1. Maski namikuanij yolpakij keman monamiktiaj, ¿toni uelis kichiaskej? (Xikonita taixkopin ipeujyan tamachtilis.)

NETASOJTALIS tein mopialiaj se takat uan siuat mochikaujtiuj, uan yejua ika kiixtaliaj monamiktiskej. Keman ejko nejon tonal uan takat kiita siuat, nochin omen tel yolpakij. Ijkuak, motenkauaj ke nochipa motasojtaskej. Sayoj ke, satepan ke monamiktiskej, monekis kipataskej seki taman tein kinpaleuis maj kisentokakan kuali mouikakan. Jiova kiixtalij nemilis kemej namikuanij, uan yejuatsin kineki maj nochin namikuanij yolpakikan. Yejua ika kinmaka kuali tayolmajxitilis itech Biblia (Prov. 18:22). Maski ijkon, tinochin titajtakouanij. Yejua ika Biblia kijtoua ke akin monamiktiskej “kipiaske ouijkayot” (1 Cor. 7:28). ¿Toni kinpaleuis tokniuan namikuanij maj amo kipiakan miak ouijkayomej? ¿Uan toni uelis kichiuaskej tein kinpaleuis maj nochipa yolpakikan?

2. ¿Toni tataman netasojtalis moneki monextiliskej namikuanij?

 ² Biblia tamachtia ke netasojtalis se kualneskayot tein motelneki. Sayoj ke onkak tataman netasojtalis tein namikuanij moneki monextiliskej. Kemej neskayot, moneki monextiliskej netasojtalis tein mopialiaj tasojiknimej uan netasojtalis tein mopialiaj se takat uan se siuat. Uan komo kinpiaj konemej, okachi moneki monextiliskej netasojtalis kemej kalyetouanij. Sayoj ke tein okachi kinpaleuis namikuanij maj yolpakikan yejua netasojtalis kemej Cristo technextilij. Tatitanil Pablo ijkon kimelauak nejin taman netasojtalis: “Cada se teyokich moneki kitasojtas isiuau ijkon keme in teyokich mopialitinemi yejua mismo ika ne yek tetasojtalis. Ika ya nojon cada se tesiuau moneki ma momouiskauika iuan iyokich” (Efes. 5:33).

3. ¿Keniuj moneki monextiliskej namikuanij ke motasojtaj?

³ Pablo kijkuiloj: “Nanteyokichuan, moneki xikintasojtatiyakan namosiuauan ijkon keme Totekotsin Cristo [...] kinteltasojtak nochi itaneltokakauan hasta motemaktij ma kimiktikan” (Efes. 5:25). Axkan tokniuan kichiuaj kemej Jesús keman motasojtaj ijkon kemej yejua kintasojtak imomachtijkauan (xikonixtajtolti Juan 13:34, 35; 15:12, 13). Tokniuan namikuanij moneki moteltasojtaskej hasta motemakaskej ika momikiliskej ininnamik. Sayoj ke keman onkak uejueyi kuejmolmej, sekin xa kinemiliskej ke amo semi motasojtaj. ¿Toni uelis kinpaleuis? Netasojtalis kemej Cristo technextilij. ¿Keyej? Porin nejin netasojtalis “kixikojtiu nochi miak tataman tajyouilisme”, “kineltokatinemi sayo ten kuali” uan “kiyolikachixtinemi Dios itanejnekilis, uan nachipa kijyouijtinemi tataman ouijkayome. Uan in tetasojtalis, yejua ne amo keman [tami]” (1 Cor. 13:7, 8). Namikuanij moneki kielnamikiskej ke motenkaujkej motasojtaskej uan nochipa senyetoskej. Nejin kinolinis maj kitemokan inepaleuil Jiova uan maj kisenyektalikan tein yeski kuejmol.

4, 5. 1) ¿Toni tekit kipia takat? 2) ¿Toni tanemilil moneki kipias siuat? 3) ¿Toni monekik kipataskej seki namikuanij?

⁴ Pablo kimelauak toni tekit kipiaj takat uan siuat namikuanij: “Tesiuauan, moneki ximotekauilikan ma namechyekanakan namoyokichuan, ijkon keme namotekauiliaj ma namechyekana Totekotsin Cristo. Porin teyokich ma kiyekantinemi isiuau ijkon keme Cristo kinyekantinemi itaneltokakauan” (Efes. 5:22, 23). Takat moneki kinextis netasojtalis ijkon kemej Jesús, akin “kinyekantinemi itaneltokakauan”. Siuat amo kinemilia ke tanauatil tein kipia takat kichiua maj moita ke yejua amo teyi chiujkej. Jiova kijtoj ke siuat kipia se tekit tein kitelpia ipatiuj. Yejuatsin kijtoj: “Amo kuali yetok maj takat kisentoka iselti. Nikchijchiuiliti se itapaleuijkauj, kemej itamajsikayo” (Gén. 2:18). Siuat moneki kipaleuis itakauj maj kuali taixyekana. Keman takat kinextia netasojtalis kemej Jesús, siuat okachi kuali momachilia. Uan no, okachi amo kiouijmaka kipoujkaitas itakauj uan kipaleuis keman taixpejpenas.

