1, 2. 1) ¿Keyej se ueyi tatiochiualis maj tiuelikan titajtokan iuan Jiova? 2) ¿Keyej moneki tikmatiskej toni tamachtia Biblia?

IIXPAN Jiova, “akin kichijchiuak iluikak uan taltikpak”, nochin taltikpakneminij moitaj kemej talnex (Salmo 115:15; Isaías 40:15). Maski ijkon, Biblia kijtoua: “Jiova amo uejka moajsi iniuan nochin akin kinotsaj, nochin akin kinotsaj kemej kineki. Kinmaka tein kinekij akin kimoujkatokaj; kinkaki keman kitsajtsiliaj maj kinpaleui, uan kinmakixtia” (Salmo 145:18, 19). Tikpiaj se ueyi tatiochiualis. Jiova yejua akin kichijchiuak nochi tein onkak uan kineki kuali mouikas touan uan techkakis keman iuan titajtoskej oso tiktataujtiskej. Se ueyi tatiochiualis maj tiuelikan timonojnotsakan iuan Jiova.

² Sayoj ke Jiova techkakis sayoj komo titajtouaj iuan kemej yejuatsin kineki. ¿Keniuj uelis tikchiuaskej nejon? Maj tikitakan toni tamachtia Biblia.

3. ¿Keyej moneki tiontajtos iuan Jiova?

³ Jiova kineki xikontataujti oso iuan xiontajto. ¿Keniuj tikmatij? Xiontanemili itech kualtsitsin tajtolmej tein moajsij itech Filipenses 4:6, 7 (xikonixtajtolti). Akin kichijchiuak nochi tein onkak semi mitsontasojta uan kineki xikontapoui keniuj tionmomachilia uan toni kuejmolmej tikonpia.

4. ¿Keniuj timouikaskej iuan Jiova komo nochipa iuan titajtouaj, uan keyej?

⁴ Netataujtil techpaleuia maj okachi kuali timouikakan iuan Jiova. Keman omen akin kuali mouikaj nochipa motapouiaj tein kinemiliaj, tein kimachiliaj uan tein kintekipachoua,  okachi kuali mouikaj. No ijkon, itech Biblia Jiova mitsontapouia tein kinemilia uan tein kimachilia, uan no mitsoniluia tein kichiuas satepan. Ika netataujtil, tejuatsin no uelis tikontapouis nochi tein tikonmachilia. Komo nochipa iuan tiontajtoua, okachi kuali tionmouikas iuan (Santiago 4:8).

5. ¿Keniuj tikmatij ke Jiova amo kikaki nochi netataujtilmej?

⁵ ¿Kikaki Jiova nochi netataujtilmej? Amo. Itech itonaluan se itekitikauj akin monotsaya Isaías, Jiova kiniluij israelitas: “Maski nankichiuaskej miak netataujtilmej, amo namechkaki; namejuan nankichiuanij maj miakej mikikan” (Isaías 1:15). Komo amo tikyeknemiliaj tein tikchiuaj, uelis tikchiuaskej tein Jiova kitauelita uan yejuatsin amo techkakis keman iuan titajtoskej.

6. 1) ¿Keyej moneki maj se takuaujtamati? 2) ¿Keniuj tiknextiaj ke titakuaujtamatij?

⁶ Komo tiknekij maj Jiova techkaki keman iuan  titajtoskej, moneki iuan titakuaujtamatiskej (Marcos 11:24). Tatitanil Pablo kimelaua: “Komo se aksa amo takuautamatinemis iuan Dios, ijkuakon amo uelis kiyolpaktijtinemis Dios. Porin komo se yejua kineki se motokitiu iuan Dios, ijkuakon moneki ma kiyekneltoka ke ongak se Dios uan no ma kiyekneltoka ke Dios kinpaleuis nekes ten kiyoltemoske” (Hebreos 11:6). Sayoj ke, maj amo sayoj tikijtokan ke titakuaujtamatij, ta no maj tiknextikan. Tiknextiaj ke titakuaujtamatij iuan Jiova keman tiktakamatij mojmostaj (xikonixtajtolti Santiago 2:26).

7. 1) ¿Keyej moneki tiknojnotsaskej Jiova ika mouisyot uan amo timoueyimatiskej? 2) ¿Keniuj tiknextiaj ke tiktapouiaj Jiova tein yekmelauj tikmachiliaj?

