1, 2. ¿Kani uelis tikajsiskej se yekmelauj nepaleuil?

XIONMONEMILI ke tionmoixpetanijtok kansaika uan peua tel tatileui. Uan tapepetani, tatitikuini uan peua tel kiouaejeka. Tejuatsin tionmotaloua tikontemojtiuj kani tionmopaleuis. Ompa, ojtenoj tikonita se kali tein taijtik uakik uan tikonita nesi taxikos. ¿Amo melauj ke tionyolpaki?

² Axkan tonalmej semi ouijkan uan tamouililpan, ta kampa tinemij okachi mochiua tein amo kuali. Maski ijkon, moajsi se yekmelauj nepaleuil tein uelis tikpiaskej ijkuak tikijyouiskej tein amo kuali, uan timoluiskej amo keman moyektalis. ¿Toni nejin? Xikonita tein kijtoua Biblia: “Yekmelauj nikiluis Jiova: ‘Tejua tinoaltepeuj chikauak tein kiyoualojtok tepamit, noDios, akin itech yekmelauj nitakuaujtamatis’” (Salmo 91:2).

3. ¿Keniuj uelis yeski Jiova tonepaleuil?

 ³ Jiova, akin tachijchiuak uan akin okachi Ueyichiujkej itech iluikak uan taltikpak, uelis yeski tonepaleuil. ¡Se ueyi tatiochiualis! Yejuatsin okachi kipia uelilis ke okse aksa oso teisa tein uelis techmojmoujtis. Uan maski techkokoskej, Jiova uelis kiyektalis nochi nejon. ¿Keniuj uelis yeski Jiova tonepaleuil? Komo titakuaujtamatij iuan. Uan no, Biblia techyoleua: “Xiksentokakan itech inetasojtalis Dios” (Judas 21, TNM). Kemaj, moneki tiksentokaskej itech inetasojtalis Dios uan tiyetoskej iuan toTajtsin akin nemi iluikak. Komo ijkon tikchiuaj, uelis senkis tikneltokaskej ke yejuatsin yeski tonepaleuil. Axkan, ¿keniuj uelis tel kuali timouikaskej iuan Dios akin tachijchiuak?

4, 5. ¿Katiyejua seki taman kinextia ke Dios techtasojta?

⁴ Tein techpaleuis maj tiksentokakan itech inetasojtalis Dios, moneki tikitaskej keniuj yejuatsin technextilia netasojtalis. Xiontanemili itech seki tamachtilismej tein Biblia kitemaka tein tikitakej itech nejin amaix. Seki yejua nejin: Jiova kichijchiuak taltikpak kampa tinemiskej maj takualtsinkan. Kitalij nochi tein tapaleuia maj onka nemilis, maj tel onka takual uan at, maj nemikan kualtsitsin tapialmej, uan maj takualtsinkan. No tikmatij ke Dios kichiuak maj moijkuilo Biblia, uan ompa techiluia keniuj itokay uan toni kualneskayomej kipia. No techiluia ke kiualtitanik iKonetsin nikan, uan kikauak maj tajyouiani uan maj toka momikiliani (Juan 3:16). Nejon techmakak kemej se netetayokolil ika nochi iyolo, uan kemej kichiuak nejon, tikchiaj se tel kualtsin nemilis amo uejkaua.

 ⁵ Dios kichiuak okse taman uan yejua ika ueli tikchiaj nejon nemilis. Jiova kitalij se iluikak Tekiuajyot tein kimaktilij Cristo. Nejin Tekiuajyot amo uejkaua kitamis nochi tajyouilis tein tikpiaj uan kichiuas taltikpak se xochital. ¡Tel kualtsin yeski! ¡Ijkuak tinemiskej nochipaya, tiyolpakiskej uan tikpiaskej yekyetolis! (Salmo 37:29.) Uan maski nejon mochiuas satepan, axkan Dios techmaka tayolmajxitilis tein techpaleuia maj tinemikan okachi kuali tein uelis. Jiova no techmaka netataujtil kemej se netetayokolil, kampa ueli tiktapouiaj nochi. Nejin yejua seki taman tein kinextia ke Jiova mitsontasojta tejuatsin uan tinochin.

6. ¿Keniuj no ijkon uelis tikonchiuas kemej Dios mitsonnextilia netasojtalis?

