Tanojnotsmej tein ualeuaj itech Biblia

NEJIN amaix kipia tanojnotsmej tein yekmelauj mochiujkej. Mokuikej itech Biblia, se amaix tein kipia okachi kuali nemachtil. Mitstapouia tein mochiuak yekinika keman Dios peuak tachijchiua, uan ika tami mitsiluia tein motenkaujtok kichiuas amo uejkaua.

Nejin amaix mitsmaka se tanemilil tein kipia Biblia. Ika mitsnojnotsa taltikpakneminij tein moajsij itech Biblia uan tein kichiujkej. No mitstapouia ika Dios kinimaka taltikpakneminij se tel kuali nechialis, kampa uelis nemiskej nochipaya itech se xochital nikan Taltikpak.

Nejin amaix kipia 116 tanojnotsmej. No kipia chikueyi taxelolmej. Kampa peua se taxelol, achto kipia seki tajtolmej kampa kijtoua toni ika motajtoti. Moijkuilojkej ijkon kemej mochiujtiualaj. Ijkon mitspaleuis tikmatis kemanian mochiujkej uan keniuj mouikaj se ika okse.

Nejin tanojnotsmej ijkuiliujtokej ika tajtolmej tein amo ouij. Miakej konetsitsin uelis kixtajtoltiskej imiselti. Tetatmej kiitaskej ika imin konetsitsin kiteluelitaskej maj kinixtajtoltilikan miakpa nejin tanojnotsmej. Tikitas ika nejin amaix kipia miak nemachtil tein motelneki. Uelis momachtiskej tein konemejok uan tein xiuejkejya.

Kampa tami se tanojnots kipia seki taxelolmej tein ualeuaj itech Biblia. ¿Keyej amo tikixtajtoltia taxelolmej kampa motaksaltiaj nejin tanojnotsmej? Itamian tanojnots 116 uitsej seki netajtanilmej, uan keman tiktamiixtajtoltis se tanojnots moneki xikita uan xiknemili keniuj tikinankilis.