“Kema Sofía * mijki, tijpixtoyaj 39 xiuitl timosenkajtoyaj, ya uejkajki kipixtok se kokolistli. Maske nouampoyouaj tlauel nechpaleuijkej uan na tlauel nimotekiuijtoya, se xiuitl tlauel nimokuesok uan nijmatiyaya ayokmo nikijiyouis. Nima mopatlayaya kej nijyolmatiyaya uan maske ya panotok nechka eyi xiuitl, nojua tlauel nimokuesoua” (Kostas).

¿Mijki se akajya katli tlauel tikiknelia? Tlaj kiampa mitspanotok, uelis tijyolmati kej Kostas. Kema se akajya miki inamik, se iuikal o iuampo, tlauel mokuesoua uan amo kuali kiyolmati. Katli momachtijtokej tlake kiyolmati se akajya kema miki katli tlauel kiiknelia, kiijtouaj nelia kiampa kiyolmatij. Nopa amochtli The American Journal of Psychiatry, kiijtoua: “Se akajya tlauel mokuesoua uan nochipa kiampa kiyolmati kema miki katli tlauel kiiknelia”. Katli kiampa kipanotok, uelis motlajtlania: “¿Nochipa kiampa nijyolmajtos? ¿Sampa niyolpakis? ¿Tlake uelis nechyolchikauas?”.

Ni pilamochtsi kinankilia nopa tlajtlanili. Ipan nopa seyok tlamachtili moixtomas tlake tijyolmati tlaj namanok mijki se akajya katli tlauel tikiknelia. Uan ipan nopa sekinok tlamachtili tikitas tlake uelis mitspaleuis ayokmo tlauel ximokueso.

Tijnekij ni pilamochtsi ma kinyolchikaua uan ma kinpaleui nochi katli mokuesojtokej pampa mijki se akajya katli kiikneliaj.