Kema tikilnamikij Cristo imikilis o “toTeko iTlakualis”, tojuantij tijchiuaj kej Biblia kiijtoua (1 Corintios 11:20). Tlen kichiuaj sekinok religiones kema kiilnamikij Cristo imikilis, amo eltok ipan Biblia.

 Tikilnamikij Cristo imikilis pampa tijnekij tikilnamikisej tlen kichijki kema motemaktilik, uan nojkia pampa tijnekij tijnextisej tijtlaskamatiliaj tlen kichijki (Mateo 20:28; 1 Corintios 11:24). Amo tikilnamikij Cristo imikilis san pampa timomajtokej tijchiuaj yon pampa timoiljuiaj kiampa tijselisej se tlamantli, o kiampa nimantsi techkixtilisej totlajtlakoljuaj. Biblia kiijtoua toTeotsij san techtlapojpoljuis tlaj titlaneltokaj ipan Jesús uan amo tlaj tijchiuaj tlen momajtokej kichiuaj ipan sekij religiones (Romanos 3:​25; 1 Juan 2:​1, 2).

 Maske Jesús kinnauatik itokilijkauaj ma kiilnamikikaj imikilis, amo kiniljuik kema kinamikiyaya kichiuasej (Lucas 22:19). Sekij kiijtouaj moneki kiilnamikisej sejse metstli, sekij sejse chikueyi, sekij mojmostla, sekij miakpa ipan se tonal uan sekij kiijtouaj uelis tikilnamikisej kema tojuantij tijnekisej. Yeka, moneki tikitasej se keski tlamantli tlen techpaleuis tijmatisej kema tikilnamikisej.

 Jesús kipeualtik tlen Biblia kiiljuia “toTeko iTlakualis” ipan nopa tonali kema judíos kichiuayayaj nopa Pascua, uan ipan nopa tonali kimiktijkej (Mateo 26:​1, 2). Jesús amo kipeualtik “toTeko iTlakualis” ipan nopa tonali san pampa ya kinejki, kichijki pampa Biblia kiijtoua nopa pilborregojtsi tlen kimiktiyayaj kema kichiuayayaj nopa Pascua kiixnextia kema Jesús motemaktilik (1 Corintios 5:​7, 8). Nopa iljuitl Pascua kichiuayayaj sejse xiuitl (Éxodo 12:​1-6; Levítico 23:5). Nopa achtoui Cristo itokilijkauaj kiilnamikiyayaj Cristo imikilis sampatsi ipan se xiuitl, uan Jehová itlajtoltemakauaj nojkia kiampa tijchiuaj, pampa Biblia kinextia kiampa kinamiki tijchiuasej.

 Kej Jesús kichijki techpaleuia tijmatisej kema tikilnamikisej imikilis uan nojkia techpaleuia tijmatisej ipan tlake tonali uan tlake hora kinamiki tijchiuasej. Jesús kipeualtik “toTeko iTlakualis” ipan tonali 14 tlen metstli nisán, xiuitl 33, kema kalaktoya tonati. Ipan nopa tonali, judíos kipouayayaj sejse metstli kema nesiyaya o kisayaya yankuik metstli (Mateo 26:18-​20, 26). Sejse xiuitl, Jehová itlajtoltemakauaj tikilnamikij Cristo imikilis kej kichiuayayaj achtoui itokilijkauaj.

 Maske tonali 14 tlen metstli Nisán, xiuitl 33 y.u.J. elki tonali viernes, sejse xiuitl mopatlatia nopa tonali. Yeka kema Jehová itlajtoltemakauaj kinekij kimatisej tlake tonali elis 14 tlen metstli nisán, amo moyakanaj ika calendario tlen nama kitekiuiaj judíos, moyakanaj kej kichiuayayaj kema itstoya Jesús. a

 Kema Jesús kipeualtik “toTeko iTlakualis”, kitekiuik nopa pantsi tlen mokajtoya ipan Pascua katli amo kixokoltijtoyaj ika tlasonejkayotl uan vino (Mateo 26:26-​28). Yeka, tojuantij nojkia tijtekiuiaj pantsi tlen amo kixokoltijtokej ika tlasonejkayotl yon kitlalilijtokej sekinok tlamantli uan tijtekiuiaj vino chichiltik, amo san uvas iayo, uan nopa vino amo kimanelojtokej ika sekinok tlamantli.

