1. ¿Toni moneki tikchiuaskej para maj yekmelauj tiyolpakikan uan keyej? (Isaías 48:​17, 18).

 TOTAJTSIN Jehová semi techtasojta uan kineki maj tiyolpakikan axkan uan satepan (Ecl. 3:​12, 13). Yejua techchijchiuak kemej uelis tikchiuaskej miak taman. Sayoj ke amo techchijchiuak kemej uelis timoixyekanaskej tejuan toselti nion no maj tikixtalikan toni kuali yetok uan toni amo (Ecl. 8:9; Jer. 10:23). Jehová kimati ke yekmelauj tiyolpakiskej sayoj komo tiktekitiliaj uan tiktakamatij (xikonlero Isaías 48:​17, 18).

2. ¿Toni kineki Satanás maj tiknemilikan, sayoj ke toni kichiuani Jehová?

² Satanás kineki maj tiknemilikan ke uelis tiyolpakiskej maski amo tiktekitiliskej Jehová uan ke uelis timoixyekanaskej toselti (Gén. 3:​4, 5). Jehová kinkauak maj akin nemij nikan taltikpak moixyekanakan ininselti se tiempo para ijkon kinextis ke tein kijtoj Satanás amo melauj katka. Uan ika nochi tein amo kuali tein panotok moita ke amo ueli timoixyekanaj toselti. Sayoj ke itech Biblia ininka tajtoua miakej takamej uan siuamej akin semi yolpakkej porin kitekitilijkej Jehová, uan semej akin okachi yolpakik yejua Jesucristo. Yejua ika, maj tikitakan seki taman keyej Jesús kiixtalij kitekitilis iTajtsin. Satepan tikitaskej keyej kinamiki maj tikueyitalikan Jehová. Uan no, tikelnamikiskej seki taman keyej tikixtalijkej tiktekitiliskej.

KEYEJ JESÚS KIIXTALIJ KITEKITILIS JEHOVÁ

3. ¿Toni Satanás kinekia kimakas Jesús, sayoj ke toni kiixtalij Jesús kichiuas?

³ Keman yetoya nikan taltikpak Jesús monekik kiixtalis akoni kitekitiliskia. Tepitsin satepan ke moauij, Satanás  kiluij ke kimakaskia nochin uejueyi altepemej komo kiueyichiuaskia maski sayoj sepa. Sayoj ke Jesús kinankilij: “¡Xiouj Satanás! Porin ijkuiliujtok: ‘Xikueyichiua moDios Jehová, uan sayoj yejua xiktekitili’” (Mat. 4:​8-10). ¿Keyej Jesús kiixtalij kichiuas nejon? Maj tikitakan seki taman.

4, 5. ¿Keyej Jesús kiixtalij kitekitilis Jehová?

⁴ Jesús semi kitasojta iTajtsin, yejua ika kiixtalij kitekitilis uan amo kichiuak porin kinekia maj kimaka teisa (Juan 14:31). Uan no, Jesús kitekitilia Jehová porin kimati ke kinamiki maj ijkon kichiua (Juan 8:​28, 29; Apoc. 4:11). Kimati ke Jehová kichiuak maj tinemikan, techmaka miak taman tein kuali uan ueli iuan titakuaujtamatij (Sal. 33:4; 36:9; Sant. 1:17). Jehová nochipa kiluij Jesús tein melauak uan nochi tein Jesús kipiaya kimakaka iTajtsin (Juan 1:14). Sayoj ke Satanás amo kemej Jehová. Satanás kichiuak maj timotajtakolmakakan uan maj timomikilikan, yejua takajkayaua, tenexikoluia uan moueyineki (Juan 8:44). Kemej Jesús kuali kiixmati Satanás, amo keman kinemilia kichiuas kemej yejua uan nion no kiixnamikis Jehová (Filip. 2:​5-8).

⁵ Jesús no kiixtalij kitekitilis Jehová porin kimatia ke ueliskia mochiuas miak taman tein kuali komo yejua amo kikauaya (Heb. 12:2). Kimatia ke komo taxikouaya kiueyitaliskia itokay iTajtsin uan ueliskia kichiuas maj amo titajtakolejkejok nion maj timomikilikanok.

KEYEJ KINAMIKI JEHOVÁ MAJ TIKUEYICHIUAKAN

6, 7. ¿Keyej miakej amo kitekitiliaj Jehová? ¿Keyej kinamiki maj tikueyichiuakan Jehová?