⁷ Keman iuan titajtouaj Jiova, moneki tiknojnotsaskej ika mouisyot oso poujkaitalis uan amo timoueyimatiskej. ¿Keyej? Porin komo monekiskia titajtoskej iuan se tekiuaj, ijkon tiknojnotsaskiaj. Jiova yejua Dios akin kichijchiuak nochi tein onkak, yejua ika okachiok moneki tiknojnotsaskej ika mouisyot oso poujkaitalis uan amo timoueyimatiskej (Génesis 17:1; Salmo 138:6; 1 Pedro 5:5). No moneki tiktapouiskej tein yekmelauj tikmachiliaj uan amo nochipa tikiluijtoskej sayoj se taman (Mateo 6:7, 8).

8. ¿Toni moneki tikchiuaskej keman teisa tiktajtaniaj Jiova?

⁸ Uan no, keman teisa tiktajtaniaj Jiova, moneki timochikauaskej tikchiuaskej tein tapaleuis maj tikselikan tein titajtanij. Kemej neskayot, xa tiktajtanijkej maj techpaleui maj tikajsikan tein ika timoixpanoltiskej. Sayoj ke moneki amo titatsiuiskej uan tikchiaskej maj Jiova techmaka nochi. Komo amo teyi techtsakuilia, maj titekitikan chikauak itech tein yeski tekit tein uelis tikchiuaskej (Mateo 6:11; 2 Tesalonicenses 3:10). Oso komo tiktataujtiaj Jiova maj techpaleui maj amo tikchiuakanok teisa tein amo kuali, maj tikixtopeuakan tein uelis techolinis maj  tikchiuakan nejon (Colosenses 3:5). Axkan maj tikitakan seki netajtanilmej tein miakej mochiuiliaj ika netataujtil.

9. 1) ¿Akoni moneki tiktataujtiskej? 2) ¿Toni techmachtia Juan 16:23 kemej moneki tikchiuaskej netataujtil?

⁹ ¿Akoni moneki tiktataujtiskej? Jesús kinmachtij itatojtokakauan maj ijkon kichiuakan netataujtil: “Toueyitajtsin ten tiyetika eluiyaktsinko” (Mateo 6:9). Nejin kinextia ke moneki tiktataujtiskej sayoj Jiova. Jesús no kijtoj: “Notajtsin Dios namechmaktilis nochi ten nankitajtaniliske ika [...] notokaytsin” (Juan 16:23). Nejin techmachtia ke moneki tikchiuaskej netataujtil itokaykopa Jesús. ¿Toni kijtosneki se kitataujtis Dios itokaykopa Jesús? Komo tiknekij maj Jiova techkaki, moneki tikmouiskaitaskej oso tikpoujkaitaskej ueyi tekit tein yejuatsin kimakak iKonetsin. Kemej tikitakejya, Jesús ualaj nikan taltikpak techmakixtiko. Ijkon amo titajtakolejkejok tiyeskij nion timomikiliskejok (Juan 3:16; Romanos 5:12). Uan no, Jiova kiixtalij Jesús kemej Tayekankatiopixkat akin ueli kichiua maj Dios techtapojpolui. Yejuatsin no kiixtalij kemej Tamelaujkej (Juan 5:22; Hebreos 6:20).

10. ¿Moneki timotankuaketsaskej keman tikchiuaskej netataujtil? Xikonmelaua.

¹⁰ ¿Moneki timotankuaketsaskej keman tikchiuaskej netataujtil? Amo. Jiova amo technauatia maj tikchiuakan nejon. Biblia techmachtia ke uelis titajtoskej iuan Jiova ika mouisyot keman titokotsyetoskej, tiixpilkatoskej, titankuaijkatoskej oso tiijkatoskej (1 Crónicas 17:16; Mateo 26:39; Lucas 18:13; Hechos 21:5). Keman tiktataujtiaj, amo kiita ke okachi moneki maj titankuaijkatokan oso maj tiijkatokan, ta maj tiknojnotsakan ika mouisyot uan maj tikiluikan tein yekmelauj tikmachiliaj. Uelis iuan titajtoskej kemej timotenkakiskej oso ichtaka, kampa yeski  timoajsiskej uan itech tein yeski hora, tonayan oso youak. Keman iuan titajtouaj Jiova, ueli titakuaujtamatij ke yejuatsin techkaki maski tiichtakatajtoskej (Nehemías 2:1-6).

11. ¿Toni uelis tikijtoskej itech tonetataujtiluan?

