Komo tikonneki tionmouikas iuan Dios, achto moneki tikonixmatis uan tikonchiuas tein kiuelita. Nejon kichiuas maj Dios motoki mouan (Santiago 4:8). Biblia kijtoua ke Dios “amo uejka yetok” (Hechos 17:27).

•  Tein moneki tikchiuaskej para kuali timouikaskej iuan Dios

•  Tein sekin kinemiliaj, sayoj ke amo melauj

 Xikonlero Biblia

•  Tein Biblia kijtoua: “Nochi tein ijkuiliujtok itech Tajkuilolamatsin ualeua imako Dios” (2 Timoteo 3:16).

•  Tein kijtosneki: Dios iaxka Biblia. Yejuatsin kitalij itanemililuan itech inintanemilil seki takamej para maj kijkuilouanij. Itech Biblia, Dios techiluia keniuj kineki maj tinemikan uan techiluia keniuj tamati yejuatsin, kemej neskayot, kijtoua ke tetasojta, melauak uan teiknelia (Éxodo 34:6; Deuteronomio 32:4).

•  Tein uelis tikonchiuas: Mojmostaj xikonlero Biblia (Josué 1:8). Itech xiontanemili tein tikonleroj. Xionmotajtani: “¿Toni nechmachtia de Dios?” (Salmo 77:12).

   Kemej neskayot, xikonlero Jeremías 29:11 uan xionmotajtani: “¿Toni kineki Dios maj nikpia: yolseuilis oso maj nechpano tein amo kuali? ¿Nechtatsakuiltia oso kineki maj kuali nieto?”.

 Xikonita tein Dios kichijchiuak

•  Tein Biblia kijtoua: “Maski Dios amo ueli se kiita [...] ueli se kiajsikamati ika tein kichijchiuak” (Romanos 1:20).

•  Tein kijtosneki: Ijkon kemej se kualtsin taixkopin oso se tepos techpaleuia maj tikixmatikan akin kichijchiuak, no ijkon tein Dios kichijchiuak techpaleuia maj tikmatikan keniuj tamati yejuatsin. Kemej neskayot, kemej tekiti uan kemej chijchiujtok tokuatixyo kinextia ke Dios semi tamatkej. Uan ichikaualis Tonaltsin uan sitalimej techmachtia ke yejuatsin kipia miak chikaualis (Salmo 104:24; Isaías 40:26).

•  Tein uelis tikonchiuas: Xikonxelo tiempo para tikonitas tein onkak uan toni mitsonmachtia. Keman tikonitas xionmotajtani: “¿Toni nechmachtia de Dios tein onkak tein semi kualtsin?”. a Sayoj ke onkak miak taman tein amo tikmatiskej de toTachijchiujkauj komo sayoj tikitaj tein kichijchiuak. Yejua ika Dios techmakak Biblia.

 Xikonkui itokay Dios

•  Tein Biblia kijtoua: “Nikyekpias porin kiixmati notokay. Yejua nechnotsas, uan nejua niknankilis” (Salmo 91:14, 15).

•  Tein kijtosneki: Dios, akin monotsa Jehová, kinkaki akin kiixmatij itokay uan kikuij ika poujkaitalis b (Salmo 83:18; Malaquías 3:16). Itech Biblia, yejuatsin techiluia keniuj monotsa: “Nejua niJehová. Yejua nejon notokay” (Isaías 42:8).

•  Tein uelis tikonchiuas: Xikonkui itokay, Jehová keman ika tiontajtos Dios.

 Iuan xiontajto Jehová

•  Tein Biblia kijtoua: “Jehová amo uejka moajsi de nochin akin kinotsaj” (Salmo 145:18).

•  Tein kijtosneki: Jehová motokia iniuan akin kinextiaj ke takuaujtamatij keman kitataujtiaj. Ika netataujtil no tikueyichiuaj Dios uan ika tiknextiaj ke semi tiktakachiuaj.