⁵ Se tokniuj akin monotsa Cathy kijtoua: “Keman ayamo nimonamiktiaya, noselti  nimoitaya uan nimoyekpiaya. Sayoj ke, keman nimonamiktij, monekik peuas niktajtanis nonamik maj nechpaleui”. Yejua kijtoua ke kemansa kiouijmakani, sayoj ke kichiuas nochi kemej Jiova kijtoua kinpaleuiani maj okachi kuali mouikakan. ^[1] Inamik, akin monotsa Fred, kijtoua: “Nochipa ouij nechkisani nitaixpejpenas. Uan kemej namikuanij okachi ouij, porin moneki se tanemilis itech omen. Sayoj ke ijkon kemej panouaj tonalmej okachi amo ouij nechkisaok, porin niktajtania Jiova maj nechpaleui uan nikaki ika nejmachkayot tein nonamik kinemilia. Nikita ke yekmelauj timosenpaleuiaj”.

6. ¿Keyej netasojtalis ‘kinsepanpoualtia’ namikuanij keman kipiaj kuejmolmej?

⁶ ¿Toni kinpaleuis namikuanij maj nochipa kuali mouikakan? Biblia kijtoua: “Ximoijyouilijtiyakan se uan okse in tataman de namotamachilisuan. Uan no ximotapojpoluijtiyakan”. Kemej takat uan siuat tajtakouanij, mopoloskej uan kipiaskej kuejmolmej. Sayoj ke nejin uelis kinpaleuis maj amo oksepaok kichiuakan, maj motapojpoluikan uan maj kisentokakan monextilikan netasojtalis kemej Cristo technextilij, porin nejin netasojtalis ‘kinsepanpoualtia se uan okse’ (Col. 3:13, 14). Namikuanij uelis monextiliskej nejin netasojtalis keman amo yolijsiuiskej uan yeskij kualtakamej, uan keman amo moelnamikiliskej ininnepololuan (1 Cor. 13:4, 5). Moneki mochikauaskej niman kiyektaliskej tein yeski kuejmol, achto ke tamis tonal (Efes. 4:26, 27). Komo se yolyemanik uan se yolchikauak uelis se kijtos: “Xinechtapojpolui porin nimitsyolxokolij”. Nejon kinpaleuia namikuanij maj kiyektalikan kuejmolmej uan maj okachi kuali mouikakan.

7, 8. 1) ¿Toni tayolmajxitilismej kitemaka Biblia keman namikuanij mosentekaj? 2) ¿Keyej namikuanij moneki monextiliskej netasojtalis?

⁷ Biblia kinmaka namikuanij kuali tayolmajxitilis tein kinpaleuia maj kipiakan se kuali tanemilil keman mosentekaskej (xikonixtajtolti 1 Corintios 7:3-5). Motelneki maj takat uan siuat itech tanemili keniuj momachilia inamik uan tein kipoloua. Komo takat amo kinextilia netasojtalis inamik, yejua xa kiouijmakas yolpakis keman mosentekaskej. Biblia kiluia takat maj kipia “chipaukatamachilis”, oso maj kiajsikamati inamik (1 Ped. 3:7). Takat moneki amo keman kiteliluis nion kichikaujkauis inamik maj iuan moteka, ta nochin omen moneki kinekiskej. Miakpa, takat yejua akin okachi kineki motekas iuan inamik. Sayoj ke moneki mosentekaskej keman omen kuali momachiliskej.

⁸ Maski Biblia amo kitemaka tanauatilmej tein senkis kijtoua keniuj namikuanij moneki monextiliskej netasojtalis keman mosentekaj, kemaj ika tajtoua seki taman tein uelis kichiuaskej (Cant. de Cant. 1:2;  2:6). Kemej tikitaj, tokniuan namikuanij moneki monextiliskej ke motasojtaj.

9. ¿Keyej tel amo kuali maj se kinexti ke se kiixuelita aksa akin amo se inamik?