¹¹ ¿Toni uelis tikijtoskej itech tonetataujtiluan? Tein yeski taman tein Jiova kiitas ke kuali. Biblia kijtoua: “Komo tiktajtaniliaj Dios tensa ijkon keme yejua in itanejnekilis de Yejuatsin, ijkuakon Totajtsin Dios techkakilia” (1 Juan 5:14). ¿Uelis tikiluiskej tein techpanoua uan tein techtekipachoua? Kemaj. Keman titajtoskej iuan Jiova moneki yeski kemej ijkuak titajtouaj iuan se akin kuali iuan timouikaj. Uelis tiktapouiskej nochi tein tiknemiliaj uan tein tikmachiliaj (Salmo 62:8). Uelis tiktajtaniskej maj techpaleui ika iyektikatsin espíritu tein semi chikauak maj tikchiuakan tein kuali (Lucas 11:13). No uelis tiktajtaniskej maj techmaka tamatilis tein techpaleuis maj kuali tiknemilikan toni tikchiuaskej uan chikaualis keman tikpiaskej kuejmolmej (Santiago 1:5). Moneki tiktataujtiskej Jiova maj techtapojpolui (Efesios 1:3, 7). No moneki tiktajtaniskej maj kinpaleui oksekin, kemej tochankauan uan tokniuan itech nechikol (Hechos 12:5; Colosenses 4:12).

12. ¿Toni moneki okachi tayekantos itech tonetataujtiluan?

¹² ¿Toni moneki tayekantos itech tonetataujtiluan? Titajtaniskej maj moueyitali Jiova uan maj mochiua itanejnekilis. Moneki tiktasojkamatiliskej Jiova nochi tein ika techpaleuiani (1 Crónicas 29:10-13). Keman Jesús kinmachtij imomachtijkauan keniuj kichiuaskej netataujtil, kinextij toni moneki okachi tayekantos itech tonetataujtiluan (xikonixtajtolti Mateo 6:9-13, TNM). Kijtoj ke achto moneki titajtaniskej maj mochipaua itokay Jiova. Satepan, kinextij ke moneki titajtaniskej maj iTekiuajyo  Dios taixyekana uan maj mochiua tein Dios kineki itech nochi taltikpak. Hasta satepan ke titajtaniskejya nejon, Jesús kijtoj ke uelisya titajtaniskej tein techpoloua. Keman achto titajtanij maj moueyitali Jiova uan maj mochiua itanejnekilis, tiknextiaj toni tikitaj ke okachi tayekantok.

13. ¿Kanachi moneki uejkauas tonetataujtiluan?

¹³ ¿Kanachi moneki uejkauas tonetataujtiluan? Biblia amo kijtoua. Tein ika titajtoskej itech tonetataujtil uelis kichiuas maj uejkaua oso maj amo uejkaua. Kemej neskayot,  uelis tikchiuaskej se netataujtil tein amo uejkauas achto ke titakuaskej, sayoj ke uelis okachi tiuejkauaskej keman tiktasojkamatiliaj Jiova oso tiktapouiaj se kuejmol tein tikpiaj (1 Samuel 1:12, 15). Itech itonaluan Jesús, sekin uejkauayaj itech ininnetataujtiluan porin kitemouayaj maj oksekin kinueyitalianij. Tejuan amo tiknekij tikchiuaskej nejon (Lucas 20:46, 47). Jiova amo kiita ke nejon netataujtilmej okachi kipiaj ipatiuj. Yejuatsin kineki maj tikiluikan tein yekmelauj tikmachiliaj.

14. 1) ¿Kanachpa moneki titajtoskej iuan Jiova? 2) ¿Toni kinextia Jiova keman techyoleua maj iuan titajtokan?

¹⁴ ¿Kanachpa moneki titajtoskej iuan Jiova? Jiova techyoleua maj nochipa iuan titajtokan. Biblia kijtoua “ximotatatautilijtokan”, “xiksentokakan de nanmotatatautiliske” uan “ximotatatautilikan iuan Dios youalitonal” (Mateo 26:41; Romanos 12:12; 1 Tesalonicenses 5:17).  Jiova nochipa techkaki. Mojmostaj uelis tiktasojkamatiliskej porin techtasojta uan techmaka miak taman. No uelis tiktajtaniskej maj techixyekana, maj techpaleui maj titaxikokan uan maj techyolseui. Komo tiktasojkamatij maj ueli tiktataujtikan Jiova, nochipa iuan titajtoskej.

15. ¿Keyej moneki tikijtoskej “amén” keman tami se netataujtil?

