“Amo ximoyolkuejmolokan den toni mochiuas mosta, porin ne tonal den mosta kualkuis okse ne kuejmololis.” (MATEO 6:34.)

Nejin kijtosneki ke mojmostaj onkak seki taman tein techtekipachoua. Sayoj ke, amo kuali yeskia maj timotekipachokan ika tein uelis panos satepan. Yejua ika, amo ika xiontanemili tein mochiuas satepan.

• Komo tionmotekipachoua, semi tiontanemilijtos. Yejua ika, ¿toni uelis tikonchiuas? Yekinika, amo uelis tikijtoskej ke amo keman timotekipachoskej. Sayoj ke, komo semi tiontanemilia ika seki taman tein amo uelis tikonyektalis, okachi tionmotekipachos. Uan ojpatika, kemansa amo mochiua kemej tikonnemiliaya.

“Akin tanemilia kemej Dios [...] kipata tein ixyetok.” (SANTIAGO 3:17, TNM.)

Nejin kijtosneki ke amo nochipa kuali kisas seki taman tein tikonchiuas. No kijtosneki ke amo xikonchia maj oksekin nochipa kuali kichiuakan teisa.

• Xikonnexti yolyemanilis, kuali xiontaixejeko uan xikonnemili tein uelis tikonchiuas uan tein amo. No xikonnemili tein oksekin uelis kichiuaskej uan tein amo. Komo ijkon tikonchiua, tejuatsin uan oksekin kuali nanmomachiliskej. Uan no, xikontemo nochipa tionyolpakis. Keman tiuetskaj maski se taman amo kuali kisa, amo semi timotekipachouaj uan kuali timomachiliaj.

“Takat akin kipia kuali taixejekolis yolseujtos.” (PROVERBIOS 17:27.)

Nejin kijtosneki ke keman amo kuali timomachiliaj, amo kuali titanemiliaj. Yejua ika, moneki xionyolseujto.

• Xikonnemili keyej semi tionmotekipachoua uan tein tikonchiua keman ijkon mitsonpanoua. Xikonita keniuj tiontanemilia, keniuj tionmomachilia uan tein tikonchiua. Xa hasta uelis tikonijkuilos. Ijkon, tikonmatis tein uelis tikonchiuas. No xikonnemili okseki taman tein mitsonpaleuis amo semi xionmotekipacho. Komo tikonsentoka tionmotekipachoua, mitsonpaleuis komo tikonixtalia keniuj tikonchiuas sejse taman uan kemanian.

• Kemej tataman titanemiliaj, tataman tein techtekipachoua. Yejua ika, xikonpata tein tikonnemilia. Xikontemo tikonchiuas nejin:

  1. Amo niman xikonnemili ke oksekin nochipa kichiuasnekij tein amo kuali. Xikonnemili ke tejuatsin tikonchixtok se taman tein oksekin no kichixtokej, sayoj ke se akin moajsi moikampa mitsonpanauia. Komo tikonnemilia ke ipa kinekia mitsonpanauis, tionkualanis. Yejua ika, amo xikonnemili ke ijkon kiixtalijtoya.

  2. Xikonnemili tein uelis tikonchiuas. Komo moneki uejkaua tionmochias kampa kisaj teposmej oso keman tionpanos iuan tapajtijkej, uelis tiontaixtajtoltis oso tikonchiuas okseki taman.

  3. Xikonnemili nochi tein panoua. Xionmotajtani: “¿Niksentokas nikitas mosta oso okse semana ke se ueyi kuejmol tein axkan nikpanoua?”. Xikonita katiyejua ueyi kuejmol uan katiyejua amo.

“Nochi xikchiuakan ika nejmach uan ka kuali.” (1 CORINTIOS 14:40.)

Nejin kijtosneki ke moneki tikonixtalis keniuj tikonchiuas sejse taman.

• Tinochin moneki maj tikixtalikan keniuj tikchiuaskej sejse taman. Komo seki taman amo niman tikchiuaj, amo tikmatiskejok tein tikchiuaskej uan peuas timotekipachoskej. Uan no, momiakilis tekit. Xikontemo tikonchiuas nejin:

  1. Xikonixtali hora keman tikonchiuas sejse taman uan ijkon xikonchiua.

  2. Xikonnemili tein mitsontsakuilia tikonchiuas se taman uan amo xikonkaua maj nejon mitsontsakuili.

“Okachi kuali maj se moseui ke semi se motekitiltis uan se kitojtokas ejekat.” (ECLESIASTÉS 4:6.)

Nejin kijtosneki ke akin semi tekitij semi mosioujtiaj uan amo uelijok moyolpaktiaj.

• Amo semi xionmotekitilti nion xikontemo tionmotomintis. Maski tikonpias miak tomin amo kijtosneki ke okachi tionyolpakis oso ke amo tionmotekipachosok. Xa hasta okachi tiontajyouis. Eclesiastés 5:12 kijtoua ke “nochi tein kipia tominpixkej amo kikaua maj kochi”. Yejua ika, xionnemi ika tein tikonpias.

