TLEN KINPALEUIS MOCHAMPOYOUAJ | TETAJMEJ
Xijmokuitlaui mokone amo kiita pornografía
“Tijmatij tlauel mitstlanauis tlaj tijtlachilis pornografía. Pero tikitakej tosiuapil ueliskia peuas kiitas” (Nicole).
Ipan ni tlamachtili tikitasej:
Tlen moneki tijmatis
Konemej uelis kinyoltilanas o uetsisej ipan pornografía. Ixtlamatinij kiijtouaj konemej peuaj kitlachiliaj kema kipiaj 11 xiuitl.
Konemej uelis kinyoltilanas pornografía maske amo kitemouaj. Uelis kipantisej ipan internet maske san kitemouayaya kimatisej se tlamantli tlen kuali o kema kiitaj redes sociales. Nojkia, maske san mauiltiaj ipan internet, uelis nesis nopa anuncios kampa nesi pornografía. Uelis monextis ipan tlaixkopinkayomej o videos. Nojkia kanajya kiijkuilojtokej o onka audio tlen uelis kichiuas ma kineki motekas iuaya se akajya, uan ni tlamantli uelis nima kikixtisej ipan internet.
Maseualmej uelis kintitlanilisej konemej pornografía ipan inincelular o ipan computadora. Kintlatsintokijkej kipanok 900 telpokamej, uan kiijtojkej nechka 90% pilichpokatsitsij uan nechka 50% piltelpokatsitsij, kintitlanilijtokej tlaixkopinkayomej uan videos kampa nesij maseualmej pepetstikej o xolotikej.
Pornografía kichiua amo ma kintlepanitakaj sekinok. Tlen más kiitaj, kichiua ma kintlaijiyouiltikaj sekinok o amo ma kintlepanitakaj siuamej.
Pornografía kintlaijiyouiltia konemej. Ixtlamatinij kiijtouaj konemej katli kiitaj pornografía kinpano ni tlamantli:
amo kikixtiaj kuali calificaciones.
tlauel motetsopaj, mokuesouaj miak tonali uan momachiliaj amo tleno ininpati.
amo kenijki kiitaj kema sekinok amo tlatlepanitaj.
Tlen kinpanos: konemej uelis nima kintlanauis tlaj kiitaj pornografía, pero tetajmej uelis kinpaleuisej.
Texto tlen mitspaleuis: “Xijtsontekontlalikaj nochi ni tlamantli uan ximoiljuikaj ajachika tlen niinmechiljuijtok ama. Xikinnextilikaj inmokoneuaj mojmostla. Xikinpouilikaj nochi ni tlanauatili kema initstokej ipan inmochaj, uan kema innejnemij ipan ojtli. Xikinmachtikaj kema inmotekasej para inkochisej uan kema inmeuasej” (Deuteronomio 6:6, 7).
¿Kenijkatsa uelis tijmokuitlauis mokone?
Xikita tlen kichiua. Xikita kema uan kanke uelis kipantis uan kiitas pornografía. Ximoiljui: ¿ueli kalaki ipan internet kema itstok escuela kampa amo aka kiita?
Mokone uelis kipantis o kiitas pornografía ipan internet.
Kuali xikixmati icelular mokone a uan nojkia tlake aplicaciones ika mauiltia. Se keski aplicaciones ueli kichiua nima ma ixpoliui mensajes, tlaixkopinkayomej o videos tlen amo kuali. Uan ipan ni tonali onka más videojuegos ipan internet, uan katli mauiltiaj uelij kiitaj pornografía o nojkia ika mauiltiaj nopa muñecos kema nesij kichiuaj tlen fiero.
“Tlaj mokone kipia se celular, moneki tijmatis kenijkatsa motekiuia, kenijkatsa uelis tijchiuas ma kiita san tlen kinamiki, uan nochipa moneki tikitas tlake kichiua ika icelular. Nikijtoua ni pampa kiampa nijchijtok” (David).
Texto tlen mitspaleuis: “Se tlakatl tlen tlalnamiki nochipa kineki kimachilis tlamantli yankuik. Nochipa tlakaktok para kikakis más tlalnamikilistli” (Proverbios 18:15).
