Tanojnots 13

Abraham mochiuak itasojikniuj Dios

SATEPAN keman panok Tetsaujkakiouit, itech semej altepemej kampa nemitoj taltikpakneminij motokaytij Ur. Ompa katka se altepet kampa motania miak tomin uan kipiaya kalmej kualtsitsin. Sayoj ika, taltikpakneminij tein ompa nemiaj kiniueyichiuayaj tiotsitsin. Itech altepet Babel no kichiuayaj nejon. Taltikpakneminij tein nemiaj Ur uan Babel amo katkaj kemej Noé uan ikoneuj Sem, yejuan kisentokakej kitekitilijkej Jiova.

Ompa, 350 xiujmej satepan keman panok tetsaujkakiouit, Noé tein nochipa kitakamatik Dios, momikilij. Ome xiuit satepan nemik se takat tein tikita itech nejin taixkopin. Katka se takat taman iixpan Dios. Motokaytij Abraham. Nemia iuan ichankauan itech altepet Ur.

Se tonal Jiova kiiluij Abraham: ‘Xikaua Ur uan mochankauan, uan xiouj itech se ueyi altepet tein nimitsnextiliti’. ¿Kitakamatik Dios uan kikauak nochi tein kipiaya tein kuali itech altepet Ur? Kemaj. Uan kemej Abraham nochipa kitakamatia Dios, yejika kixmatkej kemej itasojikniuj Dios.

Keman Abraham kisak itech altepet Ur, sekin ichankauan no kiskej iuan. Kisak inamik tein motokaytij Sara. Ipopaj tein motokaytij Taré. No kisak imach tein motokaytij Lot. Keman panok tonalmej, nochin ajsikej itech altepet tein motokaytij Harán, uan ompa momikilij Taré. Uejkaya yetoyaj kampa achto nemiaj.

Satepan Abraham uan ichankauan kiskej Harán, uan ajsikej itech tal tein pouia Canaán. Ompa Jiova kiiluij: ‘Yejua nejin tal nikinimakas mokoneuan’. Abraham mokauak Canaán uan nemik itech se kali tachijchiuj ika taken.

Ompa Dios kipaleuij Abraham uan yej kipiak uejueyi oloch ichkamej uan oksekin tapialmej uan tel miakej tekitinij. Sayoj ika Abraham uan Sara amo kinpiayaj konemej.

Keman Abraham kipiaya 99 xiujmej, Jiova kiiluij: ‘Nimoyektenkaua mouan ika eski tiimintat nochin tein takuaujtamatiskej notech’. Sayoj ika, ¿keniuj ueliskia mochiuaskia nejon, keman Abraham uan Sara katkaj xiuejkejya uan amo ueliajok kipiaskej se konet?

Génesis 11:27-32; 12:1-7; 17:1-8, 15-17; 18:9-19.