1, 2. 1) ¿Keniuj kinita Jehová akin kichiuaj se tajtakol uan amo kinekij moyolpataskej? 2) ¿Toni kineki Jehová?

 JEHOVÁ kitauelita tein amo kuali tein kichiuaj sekin uan no semi kitauelita tajtakol (Sal. 5:​4-6). Dios kineki maj tiktakamatikan tein technauatia itech Biblia. Sayoj ke amo kichia maj amo keman timopolokan porin kimati ke titajtakolejkej (Sal. 130:​3, 4). Maski ijkon, amo no kiuelita tein kichiuaj ‘takamej akin amo yolkualmej, akin kikuij itatiochiualis Dios tein amo technamiki para ika motenpaleuiskej keman kichiuaj tein tetajyaltia uan amo ixpinauaj’ (Jud. 4). Uan Biblia kijtoua ke Dios kinixpolos “akin amo yolkualmej” itech Armagedón (2 Ped. 3:7; Apoc. 16:16).

² Sayoj ke Jehová amo kineki maj nion akin ixpoliui. Kemej tikitakej itech okseki tamachtilismej, Biblia kiyekijtoua ke  yejuatsin kineki maj “nochin moyolpatakan” (2 Ped. 3:9). Ijkon kemej Jehová, tayekananij amo yolijsiuij keman kipaleuiaj akin tel tajtakolchiuak maj moyolpata uan maj oksepa kuali mouika iuan Dios. Sayoj ke kemansa amo kineki moyolpatas (Is. 6:9). Maski tayekananij miakpa kinekij kinpaleuiskej, sekin kisentokaj kichiuaj tein amo kuali. Keman ijkon panos, ¿toni moneki kichiuaskej tayekananij?

“XIKALANKIXTIKAN NEJON TAJTAKOLCHIUJKEJ”

 3. 1) ¿Toni kijtoua Biblia ke moneki kichiuiliskej akin tel tajtakolchiua uan amo moyolpata? 2) Komo aksa amo moyolpata, ¿keyej kemej yeskia iselti kiixtalij maj kikalankixtikan den nechikol?

³ Komo aksa tel tajtakolchiua uan amo moyolpata, tayekananij moneki kichiuaskej tein kijtoua 1 Corintios 5:13: “Xikalankixtikan nejon tajtakolchiujkej akin yetok namouan”. Akin tajtakolchiuak kimati ke kikalankixtiskej komo amo moyolpata, yejua ika kemej yeskia iselti kiixtalij amo yeskiok itaixpantijkauj Jehová, yejua kiselia tein kinamiki porin kichiuak tein amo kuali (Gál. 6:7). ¿Keyej? Porin amo kinekik mopatas maski tayekananij miakpa kitemojkej kipaleuiskej (2 Rey. 17:​12-15). Yejua kinextij ke amo kinekik kitakamatis itanauatiluan Jehová (Deut. 30:​19, 20).

 4. ¿Keyej kitematiltiaj itech nechikol keman kikalankixtiaj aksa?

⁴ Keman kikalankixtiaj aksa de nechikol porin tel tajtakolchiuak uan amo moyolpata, moneki kitematiltiskej ke yejua amo itaixpantijkaujok Jehová. a Sayoj ke yejuan amo kichiuaj para kipinaujtiskej, ta para maj nochin tokniuan kichiuakan tein kijtoua Biblia uan maj amo iuan mouikakanok nion maj iuan takuakanok (1 Cor. 5:​9-11). Jehová kijtoj maj mochiua nejin porin kinpaleuiskia tokniuan. Tatitanil Pablo kijkuiloj: “Tepitsin levadura kixokoltia nochi in tixti” (1 Cor. 5:6). Komo amo kikalankixtiskiaj akin amo moyolpata, tokniuan kinemiliskiaj ke amo moneki kitakamatiskej tein Jehová tanauatia (Prov. 13:20; 1 Cor. 15:33).

 5. ¿Toni moneki tikchiuaskej komo aksa kikalankixtiaj de nechikol, uan keyej?