⁶ Axkan, moneki tionmochiuilis nejin netajtanil tein motelneki: “¿Keniuj no ijkon uelis nikchiuas iuan?”. Miakej xa tanankiliskiaj: “Maj no se kitasojta Jiova”. ¿Ijkon tikonnemilia tejuatsin? Jesús kijtoj ke tanauatil tein okachi tayekantok yejua nejin: “Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililis” (Mateo 22:37). Tejuatsin yekmelauj tikonpia miak taman keyej tikontasojtas Jiova. Axkan, tikontasojtas Dios ika nochi moyolo, motanejnekilis uan motanemililis, ¿sayoj kijtosneki xikonmachili?

7. ¿Sayoj moneki tikmachiliskej ke tiktasojtaj Dios? Xikonmelaua keyej ijkon tiontanankilia.

⁷ Kemej Biblia kinextia, se kitasojtas Dios amo sayoj kijtosneki maj se kimachili. Uan maski nejon motelneki, sayoj ipeujyan yekmelauj netasojtalis tein tikpialiaj  Dios. Maj tiktalikan se neskayot tein techpaleuis maj okachi tikajsikamatikan. Komo tejuatsin tikonnekiskia se koujtakilot, ¿tikontasojkamatiskia maj sayoj iteyo mitsonmakakan? ¿Melauj ke amo? Maski iteyo uelis tikontokas uan ijkon moskaltis se kouit, tejuatsin tikonneki itakilo. No ijkon panoua ika netasojtalis tein tikmachiliaj iuan Dios. Moneki moskaltis uan kitemakas itakilo, ijkon kemej iteyo koujtakilot. Biblia tamachtia: “Nestinemi ke melau tikpiaj ne tetasojtalis de Dios, kuak no tiktakamatij ya in tanauatil [...]. Uan in tanauatilme de Dios amo techmachililtia ke kox semi oui para se kintakamatinemis” (1 Juan 5:3). Kemaj, yekmelauj netasojtalis tein tikpialiaj Dios moneki kitemakas kuali takilomej, oso monextis ika tachiualis (xikonixtajtolti Mateo 7:16-20).

8, 9. ¿Keniuj tiknextiaj ke tiktasojtaj Dios uan tiktasojkamatiliaj nochi tein techmaka?

⁸ Tiknextiaj ke tiktasojtaj Dios keman tiktakamatij  itanauatiluan uan tikchiuaj kemej techyolmajxitia. Nejon amo tel ouij, ta itanauatiluan Jiova amo se tamamal. Dios kinemilij kemej techpaleuis maj tiyolpakikan uan maj tikuelitakan tinemiskej (Isaías 48:17, 18). Keman timokauaj maj Jiova techojtokalti, tiknextiaj ke semi tiktasojkamatiliaj tein techmaka. Tetayokoltij maj sayoj se ome eyi kitasojkamatilikan. Tejuan tiknekij timotasojkamatiskej, amo kemej sekin akin nemiaj itech itonaluan Jesús. Keman kinpajtij majtakti takamej akin kokotokatoya ininnakayo, sayoj se mokepak uan kitasojkamatilij (Lucas 17:12-17). Tiknekij tikchiuaskej kemej takat akin kitasojkamatilij Jesús, uan amo kemej chiknauin akin amo kitasojkamatilijkej.

⁹ ¿Katiyejuan itanauatiluan Jiova moneki tiktakamatiskej? Seki tikitakej itech nejin amaix. Maj tikelnamikikan se ome eyi, ta komo tiktakamatij okachi amo ouij techkisas tiksentokaskej itech inetasojtalis.

10. ¿Keyej moneki tiksentokaskej tikixmatiskej Jiova Dios?

¹⁰ Tikyekixmatiskej Jiova, yejua se taman tein techtelpaleuis maj timotokikan iuan. Nejin amo keman moneki tamis. Xionmonemili ke tionmoajsi koujtaj itech se youal tein tel taseseya. Tejuatsin tiontaxotaltia uan ompa tionmototonijtok. ¿Tikonkauaskia maj taseui? ¿Melauj ke amo? Tein kemaj tikonchiuaskia, tikonsentokaskia tikontatokiliskia, komo amo tikonchiua uelis tionsekmikis. Ijkon kemej kouit kichiua maj kisentoka taxotato, “taixmatilis tein Dios kitemaka” techpaleuia maj tiksentokakan tiktasojtakan (Proverbios 2:1-5).

