1. ¿Kenke tlauel moneki titlaneltokasej? (Xikita nopa achtoui tlaixkopinkayotl.)

¿TIMOTLAJTLANIJTOK tlaj Jehová mitsmanauis kema mochiuas nopa ueyi tlaijiyouilistli? Hebreos 11:6 kiijtoua tlaj tijnekij timomanauisej, moneki titlaneltokasej, pampa tlaj amo, amo uelis tijchiuasej tlen toTeotsij kipaktia. Maske se akajya kiijtoskia nochi uelis tlaneltokasej, ipan 2 Tesalonicenses 3:2 kiijtoua amo nochi tlaneltokaj. Ni ome textos kinextia moneki tijchiuasej se kampeka.

2, 3. 1) ¿Kenke moneki tlauel kuali titlaneltokasej? 2) ¿Tlake tlajtlanili tijnankilisej ipan ni tlamachtili?

² Nopa apóstol Pedro kiijtok tlauel moneki ma tijpiakaj totlaneltokilis kej katli “kiyejyekouaj” (xijpoua 1 Pedro 1:7). Pampa nechka mochiuas nopa ueyi tlaijiyouilistli, tijnekij tijpiasej totlaneltokilis tlen ika uelis timomanauisej (Heb. 10:39). Yeka, moneki tijchiuasej kampeka tlauel kuali titlaneltokatiasej. Kiampa, Jesús techmakixtis kema kitsontlamiltiki nochi tlen amo kuali. Uelis tikiljuisej Jehová kej se tlakatl kiiljuik Jesús: ‘¡Xinechpaleui para más ma nitlaneltoka!’ (Mar. 9:24). O uelis tikiljuisej toTeotsij kej apóstoles kiiljuijkej Jesús: “Xitechpaleui para más ma timitsneltokilikaj” (Luc. 17:5).

³ Ipan ni tlamachtili tijnankilisej ni: ¿Kenijkatsa uelis tlauel kuali titlaneltokasej? ¿Kenijkatsa tijnextiaj tlauel kuali  titlaneltokaj? Uan, ¿kenke timotemachiaj Jehová nelia techpaleuis kuali titlaneltokasej tlaj tikiljuisej ma techpaleui?

4. ¿Tlake uelis techpaleuis nojua tlauel kuali titlaneltokasej?

⁴ Jehová kineki tlauel kuali ma titlaneltokakaj. Yeka, kichijki ma moijkuilo ipan Biblia kenijkatsa sekij tlauel kuali tlaneltokakej (Rom. 15:4). Se keskij eliyayaj Abraham, Sara, Isaac, Jacob, Moisés, Rahab, Gedeón uan Barac (Heb. 11:32-35). Nojkia uelis kuali titlaneltokasej kej kichijtokej toikniuaj ipan ni tonali. *

5. 1) ¿Kenijkatsa kinextik Elías tlauel kuali tlaneltokayaya? 2) ¿Tlake uelis timotlajtlanisej?

⁵ Biblia kiijtoua kenijkatsa kuali tlaneltokak Elías. Ma tikitakaj kenijkatsa makuilpa kinextik nopa. Se. Elías kiiljuik tlanauatijketl Acab Jehová kichiuaskia ma tlauaki. Uan kiiljuik temachtli panoskia pampa Jehová kiijtojtoya (1 Rey. 17:1). Ome. Motemachik kema tlauakiskia Jehová kimakaskia ya uan sekinok maseualmej tlen monekiyaya (1 Rey. 17:4, 5, 13, 14). Eyi. Motemachik Jehová ueliskia kiyolkuis se siuatl ikone (1 Rey. 17:21). Naui. Elías motemachik Jehová kititlaniskia tlitl tlen ika kitlatiskia itlakajkaualis ipan tepetl Carmelo (1 Rey. 18:24, 37). Uan makuili. Kema nojua tlauaktoya Elías motemachik sampa uetsiskia atl, yeka kiiljuik Acab: “Xitlakuati uan xiatliti pampa ya nijkaki para tlaauetsis tlauel chikauak” (1 Rey. 18:41). Pampa ya tikitakej tlen kichijki Elías, uelis timotlajtlanisej: “¿Nojkia nitlaneltoka kej Elías?”.

