Tein tajtanij akin taixtajtoltiaj
¿Sayoj maná uan totomej kikuajkej israelitas keman yetoyaj taluakyan?
Keman israelitas yetoyaj 40 xiujmej itech taluakyan, okachi kikuayaj maná (Éx. 16:35). Uan no, Jehová ojpa kinmakak totomej (Éx. 16:12, 13; Núm. 11:31). Sayoj ke israelitas no kipiayaj okseki taman tein ueliskiaj kikuaskej maski sayoj tepitsin.
Jehová kemansa kinuikaya “kampa ueliskia moseuiskej”, uan ompa kiajsiaj at uan okseki taman tein kikuaskej (Núm. 10:33). Seko kampa kinuikak Jehová katka ompa Elim, “kampa onkaya 12 ameyalmej uan 70 koujxiujmej”, nejin koujmej yejuan tein nesij itech taixkopin (itech página 31 de nejin tamachtilis) (Éx. 15:27). Amaix Plants of the Bible kijtoua ke nejin koujxiuit tel miakkan mochiua uan yejua tein okachi kikuaj itech taluakyan, yejua ika kinpaleuiaya para kikuaskej, kikixtiskej aceite uan moyekauiliskej.
Xa israelitas mokaujtikiskej kampa axkan motaixmati kemej Farán uan yetok itech wadi de Farán, kampa tel taueyika katka uan onkaya miak at. a Itech amaix Discovering the World of the Bible, kijtoua ke nejin wadi oso taltamanis kipia 130 kilómetros de ueyak uan yejua semej den wadis tein okachi ueyak, okachi kuakualtsin uan okachi kiixmatij ompa Sinaí. Nejon amaix no kijtoua ke komo peua se youi 45 kilómetros desde kampa at monamiki iuan ueyiat, se ajsis hasta kampa onkak at ompa Farán, kampa onkakej miak koujxiujmej. Nejin kampa onkak at, ueyak 4,8 kilómetros uan kipanauijtok ueyiat kemej 610 metros. Ompa onkak miak koujxiujmej, uan tel takualtsinkan ijkon kemej katka xochital Edén. Desde ne uejkaujya, miakej kiuelitanij nejin koujmej tein moitaj itech taixkopin.
Koujxiujmej tein moajsij kampa takualtsinkan ompa Farán.
Keman israelitas kiskej de Egipto, kiuikayaj tixti de harina, tein ika kimaneloskiaj, uan xa tepitsin tatet uan aceite. Nochi nejon xa niman kitamijkej. Uan no “kinuikakej tel miakej ichkamej, chivos uan kuakuejmej” (Éx. 12:34-39). Sayoj ke itech taluakyan semi ouij se nemis, yejua ika tel miakej tapialmej mikkej. Uan no, israelitas xa kinkuajkej seki tapialmej, uan oksekin kinchichinojkej para ika taueyichiuaskej hasta para kinueyichiuaskej tatadiosmej (Hech. 7:39-43). b Maski ijkon, israelitas kinpiayaj miakej ichkamej uan kuakuejmej. Uan tikmatij nejin porin keman amo kitakamatkej Jehová, kiniluij: “Namokoneuan kinyekpiaskej ichkamej 40 xiujmej itech taluakyan” (Núm. 14:33). Yejua ika xa kipiayaj leche uan tepitsin nakat, sayoj ke amo kinajsiskia para takuaskej eyi millones itech 40 xiujmej. c
¿Kani kikuiaj at uan takual para kinmakaskej tapialmej? d Itech nejon tonalmej xa okachi kiouia, yejua ika motachiuaya ompa taluakyan. Amaix Perspicacia para comprender las Escrituras, kampa ika tajtoua “Arabia” kijtoua ke kemej 3,500 xiujmej achtoya ompa Arabia okachi onkaya at ke axkan. No kijtoua ke onkayaj miak uadis tein uejkatan katkaj uan amo kipiayaj at, kampa achto ompaka panouayaj amej, nejon kinextia ke achto semi kiouia uan panouaya miak at. Maski ijkon, itech taluakyan amo teyi mochiuaya uan se mouia (Deut. 8:14-16). Komo Jehová amo kinmakaskia at ika se milagro, israelitas uan nochin inintapialuan mikiskiaj (Éx. 15:22-25; 17:1-6; Núm. 20:2, 11).
Moisés kiniluij israelitas ke Jehová kintamakak ika maná para kinmatiltis ke “amo sayoj ika takual nemi aksa, ta ika nochi tajtolmej tein kisa itech itenoj Jehová” (Deut. 8:3).
a Xikonita amaix La Atalaya 1 de mayo de 1992, itech página 24 uan 25.
b Biblia ika tajtoua ojpa keman israelitas kinchichinojkej tapialmej ompa taluakyan para kiueyichiuaskej Jehová. Yekinika keman kinixtalijkej tiopixkamej, uan ojpatika keman kichiujkej Pascua. Nochi nejin kichiujkej itech xiuit 1512 achto ke ualaskia Jesús, kemej se xiuit satepan ke israelitas kiskej de Egipto (Lev. 8:14–9:24; Núm. 9:1-5).
c Itamian nejon 40 xiujmej keman israelitas yetoyaj itech taluakyan, mokuilijkej tel miakej tapialmej keman yajkaj tateuitoj (Núm. 31:32-34). Maski ijkon, kisentokakej kikuajkej maná hasta keman ajsikej itech tal tein Dios motenkaujka kinmakas (Jos. 5:10-12).
d Tikmatij ke tapialmej amo kikuayaj maná, porin Jehová kiniluijka israelitas maj kipejpenanij sayoj tein kikuaskia sejse ininchankauj, sayoj ke amo kiniluij maj no kikuikan para tapialmej (Éx. 16:15, 16).
