1, 2. 1) ¿Katiyejua netetayokolil uelis tikonijtos ke kitelpia ipatiuj? 2) Taxtauil tein motemakak, ¿keyej se netetayokolil tein okachi kipia ipatiuj?

¿KATIYEJUA okachi kuali netetayokolil tikonselij tejuatsin? Se netetayokolil amo moneki maj tel patiyoj uan ijkon uelis tikonijtos ke yejua okachi kuali. Tein melauj, amo nochipa kijtosneki ke komo tel patiyoj, yejua okachi kuali netetayokolil. Ta uelis tikonijtos ke kitelpia ipatiuj, komo mitsonualkuilia yolpakilis oso tikonselia tein yekmelauj mitsonpolojtoya.

² Maski uelis mitsonmakaskej tel miak netetayokolilmej, moajsi se tein okachi kuali ke oksekin. Se netetayokolil tein Dios techmakatok. Tein melauj, Jiova techmakatok miak taman, sayoj ke tein okachi kitelpia ipatiuj yejua taxtauil tein kitemakak iKonetsin, Jesucristo, keman kitemakak inemilis (xikonixtajtolti Mateo 20:28). Kemej tikitaskej satepan itech nejin capítulo, taxtauil yejua tein okachi kipia ipatiuj, ta ika nejon uelis yekmelauj  tikpiaskej yolpakilis, uan tikseliskej tein yekmelauj techpoloua. Yejua nejon okachi ueyi neskayot ke Jiova techteltasojta tisejsemej.

3. ¿Toni taxtauil, uan toni moneki tikajsikamatiskej uan ijkon uelis tikitaskej ipatiuj tein kipia nejon netetayokolil?

³ Ika se ome eyi tajtolmej, taxtauil yejua tein Jiova ika techmakixtia itech tajtakol uan mikilis (Efesios 1:7). Tein techpaleuis maj tikajsikamatikan nejin tamachtilis tein ixnesi itech Biblia, moneki tikitaskej tein mochiuak itech xochital tein moajsia Edén. Komo tikajsikamatij toni kipoloj Adán keman tajtakoj, tikajsikamatiskej keyej kitelpia ipatiuj nejon taxtauil.

4. ¿Toni kijtosnekia maj Adán kipiani se nemilis tein amo kipiaya tajtakol?

⁴ Keman Jiova kichijchiuak Adán, kimakak teisa tein kitelpia ipatiuj: se nemilis tein amo kipiaya tajtakol. Xionmonemili tein kijtosnekia nejon. Ika se inakayo uan italnamikilis tein amo kipiaya tajtakol, amo keman kokolispeuaskia, ueuentsintiaskia nion no momikiliskia. Uan no, tel kualtsin mouikaya iuan Jiova kemej amo akin ijkon kichiua nikan taltikpak. Biblia kijtoua ke Adán katka ‘ikoneuj Dios’ (Lucas 3:38). Yejua ika, Dios uan Adán tel kualtsin mouikayaj ijkon kemej se tepopaj tetasojtakej iuan ikonetsin. Kemaj, Dios tajtouaya iuan ikonetsin akin moajsia nikan taltikpak, kimakaya tekit tein kiyolpaktiskia uan kiluiaya keniuj kinekia maj moojtokalti (Génesis 1:28-30; 2:16, 17).

5. ¿Toni kijtosneki Biblia keman kijtoua ke Adán chijchiujtoya “kemej Dios tamati”?

