1. Ijkon kemej tekiuaj David, ¿toni xa motajtaniaj seki tokniuan?

TINOCHIN tiknekij tinemiskej ika yolseuilis uan maj amo teyi techtekipacho. Sayoj ke kemansa tinochin tikpanouaj ouijkayomej. Tein melauj, xa seki tokniuan momachiliaj kemej tekiuaj David, akin kitajtanij Jiova: “¿Hasta kemanian amo nikpiasok netekipacholis nion tayokol itech noyolo mojmostaj?” (Sal. 13:2).

2. ¿Toni tikitaskej itech nejin tamachtilis?

² Maski amo ueli senkis timoajchiuiliaj netekipacholis, moajsi seki taman tein uelis tikchiuaskej tein techpaleuis maj amo semi timotekipachokan. Itech nejin tamachtilis, yekinika tikitaskej seki taman tein uelis kichiuas maj timotekipachokan. Satepan, tikitaskej chikuasen taman tein techpaleuis maj tiyolseujtokan keman tikpiaskej ouijkayomej.

3. ¿Toni uelis kichiuas maj timotekipachokan, uan ueli tikchiuaj maj amo pano tein techtekipachoua?

³ Moajsi seki taman tein uelis kichiuas maj timotekipachokan uan tein amo ueli tikchiuaj maj amo pano. Kemej neskayot, amo ueli tikchiuaj maj amo patiyoua xijxiujtika tein tikuaj, tein timotaliliaj uan tein tikuij tochan. No amo ueli tikpataj kemej tanemiliaj akin iniuan titekitij oso iniuan timomachtiaj akin xa kitemouaj maj titakajkayauakan oso tiauilnemikan. Uan no amo ueli tikintsakuiliaj akin kichiuaj tein amo kuali kampa tinemij. Tikpiaj nejin ouijkayomej porin miakej amo kichiuaj tein Biblia tamachtia. Uan no, Satanás taixyekana nikan taltikpak uan kineki maj ‘timoyolkuejmolokan ika tenesi san’ porin nejon kichiuas maj amo tiktekitilikan Jiova (Mat. 13:22; 1 Juan 5:19). Yejua ika onkak miak ouijkayomej tein kichiua maj taltikpakneminij motekipachokan.

4. ¿Toni uelis panos komo semi timotekipachouaj?

 ⁴ Keman semi timotekipachojtokej, xa amo ueli titanemiliaj itech okseki taman. Kemej neskayot, xa techtekipachoua maj amo techajsi tomin tein tiktanij uan maj amo ueli timoixpanoltikan, oso xa techtekipachoua maj tikokolispeuakan uan maj amo ueliok titekitikan oso hasta maj techkuilikan totekiuj. Xa no techtekipachoua maj amo tiktakamatikan Dios keman timoixnamikiskej ika tein amo kuali. Uan no, xa itech titanemiliaj toni tikchiuaskej keman Satanás kichiuas maj taltikpakneminij akin kinixyekana kinixnamikikan itekitikauan Dios. Xa timotajtaniaj: “¿Amo kuali yetok maj ika nimotekipacho nejin?”.

5. ¿Toni kijtosnekia Jesús keman kijtoj: “Amo ximoyolkuejmolojtinemikan”?

⁵ Jesús kiniluij imomachtijkauan: “Amo ximoyolkuejmolojtinemikan” (Mat. 6:25). ¿Kijtosnekia Jesús ke maj nion tepitsin timotekipachokan? Amo. Maj tikelnamikikan ke seki itekitikauan Jiova akin nenkej ne uejkauj motekipachojkej uan nejon amo kichiuak maj amo kiyolpaktianijok Jiova (1 Rey. 19:4; Sal. 6:3). * Tein melauj, Jesús techyolseuijtoya. Amo kinekia maj semi ika timotekipachokan keniuj tikpiaskej nochi tein moneki uan maj amo tiktayekanaltikanok tiktekitiliskej Jiova. Yejua ika, ¿toni uelis tikchiuaskej keman semi timotekipachoskej? (Xikonita recuadro “ Toni mitsonpaleuis”).

6. Kemej kijtoua Filipenses 4:6, 7, ¿toni uelis techyolseuis?

⁶ 1) Nochipa xikontataujti Jiova. Keman semi tionmotekipachojtos, semi tionyolseuis komo tikontataujtia Jiova (1 Ped. 5:7). Yejuatsin mitsonnankilis keman mitsonmakas “yolseuilis ten kachi kuika uelilis hasta amo uelis se kajsikamatis ok de keniu” (xikonixtajtolti Filipenses 4:6, 7). Jiova techmaka nejon yolseuilis ika iyektikatsin espíritu (Gál. 5:22).

7. ¿Toni moneki tikelnamikiskej keman tiktataujtiskej Dios?

