Tlen Biblia kiijtoua

 Ipan Sermón del Monte, Jesús kiijtok: “Xikiniknelikaj inmokualankaitakauaj” (Mateo 5:44; Lucas 6:27, 35). Nopa kiijtosneki moneki tikiniknelisej katli techkualankaitaj uan katli techchiuiliaj tlen amo kuali.

 Jesús kiampa kichijki pampa kintlapojpoljuik katli kitlaijiyouiltijkej (Lucas 23:33, 34). Kema Jesús tlamachtik, kiijtok moneki tikiniknelisej tokualankaitakauaj uan ipan Escrituras Hebreas o Antiguo Testamento nojkia kiampa kiijtoua (Éxodo 23:4, 5; Proverbios 24:17; 25:21).

 “Xikiniknelikaj inmokualankaitakauaj uan xijtlajtlanikaj toTeko ma kinteochiua tlen inmechtlaijiyouiltiaj” (Mateo 5:43, 44).

Ipan ni tlamachtili tikitasej:

•  ¿Kenke moneki tikiniknelisej katli techkualankaitaj?

•  ¿Kenijkatsa uelis tijnextisej tikinikneliaj katli techkualankaitaj?

•  ¿Uelis tiasej tikinteuitij tokualankaitakauaj?

•  Tlen sekinok kiijtouaj tlen ininkualankaitakauaj

•  Textos kampa kiijtoua moneki tikiniknelisej tokualankaitakauaj

 ¿Kenke moneki tikiniknelisej katli techkualankaitaj?

•   ToTeotsij kiampa kichiua. Ya “kinchiuilia kuali nochi tlakamej, yonke axkuajkualmej o axmotlaskamatij” (Lucas 6:35). Nojkia “kichiua ma uetsi atl ipan ininmil [...] tlen axitstokej xitlauakej iixtla” (Mateo 5:45).

•   Tokualankaitakauaj uelis moyolpatlasej tlaj tikiniknelisej. Biblia kiijtoua kuali ma tikinnojnotsakaj katli techkualankaitaj, kiampa kejuak “tijtlaliliaj tlikoli xauantok ipan itsonteko” (Proverbios 25:22, TNM). Ni tlajtoli kinextia tlen pano kema kixauanaltiaj se tetl para kikixtisej se piltetsi tlen tlauel yejyektsi. Nojkia kiampa panos tlaj kuali tikinnojnotsasej katli techkualankaitaj pampa kiampa ayokmo kualantosej touaya uan moyolpatlasej.

 ¿Kenijkatsa uelis tijnextisej tikinikneliaj katli techkualankaitaj?

•   “Xikinchiuilikaj tlen kuali inijuantij tlen inmechkokoliaj” (Lucas 6:27). Biblia kiijtoua: “Intla inmokualankaitakaj mayana, xijtlamakakaj. Intla amiki, xikamakakaj” (Romanos 12:20). Nojkia uelis tijnextisej tikinikneliaj tokualankaitakauaj tlaj tijchiuasej tlen kiijtoua nopa Regla de Oro, tlen kiijtoua: “Xikinchiuilikaj sekinok keja inkinekij sekinok ma inmechchiuilikaj” (Lucas 6:31).

•   “Xijtlajtlanikaj toTeko ma kinteochiua tlen inmechtelchiuaj” (Lucas 6:28). Tikinteochiuaj katli techkualankaitaj kema kuali tikinnojnotsaj uan ika tlatlepanitakayotl maske inijuantij techtlaijiljuiaj. Biblia kiijtoua: “Amo xikintlaijiljuikaj tlen inmechtlaijiljuiaj, pero xikinchiuilikaj tlen kuali uan xijtlajtlanikaj toTeko ma kinteochiua” (1 Pedro 3:9). Tlaj tijchiuasej tlen kiijtoua ni texto, techpaleuis ayokmo ma titekualankaitakaj.