⁶ Axkan miakej amo kitekitiliaj Jehová porin amo kiixmatij. Amo kimatij ke yejua kinextia miak taman tein kualtsin uan amo no kimatij nochi tein kichiuani para kinpaleuis. Tamatij kemej akin Pablo kinnojnotsak ompa Atenas, akin amo no kiixmatiaj Dios (Hech. 17:​19, 20, 30, 34).

⁷ Pablo kiniluij ke Dios akin melauak “kichiua maj tinochin tiyoltokan, maj timijyotikan uan techmaka nochi”. No kijtoj ke kichiua “maj timoolinikan uan maj tinemikan”. Uan no kiniluij ke “itechkopa sayoj se takat techchijchiuak tinochin”. Yejua ika kemej Jehová techchijchiuak, sayoj yejua kinamiki maj tikueyichiuakan (Hech. 17:​25, 26, 28).

8. ¿Toni amo keman kichiuaskia Jehová uan keniuj technextilia ke semi techtasojta?

⁸ Kemej Jehová tachijchiuak uan taixyekana ueliskia kichiuas tein kinekis uan techchikaujkauis maj tiktekitilikan. Sayoj ke yejua amo keman kichiuaskia nejon. Ta kineki maj tel miakej yolpakikan uan maj kualtsin iuan mouikakan nochipaya (1 Tim. 2:​3, 4). Miak taman tein Jehová kichiuani kinextia ke yekmelauj nemi oso yoltok uan ke semi techtasojta. Yejua ika technextilia keniuj tikinmachtiskej oksekin tein kuali tein kichiuas uan no keniuj kichiuas (Mat. 10:​11-13; 28:​19, 20). Uan no, Jehová kiixtaliani nechikolmej kampa ueli tikueyichiuaj uan kintaliani tayekananij akin tetasojtaj para techpaleuiskej (Hech. 20:28).

9. ¿Keniuj Jehová kinextia ke kintasojta nochin?

⁹ Miakej amo kineltokaj ke Jehová yoltok, maski ijkon yejua kinextia ke kintasojta keman kinmaka miak taman tein kuali. Miak xiujmejya tel miakej kichiuanij tein yejuan kinemiliaj ke kuali yetok uan tein amo uan amo kitakamatij Jehová. Sayoj ke, kemej yejua tel yolkuali kinmaka nochi tein kinpoloua para  nemiskej uan para maj yolpakikan (Mat. 5:​44, 45; Hech. 14:​16, 17). Dios kichiuani maj ueli kipiakan akoni kuali iuan mouikaskej, ininchankauan, maj ueli kipiakan konemej, maj ueli tekitikan uan maj yolpakikan (Sal. 127:3; Ecl. 2:24). Ika nochi tein kichiuani moyekita ke Jehová kintasojta nochin (Éx. 34:6). Axkan maj tikitakan seki taman keyej tejuan tikixtalianij tiktekitiliskej uan keniuj techtatiochiuiani.

KEYEJ TIKIXTALIJKEJ TIKTEKITILISKEJ JEHOVÁ

10. 1) ¿Keyej tiktekitiliaj Jehová? (Mateo 22:37). 2) ¿Keniuj mitsonpaleuiani tikonmatis ke Jehová mitsontapojpoluia? (Salmo 103:​13, 14).

¹⁰ Ijkon kemej Jesús, tejuan no tikixtaliaj tiktekitiliskej Dios porin tiktasojtaj ika nochi toyolo (xikonlero Mateo 22:37). Keman okachi tikixmatij Jehová okachi iuan timotokiaj porin tikitaj ke yolkuali. No tikitaj ke kineki techtapojpoluis. Keman israelitas amo kitakamatiaj, yejua kintataujtiaya maj amo kichiuakanok tein amo kuali uan maj iuan mokepakan (Jer. 18:11). Jehová kielnamiki ke titajtakolejkej (xikonlero Salmo 103:​13, 14). Keman tikelnamikij kanachpa Jehová techtapojpoluiani, techpaleuia maj tiknejnekikan tiktekitiliskej nochipaya.

11. ¿Keyej no tikixtaliaj tiktekitiliskej toTajtsin?

