Satepan, keman israelitas yetoyajok taluakyan, Coré, Datán, Abiram uan okseki 250 takamej kiixnamikkej Moisés. Yejuan kiluijkej: “¡Nantechyolajxitijkejya! ¿Keyej moneki tejua titechixyekanas? ¿Uan keyej Aarón moneki kinixyekanas tiopixkamej? Jiova amo sayoj yetok mouan uan iuan Aarón, no yetok touan”. Jiova amo kiyolpaktij nejon, porin kimachilij ke yejuatsin kiixnamiktoyaj.

Moisés kiniluij Coré uan akin iuan yetoyaj: “Xiualakan tabernáculo mosta uan xikualkuikan tein ika nantapopochuiaj uan xiktalilikan kopal. Jiova technextilis akoni kiixpejpenak”.

Mostika, Coré uan 250 takamej mosentilitoj iuan Moisés itech tabernáculo. Ompa peuak kichichinouaj kopal kemej yeskiaj tiopixkamej. Jiova kiluij Moisés uan Aarón: “Xikintalkauikan Coré uan takamej akin kipaleuiaj”.

Coré yajki itech tabernáculo kampa yetoya Moisés, sayoj ke Datán, Abiram uan ininchankauan amo kinekkej yaskej. Jiova kiniluij israelitas: “Xikintalkauikan inintakenkaluan Coré, Datán  uan Abiram”. Israelitas ijsiujka mijkuanijkej. Datán, Abiram uan ininchankauan ijkatoyaj kalampa itech inintakenkaluan. Ompa, tal motapoj uan kintoloj. Uan temok se tit itech tabernáculo, uan kinixpoloj Coré uan 250 takamej.

Satepan, Jiova kiluij Moisés: “Maj taixyekananij itech nochi 12 uejueyi kalyetouanij kiualkuikan inintopil. Xikijkuilo itokay sejse taixyekankej itech itopil. Sayoj ke itech itopil akin poui iuan Leví, xikijkuilo itokay Aarón. Xikintali topilmej taijtik itech tabernáculo. Itopil takat akin nejua nikixpejpenas, xochiyouas”.

Mostika, Moisés kinkixtij nochi topilmej uan kinnextilij taixyekananij. Itopil Aarón kipiaya xochimej uan almendras tein chikaujkejya. Ijkon Jiova kinextij ke kiixpejpenka Aarón maj kinixyekana tiopixkamej.