⁹ Sekin kijtakouanij ininkuali uikalis kemej namikuanij oso senkis mokauanij porin kiitayaj auilnemilis oso kiixuelitakej okse. Nejin tel amo kuali maj se kichiua, uan moneki senkis timoijkuaniliskej tein yeski tanemilil tein amo kuali. Komo tikteltasojtaj Jiova uan oksekin, amo tikauaskej maj nion teyi uan nion akin kijtako tokuali uikalis kemej namikuanij. Moneki amo tikchiuaskej nion teyi tein kinextis ke tikixuelitaj aksa akin amo tonamik, porin nejon kinextiskia ke amo titetasojtaj. Maj tikelnamikikan ke Dios kimati nochi tein tiknemiliaj uan tein tikchiuaj. Ijkon okachi tiknekiskej tikyolpaktiskej uan amo tiknekiskej tikajkayauaskej tonamik (xikonixtajtolti Mateo 5:27, 28; Hebreos 4:13).

10, 11. 1) ¿Kanachi namikuanij kitsayanaj amat ininixpan tekiuanij? 2) ¿Toni kijtoua Biblia keman namikuanij kinekij mokauaskej? 3) ¿Toni kinpaleuis namikuanij maj amo kiitakan kemej auil mokauaskej?

¹⁰ Seki namikuanij kinemiliaj mokauaskej oso kitsayanaskej amat ininixpan tekiuanij keman amo ueli kiyektaliaj uejueyi kuejmolmej. Itech seki altepemej, panoua tajko namikuanij kitsayanaj amat ininixpan tekiuanij. Melauak ke nejin amo semi kichiuaj itaixpantijkauan Jiova. Sayoj ke axkan okachi miakej tokniuan namikuanij kipiaj uejueyi kuejmolmej.

¹¹ Biblia kijtoua: “Tesiuau ma amo mosekokaua de iyokich. [...] Uan takan in siuat moyokichkauas [...]: Ma amo monamikti iuan okse tagat, oso ma oksepa moyoltalij uan ma sen yetinemiti iuan ne achto iyokich. Uan no ijkon namechyeknajnauatia ijkuin ke in teyokich ma amo kisekokaua ne isiuau” (1 Cor. 7:10, 11). Seki namikuanij xa kinemiliskej ke kemej kipiaj uejueyi kuejmolmej moneki mokauaskej. Sayoj ke Jesús kinextij ke nejin amo auil. Yejua kijtoj tajtolmej tein Dios kijtojka kemej moneki nemiskej namikuanij uan satepan kitamajxitij: “Tagat uan in siuat ten Dios kinsentalis namikuani ya, yejuan nojonkes ma amo se tagat kinxexelos” (Mat. 19:3-6; Gén. 2:24). Senkis moita ke Jiova kineki maj namikuanij senyetokan (1 Cor. 7:39). Tinochin moneki tikelnamikiskej ke Jiova techtajtanis maj titanankilikan ika tein tikchiuaskej. Nejin techpaleuis maj niman tikyektalikan kuejmolmej, achto ke okachi uejueyiaskej.

12. ¿Keyej seki namikuanij uelis kinemiliskej mokauaskej?

¹² ¿Keyej seki namikuanij kipiaj uejueyi kuejmolmej? Sekin amo kuali momachiliaj oso kualanij porin amo mochiuak tein kichiayaj. Miakpa kipiaj kuejmolmej porin tataman kiniskaltijkej oso tataman kemej sejse momachilia. Kemansa kipiaj kuejmolmej ika ininchankauan, tomin oso kemej kiniskaltiaj konemej. Sayoj ke semi kuali se kiitas ke miakej tokniuan  namikuanij ueli kiyektaliaj kuejmolmej tein kipiaj porin mokauaj maj Dios kinixyekana.

13. ¿Kemanian namikuanij uelis mokauaskej?

¹³ Namikuanij uelis mokauaskej sayoj komo panoua nejin: komo takat tel amo kineki kinixpanoltis ichankauan, komo semej namikuanij kintelteuia ichankauan oso komo tel amo kinkaua maj kiueyichiuakan Dios. Keman namikuanij kipiaj uejueyi kuejmolmej, moneki kintajtaniskej tayekananij maj kinpaleuikan. Nejin tokniuan kipiaj miak taixmatilis uan uelis kinpaleuiskej maj kichiuakan tein Dios tayolmajxitia. Komo namikuanij kitajtaniaj Jiova iyektikatsin espíritu, uelis kitakamatiskej tein Biblia tayolmajxitia uan kinextiskej ikualneskayouan Cristo (Gál. 5:22, 23). ^[2]

14. ¿Toni kiniluia Biblia tokniuan akin ininnamik amo itaixpantijkauj Jiova?

