TAMACHTILIS 4
¿Akoni Jesucristo?
1. ¿Keniuj peuak inemilis Jesús?
¿Keniuj tapaleuiaya ikualneskayouan Jesús maj nochi tataman taltikpakneminij motokikan iuan? (MATEO 11:29; MARCOS 10:13-16)
Achtopa ijkuak nemiskia nikan taltikpak, Jesús nemia ne iluikak kemej se ángel, yejua ika katka taman (Juan 8:23). Yejua akin Dios yekinika kichijchiuak uan akin kipaleuij maj kichijchiua nochi okseki taman tein onkak. Itech Biblia motokaytia “iyojtsin” iKonetsin Dios porin yejua akin sayoj Jiova kichijchiuak uan amo akin kipaleuij (Juan 1:14). No moixmati kemej “Tajtoltsin”, porin kiuikaya itanauatiluan iTajtsin. Xikonixtajtolti Proverbios 8:22, 23, 30 uan Hebreos 1:2.
2. ¿Keyej ualaj Jesús nikan taltikpak?
Dios kiualtitanik iKonetsin nikan taltikpak. Kipanoltij inemilis itech iijtik María, se ichpoch judía akin amo kiixmatia takat. Yejua ika, ipopaj Jesús amo katka se taltikpaknenkej (Mateo 1:18, 20). Yejua ualaj nikan taltikpak kichiuako eyi taman: 1) tamachtiko akoni yekmelauj Dios, 2) ika ineskayo technextiliko keniuj uelis tikchiuaskej itanejnekilis Dios maski tikpiaskej ouijkayomej, uan 3) kitemakako inemilis tein amo kipiaya tajtakol kemej se taxtauil. Xikonixtajtolti Mateo 20:28.
3. ¿Keyej moneki se taxtauil?
Se taxtauil yejua ipatiuj tein motemaka uan ijkon ueli kimakixtiaj inemilis se taltikpaknenkej (Éxodo 21:29, 30). Dios amo keman kiixtalij maj taltikpakneminij ueuentsintiakan nion maj momikilikan. Tikmatij nejon porin Dios kiiluij yekinika takat, Adán, ke komo tajtakouaya mikiskia. Yejua ika, komo amo tajtakoskia, amo keman mikiskia (Génesis 2:16, 17; 5:5). Kemej kijtoua Biblia, mikilis “momauak” itech taltikpak porin Adán tajtakoj. Ijkon, Adán kinpanoltilij tajtakol ikoneuan uan yejua ika momikiliaj. Ika nejin moita ke moneki se taxtauil tein uelis techmakixtis. Xikonixtajtolti Romanos 5:12 uan 6:23.
¿Akoni ueliskia kitemakas taxtauil uan techmakixtis itech mikilis? Keman timomikiliaj, tikixtauaj sayoj totajtakoluan. Kemej titajtakouanij, nion se taltikpaknenkej uelis kiixtauas inintajtakoluan oksekin. Xikonixtajtolti Salmo 49:7-9.
4. ¿Keyej momikilij Jesús?
Jesús katka yektik, amo kemej tejuan. Amo keman tajtakoj yejua ika amo kinamikia maj miki. Momikilij porin ijkon kiixtauak inintajtakoluan oksekin. Dios kinnextilij taltikpakneminij iueyi netasojtalis keman kiualtitanik iKonetsin maj toka momikili. Jesús no kinextij ke techtasojta porin kitakamatik iTajtsin uan kitemakak inemilis uan ika kiixtauak totajtakoluan. Xikonixtajtolti Juan 3:16 uan Romanos 5:18, 19.
Xikonita video ¿Keyej momikilij Jesús?
5. ¿Toni kichiujtok Jesús itech nejin tonalmej?
Keman nemia nikan taltikpak, Jesús kinpajtij akin mokokouayaj, kinajokuik mikemej uan kinpaleuij akin tajyouiayaj, ijkon kinextij tein satepan kichiuas ininka taltikpakneminij akin tatakamatij (Mateo 15:30, 31; Juan 5:28). Satepan ijkuak Jesús momikilij, Dios oksepa kimakak inemilis ne iluikak (Efesios 1:20). Ompa, Jesús mochiak iyekmakopa Dios hasta maj kimakani tanauatil, ijkon tekiuajtiskia ipan taltikpak (Hebreos 10:12, 13). Axkan Jesús tekiuajtitok ne iluikak, uan itatojtokakauan kiteixmatiltijtokej nejon kuali tanauatil semanauak taltikpak. Xikonixtajtolti Daniel 7:13, 14 uan Marcos 13:10.
Amo uejkaua, Jesús kitekitiltis itanauatil kemej Tekiuaj uan kitamis tajyouilis uan akin tetajyouiltiaj. Nochin akin takuaujtamatij iuan Jesús uan kitakamatij, nemiskej ika yolpakilis itech se xochital nikan taltikpak. Xikonixtajtolti Salmo 37:9-11.
