Jehová itlajtoltemakauaj nochipa kinitstokej tlajtolmoyauaj kajkalpa. Nama nojkia kinitaj tlajtolmoyauaj kampa nemij miakej, uan kitekiuiaj carritos kampa kitlaliaj amatlajkuiloli.

Ipan noviembre xiuitl 2011 pejkej kiampa tlajtolmoyauaj ipan altepetl Nueva York. Se keskij Jehová itlajtoltemakauaj kitekiuijkej mesas kampa kitlalijkej amatlajkuiloli uan kiampa ueliskia kinmachtisej maseualmej tlen Biblia. Ni tlamantli tlauel kuali kiski yeka nojkia kiampa kichijkej ipan sekinok altepemej.

Ipan marzo, 2015, ya kititlantoyaj ipan nochi tlanechikoli 165,390 carritos kampa kitlaliaj amatlajkuiloli. Nama nojkia tijtekiuiaj mesas, quioscos uan sekinok tlamantli kampa tijtlaliaj amatlajkuiloli.

Jehová itlajtoltemakauaj nochipa tlajtolmoyauasej kajkalpa pampa kiampa kinmachtiaj maseualmej tlen Biblia. Maske kiampa, nopa carritos kampa kitlaliaj amatlajkuiloli kinpaleuijtok tlauel miakej maseualmej. Ma tikitakaj kenijkatsa kinpaleuijtok se keskij maseualmej.

Raúl, katli eua Perú, kinnechkauik Jehová itlajtoltemakauaj katli itstoyaj ipan se carrito, uan kiniljuik: “¿Kanke initstoyaj? Eyi xiuitl niinmechtemojtok. Kema nikitak ni carrito, nijtlaskamatilik toTeotsij”.

Maske Jehová itlajtoltemakauaj ipa tlajtolmoyauayayaj kampa itstoya Raúl, ya amo kema itstoya ipan ichaj. Raúl kiniljuik ipa momachtiyaya Biblia ika Jehová itlajtoltemakauaj uan nama sampa kinekiyaya momachtis Biblia ininuaya. Inijuantij kiitakej kema ueliskia kimachtisej.

Ipan Bulgaria, se tlakatl iuaya isiua monechkauijkej kampa kitlalijtoyaj se carrito uan kiuikakej nopa amochtli El secreto de la felicidad familiar. Kema panotoya se semana tlakuepilijkej uan kiuikakej Noamoch katli nechpouilia tlen kiijtoua Biblia uan Aprendamos del Gran Maestro. Toikni katli itstoya ipan nopa carrito, kintlajtlanilik keskij ininkoneuaj kinpixtoyaj. Inijuantij kiijtojkej: “Namantsi amo tikinpiaj tokoneuaj, tlaj teipa tikinpiasej, tijnekij ma kiixmatikaj toTeotsij. Uan nochi ni amochtli tlauel techpaleuis”.

Ipan Ucrania, se tlakatl tlen moyoyontijtoya kej soldado monechkauik ipan se carrito, uan kiniljuik: “Ichpokamej, xitechiljuikaj kema peuas Armagedón”. Ni tlakatl sanok tlapaleuijtoya ipan se tlauilankayotl ipan Ucrania. Tlen kiitstoya pano ipan nochi Tlaltipaktli kichijki ma motemachi nechka mochiuaskia Armagedón, uan motlajtlaniyaya kenke toTeotsij amo tleno kichijtoya. Jehová itlajtoltemakauaj kiixtomilijkej ika Biblia kenke toTeotsij amo tleno kichijtok, uan kiiljuijkej nechka kitlamiltis nochi tlen amo kuali. Nopa tlakatl kiselik nopa pilamochtsi Tlen Tematiltia uan ¡Despertad!, uan nopa amochtli ¿Existe un Creador que se interese por nosotros?

Ipan Macedonia, kema Jehová itlajtoltemakauaj tlajtolmoyauayayaj ika carrito, se telpokatl kiniljuik ya kipojtoya nopa pilamochtsitsij uan nama kinekiyayaj nopa amochtli ¿Tlake nelnelia tlamachtia Biblia? Kema kimakakej, kiijtok nimantsi peuaskia kipouas.

Kema panok ome horas, nopa telpokatl tlakuepilik uan ya kipojtoya 79 iamayouaj. Ya kiijtok: “Ni amochtli kipatla monemilis. Nama nikita nimokuapolojtoya ipan miak tlamantli. Nelia melauak nochi tlen kiijtoua ni amochtli. Ni amochtli kipatlatok nonemilis”.