 Maske ipan sekij religiones kitekiuiaj pantsi katli kixokoltijtokej ika tlasonejkayotl, ipan Biblia nopa tlasonejkayotl kiixnextia tlajtlakoli (Lucas 12:1; 1 Corintios 5:​6-8; Gálatas 5:​7-9). Yeka, nopa pantsi tlen amo kixokoltijtokej ika tlasonejkayotl yon kitlalilijtokej sekinok tlamantli kuali kiixnextia Cristo itlakayo tlen amo tlajtlakole (1 Pedro 2:​22). Nojkia, maske Biblia kiijtoua Jesús kitekiuik vino, sekij religiones amo kiampa kichiuaj uan kitekiuiaj uvas iayo. Kiampa kichiuaj pampa kiijtouaj amo kuali se kitekiuis vino, maske Biblia amo kiampa kiijtoua (1 Timoteo 5:​23).

 Nopa pantsi katli amo kixokoltijtokej uan nopa vino tlen motekiuia kema moilnamiki Cristo imikilis, san kiixnextia Jesús itlakayo uan ieso. Maske sekij moiljuiaj nopa pantsi uan nopa vino nelia mokuepa inakayo uan ieso Jesús, nopa amo nelia. Ma tikitakaj ika Biblia kenke kiampa tikijtouaj.

•   Tlaj Jesús kiniljuijtoskia itokilijkauaj nelia ma kiikaj ieso, uajka kejuak kiniljuijtoskia ma kiixpanokaj tlen toTeotsij tlanauatijtoya kema kiniljuik amo ma kikuakaj estli (Génesis 9:4; Hechos 15:28, 29). Jesús kimatiyaya toTeotsij tlanauatijtoya ma kipatiitakaj estli, uan tijmatij amo kema kiniljuiskia itokilijkauaj ma kiixpanokaj toTeotsij itlanauatil (Juan 8:​28, 29).

•   Apóstoles amo nelia kiikej Jesús ieso, pampa Jesús ayamo kimiktijtoyaj (Mateo 26:28).

•   Jesús “motemaktilik san se uelta para mikis” (Hebreos 9:​25, 26). Tlaj kema kiilnamikiskiaj Cristo imikilis nopa pantsi uan nopa vino nelia mokuepaskia inakayo uan ieso Jesús, uajka katli kiampa kichiuaskiaj kejuak sampa kimiktiskiaj Jesús.

•   Jesús kiniljuik itokilijkauaj: “Xijchijtiakaj ya ni para innechilnamikisej”, uan amo kiniljuik: “Xijchijtiakaj kejuak sampa innechmiktiskiaj” (1 Corintios 11:24).

 Sekij kiijtouaj nopa pantsi uan nopa vino nelia mokuepa inakayo uan ieso Jesús, kiampa moiljuiaj pampa se keski textos ipan Biblia amo kuali motlajtolkueptok. Ipan miak Biblias, tlen Jesús kiijtok kema kinmakak nopa vino, kitlajtolkueptokej: “Pampa ni noeso” (Mateo 26:28). Maske kiampa kitlajtolkueptokej, tlen Jesús kiijtok uelis motlajtolkuepas: “Pampa ni kiixnextia noeso”. b Kema Jesús tlamachtik, miakpa kitekiuik tlaixneskayotl, uan ipan nopa tonali nojkia kiampa kichijki (Mateo 13:34, 35).

 Kema Jehová itlajtoltemakauaj kiilnamikij Cristo imikilis, amo miakej kikuaj nopa pantsi uan kiijij nopa vino. ¿Kenke?

 Kema Jesús motemaktilik, mopeualtik nopa “tlajtolsenkauali tlen yankuik”, tlen kipatlak nopa achtoui tlajtolsenkaualistli tlen Jehová kichijtoya ininuaya israeleuanij (Hebreos 8:​10-​13). Uajka, san katli itstokej ipan nopa yankuik tlajtolsenkaualistli kikuaj nopa pantsi uan kiijij nopa vino kema moilnamiki Cristo imikilis. Amo nochi Cristo itokilijkauaj tijkuaj nopa pantsi uan tikij nopa vino, kikuaj uan kiijij san katli toTeotsij kintlapejpenijtok (Hebreos 9:​15; Lucas 22:20). Inijuantij tlanauatisej ne iluikak iuaya Jesús. Biblia kiijtoua kintlapejpenijtokej san 144,000 (Lucas 22:28-​30; Apocalipsis [Revelación] 5:​9, 10; 14:​1, 3).

 Maske katli tekichiuasej ne iluikak iuaya Jesús ‘axmiakej’, katli motemachiaj itstosej nochipa ipan Tlaltipaktli kena tlauel miakej (Lucas 12:32; Apocalipsis 7:​9, 10). Katli timotemachiaj tiitstosej ipan Tlaltipaktli, nochipa timonechikouaj kema moilnamiki Cristo imikilis, maske amo tijkuaj nopa pantsi uan amo tikij nopa vino. Timonechikouaj pampa kiampa tijnextiaj tlauel tijtlaskamatiliaj tlen Jesús kichijki pampa kinejki techmakixtis (1 Juan 2:2).