1. Kemej kijtoua Salmo 18:​46, ¿keniuj tamati Jehová?

 KEMANSA tikixnamikiskej miak ouijkayomej tein uelis kipatas kemej tinemij. ¡Semi tiktasojkamatiliaj Jehová maj techpaleui! Itech okse tamachtilis tikitakej ke Jehová yejua Dios akin nochipa yoltok uan ke nochipa techpaleuis. Keman tikitaj keniuj techpaleuia okachi tikneltokaj ke “Jehová yoltok”, ijkon kemej kijtoj David itech Salmo 18:46 (xikonixtajtolti). Sayoj ke satepan David kijtoj ke Jehová kemej se “ueyi tet”. ¿Keyej David kijtoj ke Dios akin nochipa yoltok kemej yeskia se ueyi tet tein amo yoltok?

2. ¿Toni tikitaskej itech nejin tamachtilis?

² Itech nejin tamachtilis tikitaskej keyej kijtoua Biblia ke Jehová kemej yeskia se ueyi tet uan toni techmachtia nejon. No timomachtiskej keniuj tejuan no uelis tikitaskej Jehová kemej se ueyi tet. Uan ika titajtoskej keniuj uelis tikchiuaskej kemej yejua.

¿KEYEJ MOIJTOUA KE JEHOVÁ KEMEJ SE UEYI TET?

3. ¿Toni kijtosneki itech Biblia keman ika tajtoua ueyi tet? (Xikonita taixkopin).

³ Biblia kijtoua ke Jehová kemej yeskia se ueyi tet uan nejin techpaleuia maj tikajsikamatikan keniuj tamati yejuatsin. Keman itekitikauan Jehová kiueyichiuayaj, kijtouayaj ke yejua katka kemej se ueyi tet. Yekinika texto kampa kijtoua ke Jehová kemej yeskia “se ueyi tet” yejua Deuteronomio 32:4. Keman Ana motataujtij kijtoj ke ‘sayoj Jehová chikauak kemej se ueyi tet’ (1 Sam. 2:2). Habacuc kijtoj ke kiitaya Jehová kemej se ‘ueyi tet’ (Hab. 1:12). Uan no, Jehová kijtoj ke yejua katka kemej se ‘ueyi tet’ (Is. 44:8). Maj tikitakan eyi taman tein kichiua Jehová tein kinextia ke yejua kemej yeskia se ueyi tet, uan keniuj tejuan no uelis ijkon tikitaskej (Deut. 32:31).

4. ¿Keyej titakuaujtamatij ke Jehová nochipa techpaleuis? (Salmo 94:22).

 ⁴ Jehová nochipa techpaleuis. Keman chikauak kioui ueli timopaleuiaj itech se tepekoyok oso itampa se ueyi tet. No ijkon, Jehová ueli techpaleuia keman tikpiaj ouijkayomej (xikonixtajtolti Salmo 94:22). Yejua techpaleuia maj kuali tietokan uan techyekiluia ke maski axkan titajyouiaj, amo nochipa ijkon yeski. Uan no motenkaua ke satepan senkis kiixpolos nochi tein techtajyouiltia uan tein kichiua maj amo tiyolseujtokan (Ezeq. 34:​25, 26).

5. ¿Toni uelis tikchiuaskej para maj Jehová techpaleui?

⁵ Tiknextiaj ke tiktemouaj maj Jehová techpaleui komo tiktataujtiaj. Keman ijkon tikchiuaj “Dios techyolseuis”, uan nejon kiyekpias toyolo uan totanemilil (Filip. 4:​6, 7). Maj tikitakan tein kipanok Artiom, se tokniuj takat akin tsaktoya porin kitekitiliaya Dios. Keman tsaktoya, se takat kitatsintokiaya, kimagaya uan kimojmoujtiaya. Yejua kijtoj: “Keman nechtatsintokiayaj semi nimouia. Nochipa niktataujtiaya Jehová uan nikiluiaya maj nechpaleui maj niyolseujto uan maj kuali nitaixejeko. Maski nechtajyouiltijkej amo keman nikauak Jehová. Yejua nechpaleuij kemej se ueyi tepamit”.

6. ¿Keyej nochipa uelis titakuaujtamatiskej iuan Jehová? (Isaías 26:​3, 4).