⁵ ¿Toni moneki tikchiuaskej komo aksa kikalankixtiaj de nechikol? Maski amo iuan timouikajok, amo tiknemiliaj ke amo keman oksepa mokepas. Ta tikitaj kemej yeskia se ichkatsin tein mopoloj uan uelis oksepa mokepas iniuan okseki ichkatsitsin. Maj tikelnamikikan ke yejua motemaktijka iuan Jehová sayoj ke amo kichiujtok tein motenkaujka ke kichiuaskia, yejua ika xa amo uelis nemis nochipaya (Ezeq. 18:31). Sayoj ke, kemej Jehová kiiknelia uelisok mopatas. Komo ijkon, ¿keniuj tayekananij uelis kipaleuiskej aksa akin kikalankixtijkej de nechikol?

¿KENIUJ TAYEKANANIJ KIPALEUIAJ AKIN KIKALANKIXTIJKEJ DE NECHIKOL?

 6. ¿Toni kichiuaj tayekananij para kipaleuiskej aksa akin kikalankixtiaj de nechikol?

⁶ ¿Toni kichiuaj tayekananij keman aksa kikalankixtiaj de nechikol? ¿Kisenkauaj uan amo kipaleuiajok? ¡Amo! Ta keman tayekananij akin iuan mosentilijkej kiluiaj ke amo pouisok itech nechikol, no kiluiaj toni moneki kichiuas para oksepa mokepas. Uan amo sayoj nejon, ta no kiluiaj ke kiuelitaskiaj oksepa iuan mosentiliskej seki metsti satepan para kiitaskej ox kipatakya kemej tanemiliaya. Komo kineki, tayekananij oksepa iuan mosentiliskej uan kiyolchikauaskej maj moyolpata. ¿Uan toni uelis kichiuaskej tayekananij komo ayamo  moyolpatani? Yejuan kitemoskej oksepa iuan mosentiliskej satepan uan kiyolchikauaskej maj moyolpata.

 7. ¿Keniuj tayekananij teikneliaj kemej Jehová keman kitemouaj kipaleuiskej akin kikalankixtijkej de nechikol? (Jeremías 3:12).

⁷ Tayekananij kichiuaj kemej Jehová porin yejua kiniknelia akin kinkalankixtijkej de nechikol. Ne uejkauj keman israelitas amo tatakamatiaj, Jehová niman kitemouaya keniuj kinpaleuis maski yejuan ayamo moyolpatayaj. Yejuatsin kintitania itanauatijkauan hasta achto ke yejuan moyolpataskiaj. Itech ojpatika tamachtilis de nejin amaix kimelaua keniuj Jehová kiluij tanauatijkej Oseas maj kitapojpolui isiuatsin uan maj oksepa iuan mokepani maski yejua kisentokaya tajtakolchiujtoya. Ijkon kinnextilij itekitikauan ke semi teiknelia (Os. 3:1; Mal. 3:7). Ijkon kemej Jehová, tayekananij semi kinekij maj akin tajtakolchiuak moyolpata uan maj mokepa itech nechikol uan yejuan kitemouaj kipaleuiskej maj ijkon kichiua (xikonixtajtolti Jeremías 3:12).

 8. ¿Keniuj tein Jesús ika tajtoj techpaleuia maj okachi tikajsikamatikan ke Jehová teiknelia? (Lucas 15:7).

⁸ Xikonelnamiki tein kichiuak tepopaj akin Jesús ika tajtoj keman ikonetsin mokepak. Niman keman itat kiuejkaitak, “tsikuinteuak kinamikito, kinauaj uan kimakak se beso porin semi kitasojtaya” (Luc. 15:20). Tepopaj kinextij ke semi kitasojtaya ikonetsin uan amo kichiak maj kiluiani maj kitapojpolui, ta yejua achto kinextij ke kitapojpoluiaya. Tayekananij no ijkon momachiliaj keman se tokniuj tajtakolchiua uan mochikauaj kipaleuiskej maj mokepa iuan Jehová (Luc. 15:​22-24, 32). Keman aksa akin tajtakolchiuak mokepa, Jehová, Jesús, ángeles uan nochin tokniuan semi yolpakij (xikonixtajtolti Lucas 15:7).

 9. ¿Toni kinyolchikaua Jehová maj kichiuakan akin tel tajtakolchiujkej?

