Efesios 2:1-22
2 Uan no, Dios kichiuak xinemikan, maski kemej yeskia namomikilijkajya porin nantajtakolchiuayaj.
2 Nejon nankichiujkej keman nanentinemiaj kemej akin nemij itech nejin tonalmej* uan nankichiuayaj tein kineki taixyekankej akin kipia tanauatil itech ejekat. Nejin ejekat yejua tanemilil tein kinyekana akin amo tatakamatij.
3 Achto tinochin no tikchiuayaj tein kinejnekia tonakayo uan tikchiuayaj tein amo kuali tein tiknemiliayaj. Desde ke tiyolkej technamikiaya maj Dios technextili iueyi kualanyo, ijkon kemej oksekin.
4 Sayoj ke Dios akin semi teiknelia, semi techtasojtak,
5 yejua ika kichiuak maj tinemikan uan techsentilij iuan Cristo, maski kemej yeskia timomikilijkajya porin titajtakolchiuayaj (Dios namechmakixtij porin namechnextilij itatiochiualis tein amo technamiki).
6 Uan no, Dios kichiuak maj tinemikan* uan techtakauilij kampa timotaliskej ne iluikak porin techsentilij iuan Cristo Jesús,
7 para maj itech tonalmej* tein ualaskej kinexti iueyi tatiochiualis tein amo technamiki keman techtayokolis miak taman akin tipouij iuan Cristo Jesús.
8 Ika nejin tatiochiualis tein amo technamiki, Dios namechmakixtij porin nantakuaujtamatij. Sayoj ke amo porin namotanilijkej, ta nejon itatiochiualis Dios.
9 Amo namechmakixtijkej porin nankichiujkej tein kuali, para maj amo akin kipia tein ika moueyimatis.*
10 Dios techchijchiuak, uan kemej tipouij iuan Cristo Jesús, techchijchiuak para maj tikchiuakan tein kuali, tein Dios achto kiixtalij maj tikchiuakan.
11 Yejua ika, xikelnamikikan ke namejuan amo nanjudíos, uan akin kintekkej* keman yolkej namechixmatiaj kemej akin amo kintektokej uan ijkon namechiluiayaj.
12 Itech nejon tonalmej amo nankiixmatiaj Cristo, nion nanpouiaj itech xolal Israel, uan Dios amo namechmakaskia tein motenkaujka. Nanemiaj kemej oksekin nemij, amo nankichiayaj tein kuali uan amo nankiixmatiaj Dios.
13 Namejuan achto amo nankiixmatiaj Dios, sayoj ke axkan ke nanpouij iuan Cristo Jesús, nankiixmatijya porin namechpaleuia iesyo Cristo.
14 Porin Cristo kichiuak maj tiyolseujtokan, kichiuak maj ome xolalmej mochiuakan sayoj se uan kemej yeskia kixitinij tepamit tein kinxelouaya.
15 Ijkuak motemaktij,* kichiuak maj amo tapaleuikanok tataman tanauatilmej tein kipiaya iTanauatil Moisés, tein kichiuaya maj moixnamikikan ome xolalmej. Uan kinsentilij uan kichiuak maj mochiuakan se yankuik xolal.* Nochin pouij iuan Cristo uan yejua kichiuak maj kuali mouikakan.
16 Uan keman kikoujpampilojkej* no kichiuak maj nejon ome xolalmej tein mochiujkej sayoj se, kuali mouikakan iuan Dios, porin keman momikilij kiixpoloj tein kichiuaya maj moixnamikikan.
17 Uan yejua ualaj uan namechixmatiltij kuali tanauatilmej* tein kinextia keniuj kuali se mouikas iuan Dios. Namechixmatiltij namejuan akin amo nankiixmatiaj Dios uan no akin kiixmatiaj.
18 Porin itechkopa, akin tipouij itech ome xolalmej amo teyi techtsakuiliaok maj iuan timotokikan toTajtsin porin tinochin tikseliaj ichikaualis Dios tein sayoj se.
19 Yejua ika, axkan namechixmatijya uan amo okseko nankayomej, ta nanpouij kampa pouij akin Dios moinxelouilij* uan nanikoneuan Dios.
20 Dios namechchijchiuak kemej se kali itech tatsineualoni, nejin yejuan tatitanilmej uan tanauatianij,* uan Cristo Jesús yejua tet tein okachi tayekantok.
21 Nejon kali yekchijchiujtok uan kuali sajsaliujtok. Uan kemej nejon kali poui iuan Cristo, kemej yeskia moskaltijtok para mochiuas se templo tein xeliujtok para Jehová.*
22 Kemej nanpouij iuan Cristo, Dios namechsentilij iniuan oksekin itech se kali kampa yejua nemi, porin ichikaualis ompa yetok.
Tajtolmelaualismej
^ Xikonita tonalmej; tein mochiujtok.
^ Itech griego, “techajokuik”.
^ Xikonita tonalmej; tein mochiujtok.
^ Oso “moueyinekis”.
^ Oso “kinchiuilijkej circuncisión”. Xikonita circuncisión.
^ Itech griego, “Ika inakayo”.
^ Itech griego, “yankuik takat”.
^ Xikonita kouit kampa tetajyouiltiaj.
^ Oso “tajtolmej”.
^ Oso “chipaujkej iixpan Dios”.
^ Xikonita tanauatijkej.
