Jiova * Dios kinamiktij yekinika takat iuan yekinika siuat. Biblia kijtoua ke yejuatsin kichijchiuak yekinika siuat uan “kiuikilij takat”. Adán tel yolpakik uan kijtoj: “Iomiyouan, nejua noomiyouan; uan inakayo, nejua nonakayo” (Génesis 2:22, 23). Jiova kisentoka kineki maj namikuanij yolpakikan.

Keman se takat uan se siuat monamiktiaj, xa kinemiliaj ke nochi tel kualtsin yeski. Sayoj ke tein melauj hasta namikuanij akin moteltasojtaj kipiaskej kuejmolmej (1 Corintios 7:28). Itech nejin amaix tikonajsis tayolmajxitilis tein kitemaka Biblia, uan komo tikontakamati, mitsonpaleuis xionyolpaki iuan monamik uan no iniuan mokalyetouanij (Salmo 19:8-11).

TEIN BIBLIA KIJTOUA: Takat akin namikej yejua akin kinixyekana ikalyetouanij (Efesios 5:23).

Komo tejuatsin takat akin namikej, Jiova kichia xikonyekpia monamik ika netasojtalis (1 Pedro 3:7). Yejuatsin kichijchiuak kemej motamajsikayo uan kineki xikonpoujkaita uan xikontasojta (Génesis 2:18). Moneki semi tikontasojtas uan tikontayekanaltis tein yejua kipolos uan amo tein tejuatsin tikontemos (Efesios 5:25-29).

Komo tejuatsin siuat akin namikej, Jiova kichia senkis xikonpoujkaita monamik uan xikonpaleui itech tekit tein kipia (1 Corintios 11:3; Efesios 5:33). Xikonpaleui ika miak pakilis itech tein kiixejekos uan tein kichiuas (Colosenses 3:18). Komo ijkon tikonchiua, motakauj okachi mitsonpoujkaitas uan tikonyolpaktis Jiova (1 Pedro 3:1-6).

TEIN UELIS TIKONCHIUAS:

• Xikontajtani monamik toni uelis tikonchiuas tein mitsonpaleuis xionmochiua se kuali takat oso se kuali siuat akin namikej. Xikonkaki ika nejmachkayot tein mitsoniluis uan xionmochikaua ijkon tikonchiuas

• Amo xionyolijsiui. Se kitemos tein okse kipaktia kiuika miak tonalmej

TEIN BIBLIA KIJTOUA: Semi moneki xikonita tein kipoloua monamik (Filipenses 2:3, 4). Kuali xionmouika iuan monamik, xikonelnamiki ke Jiova kineki maj itekitikauan nochipa kinextikan kualtakayot (2 Timoteo 2:24). Xikonnemili kuali keniuj tiontajtos, ta Biblia tanejmachtia: “Akin amo kinemilia tein kijtoua kemej yeskia tetsoponia ika se espada, sayoj ke inintajtoluan tamatinij tepajtia” (Proverbios 12:18). Iespíritu Jiova mitsonpaleuis xiontajto ika netasojtalis uan kualtakayot (Gálatas 5:22, 23; Colosenses 4:6).

TEIN UELIS TIKONCHIUAS:

• Achto ke tiontajtos iuan monamik ika seki taman tein motelneki, xikontajtani Jiova maj mitsonpaleui xionyolseujto uan maj mitsonmaka se kuali tanemilil

• Xikonnemili ika nejmachkayot toni tikonijtos uan keniuj tikonijtos

TEIN BIBLIA KIJTOUA: Keman takat uan siuat monamiktiaj, mochiuaj “sanse san” (Mateo 19:5). Sayoj ke kisentokaj tatamamej uan kemansa amo sayoj se tanemilil kipiaskej. Yejua ika moneki nankitemoskej keniuj nankiajsikamatiskej tein sejse kinemilia uan tein kimachilia (Filipenses 2:2). Kuali uikalis tein nankipiaskej tapaleuis keman nankiixejekoskej teisa. Biblia kijtoua: “Ika tayolmajxitilis, tein monemilia kuali moixtalia” (Proverbios 20:18). Xikonkaua maj namechyekana tein kijtoua Biblia keman nankiixejekoskej nankichiuaskej se taman tein motelneki (Proverbios 8:32, 33).

TEIN UELIS TIKONCHIUAS:

• Amo sayoj xiontajto iuan monamik ika tein amo semi moneki, ta xikonilui tein tikonmachilia

• Achto ke tionmotenkauas tikonchiuas teisa, xiontajto iuan monamik