• Xionmoixpetani. Komo tikonchiua tein tikonuelita, amo semi tionmotekipachos. Sayoj ke, kemansa amo semi tepaleuia keman se kichiua seki taman kemej ijkuak se kiita televisión.

• Xikontekitilti celular oso tableta ika taixejekol. Nejon kijtosneki ke amo moneki nochipa tikonitas redes sociales oso tein mitsonijkuilouiliaj. Keman amo tionyetos motekipan, amo xikonchiua seki taman tein ompa tikonchiuaskia komo amo semi moneki.

“Techpaleuia tensa kuak tikmachtia ke totakayo ma molini.” (1 TIMOTEO 4:8.)

Nejin kijtosneki ke komo tikmachtiaj tonakayo maj moolini, semi techpaleuis.

• Xikonchiua tein mitsonpaleuis. Komo tikonchiua maj monakayo moolini mitsonpaleuis amo semi xionmotekipacho. Xikonkua seki taman tein kipaleuis monakayo uan xiontakua hora keman ixyetok. Uan no, kuali xionkochi.

• Komo tiontachichina, tikonkui drogas oso tiontauana, amo mitsonpaleuis. Komo tikonchiua nejon, satepan okachi tionmotekipachos, tionkokolispeuas uan amo tikonpiasok tomin.

• Komo tikonsentoka tionmotekipachoua, xikonitati tapajtijkej. Amo xionpinaua tikontemos maj mitsonpaleuikan.

Xikonita “toni okachi tayekantok” (FILIPENSES 1:10).

Nejin kijtosneki ke moneki tikonnemilis toni taman okachi moneki.

• Xikonijkuilo katiyejua taman moneki niman tikonchiuas. Ijkon, tikonchiuas tein okachi moneki uan no tikonitas katiyejua taman uelis tikonchiuas satepan, tein uelis kichiuaskej oksekin uan tein amo tikonchiuasok.

• Itech se semana, xikonijkuilo tein tikonchiua uan itech kanachi tiempo tikonchiua. Satepan, xikonnemili keniuj okachi kuali tikonkuis motiempo. Komo tikonita ke kuali tikonchiua nochi, amo semi tionmotekipachos.

• Xionmoseui. Komo tionmoseuia maski sayoj tepitsin, kuali tionmomachilis uan amo semi tionmotekipachos.

“Se takat motayokoltia keman motekipachoua, sayoj ke keman kiluiaj tein kuali moyolchikaua.” (PROVERBIOS 12:25.)

Nejin kijtosneki ke uelis mitsonyolchikauas komo oksekin kuali mitsonnojnotsaj uan komo mitsonnextiliaj ke moka motekipachouaj.

• Xikonilui tein tikonmachilia se akin iuan tionmouika uan tikonmati ke mitsonajsikamatis. Yejua uelis mitsonpaleuis okachi kuali xikonnemili se taman uan hasta uelis mitsonpaleuis xikonita keniuj tikonchiuas teisa tein xa tejuatsin amo tikonnemilijtoya. Uan no, kuali tionmomachilis maski sayoj tikoniluis tein tikonmachilia.

• Xikonilui oksekin maj mitsonpaleuikan. ¿Uelis tikoniluis oksekin maj kichiuakan se tekit oso tikontemos akin uelis mitsonpaleuiskej itech seki taman?

• Komo akin iuan tiontekiti kichiua seki taman tein kichiua okachi xionmotekipacho, uelis tikonchiuas seki taman. Xa uelis tikoniluis ika miak nejmachkayot ke amo kuali tionmomachilia keman kichiua seki taman (Proverbios 17:27). Komo tikonita ke amo mitsonkaki, xa ueliskia amo semi iuan tionmouikasok.

“Yolpakij akin kimachiliaj ke moneki motokiskej iuan Dios.” (MATEO 5:3, TNM.)

Nejin kijtosneki ke maski moneki tikpiaskej tein tikuaskej, tein timotaliliskej uan kampa tinemiskej, no moneki timotokiskej iuan Dios. Komo tikitaj ke moneki timotokiskej iuan Dios uan iuan timotokiaj, tiyolpakiskej.

• Komo tikonchiua netataujtil, semi mitsonpaleuis. Dios kineki xikonilui nochi tein mitsonpanoua porin moka motekipachoua (1 Pedro 5:7). Komo tikonchiua netataujtil uan tikonnemilia tein kuali, okachi tionyolseujtos (Filipenses 4:6, 7).

• Xikonixtajtolti tein mitsonpaleuis xionmotoki iuan Dios. Biblia moijkuiloj kemej techpaleuis maj timotokikan iuan Dios. Yejua ika, seki tamachtilismej tein moijtouaj itech nejin amaix mokixtiaj itech Biblia. Nejon tamachtilismej no uelis techpaleuiskej maj kuali titanemilikan (Proverbios 3:21). Xikonixtali tikonixtajtoltis Biblia. Uelis tionpeuas itech amatajkuilol Proverbios.