1, 2. 1) ¿Yekmelauj tikonixmati se taltikpaknenkej komo sayoj tikonmati keniuj monotsa? 2) ¿Akoni kijtouaj miakej ke katka Jesús?

MOAJSIJ miakej akin miakkan kinixmatij, uan xa tejuatsin tikonmati keniuj monotsa semej. Sayoj ke ¿uelis tikonijtos ke kuali tikonixmati komo sayoj tikonmati keniuj monotsa? Amo. ¿Keyej? Porin amo tikonmati nochi tein kipanouani uan tein kichiua.

² Maski Jesús uejkaujya nemik nikan taltikpak, xa tikonkakini ke ika tajtouaj. Sayoj ke miakej amo kimatij akoni yekmelauj katka Jesús. Sekin kijtouaj ke katka se takat yolkuali. Oksekin kijtouaj ke kitematiltiaya tein mochiuas satepan. Uan oksekin kinemiliaj ke Jesús yejua Dios. (Xikonita tajtolmelaualis 12.)

3. ¿Keniuj mitsonpaleuis xikonixmati Jiova uan Jesucristo?

³ Semi mitsonpaleuis xikonmati akoni yekmelauj katka Jesús. ¿Keyej? Porin Biblia kijtoua: “Ne nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan in taltikpakuani ma nechixmatikan Nejuatsin ke ni Jesucristo ten Tejuatsin tinechonualtitanik” (Juan 17:3). Komo tikonixmati Jiova uan Jesús, uelis tionnemis nochipaya itech se xochital nikan taltikpak (Juan 14:6). Uan no, komo tikonixmati Jesús uelis mitsonpaleuis, porin yejua okachi kuali kinextij keniuj se nemis uan keniuj se mouikas iniuan oksekin (Juan 13:34, 35). Itech tamachtilis 1 timomachtijkej akoni yekmelauj Dios. Itech nejin tamachtilis timomachtiskej akoni katka Jesús kemej tamachtia Biblia.

4. ¿Toni kijtosnekij tajtolmej Mesías uan Cristo?

⁴ Miak xiujmej achto ke Jesús yoliskia, Jiova kijtoj itech Biblia ke kiualtitaniskia Mesías oso Cristo. Tajtol Mesías mokixtia itech tajtol hebreo uan Cristo itech tajtol griego. Ika nejin ome tajtolmej moixmatiskia akin Dios kiixtaliskia maj kichiua se tekit tein semi moneki. Uan no, satepan Mesías kichiuas nochi tein Dios kiixtalijtok kichiuas.

5. ¿Kineltokayaj imomachtijkauan Jesús ke yejua katka Mesías?

⁵ Imomachtijkauan Jesús senkis kineltokayaj ke yejua katka Mesías (Juan 1:41). Kemej neskayot, Pedro kiluij Jesús: “Tejuatsin tion Cristo” (Mateo 16:16). Maj tikitakan keyej tejuan no uelis senkis tikneltokaskej ke Jesús yejua Mesías.

6. ¿Keniuj techpaleuia Jiova maj tikmatikan akoni Mesías?

⁶ Miak xiujmej achto ke Jesús yoliskia, seki itekitikauan Dios kijtojkej miak taman tein kinpaleuiskia taltikpakneminij maj kiixmatinij Mesías. ¿Keniuj kinpaleuiskia nejon? Maj tikitakan se neskayot. Xikonnemili ke mitsoniluiaj xikonchiati se akin amo tikonixmati kampa ajsij autobuses. Komo kuali mitsoniluiaj keniuj uelis tikonixmatis, tejuatsin uelis tikonmatis akoni maski miakej yetoskej. No ijkon, inintechkopa itekitikauan, Jiova techiluij tein kichiuaskia Mesías uan tein kipanoskia. Keman akin kinekij kiyolpaktiskej Dios kiitaj keniuj mochiuak tein moijtojka, ueli kimatij ke Jesús yejua Mesías oso Cristo.