⁶ Jehová amo keman techsenkauas. Jehová tamati kemej se ueyi tet oso se ueyi tepet tein amo keman moolinia, yejua ika tikmatij ke nochipa techpaleuis. Uelis titakuaujtamatiskej iuan porin yejua kemej yeskia se “ueyi tet tein nochipa yetos” (xikonixtajtolti Isaías 26:​3, 4). Kemej yejua nochipa yoltos kichiuas tein motenkaua, techkakis keman timotataujtiskej uan nochipa techpaleuis. No titakuaujtamatij iuan Jehová porin yejua amo keman kinkaua akin kitekitiliaj (2 Sam. 22:26). Amo keman kielkauas keniuj tiktekitilianij uan nochipa techtatiochiuis (Heb. 6:10; 11:6).

7. ¿Keniuj techpaleuia komo titakuaujtamatij iuan Jehová? (No xikonita taixkopin).

⁷ No uelis tikitaskej Jehová kemej se ueyi tet komo senkis iuan titakuaujtamatij. Tikmatij ke komo tiktakamatij Dios, nejon techpaleuis hasta keman tikpiaskej ouijkayomej (Is. 48:​17, 18). Uan keman tikitaskej keniuj techpaleuia, kichiuas maj okachi iuan titakuaujtamatikan. Okachi tikneltokaskej ke sayoj Jehová techpaleuis maj tikxikokan tein yeski ouijkayot tein tikpiaskej. Kemansa tikpiaj se ouijkayot uan amo akin ueli techpaleuia, sayoj ke tikitaj ke Jehová nochipa touan yetok uan techpaleuia. Se tokniuj akin monotsa Vladímir, kijtoj: “Keman nitsaktoya, nikmachilij ke Dios okachi nechpaleuij. Kemej nietoya noselti, peuak okachi nitakuaujtamati iuan Jehová porin sayoj yejua ueliskia nechpaleuis maj nitaxiko”.

8. 1) ¿Keyej ueli tikijtouaj ke Jehová amo keman mopata? 2) ¿Keniuj techpaleuia komo tikitaj Jehová kemej se ueyi tet? (Salmo 62:​6, 7).

⁸ Jehová amo mopata. Jehová kemej se  ueyi tet oso se ueyi tepet porin amo keman mopata. Amo kipapata kemej tamati nion tein kiixtalia kichiuas (Mal. 3:6). Keman Adán uan Eva kiixnamikkej, yejua amo kipatak tein kiixtalijka kichiuas. Tatitanil Pablo kijtoj ke Jehová “amo keman motajtolpata” (2 Tim. 2:13). Nejin kijtosneki ke tein yeski panos oso tein kichiuaskej oksekin, Jehová amo keman kipatas kemej tamati, tein kiixtalia kichiuas oso tein tanauatia. Yejua ika titakuaujtamatij ke Jehová nochipa techpaleuis keman tikpanoskej ouijkayomej uan ke kichiuas nochi tein motenkauani (xikonixtajtolti Salmo 62:​6, 7).

9. ¿Toni mitsonmachtia tein kipanok Tatiana?

⁹ No tikitaskej Jehová kemej se ueyi tet komo tikelnamikij keniuj tamati uan nochi tein kiixtalijtok kichiuas nikan taltikpak. Nejon techpaleuis maj tiyolseujtokan uan maj amo tikauakan Jehová maski tikpiaskej ouijkayomej (Sal. 16:8). Ijkon kipanok se tokniuj akin monotsa Tatiana keman kitsakkej ichan porin kitekitiliaya Dios. Yejua kijtoj: “Amo akin kikaujkej maj nouan yeto. [...] Semi ouij katka nietos noselti, uan miakpa semi nimotayokoltiaya”. ¿Toni kipaleuij maj taxiko? Peuak kinemilia keniuj tamati Jehová uan tein yejua kiixtalia kichiuas nikan taltikpak, ijkon kiajsikamatik keyej monekia maj taxiko. Tatiana kijtoj: “Nikelnamikik ke tein nechpanotoya katka porin niktasojta Jehová uan porin nikneki nikchiuas tein kiyolpaktia. Nejon nechpaleuiani maj amo sayoj noka nitanemili”.

