Noé, ichankauan uan tapialmej kalakkej itech arca. Jiova tatsakuak, uan peuak kioui. Kemej tel kiouik, arca peuak mokaua aixko. Yolik, itech nochi taltikpak taapexonik. Nochin akin amo yolkualmej mokaujkej kalampa uan momikilijkej. Sayoj ke Noé uan ichankauan amo teyi kinpanok porin yetoyaj itech arca. ¿Tiknemilia keniuj tel yolpakkej porin kitakamatkej Jiova?

Tel kiouik omepoual tonal uan omepoual youal, uan ompa takisak. Ijkon kemej panokej tonalmej, at kaxanik. Satepan, arca motsakuilij ikuapan se tepet. Sayoj ke kemej kalampa onkayaok miak at, Noé uan ichankauan amo uelik kiskej seki metsti.

Tonalmej panotiyajkej, uan at kaxantiyajki. Sennochiya, Noé uan ichankauan yetoyaj itech arca panoua se xiuit. Ompa, Jiova kiniluij ke ueliskiaj kisaskej. Tel yolpakiaj porin Jiova kinmakixtijka, yejua ika kimakakej se nemaktil.

Jiova kiuelitak nejon nemaktil, uan motenkauak ke amo kemanok kiixpoloskia tein onkak itech taltikpak ika se tetsaujkakiouit kemej nejon. Kiyeknextij ke kichiuas tein motenkauak keman kichiuak maj moitani yekinika arcoíris ne iluikak. ¿Kemansa tikitani se arcoíris?

Uan no, Jiova kinnauatij Noé uan ichankauan maj kinpianij konemej uan maj momoyauanij itech taltikpak.