¹¹ No tiktekitiliaj Jehová porin yejua tein kinamiki maj tikchiuakan (Mat. 4:10). Uan no, tikmatij ke komo amo tikauaj Jehová: tikueyitaliskej itokay, tiknextiskej ke Satanás takajkayaua uan tikyolpaktiskej toTajtsin. Komo axkan tikixtaliaj tiktekitiliskej Jehová, tikmatij ke uelis tiktekitiliskej nochipaya (Juan 17:3).

12, 13. ¿Toni technextilia tein kinpanok Jane uan Pam?

¹² Maski titelpochmejok oso tiichpochmejok, uelis tiktasojtaskej Jehová uan ijkon kemej panoskej xiujmej okachi tiktasojtaskej. Yejua nejon tein kinpanok ome tokniuan siuamej akin monotsaj Jane uan Pam. a Jane kipiaya 11 xiujmej uan Pam kipiaya 10 xiujmej keman peuak momachtiaj Biblia. Maski inintatuan amo kinekkej momachtiskej Biblia, kinkaujkej ininsiuapipiluan maj momachtikan iniuan itaixpantijkauan Jehová, sayoj ke kiniluijkej ke no monekia yaskej tiopan iniuan ininchankauan. Jane kijtoua: “Tein nechmachtijkej itaixpantijkauan Jehová ika Biblia, nechpaleuij maj amo nikui drogas uan maj amo niauilnemi ijkon kemej kichiuayaj akin iniuan nimomachtiaya itech escuela”.

¹³ Seki xiujmej satepan Jane uan Pam peuak tanojnotsaj. Satepan mochiujkej precursoras uan no kinyekpiayaj inintatuan akin xiuejkejya katkaj. Keman Jane kielnamiki nochi tein Jehová kichiuani para kipaleuis, kijtoua: “Nikitani keniuj Jehová kinyekpiani akin kitekitiliaj porin kemej kijtoua 2 Timoteo 2:19 yejua ‘kinixmati akin iaxkauan’”. Ueli tikitaj keniuj Jehová nochipa kinyekpia akin kiixtaliaj kitasojtaskej uan kitekitiliskej.

14. Komo kijijtouaj Jehová, ¿toni uelis tikchiuaskej? (No xikonita taixkopimej).

¹⁴ Tiknekij maj oksekin kimatikan ke tein amo kuali tein kijtouiliaj Jehová amo melauj. Xikonnemili ke aksa akin kuali iuan tionmouika yolkuali, kiuelita kitemakas tein kipia uan kuali kimati keniuj tionmomachilia, sayoj ke se tonal  tikonkaki ke kijtouiliaj ke amo yolkuali uan takajkayaua. ¿Toni tikonchiuaskia? ¿Melauj ke tikontajtouiskia? No ijkon, keman tikakij ke kijtouiliaj Jehová tein amo melauj, tiktajtouiaj uan tikijtouaj keniuj yekmelauj tamati (Sal. 34:1; Is. 43:10). Ika tein tikijtouaj uan tein tikchiuaj tiknextiaj ke tikixtalijkejya tiktasojtaskej Jehová uan tiktekitiliskej.

15. Satepan ke tatitanil Pablo kikauak seki taman, ¿toni tein kuali kiselij? (Filipenses 3:​7, 8).

¹⁵ Para tikyolpaktiskej Jehová uan para okachi tiktekitiliskej, tikauaj seki taman tein timomattoyaj tikchiuaskej. Ijkon kichiuak tatitanil Pablo akin taixyekanaya itech inintaneltokalis judíos, yejua kikauak itaneltokalis para ueliskia kitojtokas Cristo uan kitekitilis Jehová (Gál. 1:14). Kemej kichiuak nejon, kipanok miak taman tein kuali keman kitekitilij Jehová uan amo uejkaua taixyekanas iuan Cristo ompa iluikak. Pablo nochipa yolpakik porin kiixtalij kitekitilis Jehová, uan komo tejuan no tikixtaliaj tiktekitiliskej, no semi tiyolpakiskej (xikonlero Filipenses 3:​7, 8).

16. ¿Toni technextilia tein kichiuak Julia? (No xikonita taixkopimej).