10. ¿Keniuj desde axkan uelis tikonitas Jehová kemej se ueyi tet?

¹⁰ Amo uejkaua tikpiaskej uejueyi ouijkayomej uan okachi monekis titakuaujtamatiskej iuan Jehová. Yejua ika desde axkan moneki okachi tikneltokaskej ke Jehová nochipa techpaleuis maj titaxikokan uan maj amo keman tikauakan. ¿Toni mitsonpaleuis? Xikonixtajtolti tein kinpanok oksekin akin ininka tajtoua Biblia uan no tein kinpanouani tokniuan itech nejin tonalmej. Itech xiontanemili tein tikonixtajtoltia uan xikonita keniuj Jehová nochipa kinpaleuiani itekitikauan kemej se ueyi tet. Nejin mitsonpaleuis no xikonita Jehová kemej se ueyi tet.

MAJ TIKCHIUAKAN KEMEJ JEHOVÁ

11. ¿Keyej semi kuali komo tikchiuaj kemej Jehová? (No xikonita recuadro “ Tein uelis kichiuaskej tokniuan telpochmej”).

¹¹ Tikitakejya seki taman tein kichiua Jehová tein kinextia ke yejua kemej se ueyi tet. Axkan tikitaskej keniuj tejuan no uelis ijkon tikchiuaskej. Komo timochikauaj okachi tikchiuaskej kemej Jehová, okachi uelis tikinpaleuiskej tokniuan. Ne uejkauj, Jesús kitokaytij Simón kemej Cefas (oso Pedro, tein kijtosneki “tet”) (Juan 1:42). Ijkon kinextij ke Pedro kinyolseuiskia uan kinyolchikauaskia tokniuan. Biblia no kijtoua ke tayekananij kemej yeskiaj “iyekauil se  ueyi tet” tein kinpaleuia tokniuan itech nechikol (Is. 32:2). Sayoj ke tinochin uelis timosenyolchikauaskej komo tikchiuaj kemej Jehová (Efes. 5:1).

12. ¿Toni uelis tikchiuaskej para tikinpaleuiskej oksekin keman kipiaskej ouijkayomej?

¹² Maj tikinpaleuikan tokniuan keman kipiaj ouijkayomej. Komo tokniuan amo kipiajok kani nemiskej porin mochiuak se tetsauit oso kampa nemij moteuiaj, xa uelis tikinseliskej tochan. Itech nejin “tonalmej keman tatamitiya” okachi motaouijkantalis, yejua ika okachi uelis timosenpaleuiskej (2 Tim. 3:1). No uelis tikinyolchikauaskej tokniuan uan tikinnextiliskej ke tikintasojtaj. Nejin uelis tikchiuaskej keman iniuan titajtoskej itech nechikol para maj kuali momachilikan, ijkon tinochin timotasojtaskej uan kuali timouikaskej. Axkan miakej amo tetasojtaj uan kintajyouiltiaj oksekin. Yejua ika, keman tokniuan youij nechikolmej tiknekij tikinyolchikauaskej uan tikinnextiliskej ke tikintasojtaj.

13. ¿Keniuj tayekananij uelis kinpaleuiskej tokniuan? (No xikonita taixkopin).

¹³ Tayekananij kinpaleuiaj tokniuan keman kipiaj ouijkayomej. Keman mochiua se tetsauit oso se tokniuj kokolispeua, tayekananij niman kitemouaj keniuj kipaleuiskej. No kinpaleuiaj uan kinyolchikauaj ika Biblia. Tokniuan okachi kinekiskej maj kinpaleui se tayekankej komo yejua kualtakat, teajsikamati uan kuali tekaki. Ijkon tokniuan kimachiliskej ke yekmelauj kintasojtaj uan amo kinouijmakas kichiuaskej tein tayekankej kinyolmajxitis ika Biblia (1 Tes. 2:​7, 8, 11).

14. ¿Keniuj uelis tiknextiskej ke titakuaujtamachmej?

