Namikuanij akin sentekitij yejuan kemej yeskiaj akin kisenuikaj se avión uan kimatij kani ajsiskej. Kitemouaj keniuj tein kichiuaskej kinpaleuis omen hasta keman kipiaj kuejmolmej.

BIBLIA KIJTOUA: “Amo omenok, ta sayoj se” (Mateo 19:6).

“Para maj kuali yetokan namikuanij omen moneki mosenpaleuiskej” (Christopher).

Komo namikuanij amo sentekitij, keman kipiaskej se kuejmol mokualantiskej uan amo kitemoskej keniuj kiyektaliskej, maski nejon kuejmol amo ueyi katka satepan okachi ueyias.

“Semi moneki maj mosenpaleuikan namikuanij. Komo notakatsin uan nejua amo timosenpaleuiskiaj, sayoj kemej yeskia tisennemiskiaj itech se kali, uan amo tiksenixejekoskiaj seki taman tein okachi tayekantokej ” (Alexandra).

XIKONITA TEIN TIKONCHIUA

• ¿Tikonnemilia ke tomin tein tikontani sayoj moaxka?

• ¿Tikonita ke keman tionyetok moselti okachi kuali tionmomachilia?

• ¿Amo semi tionmouika iniuan ichankauan monamik maski yejuan kemaj kuali mouikaj?

TEIN IKA UELIS NANTAJTOSKEJ

• ¿Toni kuali tiksenchiuaj kemej namikuanij?

• ¿Toni seki taman uelis okachi kuali tiksenchiuaskej?

• ¿Toni techpaleuis para maj tisentekitikan kemej namikuanij?

TEIN UELIS TIKONCHIUAS

• Xikonnemili ke nenamiktilis kemej yeskia keman se mauiltia básquetbol. ¿Toni ueliskia nankichiuaskej para nansenmauiltiskej uan amo nanmotataniskej?

• Amo sayoj xikonnemili keniuj tejua tiontatanis, ta keniuj nanomen nantataniskej.

“Maj amo tikitakan akoni mopoloj. Ta tein okachi moneki, yejua maj kuali tietokan uan maj kuali timouikakan kemej namikuanij” (Ethan).

BIBLIA KIJTOUA: “Amo xiktemokan tein sayoj namejuan namechpaleuis, ta no tein kinpaleuis oksekin” (Filipenses 2:3, 4).