11. ¿Keniuj momachilijkej imomachtijkauan Jesús keman kinmelauilij seki taman tein kijtouaya Tajkuilolmej?

¹¹ Jesús kinekia maj itatojtokakauan kisentokanij kitasojtanij  Jiova uan iTajtol melauak tein tel kualtsin. Satepan keman Jesús moajokuik, kinmelauilij ome imomachtijkauan tein itech mochiuak, seki tajtolmej tein achtook moijtojka itech Tajkuilolmej Hebreo. ¿Keniuj momachilijkej? Yejuan satepan kijtojkej: “Melau ke semi tiyolpaktiualayaj tech in ojti [...] kuak in Jesús technojnotstiualaya uan techajsikamatiltijtiualaya den [i]Tajtoltsin Dios” (Lucas 24:32).

12, 13. 1) ¿Toni kinpanoua tel miakej ika netasojtalis tein kipialiaj Dios uan Biblia? 2) ¿Toni moneki tikchiuaskej uan ijkon amo kaxanis netasojtalis tein tikpialiaj Dios?

¹² Keman peuak tikonajsikamati tein yekmelauj tamachtia Biblia, ¿melauj ke no tionyolpakia, tikonmoujkakakia uan no tikontasojtaya Dios? Miakej no ijkon momachiliaj. Axkan, tiksentokaskej tikpiaskej nejon netasojtalis uan tikchiuaskej maj mochikaua, yejua tein ouij yetok. Amo tiknekij maj techpano tein axkan mochiujtok kemej Jesús kijtojka: “Kikauaske ne tasojtalis se uan okse” (Mateo 24:12). ¿Toni uelis tikonchiuas, uan ijkon amo kaxanis netasojtalis tein tikonpialia Jiova uan itamachtilis Biblia tein melauak?

¹³ Xikonsentoka xikonixmati Jiova Dios uan Jesucristo (Juan 17:3). Keman tikonixtajtoltis iTajtol Dios, xionmonemili uan xionmotajtani: “¿Toni nechnextilia Jiova ika nejin? ¿Nechnextilia okseki taman keyej moneki niktasojtas ika nochi noyolo, notanejnekilis, uan notanemililis?” (xikonixtajtolti 1 Timoteo 4:15). Komo ijkon tikonchiua, netasojtalis tein tikonpialia Dios amo keman kaxanis.

14. ¿Keniuj techpaleuia mojmostaj tikchiuaskej netataujtil maj tiksentokakan tiktasojtakan Jiova?

¹⁴ Okse taman tein techpaleuis maj tiksentokakan tiktasojtakan Dios, moneki mojmostaj tikchiuaskej  netataujtil (1 Tesalonicenses 5:17). Itech capítulo 17 timomachtijkej ke netataujtil se netetayokolil tein techmaka Dios. Kemej tikmatij, okachi kuali timouikaj iuan aksa keman nochipa iuan timonojnotsaj uan tikiluiaj tein kisa itech toyolo. No ijkon, tiksentokaskej timouikaskej iuan Jiova komo mojmostaj tikchiuaj netataujtil. Moneki timopiaskej maj amo tikijtokan itech tonetataujtiluan sayoj tein tikmattokej oso nion no tiknemiliskej tein tikijtoskej. Moneki titajtoskej iuan Jiova kemej kichiuaskia se konet iuan ipopaj tetasojtakej. Sayoj ke moneki tiknojnotsaskej ika poujkaitalis, maski kemaj tiktapouiskej nochi, uan tikijtoskej tein kisa itech toyolo (Salmo 62:8). Kemej tikitaj, tein techpaleuis maj tikueyichiuakan Dios, moneki maj timomachtikan Biblia uan maj tikchiuakan netataujtil tein kisa itech toyolo. Komo ijkon tikchiuaj, okachi amo ouij techkisas tiksentokaskej itech inetasojtalis Dios.

15, 16. ¿Keyej moneki tikitaskej tanojnotsalis kemej se tekit tein tel kualtsin uan kemej teisa tein kitelpia ipatiuj?