⁷ Keman tikontataujtis Jiova, xikonilui nochi tein tikonmachilia. Xikontapoui toni ouijkayot tikonpia uan keniuj tionmomachilia. Komo ueli tikonyektalia, xikontajtani maj mitsonmaka tamatilis tein mitsonpaleuis xikonmati toni tikonchiuas uan chikaualis tein mitsonpaleuis xikonchiua. Komo amo ueli tikonyektalia, xikontajtani maj mitsonpaleui amo semi xionmotekipacho. Komo tikoniluia Jiova toni ouijkayot tikonpia uan keniuj tionmomachilia, okachi tikonitas keniuj mitsonnankilia. Komo amo niman mitsonnankilia, xikonsentoka xikontataujti. Jiova amo sayoj kineki xikontapoui toni ouijkayot tikonpia uan keniuj tionmomachilia, ta no kineki xikonsentoka xikontataujti (Luc. 11:8-10).

8. ¿Toni no monekiskia tikijtoskej itech tonetataujtiluan?

⁸ Keman tikontapouis Jiova keniuj tionmomachilia, moneki no itech xiontanemili nochi tein kuali tein tikonpia uan xikontasojkamatili, maski tikonpanotok ouijkayomej. Komo kemansa amo tikonmati keniuj tikontapouis Jiova tein tikonmachilia, xikonelnamiki ke yejuatsin uelis mitsonnankilis maski sayoj uelis tikonijtos: “¡Ika kualtakayot, xinechpaleui!” (2 Crón. 18:31; Rom. 8:26).

9. ¿Kani monekiskia tiktemoskej nepaleuil keman timouij?

⁹ 2) Xiontakuaujtamati iuan Jiova, amo moselti xikontemo tikonyektalis ouijkayot. Itech itonaluan tanauatijkej Isaías, akin nemiaj Judá semi kimouiliayaj maj asirios kinixnamikinij uan maj kinchiuanij inintakeualuan. Yejua ika kintajtanijkej akin nemiaj Egipto maj kinpaleuianij (Is. 30:1, 2). Jiova kinnejmachtij ke  nejon tein kichiujtoyaj amo kinpaleuiskia (Is. 30:7, 12, 13). Jiova kinauatij Isaías maj kiniluiani keniuj ueliskia kiajsiskej yekmelauj nepaleuil. Isaías kijtoj: “Nankipiaskej chikaualis komo nanyolseujtokej uan komo nantakuaujtamatij” iuan Jiova (Is. 30:15b).

10. Xikonijto seki taman kampa uelis tiknextiskej ke titakuaujtamatij iuan Jiova.

¹⁰ Maj tikitakan seki taman kampa uelis tiknextiskej ke titakuaujtamatij iuan Jiova. Xikonnemili ke mitsonmakaj se tekit kampa kuali mitsontaxtauiskej, sayoj ke monekis tiontekitis okachi horas uan amo semi uelisok tikontekitilis Jiova. Oso xa se akin iuan tiontekiti kiuelitaskia mouan moixmatis, sayoj ke amo itaixpantijkauj Jiova. Xa hasta se mochankauj akin semi tikontasojta mitsoniluia ke amo mitsonnotsasok komo tikonsentoka tikontekitilia Jiova. Ouij se kiixejekos toni se kichiuas itech nochi nejin taman, sayoj ke Jiova techpaleuia maj tikmatikan toni moneki tikchiuaskej (Mat. 6:33; 10:37; 1 Cor. 7:39). ¿Titakuaujtamatiskej iuan Jiova uan tiktakamatiskej?

11. ¿Toni neskayomej tein moajsij itech Biblia uelis techpaleuiskej maj tiyolseujtokan keman techixnamikiskej?

¹¹ 3) Xikonita toni mitsonmachtia tein kichiujkej akin nenkej ne uejkauj. Itech Biblia tikajsij miak neskayomej, tein kuali uan tein amo kuali, tein kinextiaj ke semi moneki se yolseujtos uan se takuaujtamatis iuan Jiova. Keman tionmomachtis kuali neskayot tein kikaujkej itekitikauan Dios, xikonita toni kinpaleuij maj yolseujtonij keman semi kinixnamikkej. Kemej neskayot, tatitanilmej amo moujkej keman tamelauanij judíos kiniluijkej maj amo tanojnotsanijok, ta ika yolchikaualis kijtojkej: “Moneki ke ma tiktakamatikan Totajtsin Dios uan ma amo achto tikintakamatikan in tagayot” (Hech. 5:29). Amo moujkej maski kinuijuitekkej. ¿Keyej? Porin kimatiaj ke Jiova kinpaleuijtoya uan ke kiyolpaktiaya tein kichiujtoyaj. Yejua ika kisentokakej kiteixmatiltijkej iTajtol Dios (Hech. 5:40-42). No ijkon, keman Esteban, akin katka itatojtokakauj Cristo, yaya kimiktitij, semi yolseujtoya ke “kitayaj iixko Esteban keme se ángel” (Hech. 6:12-15). ¿Keyej? Porin kimatia ke Jiova kiyolpaktiaya tein kichiujtoya.

