1. ¿Keyej ouij techkisa titatakamatiskej?

 ¿KEMANSA ouij mitsonkisa tiontatakamatis ijkon kemej kipanouaya David? Yejua hasta kitajtanij Dios: “Xikchiua maj nikneki nimitstakamatis” (Sal. 51:12). Maski David kitasojtaya Jehová kemansa ouij kikisaya kitakamatis, uan tejuan no ijkon techpanoua. ¿Keyej? Yekinika, porin touejkaujtatuan amo tatakamatkej uan tejuan no ijkon tikchiuaj. Ojpatika, porin Satanás nochipa kitemoua maj amo titatakamatikan kemej yejua kichiuak (2 Cor. 11:3). Uan expatika, porin miakej taixnamikij uan kipiaj “tanemilil tein kinyekana akin amo tatakamatij” (Efes. 2:2). Yejua ika, para uelis tiktakamatiskej Jehová uan akin kinkaujtok maj taixyekanakan semi moneki timochikauaskej amo tikchiuaskej tein amo kuali, amo tikchiuaskej kemej akin amo tatakamatij uan amo timokauaskej maj techkajkayaua Satanás.

2. ¿Toni kijtosneki maj niman se tatakamati? (Santiago 3:17).

² (Xikonixtajtolti Santiago 3:17). Santiago, semej akin kijkuiloj Biblia kijtoj ke akin tamattok “niman tatakamati”. ¿Toni kijtosneki nejon? Ke moneki maj tikintakamatikan akin Jehová kinkaujtok maj taixyekanakan uan maj tiknejnekikan tikchiuaskej. Sayoj ke Jehová amo kineki maj tiktakamatikan aksa akin techiluia maj amo tikchiuakan tein yejuatsin technauatia (Hech. 4:​18-20).

3. ¿Keyej Jehová kiita ke moneki maj tikintakamatikan akin kinkaujtok maj taixyekanakan?

³ Kemej Jehová amo mopoloua uan tein technauatia techpaleuia, okachi amo ouij techkisa tiktakamatiskej yejuatsin  ke tein technauatiaj oksekin (Sal. 19:7). Jehová amo kemej akin taixyekanaj nikan taltikpak porin yejuan tajtakolejkej. Maski ijkon, yejuatsin kinkauani maj techixyekanakan totatuan, tekiuanij uan tayekananij (Prov. 6:20; 1 Tes. 5:12; 1 Ped. 2:​13, 14). Tein melauj, keman tikintakamatij yejuan, tiktakamattokej Jehová. Maj tikitakan toni uelis tikchiuaskej para tikintakamatiskej akin Jehová kinkaujtok maj taixyekanakan hasta keman ouij techkisas tikintakamatiskej.

4. ¿Keyej miakej telpochmej amo kintakamatij inintatuan?

⁴ Telpochmej momachtiaj iniuan miakej akin amo kintakamatij inintatuan (2 Tim. 3:​1, 2). ¿Keyej miakej amo tatakamatij? Sekin telpochmej kiitanij ke inintatuan kinnauatiaj maj kichiuakan teisa tein yejuan amo kichiuaj, yejua ika kinemiliaj ke amo kinamiki maj kiniluikan toni kichiuaskej. Oksekin kinemiliaj ke kemej miak taman mopatakya, tein kinnauatiaj inintatuan amo kinpaleuiaok oso tel ouij. Telpoch, ¿no ijkon titanemilia? Miakej ouij kinkisa kichiuaskej nejin tein Jehová kinnauatia: “Xikintakamatikan namotatuan kemej toTekotsin kineki, porin Dios kiita ke nejon kuali yetok” (Efes. 6:1). ¿Toni mitspaleuis xikchiua nejin?

5. Kemej kijtoua Lucas 2:​46-52, ¿keniuj tikmatij ke Jesús yejua akin okachi kuali techmachtia ke moneki tikintakamatiskej totatuan?

