Jiova kiixtalij taltikpak maj ompa tinemikan. Ijkuak Dios kichijchiuak Adán uan Eva, yekinika taltikpakneminij, amo kinemilij maj nemikan iluikak, ta nikan taltikpak. Dios ipa kinchichiujkaya ángeles maj ompa nemikan (Job 38:4, 7). Jiova kitalij yekinika takat itech se tel kualtsin xochital tein moajsia Edén (Génesis 2:15-17). Uan no, Adán uan ikoneuan tein kipiaskia satepan, ueliskiaj nemiskiaj ika yolpakilis nochipaya itech taltikpak. Xikonixtajtolti Salmo 37:29 uan 115:16.

Yekinika, xochital sayoj katka tein moajsia Edén. Adán uan Eva monekia kinpiaskej konemej uan ijkon momiakiliskiaj uan kipatauaskiaj nejon xochital itech nochi taltikpak (Génesis 1:28). Taltikpak amo keman ixpoliuis. Nochipa ompa nemiskej taltikpakneminij. Xikonixtajtolti Salmo 104:5.

Xikonita video ¿Keyej Dios kichijchiuak taltikpak?

Adán uan Eva amo kitakamatkej Dios, yejua ika kinkalankixtij itech xochital. Nejon Xochital poliuik, uan amo akin uelini kiyekchijchiuani. Biblia kijtoua ke taltikpak moajsi ininmako akin amo yolkualmej (Job 9:24). Xikonixtajtolti Génesis 3:23, 24.

¿Kisenkauak Dios tein yekinika kinekia maj kiselikan taltikpakneminij? Amo, ta yejuatsin kipia nochi uelilis uan amo keman tapoloua (Isaías 45:18). Satepan, yejuatsin kichiuas maj taltikpaknenkej nemi kemej yekinika kiixtalij. Xikonixtajtolti Salmo 37:11, 34.

Keman Jesús taixyekantos itech iTekiuajyo Dios, taltikpak mokepas se xochital. Itech neteuilis tein itokay Armagedón, Jesús iuan ángeles kinixpoloskej nochin akin kiixnamikij Dios. Ompa, kitsakuas Satanás mil xiujmej. Itekitikauan Dios makisaskej  keman mochiuas poliuilis porin Jesús kinixyekanas uan kinmatampauis, uan satepan kipiaskej se kualtsin nemilis nochipaya itech Xochital. Xikonixtajtolti Apocalipsis 20:1-3 uan 21:3, 4.

¿Kemanian kiixpolos Dios tein amo kuali? Jesús kitemakak se “neskayot” uan ijkon moitaskia ke tamilis amo uejkaua mochiuaskia. Nochi tein mochiujtok axkan uelis kinixpolos taltikpakneminij uan kinextia ke axkan tinemij itech “itamiampa nochi tein mochiujtok itech taltikpak”. Xikonixtajtolti Mateo 24:3, 7-14, 21, 22, TNM.

Itech mil xiujmej keman Jesús tekiuajtitos ne iluikak ipan taltikpak, kitamis nochi tajyouilis (Isaías 9:6, 7; 11:9). Yejua yeski se tekiuaj, sayoj ke no tekitis kemej tiopixkat, ijkon kinijkuanilis inintajtakol akin kitasojtaj Dios. Ika inepaleuil Jesús, Dios kiixpolos kokolis, ueuentsiyot uan mikilis. Xikonixtajtolti Isaías 25:8 uan 33:24.

Taltikpakneminij akin kitakamatij Dios nemiskej itech Xochital (1 Juan 2:17, TNM). Jesús kintitanik itatojtokakauan maj kintemokan akin yolmelaujkej uan maj kinmachtikan keniuj Dios kuali kinselis. Axkan, Jiova kinmachtijtok tel miakej taltikpakneminij uan ijkon nemiskej itech Xochital (Sofonías 2:3). Itech Kalmej kampa Mosentiliaj itaixpantijkauan Jiova, tel miakej kalyetouanij ompa sentaueyichiuaj uan momachtiaj keniuj mouikaskej iuan ininnamik uan yeskij kuali tetatmej, uan no kiseliaj nepaleuil tein kitemaka kuali tanauatilmej. Xikonixtajtolti Miqueas 4:1-4.