2 Crónicas 16:1-14
16 Keman Asá 36 xiujmejya tekiuajtitoya ompa Judá, Baasá akin tekiuajtia itech xolal Israel kinteuito akin nemiaj Judá. No peuak kiyekchijchiua Ramá porin amo kinekia maj nion akin kisani de Judá kampa taixyekanaya tekiuaj Asá uan maj nion akin kalakini.
2 Keman Asá kimatik nejon, kikuito plata uan oro tein kitalijkaj itech cuartos tein yetoyaj ichan Jehová kampa kikalakiayaj nochi tein patiyoj, uan no kikuik plata uan oro tein kipiaya ichan. Nochi nejon kititanilij Ben-Hadad akin tekiuajtia Siria. Asá kiluij Ben-Hadad akin nemia Damasco:
3 “Tejua uan nejua timotenkaujkaj ke timopaleuiskej uan no ijkon motenkaujkaj totatuan. Yejua ika nimitstitanilia nejin plata uan oro. Uan nimitstajtania amo xikchiuaok tein timotenkauak iuan Baasá akin tekiuajti Israel para maj amo nechixnamikiok”.
4 Ben-Hadad kichiuak tein kitajtanij tekiuaj Asá. Yejua ika kintitanik takamej akin kinixyekanayaj isoldados maj kinteuitij akin nemiaj itech uejueyi xolalmej tein pouiaj Israel. Isoldados Ben-Hadad moaxkatilijkej Ijón, Dan, Abel-Maim uan nochi uejueyi xolalmej tein kinmakakaj ikoneuan Neftalí. Itech nejon uejueyi xolalmej kisentiliayaj takual uan okseki taman.
5 Keman Baasá kimatik tein kichiuak Ben-Hadad, amo kitamichijchiuakok Ramá.
6 Tekiuaj Asá kinkuiteuak nochin akin nemiaj Judá uan yajkej Ramá. Yejuan kikuitoj tet uan kouit tein Baasá kikuika para kiyekchijchiuas Ramá. Asá kikuik nejon tet uan nejon kouit para kiyekchijchiuas ueyi xolal Gueba uan ueyi xolal Mizpá.
7 Ijkuak, tanauatijkej Hananí* kiitako Asá akin tekiuajtia Judá uan kiluij: “Kemej amo titakuaujtamatik* iuan moDios Jehová, ta titakuaujtamatik* iuan akin tekiuajti Siria, amo tikintanik isoldados akin tekiuajti Siria.
8 Soldados akin kayomej Etiopía uan Libia okachi miakej katkaj uan kinualkuiaj miak carros tein kikuiaj keman tateuiayaj, uan no kinualkuiaj miak soldados akin ualayaj itech caballos. Sayoj ke Jehová mitspaleuij xikintani porin iuan titakuaujtamatik.
9 Jehová ualtachixtok nikan taltikpak para kinextis ke semi chikauak uan ijkon kinpaleuis akin sayoj yejua kitekitiliaj.* Sayoj ke axkan tiknextij ke amo titamati, yejua ika desde axkan miakej mitsixnamikiskej”.
10 Asá tel kualanik iuan tanauatijkej Hananí* uan kitsakuak. Uan no peuak kintajyouiltia sekin akin nemiaj Judá.
11 Nochi tein kipanok Asá keman tekiuajtik, ijkuiliujtok itech amatajkuilol kampa ininka tajtoua nochin akin tekiuajtikej Judá uan Israel.
12 Keman Asá 39 xiujmejya tekiuajtitoya, kikuik se kokolis* itech imetsuan uan okachi tanauik.* Sayoj ke amo kitemoj maj Jehová kipaleui, ta kintemoj tapajtianij.
13 Asá momikilij* keman 41 xiujmejya tekiuajtitoya.
14 Asá kualtsin motachijchiuijka kampa kitokaskiaj itech ueyi xolal tein iaxka David uan ompa kitokkej keman momikilij. Kimanelojkej miak taman xiujtsitsin tein ajuiyak uan kitalijkej kampa kitekkej Asá, no kitalijkej aceite tein monotsa bálsamo. Uan kichichinojkej miak taman para kiueyitaliskej keman kitokkej.
Tajtolmelaualismej
^ Itech hebreo, “Hananí akin tachia”. Nikan ika tajtojtok aksa (akin, akaj) akin Dios kipaleuia maj kiajsikamati seki taman. Xikonita tanauatijkej.
^ Itech hebreo, “amo timopaleuij”.
^ Itech hebreo, “timopaleuij”.
^ Itech hebreo, “akin ininyolo ajsitok para yejua”.
^ Itech hebreo, “Hananí akin tachia”. Nikan ika tajtojtok aksa akin Dios kipaleuia maj kiajsikamati seki taman.
^ Oso “kokoxkayot”.
^ Oso “tel mal motalij”.
^ Oso, “moseuito iniuan iuejkaujtatuan”.