⁵ Jesús yejua akin okachi tatakamatik, uan uelis techmachtis keniuj tikchiuaskej (1 Ped. 2:​21-24). Yejua amo katka tajtakolej, sayoj ke itatuan kemaj. Yejua kinpoujkaitak maski mopolouayaj oso amo kiajsikamatiaj (Éx. 20:12). Xikita tein kipanok keman kipiaya 12 xiujmej (xikixtajtolti Lucas 2:​46-52). Jesús yajki Jerusalén iniuan itatuan, uan keman mokepkej amo iniuan mokepakok. José uan María monekia kiitaskej maj nochin ininkoneuan iniuan mokepanij satepan ke tamik iluit, sayoj ke amo ijkon kichiujkej. Satepan ke kiajsikej Jesús, María kitajtakoltij porin momoujtijkaj. Maski Jesús ueliskia kiniluis ke amo kuali tein kichiujtoyaj amo teyi kiniluij, ta kuali kinnankilij uan kinpoujkaitak. Sayoj ke José uan María “amo kiajsikamatkej tein kiniluijtoya”. Maski ijkon, Jesús “kisentokak kintakamatik”.

6, 7. ¿Toni uelis kinpaleuis telpochmej maj kintakamatikan inintatuan?

⁶ Telpoch, ¿ouij mitskisa tikintakamatis motatuan keman mopolouaj oso amo mitsajsikamatij? ¿Toni uelis mitspaleuis? Yekinika, xiknemili keniuj momachilia Jehová. Biblia kijtoua ke komo tekoneuan kintakamatij inintatuan, “kiyolpaktia toTekotsin” (Col. 3:20). Jehová kimati keman motatuan amo mitsajsikamatij oso mitsiluiaj xikchiua teisa tein semi ouij. Sayoj ke komo tikixtalia tikintakamatis maski ijkon kichiuaskej, Jehová semi yolpakis.

⁷ Ojpatika, xiknemili keniuj momachiliaj motatuan. Keman tikintakamati, tikinyolpaktia, uan okachi mouan takuaujtamatij (Prov. 23:​22-25). Uan xa okachi kuali iniuan timouikas. Alexandre, se tokniuj takat de Bélgica, kijtoua: “Keman peuak nikintakamati notatuan, peuak okachi kuali timouikaj uan okachi tiyolpakij”. b Expatika, xikelnamiki ke komo axkan titatakamati mitspaleuis satepan. Paulo, akin nemi Brasil, kijtoua: “Kemej nimochikauani nikintakamatis notatuan, nechpaleuia maj no niktakamati Jehová uan  no akin taixyekanaj”. ITajtol Dios mitsiluia nejin tein kinextia keyej semi moneki tikintakamatis motatuan: “Ijkon kualtsin tinemis uan uejkaua tiyoltos nikan taltikpak” (Efes. 6:​2, 3).

8. ¿Keyej miakej telpochmej kiixtaliaj kintakamatiskej inintatuan?

⁸ Miakej telpochmej kiitanij ke okachi kuali yetokej komo kintakamatij inintatuan. Luiza, akin no nemi Brasil, achto amo kiajsikamatia keyej se tiempo itatuan amo kikauayaj maj kipia celular, porin nochin akin katkaj iuampoyuan kipiayaj se. Sayoj ke satepan kiajsikamatik ke amo kinekiaj maj teisa kipano. Axkan kimati ke keman kintakamati itatuan, amo moneki kinemilis ke amo kikauaj maj kichiua tein kineki, porin tein kiyolmajxitiaj yejua tein okachi kipaleuia. Elizabeth se ichpoch akin nemi Estados Unidos kemansa ouij kikisa tatakamatis. Yejua kijtoua toni kichiua: “Keman notatuan nechiluiaj maj nikchiua teisa uan amo nikyekajsikamati keyej, nikelnamiki keniuj tein achto nechnauatiayaj, nechpaleuij para maj amo nechpano tein amo kuali”. Monica, akin nemi Armenia, kijtoua ke okachi yolpaki keman kintakamati itatuan ke keman amo kichiua.

