Tein techmachtia Dios Akin techchijchiuak techpaleuia maj tikchiakan tein kuali
Dios kijtoua ke amo uejkaua kipatas seki taman tein semi techyolpaktis. Kichiuas maj amo akin tajyouiok uan maj nochin yolpakikan (Salmo 37:11). ¿Keyej uelis titakuaujtamatiskej ke yekmelauj mochiuas? Porin “Dios amo takajkayaua kemej kichiuaj taltikpakneminij” (Números 23:19). Maj tikitakan seki taman tein Dios kichiuas.
Dios kinixpolos akin amo yolkualmej
“Keman akin amo yolkualmej ixuaj kemej amo kuali xiuit uan nochin akin kichiuaj tein amo kuali xochiyouaj, ijkuakya senkis kinixpoloskej” (SALMO 92:7).
Kemej tikitakejya itech okse tamachtilis, okachi mochiua tein amo kuali itech taltikpak. Nejin amo tikmoujkaitaj porin Biblia kijtojkaya ke ijkon mochiuaskia, itech 2 Timoteo 3:1-5 kijtoua ke itech “itamian tonalmej” miakej yeskiaj semi amo yolkualmej. Sayoj ke ¿toni tamis? Nochin akin amo kipoujkaitaj Dios. Amo uejkaua Dios kinixpolos nochin akin amo kinekij kikauaskej tein amo kuali. Uan sayoj nemiskej akin kinekij kitakamatiskej Dios. Kemej kijtoua Salmo 37:29: “Akin yolmelaujkej ininaxkatis taltikpak uan ompa nemiskej nochipaya”.
Dios kiixpolos Satanás
“Dios kimakatinemi yolseuilis. Uan [...] amo uejkauas ok para kitamitanilis in amokuali” (ROMANOS 16:20).
Keman Satanás, amo kuali ejekamej uan akin amo yolkualmej ixpoliuiskej, onkas yolseuilis itech taltikpak. Dios Akin techchijchiuak kijtoua: ‘Amo akinok namechmojmoujtis’ (Miqueas 4:4).
Dios kiixpolos tein techkokolispeualtia uan mikilis
“Totajtsin Dios mokaltalikiu intsalan in ipueblojkauan; uan [...] kinelkaualtis de ninchokilisuan [...]. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (APOCALIPSIS 21:3, 4).
Dios kiyektalis nochi tein amo kuali tein techchiuilianij Satanás, Adán, Eva uan tajtakol. Yejua ika amo akin tajyouis, kokolispeuas uan “amo aken momikilis ok”. Nochin akin kitasojtaj uan kitakamatij Dios Akin techchijchiuak nemiskej nochipaya. ¿Kani?
Dios Akin techchijchiuak kichiuas taltikpak se xochital
“Onkas yolpakilis taluakyan uan kampa tauaktok. Onkas yolpakilis taluakyan uan taxochiouas kemej azafrán” (ISAÍAS 35:1).
Keman Dios kiixpolos tein amo kuali, taltikpak yeski se xochital. Noyampa semi takualtsinkan yeski uan semi takis tein tikuaskej (Salmo 72:16). Nochi uejueyi amej uan tsikitsitsin, yeskij chipaujkej uan kipiaskej miak taman tein yoltok. Uan xa amo keman tikijtoskejok ke teisa amo chipauak. Nochin mochijchiuiliskej ininchan uan ompa nemiskej. Amo akin kipanos mayan, tatasojtilis nion nemis ojti (Isaías 65:21, 22).
Dios kichiuas maj oksepa nemikan akin momikilijkejya
“Totajtsin Dios kinpankixtis yoltokke nochi in ánimajme” (HECHOS 24:15).
¿Tikonuelitaskia tikonitas maj oksepa nemikan mochankauan uan akin kuali iniuan tionmouikaya akin momikilijkejya? Keman taltikpak yeski se xochital, Dios Akin kipia nochi chikaualis kichiuas maj oksepa nemikan. ¡Xikonnemili keniuj semi nanyolpakiskej keman oksepa namoitaskej! Biblia kinextia ke seki konemej uan akin uejueykejya oksepa kipiakej ininnemilis uan oksepa mosentilijkej iniuan ininchankauan. Uan Jesucristo kichiuak maj sekin oksepa neminij ininixpan miakej (Lucas 8:49-56; Juan 11:11-14, 38-44).
Xa no tikonuelitas
¡TAIJXITILIS!
Kuejmolmej tein axkan onkak: Xikonchia tein kuali
Biblia techpaleuia maj tikixnamikikan ouijkayomej uan maj tikchiakan tein kuali.
SEKI TAMAN TEIN BIBLIA TAMACHTIA TEIN TAYEKANTOKEJ
¿Keniuj moajsij mikemej?
Biblia motenkaua ke ejkos tonal keman miakej akin momikilijkejya oksepa kipiaskej nemilis, kemej panok iuan Lázaro.
TEIN TIMOTAJTANIAJ DE BIBLIA
¿Toni nechpaleuis maj nikchia nikselis tein kuali?
Tein Biblia tamachtia uelis mitsonpaleuis okachi kuali xionnemi axkan uan xikonneltoka ke uelis tikonchias maj pano tein kuali satepan.
