia okachi kintaxtauiskej ke oksekin porin tekitikej miak horas uan semi tonaltatakej (Mat. 20:​1-16). Ijkon Jesús kinmachtij itatojtokakauan ke monekia yolpakiskej ika tein Dios kinmakaya.

Maj timotasojkamatikan uan maj amo tikchixtokan maj techmakakan teisa (1 Tes. 5:18). Xikonchiua kemej tatitanil  Pablo, yejua amo kintajtanij tokniuan de Corinto maj kimakanij tein kipolouaya maski ueliskia kintajtanis (1 Cor. 9:​11-14). Moneki maj tiktasojkamatikan tein techmakaj uan maj amo tikchiakan maj techmakakan okachi.

Maj tiyolyemankej. Keman aksa moueyimati kinemilia ke kinamiki maj kiseli okachi ke tein ipa kipia. Sayoj ke komo tiyolyemankej techpaleuis maj amo ijkon titanemilikan.

Tanauatijkej Daniel kuali technextilij keniuj uelis yeski tiyolyemankej. Ichankauan tominpiayaj, katka kuakualtsin, tamatkej uan kimatia kichiuas miak taman. Yejua ika, ueliskia kinemilis ke ipa kinamikia maj kitakachiuanij uan maj kimakanij tekimej tein kipiaya (Dan. 1:​3, 4, 19, 20). Sayoj ke yejua katka yolyemanik uan yejua ika Jehová kitasojtak (Dan. 2:30; 10:​11, 12).

Maj amo sayoj totech titanemilikan nion maj timoueyimatikan kemej miakej kichiuaj, ta maj nochipa tiyolpakikan keman Jehová techtatiochiuis maski amo technamiki.