9. ¿Keniuj miakej kiitaj tein tanauatiaj tekiuanij?

⁹ Miakej kiajsikamatij ke moneki yetoskej tekiuanij uan ke moneki tiktakamatiskej seki tanauatilmej tein kiixtaliaj (Rom. 13:1). Sayoj ke, keman amo kiuelitaj se tanauatil oso kiitaj ke tel ouij, amo kinekij kitakamatiskejok. Maj tikitakan toni kinemiliaj keman moneki kiixtauaskej impuesto. Miakej akin nemij itech altepet Europa, kinemiliaj ke komo amo moneki kiixtauaskej impuesto, kuali yetok maj amo kiixtauakan. Kemej ijkon tanemiliaj, miakej akin ompa nemij amo kiixtauaj nochi impuestos tein kintajtania tekiuaj.

10. ¿Keyej titatakamatij maski amo tikuelitaj?

¹⁰ Biblia kijtoua ke tekiuanij kintajyouiltiaj oksekin, ke kinixyekantok Satanás uan ke amo uejkaua ixpoliuiskej (Sal. 110:​5, 6; Ecl. 8:9; Luc. 4:​5, 6). Sayoj ke no kijtoua ke “komo tikixnamikij inintanauatil, tein melauj tikixnamiktokej Dios”. Jehová kikaujtok maj taixyekanakan para maj amo semi mochiua tein amo kuali, uan kineki maj tikinpoujkaitakan. Yejua ika moneki tikinmakaskej ‘tein kinnamiki’ kiseliskej, nejin no kijtosneki maj tikixtauakan impuesto, maj tikinpoujkaitakan uan maj tikintakamatikan (Rom. 13:​1-7). Xa tiknemiliskej ke komo tiktakamatij se tanauatil, amo techpaleuis, tel ouij oso ke amo kinamiki maj tikchiuakan. Sayoj ke tejuan tiktakamatij Jehová, uan yejua kineki maj tikintakamatikan akin taixyekanaj, sayoj ke amo moneki tikintakamatiskej komo techiluiaj maj  amo tikchiuakanok tein Jehová technauatia (Hech. 5:29).

11, 12. Kemej kijtoua Lucas 2:​1-6, ¿toni monekik kichiuaskej José uan María para tatakamatiskej maski ouij kinkisak? ¿Uan keniuj tapaleuij? (No xikonita taixkopimej).

¹¹ Semi techmachtis miak taman tein kichiujkej José uan María. Yejuan kiixtalijkej kintakamatiskej akin taixyekanayaj maski ouij kinkisaya kichiuaskej (xikonixtajtolti Lucas 2:​1-6). Monekik kinextiskej ke tatakamatiaj keman Jesús yaya yolitia. Tekiuaj romano César Augusto tanauatij maj nochin yanij moijkuilotij. Para ueliskia kichiuaskej nejin, José uan María monekia yaskej Belén. Yejuan monekia ojtokaskej kemej 150 kilómetros kampa tepeyoj. Xa ouij kinkisaskia yaskej, uan okachiok María. Xa semi kintekipachouaya maj teisa kipanouani konetsin uan no María. ¿Uan komo konetsin yolia keman ojtokatoskiaj? ¡María kiuikaya iijtik akin yeskia Mesías! ¿Kuali yeskia maj amo kitakamatinij tekiuaj?

¹² José uan María tatakamatkej maski motekipachojtoyaj. Uan Jehová kintatiochiuij porin tatakamatkej: María ajsik Belén, uan ikonetsin kuali yolik, uan nochi nejin tapaleuij maj mochiua tein Biblia achto kijtojka (Miq. 5:2).

13. ¿Keniuj komo titatakamatij uelis kinpaleuis okseki tokniuan?