⁵ Adán kichijchiujkej “kemej Dios tamati” (Génesis 1:27). Nejin amo kijtosnekia ke no chijchiujtoya kemej Dios. Kemej timomachtijkej itech capítulo 1, Jiova se  espíritu (Juan 4:24). Amo chijchiujtok ika nakat uan omit. Yejua ika, keman Biblia kijtoua ke Adán tamatia kemej Dios, kijtosnekia ke chijchiujtoya kemej ueliskia kinextiskia kualneskayomej tein Dios kipia: kemej netasojtalis, tamatilis, melaujkayot, uelilis uan oksekiok. Uan moajsi okse tamanok keyej tamatia kemej Dios: yejua kiixpejpenaya toni kichiuas. Kemej tikitaj, amo katka kemej se máquina, tein sayoj ueli kichiua kemej kichijchiujkej. Ta iselti uelia kiixtaliaya toni kichiuas uan kiixpejpenas tein kuali uan tein amo kuali. Komo kiixpejpenaskia kitakamatis Dios, nemiskia nochipaya itech Xochital nikan taltikpak.

6. ¿Toni kipoloj Adán keman amo kitakamatikok Dios, uan ika nejon, toni kinpanok ikoneuan?

⁶ Moyekita ke Adán tel amo kuali kipanok keman amo kitakamatikok Dios, porin kiluij ke momikiliskia. Nejon tajtakol kichiuak maj kipolo inemilis tein amo kipiaya tajtakol uan nochi tein kijtosnekia nejon nemilis (Génesis 3:17-19). Semi tetayokoltij ke amo sayoj Adán kipoloj, ta ikoneuan amo no kipiaskiajok. ITajtol Dios kijtoua: “Itechkakopaka ne achtopa tagat Adán [...] tajtakol momauak ya tech nochi senmanauak. Uan [...] ongak mikilis nochi senmanauak ika por ne tajtakol de Adán. Uan no ne mikilis mosouako uan takitskijtinemiko inpan nochi in taltikpakuani porin nochi [...] motajtakolmakakke” (Romanos 5:12). Kemaj, tinochin techmauak itajtakol Adán. Yejua ika, Biblia kijtoua ke Adán monamakak uan no technamakak, kemej yeskia ‘titeaxkatitokej itech tajtakol’ uan mikilis (Romanos 7:14). Adán uan Eva amo kipiayaj nion se nechialis, ta kiixpejpenkej amo kitakamatiskej Dios. Axkan, ¿toni kinpanoskia ininkoneuan, akin no ompa tipouij?

7, 8. ¿Toni ome taman okachi kijtosneki taxtauil?

 ⁷ Jiova kinemilij techmakixtis ika se taxtauil. ¿Toni kijtosneki se taxtauil? Ome taman tein okachi kijtosneki. Yekinika, yejua ipatiuj tein se taxtaua, uan ika nejon oksepa ueli se kipia teisa, oso ika se kimakixtia aksa. Se neskayot, kemej ijkuak aksa kiichtekij. Ojpatika, itech Biblia kinextia ke yejua ipatiuj tein moixtaua teisa tein uejueliuik. Se neskayot, komo itapial se takat kalakia tetalpan, monekia kiixtauas tein moauilchiuak.

⁸ Kemej tikitaj, Adán kichiuak maj tinochin tikpolokan teisa tein kitelpia ipatiuj. ¿Keniuj ueliskia moixtauaskia tein poliuik uan timomakixtiskiaj itech tajtakol uan mikilis tein techkitskijtok? Maj tikitakan taxtauil tein Jiova kitemakak, uan keniuj nejon uelis mitsonpaleuis tejuatsin.

9. ¿Toni monekia motemakas kemej se taxtauil?

⁹ Kemej tein poliuik katka se nemilis tein amo kipiaya tajtakol, yejua ika, amo sayoj monekia maj kitemakani inemilis se taltikpak tajtakojkej, uan ika nejon ueliskia tikyekapiaskiaj tein poliuik (Salmo 49:7, 8). Monekia se taxtauil tein kipiaskia ipatiuj tein poliuik. Ika nejin nesi ke Jiova amo keman mopoloua keman kitekitiltia imelaujkayo, ta Biblia, iTajtol Dios kijtoua ke monekia motemakas “nemilis [...] ika nemilis” (Deuteronomio 19:21). Yejua ika, ¿toni ueliskia kiixtauas ipatiuj nejon nemilis tein amo kipiaya tajtakol tein Adán kipoloj? Monekia okse nemilis tein amo kipiaya tajtakol uan ijkon ueliskia “kixtauas ipatiu” tein poliuik (1 Timoteo 2:6).

