¡Nopa uikatl eli se tlamantli tlen Jehová techmakatok! Uan uelis techpaleuis ma tiyolpakikaj, ma timoiljuikaj ipan tlamantli tlen kuali uan ma tijnekikaj tijchiuasej se tlamantli. Kiampa tijyolmatij kema tijtlakakiliaj nopa uikatl tlen JW Broadcasting^®. Nopa uikatl techpaleuia ma timouampojchiuakaj iuaya Jehová.

 Ipan 2014 uan ipan ni tonali mochijchijtok kipano 70 uikatl, uan se tlen nopa uikatl uelis tijtlakakilisej ipan kipano 500 tlajtoli. Uelis timotlajtlania: “¿Kenijkatsa kichijchiuaj ni uikatl? ¿Uan ajkia kichijchiua?”.

 Katli kiitaj kenijki techmachtisej tlen Katli kinyakanaj Jehová itlajtoltemakauaj kiitaj nopa uikatl tlen kichijchiuaj Katli tlatsotsonaj Kampa kichiuaj grabaciones, kej katli mopanoltia ipan JW Broadcasting uan sekinok uikatl. Katli tlatsotsonaj elij 13 toikniuaj uan tosiuaikniuaj, inijuantij sansejko mopaleuiaj, kiitaj kenijkatsa kichijchiuasej uikatl, tlake tlamantli kitekiuisej uan nojkia kichiuaj sekinok tekitl. Nojkia, Katli kiitaj kenijkatsa techmachtisej kiijtojkej toikniuaj katli amo itstokej ipan Betel uelis tlapaleuisej ipan ni tekitl, se keskij tlen inijuantij kichijchiuaj uikatl, tlatsotsonaj uan uikaj. Ni toikniuaj amo moueyimatij, uan ika miak pakilistli tlapaleuiaj uan amo kinekij sekinok ma kinuejkapantlalikaj.

 ¿Kenijkatsa mochijchiua uikatl? Achtoui, Katli kiitaj kenijkatsa techmachtisej kiitaj ipan tlake textos mokixtis nopa uikatl uan tlake kinekij ma tijyolmatikaj. Nojkia, Katli tlatsotsonaj kitlapejpeniaj ajkia kichijchiuas nopa uikatl uan ajkia kiijkuilos. Uan kichiuaj se grabación, teipa Katli kiitaj kenijkatsa techmachtisej kitlachiliaj uan kiijtouaj tlake uelis kipatilisej. Teipa, Katli tlatsotsonaj kipatiliaj tlen moneki uan kichiuaj nopa grabación tlen mokauas. Nopa grabaciones kampa ueli kichiuaj, se keski ipan kali Betel uan se keski ipan toikniuaj ininchaj.

 Kema toikniuaj kichijchiuaj uikatl uan kichiuaj grabación kitekiuiaj sekinok tlamantli kej computadoras, programas kampa kiijkuilouaj nopa uikatl uan kampa kiajokuij. Nojkia moneki kitekiuisej sekinok tlamantli tlen ika kichijchiuasej uikatl, kej mezcladoras de sonido, amplificadores, bocinas uan micrófonos. Uan sejse micrófono ipati se 100 uan 1,000 dólares o kipano. Ipan xiuitl 2020, kitekiuijkej 116,000 dólares pampa motekiuik ika nopa tlamantli tlen ika kichijkej grabaciones.

 ¿Tlake techpaleuia amo ma tijtekiuikaj miak tomij? Miakej toikniuaj katli amo itstokej ipan Betel tlapaleuiaj ipan ni tekitl, kiampa ayokmo moneki miakej ma tlapaleuikaj ipan kali Betel. Uan maske nochi ueliskiaj tlatsotsonasej sansejko, amo kiampa kichiuaj, pampa sejse kitsotsona se tlamantli. Teipa ipan computadora kisansejkotiliaj nochi.

 ¡Toikniuaj tlauel kinpaktia kikakisej ni uikatl! Tara, katli itstok Alemania, kiijtoua: “Uikatl nechpaleuia kuali ma nijyolmati kema nimoyolkokoua. Uan kema nijkaki ika notlajtol, nijmati Jehová kejuak nechnajnaua”. Dimitri, katli itstok Kazajistán, kiijtoua: “Nopa uikatl amo kiijtoua tlamantli tlen amo kuali, yeka nechpaktia nijtlakakilis pampa tlen nopaya kiijtoua amo kiixpano tlen Biblia kiijtoua. Nojkia nechpaleuia nojua kuali ma nimouampojchiua iuaya Jehová”.

 Delia, katli itstok Sudáfrica, kiijtoua tlake kiyolmati kema kikaki nopa uikatl: “Nechpaleuia nojua kuali ma nitlaneltoka. Kema nimoyolkokoua o nijpia se kuesoli, nochipa nijpantia se uikatl tlen tlauel nechpaleuia. Kemantika, san kej kakisti nopa uikatl, nechpaleuia kuali ma nimomachili”.

 Miakej tlauel kinpaktia nopa uikatl. Lerato, katli itstok Sudáfrica, kiijtoua: “Nopa uikatl Nechka moaxitis uan Nopa nemilistli tlen nelnelia kuali nechpaleuia ma nimoiljui kema nonana moyolkuis. Nochipa kema nijtlakakilia, nimoiljuia nonana motlaloua kampa niitstok uan nechnajnaua”.

 Onka se uikatl tlen tlauel kipaleuik se pilichpokatsi katli eua Sri Lanka. Ya kiijtoua: “Katli nechmachtia, nechajuak ininixpa katli ininuaya nimomachtia pampa nieli se tlen Jehová itlajtoltemakauaj. Tlauel nimomajmati, yeka amo nijmatki tlake nikiljuis. Kema niasito nochaj, nonana nechiljuik ma nijtlakakili nopa uikatl Fuerte tú serás. Ni uikatl nechpaleuik ma nikita monekiyaya kuali nimomachtis uan kiampa nikiniljuis sekinok tlen nijneltoka. Ualmostla, nikamanaltik iuaya notlamachtijka. Ya nechtlakakilik uan nechiljuik nama kikuamachiliyaya se keski tlamantli tlen nijneltoka. Nikintlaskamatilia toikniuaj pampa kichijchiuaj uikatl tlen tlauel techpaleuia”.

 ¿Kanke mokixtia nopa tomij tlen ika mochijchiua nopa uikatl? Eli ika nopa tomij tlen intemakaj ipan toTeotsij itlanechikol uan nojkia kema inkichiuaj kej nesi ipan donate.jw.org. Tlauel tiinmechtlaskamatiliaj pampa intemakaj tlen inkipiaj.