¹⁴ Biblia kinextia keyej namikuanij moneki amo mokauaskej nion ijkuak semej amo kiueyichiua Jiova (xikonixtajtolti 1 Corintios 7:12-14). Akin amo itaixpantijkauj Jiova kemej yeskia “kiyolpaktijtinemi uan kitekitilijtok Dios” porin inamik kitekitilia Jiova. Uan ininkonetsitsin “yolchipauke iixpantsin Dios”, yejua ika yejuatsin kinmatampauia. Pablo kiniluij tokniuan: “Siuat taneltokake, ¿keniu uelis tikmakixtis moyokich ten amo taneltokakke, komo amo nachipa nansenyetoske? Uan tejua tagat taneltokakke, ¿keniu no uelis tikmakixtis mosiuau ten amo taneltokakke komo amo nachipa nansenyetoske?” (1 Cor. 7:16). Miakej tokniuan kinpaleuianij ininnamik maj mochiuakan itaixpantijkauan Jiova.

15, 16. 1) ¿Toni Biblia kiyolmajxitia siuat akin inamik amo kitekitilia Jiova? 2) ¿Toni amo uelis kichiuas tokniuj komo inamik akin amo kitekitilia Jiova kikaua?

¹⁵ Tatitanil Pedro kinyolmajxitia tokniuan  siuamej maj kinpoujkaitakan ininnamik. Yejua kijtoua keyej: “Takan sekin namoyokichuan amo kitakamatij in Tajtoltsin de Dios, ijkuakon namejuan nantesiuauan nankintaneltoktiske namoyokichuan ika namochipaukanemilis uan amo monekis xikinnojnotstokan. Uan kuak namoyokichuan ten amo taneltokani kitaske ke namejuan nanchipaukanemij uan ke nantatakamatinemij, ijkuakon yejuan kineltokaske in Tajtoltsin de Dios”. Tokniuj siuat moneki maj “yolyemankanentinemi uan yolseutinemi”, porin nejin “Dios kipoua semi kachi kipia ipatiu” (1 Ped. 3:1-4). Komo se tokniuj siuat kitakamati nejin tayolmajxitilis, okachi kipaleuis inamik maj mochiua itaixpantijkauj Jiova uan amo komo nochipa kitapouijtok tein kineltoka.

¹⁶ Sayoj ke ¿toni panoua komo akin amo itaixpantijkauj Jiova kikaua inamik? Biblia kijtoua: “Teyokich oso in tesiuau ten amo taneltokani, takan yejuan kinekij mosesekokauaske, ijkuakon ma mokakauakan [...]. Uan komo ijkon kichiuaj nekes ten amo taneltokani, ijkuakon in tagat oso siuat taneltokani ten mokakauke ya, yejuan nojonkes Dios kinpouas tasesekokaualme ya. Porin Totajtsin Dios technotsak de ke ma tinentinemikan ika se [yolseujkanemilis]” (1 Cor. 7:15). Nejin amo kijtosneki ke tokniuj uelis oksepa monamiktis. Kijtosneki ke moneki amo kiteltsakuilis inamik maj kisentoka iuan. Keman mokauaskej xa onkas tepitsin yolseuilis kalijtik. Satepan, inamik tokniuj uelis oksepa mokepas iuan, uan hasta uelis mochiuas itaixpantijkauj Jiova.

17. ¿Toni okachi moneki kitayekanaltiskej tokniuan namikuanij?

¹⁷ Kemej tinemij itech itamian tonalmej, timoajsij itech tonalmej tein tel ouijkej (2 Tim. 3:1-5). Yejua ika moneki kuali timouikaskej iuan Jiova porin nejon techmatampauia. Pablo kijtoj: “Amo uejkauas ok uan moualuikas Cristo”. Ompa kijtoj ke “nochi nekes taneltokani ten namikuani ya, yejuan nojonkes moneki ma nentinemikan keme amo namikuani”. Uan no kijtoj ke akin “moixpanoltijtokke ika ten ongak nikan taltikpak, yejuan nojonkes ma yetinemikan keme yeskia amo teyi kitstinemij de ongak nikan taltikpak” (1 Cor. 7:29-31). Pablo amo kijtosnekik ke tokniuj akin kipia inamik moneki kisenkauas inamik. Sayoj ke kemej tinemij itech itamian tonalmej, okachi moneki tiktayekanaltiskej tiktekitiliskej Jiova (Mat. 6:33).

18. ¿Toni uelis kinpaleuis namikuanij maj nochipa yolpakikan?

¹⁸ Itech nejin tonalmej tein semi ouijkej, miakej namikuanij mokakauaj. ¿Toni uelis kinpaleuis namikuanij maj nochipa yolpakikan? Komo amo kikauaj Jiova uan ixolal, komo kitakamatij tein Biblia tayolmajxitia uan kikauaj maj kinyekana iyektikatsin espíritu Dios. Ijkon kinextiskej ke kipoujkaitaj “ten Dios kinsentilij namikuani ya” (Mar. 10:9).