10. ¿Keniuj kitemakak Jiova taxtauil?

¹⁰ ¿Keniuj kitemakak Jiova taxtauil? Kiualtitanik nikan  taltikpak se aksa akin amo katka tajtakojkej, semej ikoneuan ángeles. Sayoj ke amo akin yeski kiualtitanik, ta akin okachi kitasojtaya: iyoj Konetsin (xikonixtajtolti 1 Juan 4:9, 10). Nejin tekoneuj kikauak iluikak kampa nemia ika miak pakilis (Filipenses 2:7). Kemej tikitakej itech capítulo 4, Jiova kichiuak se mouiskatekit keman kikuik inemilis iKonetsin uan kipanoltij iijtik María. Ika iyektikatsin espíritu Dios, Jesús yolik kemej takat akin amo kipiaya tajtakol, akin amo momaujtoya ika tajtakol (Lucas 1:35).

11. ¿Keniuj ika itaxtauil sayoj se takat ueli tel miakej kinmakixtia?

¹¹ ¿Keniuj ueliskia ika itaxtauil sayoj se takat maj tel miakej kinmakixtiani? Maj titanemilikan itech nejin, ¿keniuj nochin mochiujkej tajtakouanij? Xikonelnamiki ke keman Adán tajtakoj, kipoloj inemilis chipauak tein kitelpiaya ipatiuj, uan amo uelikok kinpanoltilij ikoneuan. Sayoj kinpanoltilij tajtakol uan mikilis. Jesús, akin Biblia kitokaytia “okse Adán”, kipiaya se nemilis chipauak uan amo keman tajtakoj (1 Corintios 15:45). Uelis tikijtoskej ke Jesús kiixpatak Adán uan ijkon techmakixtia. Senkis kitakamatik Dios uan kitemakak inemilis tein amo kipiaya tajtakol. Ijkon kiixtauak ipatiuj tein poliuik keman Adán tajtakoj uan techmakak se nechialis tiikoneuan (Romanos 5:19; 1 Corintios 15:21, 22).

12. ¿Toni kinextij Jesús ika nochi tein kijyouij?

¹² Biblia kijtoua nochi tajyouilis tein Jesús kixikoj achtopa ke momikiliskia. Kemej kiteltauelitayaj, kiuijuitekkej uan kipilojkej itech tajyouilis kouit, uan ompa kikaujkej maj momikili kampa semi tajyouij (Juan 19:1, 16-18, 30; uelis tikonitas tein kijtoua “Akin kichiuaj kemej Cristo, ¿kuali maj kikuikan kolotsin?”). ¿Keyej monekik kitelijyouis Jesús? Kemej tikitaskej itech okse capítulo, Satanás kiyekijtoua  ke nochin kikauaskej Dios komo kipanouaj tataman tayejyekolis. Kemej Jesús taxikoj uan amo kikauak Dios, maski kitelijyouij, okachi kuali kinextij ke tein Satanás kijtoua amo melauak. Kinextij ke se takat akin amo kipia tajtakol, tein yejua kiixpejpena toni kichiuas, ueli senkis kitakamati Jiova, maski Amokuali kitalilia tein yeski ouijkayot. ¡Jiova tel yolpakik keman kiitak ke itasojKonetsin amo keman kikauak! (Proverbios 27:11.)

13. ¿Keniuj motemakak taxtauil?

¹³ ¿Keniuj motekamak taxtauil? Itech tonal 14, metsti judío nisán, xiuit 33, Dios kikauak maj kimiktikan iKonetsin akin amo tajtakojkej katka. Ijkon, Jesús kitemakak “sepa san” inemilis (Hebreos 10:10). Eyi tonal satepan, Jiova kiajokuik kemej se espíritu. Ne iluikak, Jesús kimaktilij Dios ipatiuj nemilis tein kitemakak kemej se taxtauil, uan ika nejon maj kinmakixti ikoneuan Adán (Hebreos 9:24). Jiova kiselij ipatiuj inemilis Jesús tein kitemakak kemej se taxtauil tein monekia, uan ika nejon Dios techmakixtis itech tajtakol uan mikilis tein techkitskijtok (xikonixtajtolti Romanos 3:23, 24).