¹⁵ ¿Keyej moneki tikijtoskej “amén” keman tami se netataujtil? Tajtol amén kijtosneki “ijkon maj mochiua” oso “yekmelauj”. Keman tikijtouaj, tiknextiaj ke yekmelauj tikmachiliaj tein tikijtojkej itech tonetataujtil (Salmo 41:13). Uan no, Biblia techmachtia ke keman se tokniuj kitamichiua se netataujtil kinamiki maj tikijtokan “amén”, uelis yeski ichtaka oso kemej timotenkakiskej. Ijkon tiknextiaj ke tiknekij maj mochiua tein moijtoj (1 Crónicas 16:36; 2 Corintios 1:20).

16. ¿Keyej tikmatij ke Dios kinankilia tonetataujtiluan?

¹⁶ ¿Yekmelauj technankilia Dios keman tiktataujtiaj? Kemaj. Biblia kijtoua ke Dios ‘kikaki netataujtilmej’ uan ke ‘techmaktilia’ nochi tein tiktajtaniaj (Salmo 65:2; Juan 15:7). Jiova kinkaki nochin akin kichiuaj netataujtil ika nochi ininyolo uan tataman kemej kinnankilia.

17. ¿Keniuj kinankilia Jiova tonetataujtiluan inintechkopa ángeles uan itekitikauan nikan taltikpak?

¹⁷ Jiova kinankilia tonetataujtiluan inintechkopa ángeles uan itekitikauan nikan taltikpak (Hebreos 1:13, 14). Miakej kitataujtianij Dios maj kinpaleui maj kiajsikamatikan Biblia, uan tepitsin satepan itaixpantijkauan Jiova kinkalpanojkej. Nejin kinextia ke ángeles kiixyekantokej tanojnotsalis itech nochi taltikpak uan kichiuaj maj itekitikauan Dios kinajsikan akin kinekij kiixmatiskej yejuatsin (xikonixtajtolti Apocalipsis 14:6). Uan no, timiakej tiktajtanianij Jiova maj techpaleui keman tikpiaj se  kuejmol oso teisa techpoloua, uan se tokniuj itech nechikol techpaleuiani (Proverbios 12:25; Santiago 2:16).

18. ¿Keniuj Jiova kinankilia tonetataujtiluan ika yektikatsin espíritu uan Biblia?

¹⁸ Jiova no kikui iyektikatsin espíritu keman technankilia. Keman tiktajtaniaj maj techpaleui keman tikpiaj se kuejmol, yejuatsin xa techpaleuis ika iyektikatsin espíritu maj tikmatikan toni tikchiuaskej uan techyolchikauas (2 Corintios 4:7). Uan no, Jiova technankilia ika Biblia uan techpaleuia maj tikmatikan toni tikchiuaskej. Keman tikixtajtoltiskej xa tikajsiskej seki tajkuilolmej tein techpaleuiskej. Jiova no uelis kichiuas maj itech nechikol se tokniuj tanankili tein techpaleuis. Uan uelis kichiuas maj se tayekankej itech nechikol techtapoui se taman tein kiajsik itech Biblia (Gálatas 6:1).

19. ¿Keyej kemansa uelis tiknemiliskej ke Jiova amo technankilia keman tiktataujtiaj?

¹⁹ Sayoj ke, komo kemansa tikonnemilia ke Jiova amo mitsonnankilia keman tikontataujtia, xikonelnamiki ke yejuatsin kimati kemanian uan keniuj kichiuas. Jiova kuali kimati tein techpoloua. Sayoj ke xa monekis tiksentokaskej tiktataujtiskej uan ijkon kiitas ke yekmelauj tiknekij maj technankili uan ke iuan titakuaujtamatij (Lucas 11:5-10). Kemansa Jiova technankilia kemej amo tikchiayaj. Kemej neskayot, xa tiktajtaniaj maj techpaleui porin tikpiaj se ueyi kuejmol, sayoj ke Jiova xa amo kiixpolos tokuejmol, ta techmakas chikaualis tein techpaleuis maj titaxikokan (xikonixtajtolti 2 Corintios 4:7).

20. ¿Keyej moneki nochipa iuan titajtoskej Jiova?

²⁰ Yekmelauj se ueyi tatiochiualis maj ueli titajtokan iuan Jiova. Ueli senkis titakuaujtamatij ke yejuatsin techkaki (Salmo 145:18). Komo nochipa tiktataujtiaj uan tikiluiaj tein yekmelauj tikmachiliaj, okachi kuali timouikaskej iuan.