Hebreos 8:1-13
8 Tanemilil tein tayekantok tein ika titajtojtokej yejua nejin: tejuan tikpiaj se tayekankatiopixkat ijkon, uan yejua motalij iyekmakopa toUeyi Dios akin motalia itech iueyi silla ne iluikak.
2 Uan no tekiti kampa Okachi Yektik uan itech yekmelauj takenkal tein kichijchiuak Jehová* uan amo se takat.
3 Porin nochin tayekankatiopixkamej kinixtaliaj para kimaktiliskej Dios tapialmej uan okseki taman; yejua ika monekia maj nejin tayekankatiopixkat no kitemakani teisa.
4 Komo yejua yetoskia nikan taltikpak, amo yeskia tiopixkat, porin moajsijya tiopixkamej akin kimaktiliaj Dios seki taman ijkon kemej kijtoua iTanauatil Moisés.
5 Tekit tein kichiuaj nejin takamej sayoj kiixnextia uan kinextia tein mochiua ne iluikak. Nejin monextij keman Dios kinauatij Moisés keniuj monekiskia kichijchiuas takenkal. Yejua kiluij: “Xikyekita maj mochiua nochi ijkon kemej nimitsnextilij keman tietoya itech tepet”.
6 Sayoj ke axkan, Jesús kimakakej se okachi kuali tekit, porin yejua no tetajtouia itech se taman tein okachi kuali tein Dios motenkauak. Nejin Dios kiixtalij ika itanauatil uan kipia okachi kuali tatiochiualismej.
7 Komo nejon tein achto Dios motenkauak amo kipiaskia nion teyi tein amo kuali, amo monekiskiaok maj motenkauani okse taman.
8 Porin Dios kiitak ke israelitas kinpolouaya teisa keman kijtoj: “Jehová* kijtoua: ‘Xikita, ejkos tonal keman nimotenkauas se yankuik taman iniuan israelitas uan iniuan akin pouij Judá’.
9 Jehová* no kijtoua: ‘Amo yeski kemej tein nimotenkauak iniuan ininuejkaujtatuan keman nikinmajchanak uan nikinkixtij de Egipto. Yejuan kiixtopeujkej tein nimotenkauak, yejua ika amo nikinitakok’.
10 ”Jehová* kijtoua: ‘Yejua nejin tein nimotenkauas iniuan israelitas keman panos nejon tonalmej. Niktalis notanauatiluan itech inintanemilil uan nikijkuilos itech ininyolo. Nejua niyeski niininDios uan yejuan yeskij noxolal.
11 ”’Uan amo akin kiniluisok iikniuan nion akin pouij itech ixolal: “¡Xikixmati Jehová!”.* Porin nochin nechixmatiskej, akin amo ueyichiuanimej hasta akin ueyichiuanimej.
12 Uan nejua nikintapojpoluilis tein amo kuali tein kichiuaj, uan amo kemanok nikinelnamikilis inintajtakoluan’”.
13 Keman kijtoua “nimotenkauas se yankuik taman”, yejua kichiuak maj amo tapaleuiok tein achto motenkauak. Tein uejkaujkayot uan amo tapaleuiaok niman ixpoliuiti.