14, 15. ¿Toni moneki tikchiuaskej uan ijkon Dios ‘techtapojpoluis totajtakoluan’?

¹⁴ Ika taxtauil uelis tikpiaskej uejueyi uan kualtsitsin tatiochiualismej maski titajtakouanij. Maj tikitakan seki tatiochiualismej tein techualkuilia uan techualkuilis, okachi ueyi netetayokolil tein Dios techmakak.

¹⁵ Dios techtapojpoluia totajtakoluan. Kemej tikselijkej tajtakol, semi ouij techkisa tikchiuaskej tein kuali.  Tinochin titajtakouaj, yeski ika totajtol oso ika totachiualis. Kemej Jesús kitemakak inemilis, Dios uelis ‘techtapojpoluis totajtakoluan’ (Colosenses 1:13, 14). Sayoj ke, moneki yekmelauj timoyolnonotsaskej. No moneki tiktajtaniskej Jiova ika yolyemanilis maj techtapojpolui totajtakoluan, sayoj ke moneki tikneltokaskej inemilis Jesús tein kitemakak (xikonixtajtolti 1 Juan 1:8, 9).

16. ¿Keyej uelis tikueyichiuaskej Dios ika se tanemilil chipauak, uan keniuj techpaleuia kuali timouikaskej iuan?

¹⁶ Tikmachiliaj ke Dios techselia uan amo techixtopeua. Komo tikmachiliaj ke Dios techixtopeua, amo ueli tikchiaj nion teyi tein kuali, uan timomachiliaj amo teyi tikualtiaj. Sayoj ke kemej motemakak taxtauil, Jiova techtapojpoluia, uan kemej yolkuali, techkaua maski titajtakouanij maj tikueyichiuakan ika se tanemilil chipauak (Hebreos 9:13, 14). Nejin kichiua maj kuali timomachilikan titajtoskej iuan, tein kijtosneki tikchiuaskej netataujtil uan ompa tiktapouiskej nochi (Hebreos 4:14-16). Uan no komo kuali timouikaj iuan Jiova, amo techkuejmoloua totalnamikilis, kichiua maj kuali timomachilikan, uan okachi tiyolpakij.

17. ¿Toni tatiochiualismej uelis mochiuas ika imikilis Jesús?

¹⁷ Tikchiaj tinemiskej nochipaya itech se xochital nikan taltikpak. Romanos 6:23 kijtoua: “Tajtakol keme yeskia se patrón ten tetaxtauia sayo ika mikilis”. Sayoj ke nejin texto kisentoka kijtoua: “Pero Totajtsin Dios techtayokolia yejua ne yek nemilis nachipa porin tipoutinemij iuan Cristo Jesús”. Itech capítulo 3 tikitakej tatiochiualismej tein onkas amo uejkaua itech Xochital (Apocalipsis 21:3, 4). Nochi nejon tatiochiualismej, ijkon kemej maj tinemikan nochipaya uan maj amo tikokolispeuakan, uelis mochiuas porin Jesús toka  momikilij. Sayoj ke tikseliskej komo tiktasojkamatij taxtauil kemej se netetayokolil.

18. ¿Keyej moneki tiktasojkamatiliskej Jiova taxtauil kemej se netetayokolil?

