¿Kenijkatsa kichijchiuaj nopa tlaixkopinkayomej tlen kitlaliaj ipan amatlajkuiloli? Ma tikitakaj kenijkatsa kichijchijkej pilamochtsi ¡Despertad!, septiembre, 2015, tlen motokaxtik “¿Cuánto importa el dinero?”, kiampa kuali tijkuamachilisej nochi tekitl tlen mochiua. a

• Kej nesiskia. Katli tlapaleuiaj ipan Departamento de Arte, ipan nopa Centro Educativo de la Watchtower ne Patterson (Nueva York), kipojkej nopa tlamachtili tlen ika peua nopa pilamochtsi uan kichijchijkej se keski tlaixkopinkayomej. Teipa, kinnextilijkej katli tlapaleuiaj ipan Comité de Redacción, uan inijuantij kitlapejpenijkej se tlaixkopinkayotl tlen kinamikiskia nopa tlamachtili.

• Kampa kikixtijkej nopa tlaixkopinkayotl. Katli tlaixkopinaj, kikualtlalijkej se recepción tlen eltok ipan nopa Centro Educativo de la Watchtower, uan nopaya tlaixkopinkej, kiampa amo monekiskia kitekiuisej se banco kampa tlaixkopinaskiaj. b

• Katli nesij ipan nopa tlaixkopinkayotl. Nochi katli tlapaleuijkej elij Jehová itlajtoltemakauaj. Inijuantij kinixnextijkej maseualmej katli yauij ipan se banco. Nojkia kiijkuilouaj inintoka katli ya tlapaleuijkej, kiampa kintekiuisej sekinok ipan tlaixkopinkayomej tlen nesis ipan amatlajkuiloli.

• Sekinok tlamantli tlen motekiuik. Katli tekitij ipan nopa Departamento de Arte, kinekiyayaj ma nesi nopa banco uejka mokaua tlen Estados Unidos, yeka kitekiuijkej tomij tlen seyok altepetl. Tlen kitekiuijkej, kinpaleuik ma kinextikaj nelia itstokej ipan se banco. Se katli tlaixkopina tlen itoka Craig, kiijtoua: “Kuali timoiljuiaj kenijkatsa tijchiuasej uan kej nopa kuali kisas”.

• Yoyomitl tlen kitekiuiaj uan maquillaje. Katli kinixkopinkej, kitekiuijkej ininyoyo tlen ininaxka. Uan tlaj monekis moyoyontisej kej uejkajkia o kej moyoyontiaj se keskij maseualmej, katli tlapaleuiaj ipan nopa Departamento de Arte, kuali momachtiaj uan kiitaj kenijkatsa kichijchiuasej nopa yoyomitl tlen motekiuis. Katli kinixkopinasej kintlaliliaj nopa maquillaje tlen kinamiki, kiampa kuali nesis ipan tlake tonali uan kanke itstokej. Craig, kiijtoua: “Pampa ipan ni tonali onka tlaixkopinkayomej uan pantallas kampa kuali nesi se tlamantli, moneki se kuali kitlachilis tlen kitekiuis, pampa tlen ueli tlamantli ueliskia kiijtlakos nopa tlaixkopinkayotl”.

• Kema tlaixkopinaj. Katli tlaixkopinkej monejki kuali kitekiuisej nopa tlauili, kiampa nesiskia itstokej tonaya ipan banco. Nochipa kema tlaixkopinaj moneki kitlachilijtosej tlaj kinamiki nopa tlauili tlen kitekiuiaj (tlaj tonaya, tlayoua o seyok tlauili), kiampa tlen kiixkopinasej kuali nesis. Craig kiijtoua: “Kema titlaixkopinaj amo eli sanse kej kema mochiua se video, pampa kema titlaixkopinaj moneki nochi kuali nesis. Yeka moneki kuali tikitasej kenijkatsa tijtekiuisej nopa tlauili”.

• Kej kikualchijchiuaj tlaixkopinkayomej. Teipa, kichijkej nopa tomij ma mokaua ixmijketik, kiampa katli kipouaskiaj nopa amatlajkuiloli kintlachiliskiaj maseualmej uan amo tomij. Nojkia, maske nopa kaltemitl uan ventanas eliyaya chichiltik, kichijkej ma nesi xoxouik, kiampa kuali mokauaskia ika nopa pilamochtsi.

Amo san mokixtia tlaixkopinkayomej ne Patterson, nojkia kintlajtlaniaj toikniuaj ipan kali Betel tlen eltok ipan nochi Tlaltipaktli (kej Alemania, Australia, Brasil, Canadá, Corea, Japón, Malaui, México uan Sudáfrica) ma kititlanikaj tlaixkopinkayomej tlen uelis motekiuis ipan amatlajkuiloli. Sejse metstli, katli tlapaleuiaj ipan nopa Departamento de Arte ipan Patterson, kiajokui se 2,500 tlaixkopinkayomej. Miak tlen ni tlaixkopinkayomej kitekiuijtokej ipan pilamochtsi Tlen Tematiltia uan ¡Despertad! Ipan 2015, kema kisayayaj ni ome pilamochtsitsij kichijchiuayayaj kipano 115 millones. Tlaj tijneki nojua tijmatis, timitstlaneuij xitechpaxalo kampa titekitij ne Patterson o ipan seyok kali Betel tlen onka ipan nochi Tlaltipaktli.