⁹ Timomachtijkejya ke Jehová amo kinkaua maj kisentokakan itech inechikol akin tel tajtakolchiujkej uan amo moyolpataj. Uan no, kisentoka kinpaleuia porin kineki maj mokepakan. Uan Oseas 14:4 kijtoua keniuj momachilia Jehová keman moyolpataj: ‘Nikchiuas maj amo nechkauakanok, semi nikintasojtas porin amo nikualantosok’. Kemej kimatij keniuj momachilia Jehová, tayekananij kiitaj tein yeski taman tein kinextia ke aksa peua moyolpata. Uan nejin texto uelis kinyolchikauas akin kikaujkej Jehová maj kimatikan ke yejuatsin kintasojta uan kineki maj iuan mokepakan.

10, 11. ¿Keniuj tayekananij kintemouaj kinpaleuiskej akin ne uejkaujya kinkalankixtijkej de nechikol?

¹⁰ ¿Keniuj tayekananij uelis kinpaleuiskej akin ne uejkaujya kinkalankixtijkej? Sekin xa amo kichiuajok tajtakol tein kichiuayaj keman kinkalankixtijkej, uan sekin xa amo kielnamikijok keyej kinkalankixtijkej. Maski ne uejkaujya tajtakolchiujkaj tayekananij kintemoskej uan kinkalpanoskej. Keman kinkalpanoskej, iniuan kitataujtiskej Jehová uan kinyolchikauaskej maj mokepakan itech nechikol. Sayoj ke komo aksa kikalankixtijkej ne uejkaujya, moneki oksepa kiixmatis Jehová uan itanauatiluan. Yejua ika komo kijtoua ke kineki mokepas, tayekananij uelis kiixtaliskej maj se tokniuj takat oso siuat kimachti Biblia maski ayamo mokepa itech nechikol. Sayoj tayekananij uelis kijtoskej akoni tamachtis.

¹¹ Tayekananij kitemouaj tetasojtaskej kemej Jehová kichiua. Yejua ika mochikauaj kintemoskej nochin akin kikaujkej Jehová uan kinyolchikauaskej maj oksepa iuan mokepakan. Komo aksa kinextia ke  moyolpatakya uan amo tajtakolchiuaok, niman uelis oksepa pouis itech nechikol (2 Cor. 2:​6-8).

12. 1) ¿Kemanian tayekananij moneki okachi kuali kiitaskej ox aksa uelis oksepa pouis itech nechikol? 2) ¿Keyej amo moneki tiknemiliskej ke Jehová amo keman kiniknelisok akin tel tajtakolchiujkej? (No xikonita nota).

¹² Tayekananij moneki okachi kuali kiitaskej ox uelis oksepa pouis itech nechikol aksa akin kichiuak seki tajtakolmej kemej nejin: kitajyouiltiaya se konetsin oso moyekmati ke kichiualtij maj iuan auilnemi, mochiujka apóstata oso kichiuak teisa para maj amo ixnestook ke iuan monamiktijka akin katka itakatsin oso isiuatsin. Keman ijkon panos, tayekananij moneki kuali kiitaskej ox yekmelauj moyolpatakya (Mal. 2:14; 2 Tim. 3:6). Yejuan moneki kinyekpiaskej tokniuan itech nechikol. Sayoj ke moneki tikajsikamatiskej ke Jehová kiselis akin yeski akin yekmelauj moyolpata uan amo kichiuaok tein amo kuali. Yejua ika, maski tayekananij moneki kiitaskej ox yekmelauj moyolpatakya akin kichiujka nejin uejueyi tajtakolmej, amo moneki  kinemiliskej ke Jehová amo keman kiiknelisok (1 Ped. 2:10). b

¿TONI UELIS KICHIUASKEJ TOKNIUAN ITECH NECHIKOL?

13. ¿Keniuj timouikaj iuan aksa akin kimelauaj, uan iuan aksa akin kikalankixtiaj de nechikol?

¹³ Itech okse tamachtilis tikitakej ke keman tayekananij kimelauaj aksa, kemansa kitematiltiaj itech nechikol. Keman ijkon panoua uelis tiksentokaskej iuan timouikaskej nejon tokniuj porin tikmatij ke moyolpatakya uan amo tajtakolchiuaok (1 Tim. 5:20). Yejua kisentoka poui itech nechikol uan moneki maj tokniuan kiyolchikauakan para kisentokas kichiuas tein kuali (Heb. 10:​24, 25). Sayoj ke amo ijkon tikchiuaj keman kikalankixtiaj aksa de nechikol, porin amo iuan timouikajok nion iuan titakuajok (1 Cor. 5:11).