•   “Ximomaijtokaj ika toTeko para inijuantij tlen inmechtlaijiljuiaj ika tlen fiero” (Lucas 6:28). Amo ma tikinmakuepakaj katli techtlaijiljuiaj (Romanos 12:17). Uan ma tikiljuikaj Jehová a ma kintlapojpoljui (Lucas 23:34; Hechos 7:59, 60). Amo ma timomakuepakaj uan ma tijkauakaj Jehová ma kiita tlake kichiuas ika nopa maseuali pampa ya nochipa kichiua tlen xitlauak (Levítico 19:18; Romanos 12:19).

 “Xikiniknelikaj inmokualankaitakauaj. Xikinchiuilikaj tlen kuali inijuantij tlen inmechkokoliaj. Xijtlajtlanikaj toTeko ma kinteochiua tlen inmechtelchiuaj. Ximomaijtokaj ika toTeko para inijuantij tlen inmechtlaijiluiaj ika tlen fiero” (Lucas 6:27, 28).

•   Xijpia ueyi moyolo uan xiteikneli (1 Corintios 13:4). Kema apóstol Pablo kiijtok tlake moneki kichiuas katli teiknelia, kitekiuik nopa tlajtoli griego agápe tlen nojkia motekiuia ipan Mateo 5:44 uan ipan Lucas 6:27, 35. Tijnextiaj tikinikneliaj tokualankaitakauaj kema tijpiaj ueyi toyolo, kuali tikinnojnotsaj, amo titekokoliaj, amo timoueyimatij uan titlatlepanitaj.

 “Se tlen teiknelia kipia iyolo ininuaya sekinok uan kinchiuilia tlen kuali. Yajaya axkineki tlen sekinok kipiaj. Axmoueyimati, niyon axmomachilia achi kuali kej sekinok. Se tlen teiknelia moyoliljuia achtoui kema tlanankilia. Axkamati san kej ueli. Axitskuinti uan axyolkentsi. Niyon axkichiuilia cuenta kema seyok kichiuilia tlen axkuali. Tlen teiknelia axkema paki ika tlen axkuali, san paki ika tlen melauak. Se tlen teiknelia kiijiyouia nochi tlamantli tlen uala uan motemachia para asis tlen kuali. Nochipa kichia para sekinok ma kichiuakaj tlen kuali uan mokaua temachtli yonke tlen ueli kipanotiuala. Teiknelijkayotl nochipa eltos uan axkema tlamis” (1 Corintios 13:4-8).

 ¿Uelis tiasej tikinteuitij tokualankaitakauaj?

 Amo, pampa Jesús kiniljuik itokilijkauaj amo ma kinteuikaj katli kinkualankaitayayaj. Kema kiniljuik yaskiaj kinteuitij katli itstoyaj Jerusalén, amo kiniljuik ma mokauakaj nopaya uan ma tlateuikaj, kiniljuik ma mochololtikaj (Lucas 21:20, 21). Jesús nojkia kiiljuik apóstol Pedro: “Xijkalaki momachete ipan ikuetlaxo pampa tlen tlateuiaj ika machete, nojkia kinmiktisej ika machete” (Mateo 26:52). Biblia uan tlen panotok kinextia Cristo itokilijkauaj tlen achtoui siglo amo yauiyayaj ipan tlauilankayotl b (2 Timoteo 2:24).

 Tlen sekinok kiijtouaj tlen ininkualankaitakauaj

 Tlen sekinok kiijtouaj: ToTeotsij iTlanauatiljuaj kiijtouayaya israeleuanij monekiyaya kinkualankaitasej ininkualankaitakauaj.

 Tlen sekinok kiijtouaj: Katli kiiknelia ikualankaitakaj kiijtosneki kipaktia tlen ya kichiua.

 Tlen melauak: Biblia kiijtoua se akajya uelis kiiknelis seyok maske amo kipaktia tlen kichiua. Maske Jesús amo kipaktiyaya se akajya ma mosisini, ya momaijtok ininpampa katli kimiktijkej (Lucas 23:34). Ya kikualankaitayaya tlasisinijkayotl uan tlajtlakoli pero temaktilik inemilis ininpampa maseualmej katli tlajtlakolejkej (Juan 3:16; Romanos 6:23).