Maske Jehová itlajtoltemakauaj techpaktia timokamanaljuisej ininuaya maseualmej katli itstokej ipan sekinok religiones uan tikitasej ininuaya tlen Biblia tlamachtia, amo titlaueyichiuaj ininuaya. Biblia kiijtoua katli melauak kitokiliaj Cristo moneki mosentikapaleuisej, yeka moneki kineltokasej sanse tlamachtili (Efesios 4:​16; 1 Corintios 1:​10; Filipenses 2:2). Maske sekinok religiones kichiuaj kampeka teiknelisej, tetlasojtlasej, tetlapojpoljuisej uan kinextisej sekinok kuajkuali tlamantli, amo san ya nopa moneki. Jehová itlajtoltemakauaj kuali timomachtijtokej Biblia uan nochi tlen tijneltokaj nopaya mokixtijtok, tlaj amo kiampa tijchiuaskiaj san tlapik tlen tijneltokaskiaj (Romanos 10:​2, 3).

 Biblia kiijtoua: “Amo ximosentilikaj iuaya se tlen axkineltoka toTeko”. Kiampa panoskia tlaj titlaueyichiuaskiaj ininuaya sekinok katli kineltokaj seyok tlamachtili (2 Corintios 6:​14-​17). Uan pampa amo sanse tlamachtili tijneltokaj, uelis kichiuas ayokmo kuali ma titlaneltokakaj (Mateo 12:30; Juan 14:6). Nojkia, ipan nopa Tlanauatili tlen toTeotsij kimakak Moisés, kiniljuik amo ma tlaueyichiuakaj ininuaya maseualmej tlen sekinok altepemej (Éxodo 34:11-​14). Israeleuanij kineltokakej tlen toTeotsij kinnauatik, yeka kema maseualmej tlen sekinok altepemej kinejkej kinpaleuisej ipan se tekitl, inijuantij amo kinejkej, pampa amo kinejkej tlaueyichiuasej ininuaya katli amo kineltokayayaj Jehová (Esdras 4:​1-3).

 Kena. Nochi tijchiuaj kampeka tikinnojnotsasej maseualmej katli itstokej ipan sekinok religiones. Ipan xiuitl 2023, titlajtolmoyajkej 1,791,490,713 horas. Tijnekij tijchiuasej kej apóstol Pablo, tijnekij tijkuamachilisej tlen maseualmej moiljuiaj uan kineltokaj (1 Corintios 9:​19-​22). Uan kema tikamanaltij ininuaya, tijnextiaj tijtlepanitaj tlen kineltokaj, pampa kiampa technauatia Biblia ma tijchiuakaj (1 Pedro 3:​15).