Xiknemili nejin: Karen kiuika kemej majtakti minuto itech se iluit keman kitenixmati aksa akin iikampa kiluia:

Keman moikankepa, kiita Jessica, akin kuali iuan mouika uan kiualkui ome cerveza. Kimaka se uan kiluia: “Tiueyiya. ¿Amo uelis timoyolpaktis tepitsin?”.

Karen amo kineki tayis porin ayamo kiajxitia 18 xiujmej, sayoj ke amo no kineki maj Jessica kinemili ke yejua tel amo teyi kiuelita. Uan no, Jessica se kuali ichpoch. Komo yejua tayi, kijtosneki ke uelis se tayis. Karen monemilia: “Sayoj setsin. Nejon amo kemej keman se kikui drogas”.

Komo tejua tiyeskia tiKaren, ¿toni tikchiuaskia?

Moneki xikmati keniuj titanemilia uan keyej kuali timonejnemiltia, porin nejon mitspaleuis kuali xitaixpejpena itech seki taman kemej tein kipanok Karen. Tikyekmatis nejin mitsmatampauia uan mitsmaka chikaualis tein mitspaleuia tejua xikixpejpena tein tikchiuas uan amo oksekin (1 Corintios 9:26, 27).

¿Toni mitsmakas nejon chikaualis? Yekinika, komo itech titanemilia nejin naui netajtanilmej.

Komo tikmati toni tein ueli tikchiua uan tein kuali tiknextia, okachi kuali timomachilis.

NESKAYOT ITECH BIBLIA. Pablo, se itatojtokakauj Cristo, kijkuiloj: “Maski nejua amo semi niyektajtoa [...], pero nikixej[e]koa ke semi kachi ueyi nikpixtinemi tataman tamachilis de Dios” (2 Corintios 11:6). Kemej yejua kuali kiixmatia iTajtol Dios, amo omeyolouak keman kijijtojkej. Amo kikauak maj tein oksekin kijtouiliayaj kichiuani maj amo kuali momachiliani (2 Corintios 10:10; 11:5).

XIMOIXMATI. Xikijkuilo se taman tein kuali tikmati tikchiuas.

Axkan xikijkuilo se taman tein kuali tein tiknextia (kemej neskayot, komo tikualtakat, tikuelita titemakas teisa, titakuaujtamach oso timomattok amo timotajkajtilis).

Ijkon kemej se cadena tapetskoua kampa amo yektentakuitok, tejua niman uelis tikelkauas keniuj titanemilia uan keyej kuali timonejnemiltia komo okachi tikita tein amo tikyekchiua.

NESKAYOT ITECH BIBLIA. Pablo kimatia toni amo kiyekchiuaya. Yejua ika kijkuiloj: “Semi nechyolpaktia ne tanauatil de Dios ten yetok tech notalnamikilis. Pero no nikyolitstok ke yetok okse uelilis ten nechmapachojtinemi tech notalnamikilis. Uan ne okse uelilis kixnamiktinemi nejua notalnamikilis ten kineki kichiuas ten kuali. [...] Uan yejua ne nechmautok ika tajtakol uan no nechyolkitskijtinemi uan nechtsijtsikojtinemi keme yeskia nejua nipreso iuan” (Romanos 7:22, 23).

XIMOIXMATI. ¿Toni tein amo tikyekchiua moneki tikyektalis?

¿Titejkoskia itech se taxi uan tikiluiskia akin kinejnemiltia maj tatayoualo hasta maj tami gasolina? ¿Melauj ke nejon amo taixejekol? Uan no tel patiyoj mitskisaskia.

¿Toni mitsmachtia nejin? Komo tikixtalia toni tikchiuas satepan, amo kemej yeskia sayoj titatayoualojtos, ta tikmatis kani tiyas uan keniuj tiajsis.

NESKAYOT ITECH BIBLIA. Pablo kijkuiloj: “Amo nikchiutinemi de nenkajtik san” (1 Corintios 9:26). Pablo amo mosenkauak, ta kiixtalij toni kichiuas uan mochikauak ijkon kichiuas (Filipenses 3:12-14).

XIMOIXMATI. Nikan xikijkuilo eyi taman tein tikuelitaskia tikchiuas itech nejin xiuit.

Komo amo senkis tikmati ke melauak tein tikneltoka, nochipa tiomeyolouas. Nochipa timopatas porin tiknekis tikchiuas kemej akin iniuan timouika, ijkon kemej se camaleón mopapata ijkon kemej kampa yetok. Akin ijkon kichiua, amo kimati keniuj yekmelauj tanemilia.

Sayoj ke, komo amo tikpapata tein tiknemilia, tikchiuas tein tejua tikixejekos, maski oksekin kichiuaskej okseki taman.

NESKAYOT ITECH BIBLIA. Daniel xa okichpilok katka keman kiuikakej uejka uan kinkaujteuak ichankauan. Maski ijkon, “kiixtalij itech iyolo” kitakamatis itanauatiluan Dios (Daniel 1:8). Amo kinekik kipatas itanemilil uan kichiuak tein kimatia ke okachi kuali.

XIMOIXMATI. ¿Toni tikneltoka? Kemej neskayot: ¿Tikneltoka ke nemi Dios? ¿Keyej? ¿Toni kichiua xikneltoka?

¿Tiknemilia ke mitspaleuia maj Dios tanauati maj se chipaujkanemi? ¿Keyej?

¿Kemej toni tikneki tiyeski: kemej se xiuit tein kipatanaltia ejekat, oso kemej se kouit tein amo uetsi maski tel tetsaujkaejekas? Komo tikneki tiyeski kemej nejon kouit, senkis xikixtali amo tikpatas kemej titanemilia uan kemej timonejnemiltia. Nejon mitspaleuis xiknankili netajtanil: ¿Keniuj yekmelauj nitanemilia?