6. ¿Tlake moneki tijtlajtlanisej toTeotsij tlaj tijnekij kuali titlaneltokasej?

⁶ Tlaj tijnekij kuali titlaneltokasej, moneki tikiljuisej toTeotsij ma techmaka itonal, pampa “itonal toTeko” kichiua ma titlaneltokakaj (Gál. 5:22). Yeka Jesús kiijtok ma tijtlajtlanikaj Jehová itonal, pampa ya temachtli kinmaka katli kitlajtlaniaj (Luc. 11:13).

7. Xikijto ika se neskayotl tlake moneki tijchiuasej tlaj tijnekij nochipa kuali titlaneltokatosej.

⁷ Tlaj ya titlaneltokaj, moneki tijchiuasej tlen kinamiki uan kiampa nojua kuali titlaneltokatosej, pampa totlaneltokilis kejuak nopa tlitl. Maske achtoui kuali lementos, tlaj ayokmo tijyakatiliskiaj kuauitl ueliskia seuis. Ika totlaneltokilis nojkia kiampa pano. Tlaj mojmostla tijpouasej uan timomachtisej Biblia, tlauel tikiknelijtiasej Jehová uan Biblia, uan nochipa kuali titlaneltokatosej.

8. ¿Tlake techpaleuis kuali titlaneltokatosej?

⁸ Tlaj tijnekij nojua kuali titlaneltokatosej, amo kinamiki tijmajtosej san tlen techmachtijkej kema ayamo timoatsonpoliuiltiyayaj (Heb. 6:1, 2). Uelis timomachtisej kenijkatsa moaxitijtok se keski tlajtolpanextili. Kema tijchiuasej ni, moneki tijchiuasej kampeka tikitasej tlaj tijnextiaj nelia kuali titlaneltokatokej (xijpoua Santiago 1:25; 2:24 uan 26).

9, 10. 1) ¿Kenijkatsa techpaleuiaj toikniuaj kuali titlaneltokasej? 2) ¿Kenijkatsa techpaleuia kuali titlaneltokasej kema timonechikouaj? 3) ¿Kenijkatsa techpaleuia kuali titlaneltokasej kema titlajtolmoyauaj?

⁹ Nopa apóstol Pablo kiijtok techyolchikaua  kema “tikitaj keja ne se kuali kineltoka [toTeotsij]” (Rom. 1:12). Ni kiijtosneki techpaleuia nojua kuali titlaneltokasej kema tiitstokej ininuaya toikniuaj ipan tlanechikoli, uan tlauel techpaleuiaj kema tiitstokej ininuaya katli amo kema kitlauelkajtokej toTeotsij maske kipixtokej kuesoli (Sant. 1:3). Amo kuali touampoyouaj kichiuaj amo ma titlaneltokakaj, uan kuali touampoyouaj kena techpaleuiaj kuali titlaneltokasej (1 Cor. 15:33). Yeka, Biblia kiijtoua nochipa ma timonechikokaj pampa kiampa nochi timoyolchikauaj (xijpoua Hebreos 10:24 uan 25). Tlen tijyekouaj ipan tlanechikoli nojkia techpaleuia nojua kuali ma titlaneltokakaj. Romanos 10:17 kiijtoua tlaj nojua tijyekojtiasej tlen tlamachtia Biblia, nojua kuali titlaneltokasej. Yeka moneki ma timotlajtlanikaj: “¿Nochipa nimonechikoua?”.

¹⁰ Kema tikinpouiliaj Biblia sekinok, nojkia techpaleuia kuali titlaneltokasej. ¿Kenke? Pampa kema titlajtolmoyauaj, tijyekouaj timotemachiaj ipan Jehová uan amo timajmauij, kej kichijkej nopa achtoui Cristo itokilijkauaj (Hech. 4:17-20; 13:46).