14. ¿Toni uelis kiixtalis kichiuas sejse tokniuj keman moajsis iuan akin kikalankixtijkej de nechikol? (No xikonita taixkopimej).

¹⁴ ¿Kijtosneki nejin ke amo uelis tikyoleuaskej maj youi nechikolmej aksa akin kikalankixtijkej de nechikol oso amo uelis tiktajpaloskej keman touan mosentilis? Amo. Tikmatij ke amo iuan timouikaskiaj nion uejkauak iuan tietoskiaj. Sayoj ke tisejsemej tikmatij toni tikchiuaskej uan tein timomachtianij itech Biblia techpaleuis maj tikmatikan ox tikyoleuaskej maj youi nechikol aksa akin kikalankixtijkej, xa se tochankauj oso aksa akin katka totasojikniuj. ¿Uan toni moneki tikchiuaskej komo youi nechikol? Ne uejkauj ipa amo tiktajpaloskiaj. Sayoj ke no sejse tokniuj moneki kiixtalis toni kichiuas, uan tein momachtiani itech Biblia semi kipaleuis. Sekin xa kitajpaloskej oso kiluiskej ke yolpakij porin yajki nechikol. Sayoj ke amo uejkauak tiknojnotstoskiaj nion tikchiuaskiaj seki taman iuan.

15. ¿Akonimej ininka tajtoua 2 Juan 9-11? (Xikonita recuadro “ ¿Sayoj se taman tajtakol ika tajtojtoyaj tatitanil Juan uan Pablo?”).

¹⁵ Biblia ininka tajtoua sekin akin tajtakolchiuaj, akin amo moneki tikintajpaloskej porin komo tikchiuaskiaj kemej yeskia ‘no tikchiujtoskiaj tein amo kuali tein yejuan kichiuaj’ (xikonixtajtolti 2 Juan 9- 11). Tein ika tajtoua nejin versículos kinextia ke ininka tajtojtok akin mochiujkej apóstatas, oso akin kitemouaj maj kichiuakan tein Biblia kijtoua ke tajtakol (Apoc. 2:20). Yejua ika, komo aksa nochipa kimoyaujtok tein tamachtiaj apóstatas oso okseki taman tein amo kuali, tayekananij amo kinemiliskiaj kikalpanoskej. Maski ijkon, xa uelisok mopatas. Sayoj ke komo amo kichiua, amo tiktajpaloskiaj nion tikyoleuaskiaj maj youi se nechikol.

MAJ TITETASOJTAKAN UAN MAJ TITEIKNELIKAN KEMEJ JEHOVÁ KICHIUA

16, 17. 1) ¿Toni kineki Jehová maj kichiuakan akin tajtakolchiujkej? (Ezequiel 18:32). 2) ¿Keniuj tayekananij uelis tekitiskej iuan Jehová?

¹⁶ ¿Toni timomachtijkej itech nejin amaix? Ke Jehová amo kineki maj nion akin ixpoliui (xikonixtajtolti Ezequiel 18:32). Kineki maj nochin akin tajtakolchiuaj oksepa kuali iuan mouikakan (2 Cor. 5:20). Yejua ika desde ne uejkaujya, Jehová miakpa kiniluiani akin kikauanij maj moyolpatakan uan maj oksepa kuali iuan mouikakan. Uan tayekananij iuan tekitij Jehová para kinpaleuiskej maj moyolpatakan akin tel tajtakolchiuaj (Rom. 2:4; 1 Cor. 3:9).

¹⁷ Ángeles semi yolpakij keman akin tajtakolchiuaj moyolpataj. ToTajtsin no semi yolpaki keman aksa oksepa mokepa itech nechikol. Maj nochipa itech titanemilikan keniuj Jehová kinextia ke teiknelia, tetasojta uan tetatiochiuia maski amo technamiki porin nejon techpaleuis maj okachi tiktasojtakan (Luc. 1:78).