¹⁵ Keman timomachtiaj Biblia uan tikchiuaj netataujtil tikueyichiuaj Dios toselti. Axkan maj ika titajtokan tein tikchiuaj ijkuak tiyetokej iniuan oksekin. ¿Toni nejin? Keman titetapouiaj tein tikneltokaj. ¿Tikontapouiani oksekin itamachtilis Biblia tein melauak? Komo ijkon, tikonpia se kualtsin tatiochiualis tikontekitilijtos Dios (Lucas 1:74). Keman titetapouiaj tein timomachtijtokej itech iTajtol Dios, tikchiuaj se tekit tein motelneki tein kiseliaj nochin akin yekmelauj kichiuaj kemej Cristo. ¿Katiyejua nejin? Kitetapouiskej  kuali tanauatilmej tein kichiuati iTekiuajyo Dios (xikonixtajtolti Mateo 28:19, 20, TNM; Marcos 13:10).

¹⁶ Tatitanil Pablo kiitaya nejon tekit kemej yeskia teisa tein kitelpia ipatiuj (2 Corintios 4:7). Titetapouiskej tein kijtoua Jiova uan itanejnekilis, yejua okachi kuali tekit tein uelis onkas. ¿Keyej? Yekinika, tikchiuaj se tekit tein technauatia akin okachi Ueyichiujkej, uan ojpatika, yejua tein okachi tapaleuia. Keman titanojnotsaj, tikinpaleuiaj akin yolmelaujkej maj motokikan iuan toTajtsin akin nemi iluikak, uan maj kiajsikan ojti tein teajxitia itech nemilis nochipaya. ¿Ueliskia okse tekit techualkuilis yolpakilis kemej nejin? Uan no, keman ika titajtouaj Jiova uan iTajtol, okachi mochikaua totakuaujtamatilis uan netasojtalis tein tikpialiaj. Uan semi kiyolpaktia chikaujkayot tein tikchiuaj (Hebreos 6:10). Kemej tikitaj, tiksentokaskej tikchiujtoskej nejin tekit, techpaleuia maj tiksentokakan itech inetasojtalis Dios (xikonixtajtolti 1 Corintios 15:58).

17. ¿Keyej moneki ijsiujka motanojnotsas?

¹⁷ Maj tikelnamikikan ke moneki ijsiujka titetapouiskej tein kichiuati iTekiuajyo Dios. Biblia kijtoua: “Xitanojnotsa ika in Tajtoltsin de Dios [...] youalitonal [oso “ijsiujka”, TNM]” (2 Timoteo 4:2). ¿Keyej moneki ijsiujka tikchiuaskej? ITajtol Dios techiluia: “Iueyi tonal Jiova amo uejka yetok. Amo uejka yetok, uan motokijtok ijsiujka” (Sofonías 1:14). Kemaj, ijkon kemej panotiuj tonalmej, okachi motokia tonal keman Jiova kiixpolos nochi tein amo kuali. ¡Nochin moneki kimatiskej! Moneki kiajsikamatiskej ke axkan moneki kitakamatiskej Jiova kemej ininUeyi Taixyekankankauj, ta ixpoliuilis “amo ejkos tiotak” (Habacuc 2:3).

18. ¿Keyej moneki tikueyichiuaskej Jiova iniuan akin yekmelauj kichiuaj kemej Cristo?

 ¹⁸ Jiova kineki maj tikueyichiuakan iniuan akin yekmelauj kichiuaj kemej Cristo. Yejua ika, iTajtol techiluia:  “Ma tiktemolijtiyakan [...] keniu timotasojtatiyaske se uan okse uan de keniu tikchiutiyaske in kuali tachiualisme. Uan sekin tokniuan amo mosentilijtinemij [...;] [uan] amo ijkon ma tikchiutinemikan tejuan. Ta, [...] ma timopaleuijtiyakan se uan okse ika ne yolmajxitilis porin tikitaj ke kachi motokijtiuits ya ne tonal” (Hebreos 10:24, 25). Keman tiyouij ininnechikoluan akin kichiuaj kemej Cristo, ompa ueli tikueyichiuaj uan tikueyitaliaj ika nekuikatilmej toDios tetasojtakej. No timoyolchikauaj uan timopaleuiaj se iuan okse.

19. ¿Toni moneki tikchiuaskej uan ijkon uelis okachi timotasojtaskej iniuan oloch tokniuan akin mosentiliaj?