7. Xikonijto ome taman tein techpaleuia maj tikmatikan ke Jesús yejua Mesías.

⁷ Maj tikitakan ome taman tein moijtojka ke panoskia. Yekinika moijkuiloj kemej 700 xiujmej achto ke  yoliskia Jesús. Miqueas kijtojka ke Mesías yoliskia itech se xolalkonet tein motokaytiaya Belén (Miqueas 5:2). Uan Jesús yolik ompa (Mateo 2:1, 3-9). Ojpatika kijkuiloj Daniel. Yejua kijtoj ke senkis momatiskia akoni katka Mesías itech xiuit 29 (Daniel 9:25). Uan nejon no mochiuak. * Nejin sayoj ome taman tein techpaleuia maj tikmatikan ke Jesús yejua Mesías akin moijtojka ke ualaskia.

8, 9. ¿Keniuj kinextia tein mochiuak keman moauij Jesús ke yejua Mesías?

⁸ Jiova senkis kinextij ke Jesús yejua Mesías. Jiova kiluijka Juan, akin teauiaya, ke kipaleuiskia maj kimatini akoni katka Mesías. Itech xiuit 29, Jesús yajki ueyiat Jordán porin kinekia maj Juan kiauiani. Ijkuak, Juan kiitak tein Dios kiluijka. Biblia kijtoua: “Nikitak in [y]ektikatsin [e]spíritu [...] ual pantemoaya de ne eluiyaktsinko ijkon keme ual temoa se tototsin paloma. Uan no nikitak ke kalakito itech ne Jesús. [...] Uan Totajtsin Dios ipa nechilijka ya [...]. Uan nejua nikitak ya ke ijkon mochiuak ipan ne Jesús. Ika ya nojon namechtapouij de ke Jesús yejua ya nijin Tekonetsin de Dios” (Juan 1:32-34; Mateo 3:16, 17). Keman Juan kiitak uan kikakik nejin, kimatik ke Jesús yejua katka Mesías. Nejon tonal, Jiova kimakak Jesús iyektikatsin espíritu. Ijkuak,  Jesús mochiuak Mesías oso Cristo. Yejua akin Dios kiixtalijka kemej Tekiuaj uan Taixyekankej (Salmo 2:6; Isaías 55:4). (Xikonita tajtolmelaualis 2.)

⁹ Tein moijtojka itech Biblia, uan tein Jiova kichiuak uan kijtoj keman moauij iKonetsin kinextia ke Jesús yejua Mesías. Sayoj ke ¿kani ualeuak Jesús uan keniuj katka? Maj tikitakan tein Biblia kijtoua.

10. ¿Kani nemia Jesús achto ke ualaskia nikan taltikpak?

¹⁰ Biblia tamachtia ke Jesús uejkauak nemik ne iluikak achto ke ualaskia nikan taltikpak. Kemej neskayot, Miqueas kijtoj ke Mesías yeskia se akin ipa uejkaujya nemia (Miqueas 5:2). Uan Jesús miakpa kijtoj ke nemia ne iluikak achto ke yoliskia nikan taltikpak (xikonixtajtolti Juan 3:13; 6:38, 62; 17:4, 5). Keman ompa nemia, semi kuali mouikaya iuan Jiova.

11. ¿Keyej Jiova semi kitasojta Jesús?

¹¹ Jiova semi kitasojta Jesús. ¿Keyej? Porin Jesús “ipa yetinemi ya achtopa ke mochiuaskia nochi ten ongak”. Nejin kijtosneki ke yejua akin Jiova yekinika kichijchiuak (Colosenses 1:17). * Dios no semi kitasojta Jesús porin yejua “Iyojtsin Ikonetsin”. Nejin kijtosneki ke sayoj yejua akin Jiova iselti kichijchiuak, amo akin kipaleuij (Juan 3:16). Uan no, sayoj Jesús kipaleuij Jiova keman kichijchiuak nochi tein onkak (Hebreos 1:2). Uan sayoj Jesús moixmati kemej “Tajtoltsin”, porin Jiova kiluiaya maj kiniluiani ángeles uan taltikpakneminij tein yejuatsin kinekia maj kichiuanij (Juan 1:14).

12. ¿Keniuj tikmatij ke Jesús amo yejua Dios?

¹² Miakej kinemiliaj ke Jesús yejua Dios, sayoj ke nejin amo yejua tein kijtoua Biblia. * Biblia tamachtia ke Dios kichijchiuak Jesús, tein kijtosneki ke achto amo nemia. Sayoj ke Jiova nochipa nemi. Tein melauj, yejuatsin kichijchiuak nochi tein onkak (Salmo 90:2).  Biblia kijtoua ke toTajtsin okachi kipia tanauatil ke iKonetsin. Uan no, Jesús amo keman kitemoj kipias tanauatil tein kipia iTajtsin (xikonixtajtolti Juan 14:28; 1 Corintios 11:3). Sayoj Jiova “kipixtinemi nochi chikaualis” (2 Corintios 6:18). Amo akin okachi ueyichiujkej uan okachi chikauak ke yejuatsin.

