Tanojnots 66

Siuatekiuaj Jezabel tel amo yolkuali

SATEPAN keman momikilij tekiuaj Jeroboán, nochin tein kinixyekanayaj majtakti kalyetouanij israelitas, amo yolkualmej katkaj. Uan okachiok katka tekiuaj Acab. ¿Tikmati keyej? Tein okachi kichiualtij, yejua inamik, Jezabel, tein tel amo yolkuali katka.

Jezabel amo katka israelita. Katka iichpoch tein tekiuajtia Sidón. Kiueyichiuaya tiotsin Baal, uan kichiuak maj Acab uan miakej israelitas no kiueyichiuanij Baal. Jezabel kitauelitaya Jiova uan kinimiktij miakej itanauatijkauan. Oksekin monekik motatiskej itech tepekoyokmej uan ijkon maj amo kinimiktianij. Komo Jezabel kinekia teisa uan amo kikauiliayaj, kinimiktiaya.

Se tonal tekiuaj Acab tel tayokoxtoya. Yejika Jezabel kitajtanij: ‘¿Keyej titayokoxtok axkan?’

Acab kinankilij: ‘Ika tein Nabot nechiluij. Nej niknekia nikouilis iuvajtal. Sayoj ika yej nechiluij ika amo ueliskia nechmakas’.

Jezabel kinankilij: ‘Amo teyi ximolui. Nejua nikchiuas maj moaxkati’.

Ompa, Jezabel kinijkuilouilij amamej tayekananij tein nemiaj itech altepet kampa nemia Nabot. Kiniluij: ‘Xikchiuakan maj seki takamej tachiuanij ika tein amo kuali, maj kijtokan ika Nabot kitejtelchiuak Dios uan tekiuaj. Ompa xikixtikan itech altepet uan xikmiktikan ika tet’.

Keman Jezabel kimatik ika Nabot mikkaya, niman kiiluij Acab: ‘Axkan xiouj uan ximoaxkatiliti uvajtal’. ¿Melauj ika Jezabel monekia kitatsakuiltiskej ika tein kichiuak tein tel amo kuali?

Yejika, satepan Jiova kititanik Jehú maj kitatsakuiltiti. Keman Jezabel kimatik ika Jehú yaya ichan, moixtajtapaluij uan mochijchiuak maj moitani kuakualtsin. Sayoj ika, keman Jehú ajsik uan kiitak ika yetoya itech iventana, kiniluij takamej tein yetoyaj itech kaltekiuaj: ‘¡Xikpantamotakan!’ Kemej tikita itech taixkopin, yejuan tatakamatkej. Kipantamotkej uan mikik. Ijkon tamiko siuatekiuaj Jezabel tein tel amo yolkuali.

1 Reyes 16:29-33; 18:1-4; 21:1-16; 2 Reyes 9:30-37.