12. Kemej kijtoua 1 Pedro 3:14 uan 4:14, ¿keyej ueli tiyolpakij keman techixnamikij?

¹² Tatitanilmej miak taman kinmatiltiaya ke Jiova kinpaleuijtoya. Yejuatsin kinmakaka chikaualis tein kinpaleuiaya maj kichiuanij “mouiskatekime” (Hech. 5:12-16; 6:8). Axkan Jiova amo techmaka chikaualis tein ika uelis tikchiuaskej “mouiskatekime”. Sayoj ke itech iTajtol techmatiltia ke keman techtajyouiltiskej porin tikchiuaj tein kuali, uelis tiyolpakiskej porin yejuatsin kiyolpaktia tein tikchiuaj uan techpaleuia ika iespíritu (xikonixtajtolti 1 Pedro 3:14). Biblia kijtoua: “Xikpiakan ueyi yolpakilis kuak aksame namechkejkeloske uan namechtejtelchiuaske ika por namotakuautamatilis tech itokaytsin de Cristo. Kuak ijkon mochiuas, ijkuakon namejuan no ximoueyiyolpaktikan porin in [y]ektikatsin [e]spíritu de Dios yetinemi namoyolijtik” (1 Ped. 4:14). Yejua ika, maj amo ika timotekipachojtokan toni tikchiuaskej komo satepan techixnamikij. Okachi kuali, maj tikchiuakan tein techpaleuis maj okachi titakuaujtamatikan ke Jiova uelis techpaleuis uan techmakixtis. Ijkon kemej kichiujkej yekinika itatojtokakauan Jesús, moneki titakuaujtamatiskej itech  nejin tein kijtoj Jesús: “Namechinmaktiliti tajtolme uan tamachilis. Uan ijkon nekes ten namechtauelitstinemij, yejuan nojonkes amo uelis namechtajtolxijxikoske uan amo nouelis namechtajtolixnamikiske”. Uan no kijtoj: “Komo namejuan nankixikojtiyoue nochi nijin tajyouilis, ijkuakon Dios namechmaktilis [...] ne nemilis nachipa” (Luc. 21:12-19). Uan maj amo tikelkauakan ke Jiova senkis kielnamiki keniuj katka se itekitikauj akin momikilij akin amo keman kikauak, uan oksepa kimakas inemilis.

13. ¿Keniuj uelis techpaleuis ininneskayo akin yolijsiujkej uan amo takuaujtamatkej iuan Jiova?

¹³ No uelis techmachtis miak taman tein kichiujkej akin yolijsiujkej uan amo takuaujtamatkej iuan Jiova. Komo timomachtiaj tein kichiujkej techpaleuis maj amo tikchiuakan kemej yejuan. Kemej neskayot, Asá, akin tekiuajtik Judá, takuaujtamatik iuan Jiova keman miakej tateuianij etíopes kinixnamikkej, uan Jiova kinpaleuij maj tataninij (2 Crón. 14:9-12). Satepan, Baasá, akin tekiuajtik Israel, no kinixnamikik. Maski itateuijkauan amo miakej katkaj, Asá amo kitemoj inepaleuil Jiova kemej kichiujka achto, ta kintajtanij akin nemiaj Siria maj kipaleuianij uan kintaxtauij (2 Crón. 16:1-3). Uan keman semi mokokouaya uan yaya momikilitia, amo kitemoj maj Jiova kipaleui (2 Crón. 16:12).

14. ¿Toni techmachtia tein kichiuak Asá?

¹⁴ Yekinika, keman Asá kipiaya kuejmolmej kitemouaya maj Jiova kipaleui. Sayoj ke satepan amo kitemojok inepaleuil, ta iselti kitemoj keniuj kiyektalis ikuejmoluan. Ueliskia se kinemilis ke kuali tein kichiuak Asá keman kintajtanij akin nemiaj Siria maj kipaleuianij. Sayoj ke satepan nejon amo tapaleuij. Jiova kititanik se itanauatijkauj maj kiluiti: “Kemej titakuaujtamatik iuan tekiuaj akin taixyekana Siria uan amo titakuaujtamatik iuan Jiova moDios, itateuijkauan tekiuaj akin taixyekana Siria mitscholuijkejya” (2 Crón. 16:7). Tejuan no moneki timoyekpiaskej. Maj amo tiknemilikan ke toselti uelis tikyektaliskej tokuejmoluan uan amo tiktemoskej nepaleuil tein Jiova techmaka itech iTajtol. Kemansa panos seki taman uan monekis niman tikixejekoskej toni tikchiuaskej. Maski ijkon, kuali kisas tein tikixtaliskej tikchiuaskej komo tiyolseujtokej uan titakuaujtamatij iuan Jiova.