11. 1) ¿Kenke Caleb uan Josué tlauel kuali tlaneltokayayaj? 2) ¿Kenijkatsa nojkia uelis tijchiuasej kej inijuantij?

¹¹ Kema tikitaj Jehová techtlakakilia kema timomaijtouaj uan techpaleuia, tlauel kuali titlaneltokaj. Ya nopa kipanok Josué uan Caleb. Kema yajkej tlachiatoj ipan nopa tlali tlen Jehová kinmakaskia, kinextijkej kuali tlaneltokatoyaj. Uan kej panotiajki tonali, nojua kuali tlaneltokatiajkej pampa kiitayayaj toTeotsij nochipa kinpaleuiyaya. Yeka, Josué kiniljuik israeleuanij Jehová kiaxitijtoya nochi tlen kiniljuijtoya kichiuaskia. Yeka kiniljuik: “[Xikimakasikaj Jehová uan] xijtekipanokaj”. Uan nojkia kiniljuik: “Naja ika nochi nochampoyouaj tijtekipanosej san toTeko” (Jos. 23:14; 24:14, 15). Tlaj nojkia timotemachisej ipan Jehová, tikitasej kenijkatsa techpaleuia uan nojua tlauel kuali titlaneltokasej (Sal. 34:8).

12. ¿Kenijkatsa uelis tijnextisej tlauel kuali titlaneltokaj?

¹² Santiago kiijtok: ‘Nijnextis nijneltoka toTeko ika tlen nijchijtiuala’ (Sant. 2:18). Uajka, ika tlen tijchiuaj tijnextiaj kuali titlaneltokaj. Ma tikitakaj se keski tlamantli.

13. ¿Kenke kema titlajtolmoyauaj tijnextiaj titlaneltokaj?

¹³ Kema titlajtolmoyauaj tijnextiaj titlaneltokaj, uan tijnextiaj timotemachiaj monechkauia nopa tonali kema kitsontlamiltisej nochi uan “temachtli panos” (Hab. 2:3). Tlaj tijnekij tijmatisej tlaj kuali titlaneltokatokej, moneki ma timotlajtlanikaj: “¿Tlauel nijpatiita nitlajtolmoyauas? ¿Nijchiua kampeka nochi nikinmachtis tlen toTeotsij? ¿Nijtemolia kenijkatsa tlauel nitlajtolmoyauas?” (2 Cor. 13:5). Tlaj tijchiuasej kampeka titlajtolmoyauasej, tijnextisej tlauel kuali titlaneltokaj (xijpoua Romanos 10:10).

14, 15. 1) ¿Kenijkatsa uelis tijnextisej titlaneltokaj ika tlen mojmostla tijchiuaj? 2) Xikijto kenijkatsa se toikni iuaya ichampoyouaj katli euaj Asia kinextijkej kuali tlaneltokayayaj.

¹⁴ Nojkia uelis tijnextisej titlaneltokaj kema tikijiyouiaj kuesoli tlen tijpiaj. Tlaj amo tijpiasej tomij, tijpiaj se kokolistli, timotekipachouaj o timoyolkokouaj, ma timotemachikaj Jehová uan Jesús techpaleuisej “ipan tlen ueli tlalochtli” (Heb. 4:16). Tlaj tikiljuisej Jehová ma techpaleui, tijnextisej titlaneltokaj ipan ya. Jesús kiijtok uelis tijtlajtlanisej toTeotsij “nopa tlakualistli tlen moneki mojmostla” (Luc. 11:3). Uan Biblia kinextia ika tlen kinpanotok miakej, Jehová uelis techmakas nochi tlen moneki. Kema ne Israel tlauel tlauajki, Jehová kimakak Elías atl uan tlakualistli. Biblia kiijtoua “nopa totomej kiuikiliyayaj pantsi uan nakatl mojmostla ika ijnalok uan ika tiotlak”, uan atliyaya ipan se ueyatl (1 Rey. 17:3-6). Yeka uelis timotemachisej Jehová techmakas tlen moneki.

