Jonás uan ueyi amichij
Tanojnots 70
Jonás uan ueyi amichij
XIKITA takat tein yetok aijtik. Tel amo kualtsin kipanotok, ¿melauj? ¡Nejin amichij kitoloti! ¿Tikmati akoni nejin takat? Motokaytia Jonás. Tikitatij keniuj mokalakij itech se ueyi kuejmol nejin takat.
Jonás katka itanauatijkauj Jiova. Satepan keman momikilij tanauatijkej Eliseo, Jiova kiiluij Jonás: ‘Xiouj itech ueyi altepet Nínive. Imin tachiualisuan tein ompa nemij motelmiakilijya, uan nikneki xikinejmachtiti’.
Sayoj ika Jonás amo kinekik yas. Yejika mokalakij itech se barco tein amo yaya Nínive, ta yaya sentapalika. Jiova amo kiuelitak maj cholouani Jonás. Yejika kichiuak maj tel kiouaejeka. Kemej katka tel chikauak, barco yaya pankalakiti. Nochin tein ompa yayaj motelmoujtijkej, uan kintsajtsiliayaj imin tiotsitsin maj kinpaleuianij.
Ompa, Jonás kiniluij: ‘Nej nikueyichiua Jiova, Dios tein kichijchiuak iluikak uan Taltikpak. Nikcholuijtok tekit tein Jiova nechnauatij maj nikchiua’. Ompa, nochin tein yayaj itech barco kitajtanijkej: ‘¿Toni maj timitschiuilikan uan ijkon motsakuilis kiouaejekat?’
Jonás kiniluij: ‘Xinechpantamotakan aijtik, uan ueyiat motamatilis’. Tein yayaj itech barco amo kinekiaj kichiuaskej nejon, sayoj ika keman okachi mochikauak kiouaejekat, kipantamotkej Jonás. Uan kiouaejekat niman motsakuilij, uan ueyiat motamatilij.
Keman Jonás pankalakik, se ueyi amichij kitoloj. Sayoj ika amo mikik. Eyi tonal uan eyi youal yetoya iijtik amichij. Jonás motelyolkokoj keyej amo yajki Nínive kemej Jiova kiiluijka. Yejika, ¿tikmati toni kichiuak?
Jonás kichiuak se netataujtil iuan Jiova uan kitajtanij inepaleuil. Ompa, Jiova kichiuak maj amichij kijsotani Jonás atenoj. Satepan, Jonás yajki Nínive. ¿Amo technextilia nejin ika motelneki tikchiuaskej nochi tein Jiova techiluis?