¹⁹ Keman timosentiliaj iniuan itekitikauan Jiova, okachi timotasojtaj uan kuali timouikaj akin iniuan timonechikouaj. Moneki maj se kinitili ininkuali tachiualisuan, ijkon kemej Jiova techitilia tokuali tachiualisuan. Amo xikonchia maj amo keman mopolokan tokniuan akin kichiuaj kemej Cristo. Xikonelnamiki, tinochin timopolouaj uan tataman timoskaltiaj kemej itatojtokakauan Cristo (xikonixtajtolti Colosenses 3:13). Xionmouika iniuan akin kitasojtaj Jiova ika nochi ininchikaualis, nejon mitsonpaleuis xionmoskalti kemej itatojtokakauj Cristo. Komo tikonueyichiua Jiova iniuan tokniuan akin kichiuaj kemej Cristo, okachi amo ouij mitsonkisas tikonsentokas itech inetasojtalis Dios. Axkan maj tikitakan toni tatiochiualis kinmaka akin kisentokaj kiueyichiuaj uan kisentokaj itech inetasojtalis.

20, 21. ¿Toni kijtosneki “melau nemilis”, uan keyej tel kualtsin maj tikpiakan?

²⁰ Jiova kintatiochiuia ika nemilis akin kitekitiliaj  uan amo kikauaj. ¿Keniuj nejon nemilis? Timiakej tikijtoskiaj tinentokejya, ta timijyotiaj, titakuaj uan titatayij. Uan keman titelyolpaktokej xa tikijtouaj: “¡Nejin kemaj nemilis!”. Sayoj ke Biblia kinextia ke axkan amo akin yekmelauj nemi.

²¹ Biblia tinochin techyolchikaua maj ‘timoaxkatilikan ne tein melauj nemilis’ (1 Timoteo 6:19). Tajtolmej ‘tein melauj nemilis’ kijtosneki se nemilis tein tikchiaj tikpiaskej amo uejkaua. Keman amo tikpiaskejok tajtakol, tinentoskej kemej yekmelauj kijtosneki tajtol, ta tinentoskej kemej Dios kinekia yekinika. Nejon tonalmej tiyetoskej itech Xochital nikan taltikpak, uan amo nenken tikpiaskej kokolis, senkis tikpiaskej yekyetolis uan yolpakilis. Ijkuak kemaj tikpiaskej “melau nemilis” oso nemilis nochipaya (1 Timoteo 6:12). ¿Melauj ke tikchiaj se tel kualtsin nemilis?

22. ¿Keniuj uelis tejuatsin ‘tionmoaxkatilis ne tein melauj nemilis’?

²² ¿Keniuj uelis aksa ‘moaxkatilis ne tein melauj nemilis’? Achtopa ke Pablo kijtoskia nejin tajtolmej, kinyolchikaua akin kichiuaj kemej Cristo, maj “kichiuakan nochi ten kuali” uan maj kinextikan “tatakamatilis” (1 Timoteo 6:18). Uelis tikseliskej nejon nemilis komo tikchiuaj tein timomachtiaj itech Biblia. Axkan, ¿kijtosnekik Pablo ke timotaniliaj “melau nemilis” ika tokuali tachiualis? Amo. Tein melauj, uelis tikseliskej nejon kualtsin nemilis sayoj komo Dios technextilia “iueyiteiknelilis” (Romanos 5:15). Sayoj ke Jiova kemaj kiyolpaktia kintatiochiuis akin kitekitiliaj uan amo kikauaj. Yejuatsin kineki xikonpia “melau nemilis”, se nemilis nochipaya ika yolpakilis uan yolseuilis. Yejua nejon nemilis tein kichiaj nochin akin kisentokaj itech inetasojtalis Dios.

23. ¿Keyej motelneki tiksentokaskej itech inetasojtalis Dios?

 ²³ Semi kuali maj tisejsemej timotajtanikan: “¿Nikueyichiujtok Dios kemej tanauatia itech Biblia?”. Komo mojmostaj ijkon tikueyichiuaj, tiyajtokej itech se kuali ojti. Uelis senkis tikneltokaskej ke Jiova yejuatsin tonepaleuil. Uan kinpaleuis itekitikauan akin amo kikauaj itech nejin tonalmej tamouililpan, tein amo uejkaua tamiti. Uan no, kinmakas se kualtsin nemilis tein tel amo uejka yetok. ¡Tel kualtsin yeski! ¡Semi tiyolpakiskej tikmatiskej ke tikixpejpenkej tein okachi kuali itech nejin itamian tonalmej! Komo yejua nejon tikonixpejpena tikonchiuas axkan, tionyolpakis tikonpias “melau nemilis”, nemilis tein Jiova Dios nochipa kinekik maj tikpiakan.