Xijpaleui mokone amo ma kiita pornografía. Xikita tlake uelis tijchiuas. Uelis tikolinis uan tijchiuas amo ma nesi tlen amo kinamiki ipan celular, ipan tlablet o ipan computadora. Nojkia xijchiua ipan seyok celular kenijkatsa uelis tikitas tlen mokone kitlachilia uan tlake contraseña kitekiuia.
“Tlauel techpaleuijtok pampa ipan sekinok celulares tikitaj tlen tokone kiita, ipan televisión tijchijtokej amo ma nesi se keski tlamantli uan tijmatij contraseña tlen icelular” (Maurizio).
“Amo nikinkaua nokoneuaj ma kiitakaj videos kema mokaltsajtokej. Uan amo nikinkaua ma kiuikakaj inincelular kema ya kochisej” (Gianluca).
Texto tlen mitspaleuis: “Se tlakatl tlen tlalnamiki nimantsi momaka cuenta intla mauilili kampa youi uan axpano” (Proverbios 22:3).
Xikiljui mokone tlen uelis kichiuas. Flavia, katli eli se tenaj kiijtoua: “Se keskij tetajmej amo kinekij kiniljuisej ininkoneuaj tlake eli nopa pornografía, pampa moiljuia amo kema kipiasej nopa kuesoli”. Sekij tetajmej moiljuiaj: “Tlaj nikiljuis nokone, uelis teipa kinekis kitemos”. Tlaj kiampa timoiljuia, amo mitspaleuis. Tetajmej katli tlalnamikij kichiuasej kampeka kuali kinyakanasej ininkoneuaj kema ayamo kiixnamikij nopa kuesoli. Yeka, ¿tlake uelis tijchiuas?
Tlaj mokoneuaj nojua pilsiltsitsij, xikiniljui tlake uelis kichiuasej kema kanajya monextis pornografía. Uelis tikiniljuis ma ijkopikaj o ma kiseuikaj inincelular o tablet. Uan xijchiua ma kinekikaj mitsiljuisej tlen kiitakej o kikajkej. b
“Maske nokone nojua eliyaya pilsiltsi, tikiljuijkej tlake uelis kipanos tlaj kiitas pornografía. Kema kipixtoya 11 xiuitl uan mauiltiyaya ipan icelular, pejki nesi anuncios tlen pornografía uan nojkia kitlajtlaniyayaj ma kititlani iixkopinka. Kema kiampa kipanok, nima nechiljuik” (Maurizio).
Texto tlen mitspaleuis: “Xijnextili mokone kema noja pilsiltsi para ma youi ipan nopa ojtli tlen TOTEKO kisenkajtok para ya. Uan kema yajaya ueuejtias noja nopano monejnemiltis” (Proverbios 22:6).
Tlaj mokoneuaj ya uejueyij, xikinpaleui amo ma kiitakaj, ma kikakikaj yon ma kipouakaj pornografía. Uelis inkiijkuilosej tlake tlamantli kena mochiuas uan tlake amo ipan inmochaj, tlake kichiuas kema nesis pornografía uan kenke kiampa kineki kichiuas. Nojkia xikiljui mokone ma kiijkuilo tlake uelis kipanos tlaj kiitas pornografía: ayokmo mopatiitas, itatauaj ayokmo motemachisej ipan ya uan ayokmo kuali mouikas iuaya Dios. c
“Kej moskaltijtiasej mokoneuaj, xikinixtomili tlake uelis kinpanos teipa tlaj kiitasej pornografía” (Lauretta).
“Tikinpaleuiaj tokoneuaj ma kikuamachilikaj tlake uelis kinpanos tlaj kiitasej pornografía. Uan nojkia tikiniljuiaj kenijkatsa kiyolmatis Jehová tlaj kiampa kichiuasej” (David).
Texto tlen mitspaleuis: “Tlalnamikistli nelia tepaleuia” (Eclesiastés 7:12).
Nochipa ininuaya ximokamanaljui. Maske timosentlachilis, konemej kineki kimatisej kenke uan tlake kichiuaj kema se tlakatl uan se siuatl moteka sansejko, uan nojkia tlake eli nopa pornografía. Rachel de Souza, katli kitekimakakej ma kiita tlen kinpano konemej ipan Inglaterra, kiijtok: “Tlauel ipati nima tikamanaltis ininuaya konemej uan ajachika. Konemej kinekij ma kinixtomilikaj inintatauaj sekinok tlamantli kej moskaltijtiauij”.
