1, 2. 1) ¿Toni tajtakol, uan keniuj satepan amo yeski titajtakolejkejok? (No xikonita kampa kijtoua “Tein okachi momelaua”). 2) ¿Toni tikitaskej itech nejin tamachtilis uan itech okseki tamachtilismej tein kipia nejin amaix Tanejmachtijkej? (No xikonita “Tein tiknekij xikonmati” tein kipia nejin amaix).

 ¿KENIUJ uelis tikonmatis ke Jehová semi mitsontasojta? Uelis tikonmatis komo tionmomachtia toni kichiuani Jehová para mitsonmakixtis den tajtakol uan mikilis. Tajtakol a tel fiero uan amo akin ueli mokixtilia iselti. Tinochin mojmostaj titajtakolchiuaj uan kemej titajtakolejkej timomikiliaj (Rom. 5:12). Sayoj ke Jehová techmatiltia ke senkis techmakixtis den tajtakol uan mikilis.

² Kemej 6 mil xiujmejya Jehová techpaleuiani maj kuali iuan timouikakan maski titajtakolejkej. ¿Keyej? Porin semi techtasojta. Desde ke Jehová techchijchiuak semi techtasojtani, yejua ika kichiuani miak taman para techpaleuis keman titajtakolchiuaj. Dios kimati ke timomikiliaj porin titajtakolejkej uan yejua amo kineki maj nion akin momikili, ta kineki maj tinemikan nochipaya (Rom. 6:23). Uan Jehová no kineki xionnemi nochipaya. Itech nejin tamachtilis tiknankiliskej eyi netajtanilmej: 1) ¿toni kichiuak Jehová para maj tikchiakan tein kuali?, 2) ¿toni kichiuayaj  ne uejkauj para kiyolpaktiskej Jehová maski katkaj tajtakolejkej? uan 3) ¿keniuj Jesús techmakixtij den tajtakol uan mikilis?

¿TONI KICHIUAK JEHOVÁ PARA MAJ TIKCHIAKAN TEIN KUALI?

 3. ¿Toni panok itech xochital Edén?

³ Keman Jehová kinchijchiuak Adán uan Eva, kinekia maj yolpakikan. Yejua ika kinkauak maj nemikan kampa takualtsinkan, kinnamiktij uan kinnauatij maj momiakilianij uan maj itech nochi taltikpak kichiuanij se xochital kemej katka ompa Edén. Sayoj kinnauatij maj amo kichiuanij se taman uan kinnejmachtij ke komo amo kitakamatiaj momikiliskiaj. Uan tikmatijya ke se ángel akin amo tetasojta nion kitasojta Dios kinkajkayauak Adán uan Eva para maj amo kitakamatinijok yejuatsin. Yejuan kichiujkej tein nejon ángel kiniluij porin tajtakolchiujkej uan amo takuaujtamatkej iuan ininTajtsin akin semi kintasojtaya, ijkon mochiuak tein Jehová kijtojka. Kemej amo tatakamatkej, Adán uan Eva tajyouijkej hasta ke ueuentsintiakej uan momikilijkej (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

 4. ¿Keyej Jehová kitauelita tajtakol, uan keyej techpaleuia maj iuan timotokikan? (Romanos 8:​20, 21).

⁴ Tel amo kualtsin tein panok, sayoj ke Jehová kichiuak maj moijkuilo itech Biblia para techmachtis teisa tein motelneki, nejin techpaleuia maj tikajsikamatikan keyej Jehová semi kitauelita tajtakol. Tajtakol amo techpaleuia maj kuali iuan timouikakan toTajtsin uan no timomikiliaj (Is. 59:2). Satanás semi kitauelita Jehová uan tejuan no, yejua ika kichiuak maj Adán uan Eva tajtakolchiuanij uan hasta axkan kisentoka kitemoua maj no titajtakolchiuakan. Yejua ika keman Adán uan Eva tajtakolchiujkej, Satanás xa kinemilij ke Jehová amo ueliskiaok kichiuas tein kiixtalijka. Sayoj ke amo senkis kiajsikamatia keniuj Jehová semi tetasojta. Dios amo keman kipatak kemej kinekia maj nemikan ikoneuan Adán uan Eva. Yejuatsin techtasojta tinochin uan yejua ika niman kitemoj techpaleuis (xikonixtajtolti Romanos 8:​20, 21). Jehová kimatia ke sekin kitasojtaskiaj uan kitemoskiaj kitakamatiskej. Yejua ika kichiuak maj ueli iuan motokikan uan kinmakixtij den tajtakol uan mikilis. ¿Keniuj kichiuak?