¹⁴ Maj titakuaujtamachmej. Tiknekij maj tokniuan kimatikan ke nochipa tikinpaleuiskej, hasta keman kipiaskej se ueyi  ouijkayot (Prov. 17:17). ¿Keniuj oksekin uelis kiitaskej ke titakuaujtamachmej? Komo mojmostaj timochikauaj tikchiuaskej kemej Jehová, uan nejin tiknextiaj keman tikchiuaj tein timotenkauaj uan keman hora tiajsij kampa moneki tiaskej (Mat. 5:37). No uelis tikpaleuiskej aksa akin moneki maj kipaleuikan. Uan no komo techmakaj se tekit itech nechikol, maj tikchiuakan ijkon kemej technauatiskej.

15. ¿Keniuj kinpaleuia tokniuan keman tayekananij takuaujtamachmej?

¹⁵ Tayekananij semi kinpaleuiaj tokniuan itech nechikol keman takuaujtamachmej. Keman tokniuan kimatij ke uelis kinnotsaskej tayekananij keman monekis, kinpaleuia maj amo semi motekipachokan. Tokniuan kimachiliaj ke kintasojtaj keman kiitaj ke tayekananij nochipa kitemouaj kinpaleuiskej. Tokniuan okachi takuaujtamatij iniuan tayekananij keman kinyolchikauaj ika Biblia uan toamaixuan uan amo ika tein yejuan kinemiliaj. Uan no keman tayekananij amo kijtojtinemij tein tokniuan kintapouiaj uan kichiuaj tein motenkauaj.

16. ¿Keniuj techpaleuia komo nochipa tikchiuaj tein Jehová kiyolpaktia, uan keniuj no tikinpaleuiaj oksekin komo tikchiuaj nejon?

¹⁶ Maj nochipa tiktakamatikan Dios. Komo nochipa tiktakamatij Jehová uan timoixyekanaj ika tein Biblia kijtoua, tikinpaleuiskej  oksekin maj no ijkon kichiuakan. Komo timomachtiaj iTajtol Dios uan okachi iuan titakuaujtamatij, amo keman tikauaskej Jehová uan nochipa tiktakamatiskej. Nejon no techpaleuis maj amo tikneltokakan tein tamachtiaj akin amo kitekitiliaj Jehová uan maj amo no timoixyekanakan ika tein kinemiliaj (Efes. 4:14; Sant. 1:​6-8). Uan no, komo titakuaujtamatij iuan Jehová uan itech tein motenkaua kichiuas, amo semi timotekipachoskej keman tikakiskej ke mochiujtok tein amo kuali (Sal. 112:​7, 8). Uan no uelis tikinpaleuiskej akin xa kipiaskej ouijkayomej (1 Tes. 3:​2, 3).

17. ¿Keniuj tayekananij uelis kinpaleuiskej tokniuan maj kisentokakan kitekitilikan Jehová?

¹⁷ Tayekananij moneki kuali kiixejekoskej tein kichiuaskej, yektalnamiktoskej, amo kitemoskej maj nochipa mochiua tein kinemiliaj uan kichiuaskej nochi ijkon kemej moneki. Keman yejuan ‘kikuij tajtolmej tein takuaujtamachmej’, kinpaleuiaj tokniuan maj amo semi motekipachokan uan maj okachi takuaujtamatikan iuan Jehová (Tito 1:9; 1 Tim. 3:​1-3). Keman tayekananij kinyolchikauaj tokniuan, youij nechikolmej, tanojnotsaj uan momachtiaj, tokniuan kiitaj uan kinpaleuia maj yejuan no ijkon kichiuakan. Keman tokniuan kipiaj se ouijkayot ten kichiua maj semi motekipachokan, tayekananij kinpaleuiaj maj takuaujtamatikan iuan Jehová uan maj tanemilikan itech tein motenkaua kichiuas.

18. ¿Keyej tiknekij tikueyitaliskej Jehová uan okachi iuan timotokiskej? (No xikonita recuadro “ Tein uelis tikchiuaskej para timotokiskej iuan Jehová”).

¹⁸ Timomachtijkejya seki taman tein kichiua Jehová, yejua ika no tikijtouaj tein kijtoj David: “Maj kiueyitalikan Jehová, akin se ueyi tet” (Sal. 144:1). Nochipa uelis titakuaujtamatiskej iuan Jehová. Yejuatsin nochipa techpaleuis maj kuali iuan timouikakan, hasta keman tiyeskij tixiuejkejya. Yejua ika ueli tikijtouaj: “Yejua se ueyi tet” (Sal. 92:​14, 15).