“Kema nieliyaya nipilsiltsi, notatauaj amo kema nechiljuijkej se keski tlamantli. Tlauel nechpaktijtoskia ma kichiuakaj. Nama nikinpia nokoneuaj, uan nijchiua kampeka nikiniljuis se keski tlamantli tlen moneki kimatisej” (Flavia).
¿Tlake uelis tijchiuas tlaj mokone kiitak pornografía?
Amo nima xikualani. Tlaj tikitak mokone kitlachilik, kikajki o kipojki pornografía, amo nima xikualani. Uelis mokone amo kuali kiyolmati, pinaua o motlajtlakoltia ika tlen kipanok. Tlaj peua tikualani, uelis amo tijpaleuis pampa teipa ayokmo kinekis mitspouilis tlen kipano.
Texto tlen mitspaleuis: “Se tlen kimokuitlauia ikamak para axkamatis tlauel, yajaya kipia tlalnamikilistli. Se tlakatl tlen kimachilia miak tlamantli axnimantsi kualani” (Proverbios 17:27).
Xijmati nochi tlen panok. Achtoui xijtlatsintokili mokone se keski tlamantli tlen panok uan kiampa tijmatis tlake tijchiuas. Se neskayotl, ¿kititlanilik se akajya nopa tlaixkopinkayotl o iselti kipantik? ¿Ipa kiitstoya pornografía? ¿Ipan icelular o itablet kichijtoya amo ma nesi tlamantli tlen amo kuali? Tlaj kena, ¿kichijki kampeka amo kiitas? Xikilnamiki ta tijneki mokone ma kiijto tlen kipanotok uan amo ma kimachili tijtetsopa.
Texto tlen mitspaleuis: “Uejkatla ipan iyolo sejse tlakatl eltok nopa tlamantli tlen yajaya achi más kiita para ipati uan tlen yajaya kineki kichiuas, uan tlen tlalnamiki kimati kejatsa kipaleuis para tematiltis” (Proverbios 20:5).
Xikita tlake tijchiuas. Tlaj mokone kiitak pornografía maske amo kinekiyaya kiampa kichiuas, uelis monekis tijchiuas ipan icelular o itlabet amo ma nesi tlen amo kuali.
Tlaj tijmatis o tikitas mokone kitemoua pornografía, xijtlakaualti ika tlaiknelili uan amo xikajua. Kuali xikamanalti iuaya uan xijnextili textos kej Job 31:1, Salmo 97:10 uan Salmo 101:3, kiampa tijpaleuis ayokmo ma kiita pornografía. d Uan xikiljui tikamanaltis iuaya sejse semana para tijmatis uan tikitas tlaj kichijtok kampeka ayokmo kiitas pornografía uan ipan tlake sekinok tlamantli uelis tijpaleuis.
Texto tlen mitspaleuis: “Amo xikinkualankamakakaj inmokoneuaj. Xikiniskaltikaj kuali. Xikintlalnamiktikaj ika teiknelijkayotl uan xikinmachtikaj tlen Toueyiteko kineki ma kimatikaj” (Efesios 6:4).
a Ipan ni tlamachtili nopa tlajtoli konemej tijtekiuiaj para tikijtosej tlakatl o siuatl.
b Ipan tlamachtili “¿Cómo hablar con los hijos sobre la sexualidad?” tijpantis sekinok tlamantli tlen mitspaleuis iuaya xikamanalti mokoneuaj kej moskaltijtiauij.
c Kema inkiijkuilosej tlen moneki inkichiuasej uelis inkiitasej “Cómo rechazar la pornografía”.
d Uelis nojkia sansejko inkipouasej tlamachtili “¿Por qué debo rechazar la pornografía?”.
Tlen nojkia mitspaktis tikitas
TLAMACHTILI TLEN TLAUEL IPATI: VIDEOS
¿Kenijkatsa kiita toTeotsij pornografía?
¿Kenijkatsa uelis tijmatisej tlake moiljuia toTeotsij tlen pornografía tlaj ipan Biblia amo uala nopa tlajtoli?