¹³ Komo tikintakamatij tekiuanij akin taixyekanaj, techpaleuis tejuan uan no oksekin. ¿Keniuj? Yejuan amo techtatsakuiltiaj kemej kintatsakuiltiaj akin amo tatakamatij (Rom. 13:4). Uan no keman tikintakamatij, yejuan kiitaj ke itaixpantijkauan Jehová tatakamatij. Ijkon panok ne uejkauj ompa Nigeria. Seki soldados kalakkej itech Kali kampa tiMosentiliaj keman mochiujtoya se nechikol. Soldados kintemojtinemiaj sekin akin kualaniaj uan taixnamikiaj porin amo kinekiaj kiixtauaskej impuesto. Sayoj ke akin kinixyekanaya soldados kinnauatij maj kisanij. Kiniluij: “Itaixpantijkauan Jehová amo taixnamiktinemij para amo taxtauaskej  impuesto”. Nochipa keman tikontakamati tein tekiuaj tanauatia, tiontapaleuia maj okachi kuali ika tajtokan ixolal Jehová. Uan nejon xa satepan tapaleuis maj kuali yetokan tokniuan (Mat. 5:16).

14. ¿Toni kipaleuij se tokniuj siuat maj okachi kintakamati tekiuanij?

¹⁴ Kemansa xa amo tiknekiskej tikintakamatiskej tekiuanij akin taixyekanaj. Joanna se tokniuj siuat akin nemi Estados Unidos, kijtoua: “Ouij nechkisaya nitatakamatis porin tekiuanij kinchiuilijkaj tein amo kuali nochankauan”. Sayoj ke Joanna mochikauak kipatas kemej kinemiliaya. ¿Keniuj kichiuak? Yekinika, kiixtalij amo kiixtajtoltisok tein kitaliayaj itech redes sociales tein kichiuaskia maj okachi amo kuali kinita (Prov. 20:3). Ojpatika, kitataujtij Jehová maj kipaleui maj okachi iuan takuaujtamati, uan maj amo kinemili ke tekiuanij okachi tapaleuiskej (Sal. 9:​9, 10). Uan expatika, peuak okachi kiixtajtoltia tamachtilismej itech toamaixuan tein ika tajtouaj ke amo moneki se mokalakis itech política (Juan 17:16). Joanna kijtoua ke kemej axkan kinpoujkaita uan kintakamati tekiuanij, okachi yolseujtok uan yolpaki.

15. ¿Keyej kemansa ouij techkisas tiktakamatiskej tein technauatia inechikol Jehová?

¹⁵ Jehová techtajtania maj tikintakamatikan akin techixyekanaj itech nechikol (Heb. 13:17). Jesús yejua toueyi Taixyekankauj uan amo tajtakolej, sayoj ke akin kinixpejpenak maj techixyekanakan tajtakolejkej. Kemansa xa ouij techkisas tikintakamatiskej, uan okachiok komo amo tiknekij tikchiuaskej tein technauatiaj. Se tonal, tatitanil Pedro kinauatijkej maj kichiua teisa tein amo kinekia kichiuas. Se ángel kinauatij maj kinkuani tapialmej tein iTanauatil Moisés kijtouaya ke amo chipauak. Pedro hasta expa kijtoj ke amo kinekia kichiuas (Hech. 10:​9-16). ¿Keyej? Yejua kinemiliaya ke tein kinauatijkaj maj kichiua amo kuali yetoya. Yejua momattoya kichiuas okse taman. Komo Pedro ouij kikisak kitakamatis se ángel akin amo tajtakolej, tejuan xa no ouij techkisas tikchiuaskej tein technauatiaj takamej akin tajtakolejkej.

16. ¿Toni kichiuak tatitanil Pablo keman kinauatijkej maj kichiua teisa tein xa kinemiliaya ke amo semi monekia? (Hechos 21:​23, 24, 26).