¹⁶ Komo tikixtaliaj okachi tiktekitiliskej Jehová, yejua techmakas miak taman tein kuali axkan uan satepan. Maj tikitakan tein kichiuak se tokniuj siuat akin monotsa Julia. Keman siuapilok katka cantarouaya tiopan. Kemej kuali cantarouaya peuak kimachtiaj keniuj okachi kuali kichiuas. Niman peuak miakkan kiixmatij uan peuak cantaroua kampa miakej mosentiliayaj. Se tonal itech escuela se akin iuan momachtiaya, peuak kinojnotsa de Dios uan kiluij ke itokay yejua Jehová. Satepan, Julia peuak momachtia Biblia ojpa itech semana. Panok  tiempo uan kiixtalij kitekitilis Jehová uan amook cantaros. Semi ouij tein kiixtalij kichiuas. Yejua kijtoua: “Miakej nechiluiayaj ke nenkaj kualtsin nicantarouaya, sayoj ke nejua niknekia niktekitilis Jehová”. Axkan ke panokya 30 xiujmej, ¿toni kinemilia Julia ika tein kiixtalij kichiuas? Yejua kijtoua: “Semi niyolpaki uan nikyekmati ke itech xochital uelis nikchiuas nochi tein nikyolnejneki ijkon kemej Dios motenkauani” (Sal. 145:16).

XIKONSENTOKA XIKONTEKITILI JEHOVÁ

17. Kemej amo uejkaua tatamitiya, ¿toni kijtosneki nejon para akin kitekitiliaj Jehová uan para akin ayamo kitekitiliaj?

¹⁷ Amo uejkaua tamitiya nochi tein amo kuali tein mochiujtok itech taltikpak. Tatitanil Pablo kijkuiloj: “Porin ‘semi amo uejkaua’, ‘ejkos akin ualati, uan amo motajkajtilis’” (Heb. 10:37). ¿Keniuj techpaleuia maj tikmatikan nejin? Yekinika, akin ayamo kitekitiliaj Jehová amo kipiajok miak tonalmej para kiixtaliskej kitekitiliskej, yejua ika moneki moijsiuiliskej (1 Cor. 7:29). Uan ojpatika, komo tejuan tikixtalijkejya tiktekitiliskej Dios, tikmatij ke ouijkayomej tein tikpanouaj amo uejkauaskejok.

18. ¿Toni kinekij Jehová uan Jesús maj tikchiuakan?

¹⁸ Jesús kiniluij oksekin maj mochiuakan imomachtijkauan uan maj nochipa kitojtokakan (Mat. 16:24). Yejua ika komo miak xiujmejya tiktekitilijtokej Jehová, maj tiksentokakan ijkon tikchiuakan.  Maski kemansa ouij yeski moneki timochikauaskej para tiksentokaskej tiktekitilijtoskej. Komo ijkon tikchiuaj tiyolpakiskej axkan uan Jehová semi techtatiochiuis (Sal. 35:27).

19. ¿Toni technextilia tein kipanok Gene?

¹⁹ Sekin kinemiliaj ke komo kitekitiliaj Jehová amo yolpakiskej porin amo uelis kichiuaskej miak taman tein kiuelitaskiaj. Komo titelpoch oso tiichpoch, ¿tiknemilia ke semi ouij tiktekitilis Jehová? Se telpoch akin monotsa Gene kijtoua: “Niknemiliaya ke amo ueliaok nimoixpetaniaya porin katka niitaixpantijkauj Jehová. Nikitaya ke miakej telpochmej akin iniuan nimoskaltijka, semi yolpakiaj porin yayaj iluimej, kisayaj iniuan siuapipil oso moixpetaniayaj ika videojuegos kampa nesia ke moteuijtokej, sayoj ke nejua monekia nias nechikolmej uan nitanojnotsatiuj”. ¿Toni kipanok Gene porin ijkon tanemiliaya? Yejua kijtoua: “Peuak nikchiua seki taman tein amo kuali tein kichiuayaj oksekin telpochmej, sayoj ke amo niyolpakia. Yejua ika peuak nikelnamiki tein kijtoua Biblia uan keniuj nechpaleuiskia komo niktakamatia uan nikixtalij niktekitilis Jehová ika nochi noyolo. Desde ijkuak, nikitani keniuj Jehová nechnankilia keman niktataujtia”.

20. ¿Toni moneki tikixtaliskej tikchiuaskej?

²⁰ Se akin kijkuiloj se Salmo kiueyitalij Jehová keman kijtoj: “Yolpaki takat akin tikixpejpena uan tikyoleua maj mouan motoki para maj nemi itech patio de motemplo” (Sal. 65:4). Ijkon kemej Josué maj tikixtalikan tiktekitiliskej Jehová uan maj tikijtokan: “Nejua uan nochankauan tiktekitiliskej Jehová” (Jos. 24:15).