Amo. Biblia amo kiijtoua tlaj amo kuali kema se akajya kipia tomij yon tlaj tomij kichiua ma pano tlen amo kuali. Miakej maseualmej kiijtouaj: “Ika tomij peua nochi tlamantli tlen amo kuali”, uan moiljuiaj ya nopa kiijtoua Biblia. Maske kiampa moiljuiaj, Biblia kiijtoua: “Miak tlamantli tlajtlakoli peua kema se tlakatl kiiknelia tomij” (1 Timoteo 6:10).

•  ¿Tlake kiijtoua Biblia tlen tomij?

•  ¿Kenke tlauel amo kuali tlaj tikikneliaj tomij?

•  ¿Kenijkatsa techpaleuia tlaj tijneltokaj tlen Biblia kiijtoua?

•  Textos tlen Biblia kampa kiijtoua kenijkatsa moneki tikitasej tomij

 Biblia kiijtoua tlaj kuali tijtekiuiaj tomij, uelis techpaleuis (Eclesiastés 7:12). Nojkia kiijtoua tlauel kuali kema se akajya temaka tlen kipia uan kinpaleuia sekinok ika itomij (Proverbios 11:25).

 Maske kiampa, Biblia nojkia kiijtoua amo moneki timosentlalisej tijpiasej miak tomij. Hebreos 13:5 kiijtoua: “Amo xikixtokakaj inkipiasej miak tomij. Más kuali xipakikaj ika tlen inkipiaj”. ¿Tlake techmachtia? Maske uelis tijtekiuisej tomij, moneki amo tlauel tijpatiitasej. Tlauel techpaleuis tlaj tiyolpakisej san ika tlen tlauel moneki: yoyomitl, tlakualistli uan kampa tiitstosej (1 Timoteo 6:8).

 Maseualmej katli kinekij kipiasej miak tomij amo uelis kipiasej nemilistli tlen axkema tlamis (Efesios 5:5). Achtoui, pampa katli tlauel kinekij tlapijpiasej kiitaj tomij kejuak eliskia ininteotsij (Colosenses 3:5). Uan ome, pampa katli kinekij miak tomij uelis kichiuasej tlamantli tlen amo kuali uan kiixpanosej tlen Biblia tetlajtolmaka. Yeka, Proverbios 28:20 kiijtoua: “Aki kineki moricojchiuas ika se tlalochtli, moualikilis tlaouijkayotl”. Uelis nopa maseuali kinekis tekajkayauas, kichiualtis se akajya ma kimaka tomij, kiichtekis se akajya o temiktis.

 Uan maske amo tijchiuasej tlen amo kuali, tlaj tikikneliaj tomij, kichiuas ma tijpiakaj sekinok tlaouijkayotl. Biblia kiijtoua: “Tlakamej tlen tlauel kinekij miak tomij, nimantsi uetsisej, pampa tlajtlakoli kinyoltilanas. Eltok keja se tlaketstli tlen kinmasiltia. Uan inijuantij peuasej kinekisej más tlamantsitsij tlen kinijtlakos” (1 Timoteo 6:9).

 Tlaj nochipa tijchiuaj tlen toTeotsij techiljuia uan amo tijchiuaj tlen amo kinamiki pampa tijnekij tijpiasej tomij, tijnextisej timopatiitaj uan toTeotsij yolpakis ika tojuantij. ToTeotsij kiniljuia katli kichiuaj kampeka kineltokasej: “Axkema niinmechkajteuas, nochipa niitstos inmouaya” (Hebreos 13:5, 6). Nojkia kiijtoua katli “itstok temachtli kiselis miak tlateochiualistli” (Proverbios 28:20).