 5. ¿Kemanian Jehová kijtoj ke uelis tikchiaskej tein kuali uan keniuj kichiuak? (Génesis 3:15).

⁵ (Xikonixtajtolti Génesis 3:15). Jehová niman kijtoj ke kiixpoloskia Satanás uan nejon tapaleuij maj tikchiakan tein kuali. Dios ika tajtoj se ‘tekoneuj’ akin kinmakixtiskia nochin porin kiixpoloskia Satanás uan kiyektaliskia nochi kuejmolmej tein mochiuak itech xochital Edén (1 Juan 3:8). Sayoj ke achto, Satanás kitajyouiltiskia ‘tekoneuj’ oso kichiuaskia maj kimiktikan. Nejon kitelyolkokoskia Jehová. Sayoj ke yejuatsin kinekik kikauas maj kitajyouiltikan ‘tekoneuj’ para kinmakixtis nochin den tajtakol uan mikilis.

¿TONI KICHIUAYAJ NE UEJKAUJ PARA KIYOLPAKTISKEJ JEHOVÁ MASKI KATKAJ TAJTAKOLEJKEJ?

 6. ¿Toni kichiujkej Abel, Noé uan oksekin para iuan motokiskej Jehová?

⁶ ¿Keniuj ueliskia iuan timotokiskej Jehová maski titajtakolejkej? Tel miak xiujmej yejuatsin yolik technextilijtiajki keniuj uelis iuan timotokiskej. Abel ojpatika ininkoneuj Adán uan Eva, yejua akin yekinika iuan takuaujtamatik Jehová satepan ke itatuan kiixnamikkej itech xochital Edén. Yejua kitasojtaya Jehová,  kinekia kiyolpaktis uan iuan motokis. Uan yejua ika kiixtalij kimaktilis teisa. Kemej kinyekpiaya ichkatsitsin kinkuik miak “ichkamej tein achto yolkej” uan kinmaktilij Jehová. ¿Uan yejuatsin toni kichiuak? “Kiyolpaktiaya keniuj katka Abel uan no kiyolpaktij tein kimaktilij” (Gén. 4:4). Satepan Jehová no kiyolpaktij tein kimaktiliayaj oksekin akin kitasojtayaj uan iuan takuaujtamatiaj, kemej Noé (Gén. 8:​20, 21). Nejin kinextij ke maski titajtakolejkej, uelis tikyolpaktiskej uan iuan timotokiskej. b

 7. ¿Toni techmachtia tein Abrahán yaya kichiuati?

⁷ Abrahán no semi takuaujtamatia iuan Jehová uan yejuatsin kitajtanij maj kichiuani teisa tein tel ouij: kiluij maj kitemaktiani ikonetsin Isaac. Nejin xa semi kitekipachoj Abrahán uan kitayokoltij. Maski ijkon, ipa kinekik kitakamatis. Uan keman yaya kimiktitia, Jehová kitsakuilij para maj amo kichiua. Nejin kinextia tein Jehová kichiuaskia satepan: yejuatsin kitemaktiskia itasojkonetsin porin semi techtasojta tinochin (Gén. 22:​1-18).

 8. ¿Toni kinextij tapialmej tein iTanauatil Moisés kijtouaya maj kintemaktikan? (Levítico 4:​27-29; 17:11).