 ¹⁵ Timotemachiaj tlaj tijchiuasej tlen Biblia techtlajtolmaka, uelis tikinmakasej tochampoyouaj tlen moneki. Xikita tlen kipanok se toikni iuaya ichampoyouaj katli euaj Asia. Se tonali, ni toikni kiitak iteki kichiuayaya ayokmo kuali ma mouika iuaya Jehová. Ya uan isiua kinekiyayaj kichiuasej tlen kiijtoua Mateo 6:33 uan Proverbios 10:4. Yeka iueue kiijtok kikauaskia iteki, uan mopanoltiskiaj ika tlen kitlaniskiaj kema tlakualnamakaskiaj. Isiua kiijtoua maske tlauel tekititokej, Jehová nochipa kinmokuitlauijtok, yeka nochipa kipixtokej tlen kikuasej. ¿Mitspanotok tlen nojkia kichijtok kuali xitlaneltoka?

16. ¿Tlake panos tlaj timotemachisej ipan Jehová?

¹⁶ Moneki tijneltokasej Jehová techpaleuis tlaj timotemachisej ipan ya uan tijchiuasej tlen ya kineki. Ya nopa kinekiyaya kiijtos Pablo kema techilnamikilik tlen kiijtok Habacuc: “Tlen itstok xitlauak iixpa toTeko, itstos para nochipa pampa kineltoka toTeko” (Gál. 3:11; Hab. 2:4). Uan Pablo nojkia kiijtok toTeotsij uelis techpaleuis ika tlen amo kema timoiljuiskiaj (Efes. 3:20). Maske tijchiuaj kampeka tijtekipanosej toTeotsij, amo tiuelij tijchiuaj nochi. Yeka, tijtemoliaj kuali tijchiuasej nochi uan timotemachiaj Jehová kiteochiuas toteki. Nelia tlauel tijtlaskamatiliaj pampa techpaleuia.

17. 1) ¿Tlake kinnankilik Jesús nopa apóstoles kema kiiljuijkej ma kinpaleui kuali tlaneltokasej? 2) ¿Kenke tijmatij Jehová kichiuas nojua ma titlaneltokakaj tlaj tikiljuisej ma techpaleui?

¹⁷ Ika tlen tijyekojkej ipan ni tlamachtili, uelis nojkia tijyolmatij kej nopa apóstoles kema kiiljuijkej Jesús: “Xitechpaleui para más ma timitsneltokilikaj” (Luc. 17:5). Jesús kuali kinpaleuik ipan iljuitl tlen kichijkej ipan Pentecostés, xiuitl 33. Ipan nopa tonali kiselijkej toTeotsij itonal uan kinpaleuik kuali ma kikuamachilikaj tlen toTeotsij kinekiyaya ma kichiuakaj. Nopa kinpaleuik kuali ma tlaneltokakaj, yeka pejkej tlajtolmoyauaj kej amo aka kichijtoya (Col. 1:23). Jehová kiijtoua techmakas nochi tlen tijtlajtlanisej “tlen kinamiki ika tlen yajaya kineki” (1 Juan 5:14). Yeka, tijmatij techpaleuis tlaj tikiljuisej ma kichiua kuali titlaneltokasej.

18. ¿Kenijkatsa kinteochiua Jehová katli kuali tlaneltokaj?

¹⁸ Tlaj timotemachisej ipan Jehová ika nochi toyolo, ya techteochiuas uan kichiuas kuali ma titlaneltokakaj kema tikiljuisej ma techpaleui. Uan nojkia tlauel kuali titlaneltokasej uan kinamikis tiitstosej kema “yajaya tlanauatis para nochipa” (2 Tes. 1:3, 5).