15. ¿Toni uelis tikchiuaskej keman tikixtajtoltiskej Biblia?

¹⁵ 4) Xionmomamachti tajkuilolmej itech Biblia kemej mokauas itech motanemilil. Keman tikonixtajtoltis itech Biblia seki tajkuilolmej tein kinextiaj ke se yolseujtos uan se takuaujtamatis iuan Jiova temaka chikaualis, xionmochikaua maj mokauakan itech motanemilil. Xa mitsonpaleuis maj mokaua itech motanemilil komo tikonixtajtoltia kemej timotenkakis oso komo tikonijkuiloua uan satepan oksepa tikonixtajtoltia. Jiova kinauatij Josué maj kiixtajtoltiani iTajtol uan maj itech tanemiliani tonayan uan youak porin nejon kipaleuiskia maj kichiuani teisa ika tamatilis. Tein kiixtajtoltiskia no kipaleuiskia maj amo mouini, ta maj kipiani yolchikaualis tein kipaleuiskia maj kiixyekanani ixolal Dios (Jos. 1:8, 9). Itech iTajtol Dios, tikajsiskej miak tajkuilolmej tein uelis techpaleuiskej maj tiyolseujtokan keman tikpanoskej seki taman tein ueliskia kichiuas maj timouikan oso maj timotekipachokan (Sal. 27:1-3; Prov. 3:25, 26).

16. ¿Keniuj techpaleuia Jiova inintechkopa tokniuan maj tiyolseujtokan uan maj iuan titakuaujtamatikan?

¹⁶ 5) Xionmosentili iniuan tokniuan. Jiova techpaleuia inintechkopa tokniuan maj tiyolseujtokan uan maj iuan titakuaujtamatikan. Keman tiouij nechikolmej, semi techpaleuia tamachtilis tein motemaka taixpan, tanankililmej tein motemakaj uan keman titajtouaj iniuan tokniuan (Heb. 10:24, 25). No uelis semi techyolchikauas komo tiktapouiaj se tokniuj  akin kuali iuan timouikaj toni techtekipachoua. Keman se akin kuali iuan timouikaj techiluia “se kuali tajtol” uelis semi techyolchikauas uan techpaleuis maj amo semi timotekipachokanok (Prov. 12:25).

17. Kemej kijtoua Hebreos 6:19, ¿keniuj tein tikchiaj maj kichiua iTekiuajyo Dios techpaleuia maj titaxikokan maski tikpiaskej ouijkayomej?

¹⁷ 6) Nochipa xikonelnamiki nechialis tein tikpiaj. Tein tikchiaj maj kichiua iTekiuajyo Dios techpaleuia maj titaxikokan maski tikpiaskej ouijkayomej uan netekipacholis, “keme se tepos ancla kitsajtsakuilijtok in barco para ma amo eliuis yetinemi” (xikonixtajtolti Hebreos 6:19). Itech xiontanemili ke Jiova kijtoua ke satepan amo teyi techtekipachosok (Is. 65:17). Xikonnemili ke tionyetoka itech Xochital, kampa onkas yolseuilis uan amo mochiuasok tein amo kuali (Miq. 4:4). Komo tikontapouia oksekin ke tikonchia nejin no mitsonpaleuis nochipa xikonelnamikto. Yejua ika, xionmochikaua nochipa tiontanojnotsas uan tikonpaleuis oksekin maj mochiuakan itatojtokakauan Cristo. Komo tikonchiua, okachi tiontakuaujtamatis ke tikonselis tein tikonchia (Heb. 6:11).

18. ¿Toni uelis panos satepan, uan toni techpaleuis maj titaxikokan?

¹⁸ Kemej okachi motokia itamilis tein mochiujtok itech nejin taltikpak, tikpiaskej okachi ouijkayomej tein uelis kichiuas maj semi timotekipachokan. Tajkuilol itech xiuit 2021 techelnamiktia ke uelis titaxikoskej keman tikpiaskej ouijkayomej uan tiyolseujtoskej komo titakuaujtamatij iuan Jiova uan amo tiktemouaj toselti tikyektaliskej se ouijkayot. Itech nejin xiuit, maj tinochin tiknextikan ika tein tikchiuaj ke titakuaujtamatij itech nejin itajtoluan Jiova: “Nankipiaskej chikaualis komo nanyolseujtokej uan komo nantakuaujtamatij” (Is. 30:15).