⁸ Miak xiujmej satepan, keman Jehová kinmakak tanauatil israelitas, kiniluij maj kintemaktianij tapialmej para kintapojpoluiskia inintajtakoluan (xikonixtajtolti Levítico 4:​27-29; 17:11). Tein kitemakayaj kiixnextiaya ke tein Jehová yaya kitemakati okachi kuali katka porin senkis techmakixtiskia den tajtakol. Dios kiniluij tanauatianij maj kinmelauilianij oksekin ke se ikoneuj Dios akin moijtojka ke ualaskia kitajyouiltiskiaj uan kimiktiskiaj. Yejua yeskia kemej ichkat tein kitemaktiayaj (Is. 53:​1-12). Jehová motenkauak ke kitemaktiskia iKonetsin akin semi kitasojta para maj techmakixti tinochin den tajtakol uan mikilis, semi kualtsin tein Jehová kichiuak, uan ijkon kichiuak para maj tejuatsin no ueli xionmomakixti.

¿KENIUJ TECHMAKIXTIJ JESÚS?

 9. ¿Toni kitematiltij Juan akin teauia? (Hebreos 9:22; 10:​1-4, 12).

⁹ Itech xiuit 29, Juan akin teauia kiitak Jesús de Nazaret uan kijtoj: “¡Xikitakan, iIchkatsin Dios tein techkixtilia tajtakol!” (Juan 1:29). Tein kijtoj kinextij ke Jesús katka tekonetsin akin Dios kijtojka ke ualaskia. Jesús motemakaskia maj kimiktikan. Ikonetsin Jehová ejkokaya para techmakixtiskia den tajtakol uan mikilis (xikonixtajtolti Hebreos 9:22; 10:​1-4, 12).

10. ¿Keniuj kinextij Jesús ke kinpaleuiko akin tajtakolejkej?

¹⁰ Jesús okachi kitemoj kinpaleuis akin kinyolkokouaya tajtakol tein kichiujkaj uan kinyoleuaya maj kitojtokakan. Yejua kimatia ke nochin tajyouiayaj porin katkaj tajtakolejkej. Yejua ika okachi kintemouaya takamej uan siuamej akin tajtakolchiujkaj para kinpaleuis. Ijkon kinextij keman kijtoj nejin: “Akin paktokej amo moneki maj kiitatij tapajtijkej, sayoj ke akin mokokouaj kemaj”. Uan no kijtoj: “Amo nikinnotsako akin yolmelaujkej, ta akin tajtakolejkej” (Mat. 9:​12, 13). Uan yejua nejon tein kichiuak Jesús, keman se siuat kimetspajpakak ika iixayo, yejua kualtsin kinojnotsak uan kitapojpoluij itajtakoluan (Luc. 7:​37-50). Uan no, Jesús kimachtij siuatsin akin katka kayot Samaria, maski kimatia ke nemia iuan se takat  akin amo katka itakatsin (Juan 4:​7, 17-19, 25, 26). Tinochin timomikiliaj porin titajtakolejkej, sayoj ke Dios kimakak Jesús chikaualis para kichiuaskia maj oksepa nemikan takamej, siuamej uan konemej akin momikilijkajya (Mat. 11:5).

11. ¿Keyej akin tajtakolchiuayaj kiuelitayaj iuan yetoskej Jesús?

¹¹ Miakej kiuelitayaj iuan yetoskej Jesús hasta akin tel tajtakolchiuayaj. Yejua kinajsikamatia uan kuali kinnojnotsaya yejua ika kinekiaj iuan yetoskej (Luc. 15:​1, 2). Jesús kiniluiaya akin iuan takuaujtamatiaj ke kuali tein kichiujtoyaj uan katka yolkuali iniuan (Luc. 19:​1-10). Jesús teikneliaya ijkon kemej kichiua iTajtsin (Juan 14:9). Kemej kinnojnotsaya oksekin uan kemej mouikaya iniuan, kinextij ke Jehová kiniknelia uan kintasojta akin tajtakolejkej uan kineki kinpaleuis. Jesús kinpaleuiaya maj mopatakan akin tajtakolchiuayaj uan maj kinekinij kitojtokaskej (Luc. 5:​27, 28).