¹⁶ Tatitanil Pablo kinextij ke niman tatakamatia, ijkon kichiuak hasta keman kinauatijkaj teisa tein xa kinemiliaya ke amo monekia kichiuas. Seki tokniuan judíos kitekakilijkaj ke Pablo tamachtijtoya “maj kiixnamikikan iTanauatil Moisés” uan ke amo kipoujkaitaya Tanauatil (Hech. 21:​21, nota). Tokniuan tayekananij de Jerusalén kiluijkej Pablo maj kinextiani ke kitakamattoya Tanauatil. Yejua ika monekia yas templo iniuan naui takamej uan mochipauas. Sayoj ke Pablo kimatia ke amo kichiujtoya tein amo kuali porin tokniuan amo monekiaok kitakamatiskej iTanauatil Moisés. Maski ijkon, Pablo niman tatakamatik. Biblia kijtoua: “Mostika, Pablo kinuikak nejin takamej uan iniuan mochipauak ijkon kemej kijtoua iTanauatil Moisés” (xikonixtajtolti Hechos 21:​23, 24, 26). Kemej tatakamatik, Pablo tapaleuij maj nochin kuali mouikakan (Rom. 14:​19, 21).

17. ¿Toni mitsonmachtia tein kipanok Stephanie?

¹⁷ Se tokniuj siuat akin monotsa Stephanie ouij kikisak kintakamatis tokniuan akin tekitij Betel. Yejua uan itakatsin semi yolpakiaj keman tapaleuiayaj maj motanojnotsa itech se tajtol tein amo motajtouaya ompa. Sayoj ke sucursal tanauatij ke  amo monechikoskiajok itech nejon tajtol, uan nejin tokniuan kinnauatijkej maj oksepa monechikokan itech inintajtol. ¿Keniuj momachilij Stephanie? Yejua kijtoua: “Semi nimotayokoltiaya, nejua niknemiliaya ke itech notajtol amo semi monekiaj tanojnotsanij”. Maski ijkon tanemiliaya yejua tapaleuij, kijtoua: “Satepan nikajsikamatik keyej tokniuan kiixtalijkaj nejin. Itech nechikol kampa tietokej axkan, ininchankauan miakej tokniuan amo momachtiaj, yejua ika timochiuanij kemej ininchankauan uan tikinyolchikauaj. No nikmachtia se tokniuj siuat akin achto amo tanojnotsayaok. Uan axkan hasta ueli okachi nimomachtia noselti”. No kijtoua: “Nikmati ke semi nimochikauani nitatakamatis uan nejon kichiua maj kuali nimomachili”.

18. ¿Keniuj techpaleuia komo titatakamatij?

¹⁸ Tinochin uelis titatakamatiskej. Jesús ‘kimatik keniuj tatakamatis’ porin tajyouij, uan amo porin kualtsin nemia (Heb. 5:8). Miakpa, tejuan no timomachtiaj keniuj titatakamatiskej keman tikpiaj ouijkayomej. Maj tikelnamikikan tein panok keman peuak ueyi kokolis COVID-19. Techiluijkej maj amo timonechikokanok itech Kali kampa tiMosentiliaj nion maj titanojnotsakanok kajkalpan. ¿Keniuj tionmomachilij? ¿Ouij mitsonkisak tiontatakamatis? Maski kemaj, tein tikonchiuak mitsonpaleuij kuali xionyeto, mitsonpaleuij kuali xionmouika iniuan tokniuan uan tikonyolpaktij Jehová. Axkan tikmatij ke tein yeski tein technauatiskej keman mochiujtos tetsaujkatajyouilis, uelis titatakamatiskej. Xa komo titatakamatij techpaleuis maj timomakixtikan (Job 36:11).

19. ¿Keyej tikonneki tiontatakamatis?

¹⁹ Timomachtijkej ke keman titatakamatij, tikseliaj miak tatiochiualismej. Sayoj ke tikixtaliaj tiktakamatiskej Jehová porin tiktasojtaj uan tiknekij tikyolpaktiskej (1 Juan 5:3). Amo keman uelis tikepiliskej Jehová tein toka kichiuani (Sal. 116:12). Sayoj ke uelis tikchiuaskej se taman: tiktakamatiskej Jehová uan akin taixyekanaj. Keman titatakamatij tiknextiaj ke titamatinij, uan keman ijkon tikchiuaj tikyolpaktiaj Jehová (Prov. 27:11).