¹⁸ ¿Keyej moneki tikteltasojkamatiliskej Jiova nejon taxtauil? Maj titanemilikan itech nejin: se netetayokolil okachi kipia ipatiuj komo akin techmakak monekik tonalpolos, monekik chikaualis oso tomin. Uan no, techyololinia, ta ika nejon kinextia yekmelauj techtasojta. No ijkon, maski Jiova okachi kitasojtaya Jesús, kiualtitanik maj motemakaki kemej se taxtauil. Yejua ika uelis tikijtoskej ke yejua netetayokolil tein okachi kipia ipatiuj tein Dios techmakak. Juan 3:16 kijtoua: “Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin”. Taxtauil, yejua tein okachi ueyi neskayot tein Jiova ika kinextia ke techteltasojta. Uan no se ueyi neskayot ke Jesús techteltasojta porin toka motemakak (xikonixtajtolti Juan 15:13). Kemaj, nejon tein kichiujkej Jiova uan Jesús, moneki techpaleuis  maj senkis tikneltokakan ke techtasojtaj tisejsemej (Gálatas 2:20).

19, 20. ¿Keniuj uelis tikonnextis ke tikontasojkamati taxtauil kemej se netetayokolil?

¹⁹ ¿Keniuj uelis tikonnextis ke tikontasojkamatilia Jiova taxtauil kemej se netetayokolil? Yekinika, xikonixmati Jiova, Akin kitemakak taxtauil (Juan 17:3). Uelis tikonixmatis komo tionmomachtia Biblia ika inepaleuil nejin amaix. Keman okachi tikonixmatis Jiova, okachi tikontasojtas. Uan keman okachi tikontasojtas, okachi tikonnekis tikonyolpaktis (1 Juan 5:3).

²⁰ Xikonneltoka taxtauil tein motemakak. Biblia kijtoua: “Ten takuautamatiske [kineltokaskej, TNM] [...] Ikonetsin Dios, [...] kipiaske ne yek nemilis nachipa” (Juan 3:36). ¿Keniuj se kinextia ke se kineltoka Jesús? Amo sayoj ika tajtolmej. Kemej kinextia Santiago 2:26, “amo teyi ipatiu komo amo kinextijtinemi itakuautamatilis ika ne kuali tatakamatilis”. Kemaj, yekmelauj takuaujtamatilis monextia ika tachiualis. Se taman kemej uelis tiknextiskej ke tikneltokaj Jesús, moneki tikchiuaskej kemej yejua, ika tein tikijtouaj uan ika tein tikchiuaj (Juan 13:15).

21, 22. 1) ¿Keyej moneki tiyaskej itech talnamikilis tein mochiua xijxiujtika tein itokay iTakualis toTekotsin? 2) ¿Toni tikitaskej itech capítulos 6 uan 7?

²¹ Xionyoui itech talnamikilis tein mochiua xijxiujtika tein itokay iTakualis toTekotsin. Youak 14 metsti nisán itech xiuit 33, Jesús kipeualtij se talnamikilis tein motelneki tein Biblia kitokaytia ‘itakualis toTekotsin’ (1 Corintios 11:20; Mateo 26:26-28). No motokaytia: ijkuak tikelnamikij imikilis Cristo. Jesús kipeualtij nejin talnamikilis, tein kinpaleuiskia tatitanilmej uan nochin akin yekmelauj kichiuaj kemej Cristo, maj  kielnamikikan ke keman momikilij, kitemakak inemilis tein amo kipiaya tajtakol kemej se taxtauil. Jesús ika tajtoj nejon talnamikilis keman kitemakak nejin tanauatil: “Xiksentokakan xikchiujtokan nejin uan ika xinechelnamikikan” (Lucas 22:19, TNM). Nejin Talnamikilis techelnamiktia ueyi netasojtalis tein technextiliaj Jiova uan Jesús, ijkuak kitemakakej taxtauil. Tiyaskej itech nejon talnamikilis tein mochiua xijxiujtika, no tiknextiaj ke tiktasojkamatij taxtauil. *

²² Taxtauil yejua netetayokolil tein okachi kipia ipatiuj tein Jiova techmaka (2 Corintios 9:14, 15). Tein melauj, nejin no uelis kinpaleuis akin momikilijkejya, kemej tikitaskej itech capítulos 6 uan 7.