13. ¿Keyej kijtoua Biblia ke Jesús “tamati ijkon keme Totajtsin Dios”?

¹³ Jiova uan Jesús sentekitikej miak xiujmej achto ke kichijchiuaskiaj nochi tein onkak itech iluikak uan taltikpak. Kemej uejkauak senyetoyaj, tikmatij ke semi motasojtayaj (Juan 3:35; 14:31). Biblia kijtoua ke Jesús “tamati ijkon keme Totajtsin Dios”. ¿Keyej? Porin Jesús tetasojtaya, teikneliaya uan kinextiaya nochi kualtsin taman tein iTajtsin kinextia (Hebreos 1:3).

14. ¿Keniuj Jesús uelik yolik nikan taltikpak?

¹⁴ Jesús motemakak kikauas iluikak uan yolis nikan taltikpak kemej se konetsin. Sayoj ke ¿keniuj uelik mochiuak nejon? Jiova kipanoltij inemilis iKonetsin iijtik María, se ichpoch akin amo keman motektoya iuan se takat. Yejua ika, Jesús amo monekik kipias se ipopaj nikan taltikpak. Ijkon, María kipiak se konetsin akin amo tajtakolej katka. Amo katka kemej tejuan akin tikokolispeuaj, tiueuentsintiaj uan timomikiliaj. Nejon konetsin kitokaytij Jesús (Lucas 1:30-35).

15. ¿Keniuj uelis okachi kuali tikonixmatis Jiova?

¹⁵ Jesús kijtoj: “Ijkon keme Nejuatsin tinechitstinemi, no ijkon Totajtsin Dios tikitstinemi” (Juan 14:9). Uelis okachi kuali tikonixmatis Jiova keman tikonixmatis Jesús, porin Jesús senkis tanemilia kemej iTajtsin. Uelis okachi tikonmatis tein kichiuak uan keniuj  katka keman tikonixtajtoltis amatajkuilolmej Mateo, Marcos, Lucas uan Juan. Nejin amatajkuilolmej tein moajsij itech Biblia moixmatij kemej Evangelios.

16. 1) ¿Toni tamachtiaya Jesús? 2) ¿Akoni kimachtij Jesús nochi tein tamachtiaya?

¹⁶ Miakej kiluiayaj Jesús “Tamachtijke” (Juan 1:38; 13:13). Se taman tein tayekantok tein Jesús tamachtij yejua tein kuali tein kichiuas iTekiuajyo Dios. Nejin Tekiuajyot tein moajsi iluikak taixyekanas itech nochi taltikpak uan kichiuas maj kiselikan tein kuali akin kitakamatij Dios (Mateo 4:23, TNM). Nochi tein Jesús tamachtiaya Jiova kimachtij. Jesús kijtoj: “Notanextililisuan amo ualeuak de nejua notanemililis san. Ta, ualeutok de Notajtsin Dios ten nechualtitanik” (Juan 7:16). Jesús kimatia ke Jiova kineki maj taltikpakneminij kimatikan ke iTekiuajyo Dios taixyekanas itech nochi taltikpak.

17. 1) ¿Kani tamachtiaya Jesús? 2) ¿Keyej nochipa kitemouaya tamachtis?

¹⁷ ¿Kani tamachtiaya Jesús? Kampa yeski. Tamachtiaya kampa taltikpakneminij tatokayaj, itech uejueyi xolalmej, itech xolalkonemej, kampa tanamakayaj uan kajkalpan. Amo kichiaya maj yejuan kitemouanij, ta yejua yaya kintemoti (Marcos 6:56; Lucas 19:5, 6). Jesús kimatia ke Dios kinekia maj tamachti uan yejua nochipa kitakamatia iTajtsin. Yejua ika nochipa kitemouaya tamachtis (Juan 8:28, 29). No tamachtiaya porin teikneliaya (xikonixtajtolti Mateo 9:36). Kiitak ke taixyekananij itech taneltokalis kinkajkayauayaj taltikpakneminij keman ika tajtouayaj Dios uan iTekiuajyo. Yejua ika, kinekia kintapouis tein kuali tein kichiuas iTekiuajyo Dios nochin akin ueliskia.