12. ¿Keniuj Jesús kiniluij imomachtijkauan ke kimiktiskiaj?

¹² Jesús kimatia ke yaya motemaktiti para maj kimiktikan. Miakpa kiniluij itatojtokakauan ke kiixnamikiskiaj uan ke kikoujpampiloskiaj (Mat. 17:22; 20:​18, 19). No kimatia ke inemilis tein kitemakaskia kichiuaskia maj amo titajtakolejkejok ijkon kemej kitematiltijka Juan uan oksekin tanauatianij. Uan no tamachtij ke satepan ke kimiktiskiaj kichiuaskia  maj iuan motokikan “akin pouij itech nochi tataman xolalmej” (Juan 12:32). Akin takuaujtamatiskiaj iuan Jesús uan kichiuaskiaj kemej yejua, ueliskia kiyolpaktiskej Jehová uan ‘kinmakixtiskiaj imako tajtakol’ (Rom. 6:​14, 18, 22; Juan 8:32). Jesús uelik kichiuak nejin porin katka yolchikauak uan motemakak maj kiteltajyouiltikan uan maj kimiktikan (Juan 10:​17, 18).

13. ¿Keniuj kimiktijkej Jesús, uan toni techmachtia de Jehová? (No xikonita taixkopimej).

¹³ Semej itasojikniuan Jesús kitemaktij, satepan akin kiixnamikiaj kikitskijkej, kipijpinaujtijkej uan kipantijkej tein amo melauj, kitajyouiltijkej uan kiixtalijkej kimiktiskej. Uan satepan seki soldados kimasojsokej para kikoujpampiloskej. Maski semi kitajyouiltijkej, Jesús kixikoj nochi tein kichiuilijkej, sayoj ke Jehová okachi tajyouij keman kiitak tein kipanotoya iKonetsin. Yejuatsin semi kitasojtaya iKonetsin uan ueliskia kichiuas maj amo tajyouianiok, sayoj ke amo kichiuak. ¿Keyej? Porin techtasojta. Jesús kijtoj: “Dios semi kintasojtak akin nemij nikan taltikpak, yejua ika kitemakak iKoneuj akin yojtsin uan ijkon akin itech takuaujtamatis amo ixpoliuis, ta nemis nochipaya” (Juan 3:16).

14. ¿Toni mitsonmachtia tein Jehová kichiuak keman kitemaktij iKonetsin?

¹⁴ Inemilis Jesús tein kitemakak kinextia ke Jehová semi techtasojta tinochin tiikoneuan Adán uan Eva. Uan no kinextia ke tejuatsin semi mitsontasojta. Jehová taxikoj keman kitemakak iKonetsin akin semi kitasojtaya para mitsonmakixtis den tajtakol uan mikilis (1 Juan 4:​9, 10). Yejuatsin kineki techpaleuis tisejsemej para maj tiktekitilikan maski titajtakolejkej uan satepan senkis kichiuas maj amo tikpiakanok tajtakol.

15. Kemej Jesús toka momikilij, ¿toni moneki tikchiuaskej para maj techpaleui tein kichiuak?

¹⁵ Tein Dios kichiuak keman kitemaktij iKonetsin techpaleuia maj techtapojpolui totajtakoluan. Sayoj ke tejuan no moneki tikchiuaskej teisa. Juan akin teauia uan Jesucristo techmelauilijkej toni moneki tikchiuaskej: “Ximoyolpatakan, porin iTaixyekanalis Dios tein moajsi iluikak ejkotokya” (Mat. 3:​1, 2; 4:17). Kemej titajtakolejkej moneki timoyolpataskej para uelis tiksentokaskej tiktekitiliskej Jehová uan iuan timotokiskej. Sayoj ke, ¿toni kijtosneki maj se moyolpata uan keniuj nejon techpaleuia maj tikyolpaktikan Jehová maski titajtakolejkej? Tikitaskej nejin itech okse tamachtilis.