Tanojnots 43

Josué mochiuak tayekankej

MOISÉS kinekia kalakis Canaán imiuan israelitas. Yejika kiiluij Jiova: ‘Xinechkaua maj nikpanaui ueyiat Jordán, uan maj nikita kuali tal’. Sayoj ika Jiova kiiluij: ‘¡Amo xinechkuejsojto! ¡Ta nimitsiluijya ika amo!’ ¿Tikmati keyej Jiova ijkon kiiluij?

Porin tein kichiujkej keman Moisés kiuitekik tepejxit. Xikelnamiki: yejua uan Aarón amo kiueyitalijkej Jiova. Amo kiniluijkej israelitas ika katka Jiova akin kikixtij at itech tepejxit. Yejika Jiova kiniluij ika amo kinkauaskia maj kalakikan Canaán.

Yejika, se ome eyi metsti satepan keman momikilij Aarón, Jiova kiiluij Moisés: ‘Xikuika Josué uan xiktali iixpan tiopixkat Eleazar uan imin ixpan israelitas. Uan ompa imin ixtenoj nochin xikinilui ika Josué eski yankuik tayekankej’. Moisés kichiuak ijkon kemej Jiova kiiluijka, kemej tikita itech taixkopin.

Ompa Jiova kiiluij Josué: ‘Ximoyolchikaua uan amo ximomoujti. Tejua tikinojtokaltis israelitas uan tikinpanoltis itech tal tein poui Canaán tein nimotenkauak namechmakas, uan nej mouan niyetos’.

Satepan Jiova kiiluij Moisés maj tejkoni ikuapan tepet Nebo tein moajsia Moab. Uan ompa uelik analtachiak nepakaok kampa panouaya ueyiat Jordán uan kiitak kuali tal tein pouia Canaán. Jiova kiiluij: ‘Yejua nejin tal tein nimotenkauak nikinimakas imin koneuan Abraham, Isaac uan Jacob. Nimitskauak xikita, sayoj ika amo nimitskauas xikalaki’.

Moisés ompa momikilij itech tepet Nebo. Kipiaya 120 xiujmej. Katka chikauakok uan ixajsiaok. Israelitas tel tayokoxtoyaj uan kichokilijtoyaj Moisés. Sayoj ika yolpakiaj kipiaskej imin yankuik tayekankauj.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.