•  Tein uelis tikonchiuas: Nochipa xikonchiua netataujtil (1 Tesalonicenses 5:17). Xikonilui Dios keniuj tionmomachilia uan toni mitsontekipachoua (Salmo 62:8). c

 Xiontakuaujtamati iuan Dios

•  Tein Biblia kijtoua: “Komo aksa amo takuaujtamati amo keman uelis kiyolpaktis Dios” (Hebreos 11:6).

•  Tein kijtosneki: Komo tikonneki tionmotokis iuan Dios, moneki iuan tiontakuaujtamatis. Itech Biblia, se takuaujtamatis amo sayoj kijtosneki se kineltokas ke Dios nemi. No kijtosneki senkis se takuaujtamatis iuan, ke kichiuas tein motenkaua uan ke itanauatiluan nochipa tepaleuiaj. Motelneki titakuaujtamatiskej komo tiknekij kuali timouikaskej iuan Dios.

•  Tein uelis tikonchiuas: Moneki tikpiaskej taixmatilis para yekmelauj titakuaujtamatiskej iuan Dios (Romanos 10:17). Komo tionmomachtia tein kijtoua Biblia tikonitas ke uelis tiontakuaujtamatis iuan Dios uan ke tein tayolmajxitia uelis mitsonpaleuis. Itaixpantijkauan Jehová uelis mitsonpaleuiskej okachi xikonixmati tein Biblia tamachtia. d

 Xikonchiua tein Dios kiuelita

•  Tein Biblia kijtoua: “Yejua nejin tein kijtosneki tiktasojtaskej Dios: maj tiktakamatikan itanauatiluan” (1 Juan 5:3).

•  Tein kijtosneki: Komo tikonnextilia Dios ke tikontasojta uan tionmochikaua tikontakamatis, Jehová mouan motokis.

•  Tein uelis tikonchiuas: Ijkon kemej tionmomachtijtias Biblia, tikonmatis toni kiuelita Dios uan toni amo. Xionmotajtani: “¿Toni moneki nikpatas para nikyolpaktis Dios?” (1 Tesalonicenses 4:1).

 Xikonchiua tein Dios mitsonyolmajxitia uan xikonmachili ke mitsontasojta

•  Tein Biblia kijtoua: “Xikixmatikan Jehová uan xikitakan ke yolkuali” (Salmo 34:8).

•  Tein kijtosneki: Dios mitsonyoleua xikonita ke yejuatsin yolkuali. Keman tikonmachilis ke mitsontasojta tikonnekis okachi tionmotokis iuan.

•  Tein uelis tikonchiuas: Ijkon kemej tikonlerojtias Biblia, xikonchiujtiuj tein tayolmajxitia, tikonitas ke semi mitsonpaleuis (Isaías 48:17, 18). No xikonita keniuj Dios kinpaleuiani oksekin maj taxikokan keman kipianij ouijkayomej, maj okachi kuali nemikan yejuan uan ininchankauan, uan maj yekmelauj yolpakikan. e

 Tein sekin kinemiliaj: Amo uelis timouikaskej iuan Dios porin amo ueli se kiixmati.

 Tein melauj: Maski moajsi seki taman tein ouij techkisa tikajsikamatiskej, kemej neskayot, ke Dios se ejekat, kemaj uelis iuan timouikaskej. Tein melauj, Biblia kijtoua ke komo tiknekij tinemiskej nochipaya, moneki tikixmatiskej (Juan 17:3). Tein Biblia kijtoua de Dios amo ouij se kiajsikamati, techiluia keniuj tamati yejuatsin, keniuj kineki maj nemikan taltikpakneminij, tein kiixtalijtok maj mochiua nikan taltikpak uan katiyejua itanauatiluan (Isaías 45:18, 19; 1 Timoteo 2:4). Uan kemej tikijtojkejya, Dios no techiluia keniuj monotsa (Salmo 83:18). Yejua ika, amo sayoj uelis tikixmatiskej Dios, ta no uelis iuan timouikaskej (Santiago 4:8).