18. ¿Toni tein kichiuaya Jesús okachi tikonuelita?

 ¹⁸ Jesús kintasojtaya nochin uan ininka motekipachouaya. Katka kualtakat uan yejua ika kiuelitayaj tajtoskej iuan. Hasta konemej kiuelitayaj yetoskej iuan (Marcos 10:13-16). Jesús nochipa kichiuaya tein kuali. Amo kiuelitaya maj kintachtekianij uan maj kintajyouiltianij taltikpakneminij (Mateo 21:12, 13). Itech nejon tonalmej, semi amo kinpatiuitayaj siuamej. Sayoj ke Jesús nochipa kinpatiuitak (Juan 4:9, 27). Uan no, Jesús amo moueyimatia. Kemej neskayot, se tonal kinmetspajpakak imomachtijkauan. Nejin katka se taman tein okachi kichiuayaj takeualmej (Juan 13:2-5, 12-17).

19. ¿Toni kinextia ke Jesús kimatia tein kinpolouaya oksekin uan kinekia kinpaleuis?

¹⁹ Jesús kimatia toni kinpolouaya oksekin uan kinekia kinpaleuis. Senkis kinextij nejin keman kinpajtij ika chikaualis tein Dios kimakak (Mateo 14:14). Kemej neskayot, se takat akin “inakayo kokotokaya” motokij iuan Jesús uan kiluij: “Komo tikonekiskia, tionuelis tinechonchipauas”. Jesús kiiknelij keman kiitak ke tajyouijtoya uan kipaleuij. Jesús “kimatokak uan kilij ijkuin: ‘Nikneki ma tejua xichipaua de mokokolis’”. Uan nejon takat pajtik (Marcos 1:40-42). ¿Keniuj tikonnemilia ke momachilij nejon takat?

20, 21. ¿Keyej Jesús kuali kinextij keniuj moneki se kitakamatis Dios?

²⁰ Jesús kuali kinextij keniuj moneki se kitakamatis Dios. ¿Keyej? Porin nochipa kichiuak tein kiyolpaktij iTajtsin maski kipanok miak ouijkayomej uan akin kitauelitayaj kichiuilijkej miak taman tein amo kuali. Kemej neskayot, Jesús amo tajtakoj keman Satanás  kitemoj kichiualtis tein amo kuali (Mateo 4:1-11). Uan no, seki ichankauan amo kineltokayaj ke yejua katka Mesías uan kijtouayaj ke kuatapolojtoya. Maski ijkon, Jesús kisentokak kitakamatik Jiova (Marcos 3:21). Maski akin kitauelitayaj semi kitajyouiltijkej, yejua amo keman momakepak (1 Pedro 2:21-23).

²¹ Jesús nochipa kitakamatik Jiova maski semi kitajyouiltijkej keman kimiktijkej (xikonixtajtolti Hebreos 5:8). Xikonnemili nochi tein kichiuilijkej itech tonal keman kimiktijkej: kikitskitoj, kipantijkej ke kiuijuikaltij Dios, seki tekiuanij kiixtalijkej maj kitatsakuiltikan, kipijpinaujtijkej, uan seki soldados kitajyouiltijkej uan kipilojkej itech se kouit. Keman Jesús yaya momikilitiya,  chikauak kijtoj: “Nochi notekiuan niktamichiuak ya axkan” (Juan 19:30). Eyi tonal satepan, Jiova kichiuak maj oksepa nemi, sayoj ke amo moitayaok (Efesios 1:20). Cuarenta tonalmej satepan, Jesús “yajki eluiyaktsinko uan motalito iyekmakopaka Itajtsin” uan mochiak hasta maj yejuatsin kimakani tanauatil kemej Tekiuaj (Hebreos 10:12, 13).

22. ¿Toni ueli tikchiaj porin Jesús nochipa kitakamatik iTajtsin?

²² Kemej Jesús nochipa kitakamatik iTajtsin, ueli tikchiaj tinemiskej nochipaya itech Xochital. Yejua nejon tein Jiova kiixtalijka. Itech okse tamachtilis tikitaskej keniuj imikilis Jesús techpaleuia maj ueli tikchiakan tinemiskej nochipaya.