1 Crónicas 15:1-29
15 David kisentokak moinchijchiuilij kalmej itech ueyi xolal tein iaxka David. No tachijchiuak kampa ueliskia kiketsas se kaltsin* para ompa kitalis tatiochiualkaxon* tein iaxka toTajtsin Dios.
2 Ijkuak, David kijtoj: “Sayoj levitas ueli kiuikaj tatiochiualkaxon tein iaxka toTajtsin Dios, porin Jehová kinijitak levitas para kiuikaskej tatiochiualkaxon tein iaxka Jehová uan para kitekitiliskej nochipaya”.
3 Satepan David kinsentilij nochin israelitas ompa Jerusalén para kikuitiuij* tatiochiualkaxon tein iaxka Jehová uan kitaliskej kampa David kitachijchiuijka.
4 David kinsentilij ikoneuan Aarón uan levitas:
5 de ikoneuan Cohat kinotsak Uriel akin taixyekanaya uan 120 iparientes.
6 De ikoneuan Merarí kinotsak Asaya akin taixyekanaya uan 220 iparientes.
7 De ikoneuan Guersom kinotsak Joel akin taixyekanaya uan 130 iparientes.
8 De ikoneuan Elizafán kinotsak Semaya akin taixyekanaya uan 200 iparientes.
9 De ikoneuan Hebrón kinotsak Eliel akin taixyekanaya uan 80 iparientes.
10 De ikoneuan Uziel kinotsak Aminadab akin taixyekanaya uan 112 iparientes.
11 Uan no, David kinotsak Sadoc uan Abiatar akin katkaj tiopixkamej. No kinotsak Uriel, Asaya, Joel, Semaya, Eliel uan Aminadab akin katkaj levitas.
12 David kiniluij: “Namejuan nankinixyekanaj uejueyi familias tein pouij iniuan ichankauan Leví. Namejuan uan namoparientes xikchiuakan nochi tein moneki para uelis nankiueyichiuaskej Dios. Satepan xikuitij tatiochiualkaxon tein iaxka Jehová, ininDios israelitas. Xikpankixtikan uan xiktalikan kampa niktachijchiuij.
13 Kemej amo namejuan nankiualkuikej tatiochiualkaxon keman yekinika tikuitoj, semi tikualantijkej toDios Jehová porin amo tikchiujkej kemej yejua tanauatij”.
14 Yejua ika tiopixkamej uan levitas kichiujkej nochi tein monekia para ueliskia kiueyichiuaskej Dios. Ijkon ueliskia kikuitiuij tatiochiualkaxon tein iaxka Jehová ininDios israelitas para kipankixtiskej.
15 Levitas kiuikakej tatiochiualkaxon tein iaxka toTajtsin Dios ijkon kemej Jehová kinauatijka Moisés maj kichiuakan. Moisés kiniluijka ke monekia kimamaskej tatiochiualkaxon ika koujmej tein kitalilijkaj para kiuikaskej.
16 David kiniluij akin kinixyekanayaj levitas maj kiniluianij ininparientes akin cantarouayaj maj cantarouanij ika miak pakilis uan maj kitsotsonanij cítara,* arpas uan maj kikakistiltianij címbalos.*
17 Yejua ika levitas kinixtalijkej seki ininparientes para maj kichiuanij tein David kijtojka. Kiixtalijkej Hemán akin katka iokichpil Joel, Asaf akin katka iokichpil Berekías uan de ichankauan Merarí kiixtalijkej Etán akin katka iokichpil Cusayá.
18 Levitas no kinixtalijkej okseki ininparientes. Kiixtalijkej Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu uan Micneyá. No kinixtalijkej Obed-Edom uan Jeiel akin tajpiayaj puertajtenoj.
19 Hemán, Asaf uan Etán akin cantarouayaj monekia kikakistiltiskej címbalos tein chijchiujtoyaj ika cobre.
20 Zacarías, Aziel, Semiramot, Jehiel, Uní, Eliab, Maaseya uan Benaya kitsotsonayaj cítaras tein kualtsin kitilintiliayaj cuerdas para maj chikauak kakisti.*
21 Uan Matitías, Elifelehu, Micneyá, Obed-Edom, Jeiel uan Azazías kitsotsonayaj arpas tein amo semi kitilintiliayaj cuerdas para maj amo chikauak kakisti.* Yejuan kinixyekantiayaj tatsotsonanij.
22 Kenanías kinixyekanaya akin kiuikayaj tatiochiualkaxon porin kuali kimatia keniuj kiuikaskej. Yejua kinixyekanaya nochin levitas.
23 Uan Berekías uan Elcaná kiyekpiayaj tatiochiualkaxon.
24 Sebanías, Josafat, Netanel, Amasái, Zacarías, Benaya uan Eliezer akin katkaj tiopixkamej kipitsayaj trompetas. Yejuan chikauak kipitsayaj trompetas taixpan den tatiochiualkaxon tein iaxka toTajtsin Dios. Uan Obed-Edom uan Jehías no kiyekpiayaj tatiochiualkaxon.
25 David, taixyekananij israelitas uan akin kinixyekanayaj mijmil takamej yajkej ichan Obed-Edom uan semi yolpaktiayaj. Yejuan kikuitoj tatiochiualkaxon tein iaxka Jehová para kipankixtiskej.
26 Kemej toTajtsin Dios kinpaleuij levitas akin kiuikayaj tatiochiualkaxon tein iaxka Jehová, yejuan kichichinouilijkej chikome kuakuejmej tein yekin moskaltijtoyaj uan chikome ichkaueuetkej.*
27 David motalilijka se tasal tein ueyak uan makojkotoltik tein tel kuali katka, ijkon kemej nochin levitas akin kiuikayaj tatiochiualkaxon. Kenanías uan akin cantarouayaj no motalilijkaj se tasal ueyak uan makojkotoltik. Kenanías kinixyekanaya akin cantarouayaj uan kiuikayaj tatiochiualkaxon. David no motalilijka se koton tein kiluiaj efod* tein chijchiujtoya ika lino.
28 Nochin israelitas kiualkuiaj tatiochiualkaxon tein iaxka Jehová uan ajkotsajtsitiualayaj keman ualpankistiayaj porin semi yolpakiaj. No mokakia kuaomit tein kipitstiualayaj, trompetas uan címbalos tein kikakistiltijtiualayaj. No chikauak kitsotsontiualayaj cítaras uan arpas.
29 Keman tatiochiualkaxon tein iaxka Jehová kiejkoltijkej itech ueyi xolal tein iaxka David, Mical iichpoch Saúl pantachixtoya desde iventana. Keman kiitak ke tekiuaj David ajkotsikuintiualaya uan kichiujtiualaya miak taman porin semi yolpakia, peuak kitauelita.
Tajtolmelaualismej
^ Nejin kaltsin chijchiujtoya ika tasal.
^ Xikonita tatiochiualkaxon.
^ Itech hebreo, “kipankixtitiuij”.
^ Nejin tein ika tatsotsonayaj chijchiujtoya ika kouit uan kitaliliayaj cuerdas.
^ Nejin tein ika tatsotsonayaj katkaj ome uejueyi teposmej tein yojyoualtikej.
^ Oso “borregos”.
