Janet kiijtoua: “Kema panotoya se keski tonali kema mijki notata, noueue nechiljuik kipixtoya seyok siuatl. Teipa, amo monauatijtejki, kikixtik nochi iyoyo uan nechkajtejki ininuaya omej nokoneuaj”. Maske Janet kiasik se tekitl, tlen kitlaxtlauiyayaj amo kiaxiliyaya. Nojkia kipixki seyok kuesoli. Ya kiijtoua: “Tlauel ouij nijmatki, pampa tlauel nechtekipachok nochi tlen monekiyaya nijchiuas noselti. Tlauel amo kuali nijyolmatiyaya pampa amo ueliyaya nikinmaka nokoneuaj tlen sekinok tetajmej kinmakayayaj ininkoneuaj. Nama nojua nechtekipachoua tlen sekinok moiljuiaj kema techitaj. ¿Uelis moiljuiaj amo nijchijki tlen kinamikiyaya yeka nechkajki noueue?”.

Kema Janet momaijtoua kipaleuia amo tlauel ma motekipacho uan ma kiyolmati toTeotsij itstok inechka. Ya kiijtoua: “Kema tlayouia tlauel amo kuali nijyolmati uan nimoyoliljuia san tlen amo nechpaleuia. Kema nimomaijtoua uan nijpoua Biblia ueli nikochi. Filipenses 4:6 uan 7 tlauel nechpaktia pampa kiijtoua: ‘Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj para nochi tlen inmechchiuilijtok. Intla keja nopa inkichiuaj, toTeko inmechmakas tlaseuilistli ipan inmoyolo tlen tlakamej axuelis kimachilisej. Uan nopa tlaseuilistli kiyaualtsakuas inmoyolo uan inmotlalnamikilis’. Kemantika seyoual nimomaijtoua. Uajka nijyolmati kenijkatsa Jehová kichiua ma nijpia tlayolseuilistli”.

Kema Jesús kinmachtik itokilijkauaj ma momaijtokaj, kiijtok kenijkatsa uelis amo tlauel timotekipachosej. Ya kiijtok: “InmoTata ya kimati tlachke inmechpoloua hasta kema aya inkitlajtlaniaj” (Mat. 6:8). Maske kimati tlake techpoloua, ya kineki ma tijtlajtlanikaj. Ma tikilnamikikaj  kema timomaijtouaj techpaleuia tijnechkauisej toTeotsij. Uan Biblia kiijtoua: ‘Yaya technechkauis’ (Sant. 4:8).

Kema timomaijtouaj tikiljuiaj Jehová tlen techtekipachoua. Uan pampa techtlakakilia “kema timomaijtouaj” nojkia techmokuitlauia (Sal. 65:2). Yeka, Jesús kiniljuik itokilijkauaj “ma kisenuikilikaj momaijtokaj ika toTeko hasta yajaya kinmakas tlen kitlajtlaniaj” (Luc. 18:1). Uajka, nochipa ma tikiljuikaj toTeotsij ma techyakana, ma techpaleui uan ma timotemachikaj ya nelnelia kineki techpaleuis uan kiampa kichiuas. Tlaj nochipa timomaijtosej, tijnextisej timotemachiaj uan titlaneltokaj ipan ya (1 Tes. 5:17).

Tlaj tijnekij titlaneltokasej ipan toTeotsij moneki kuali tikixmatisej (Juan 17:3). Kema timomachtiaj Biblia, tijyekouaj kenijkatsa ya, tlake moyoliljuia uan techpaleuia tijmatisej kitekipachoua tlen techpano. Amo kinamiki tijmatisej san se kentsi tlen toTeotsij, moneki tikixmatisej kej tikixmatij se kuali touampo. Kema omej mouampojchiuaj amo nimantsi kuali mouikaj, moneki panos miak tonali. Uan kema kuali tikixmajtiauij toTeotsij, peua tijchiuaj tlen kipaktia uan tikitaj kenijkatsa techpaleuia, ni kichiua kuali ma titlaneltokakaj uan ma timotemachikaj ipan ya (2 Cor. 10:15; Juan 8:29). Ni kipaleuia Janet amo tlauel ma motekipacho.

Janet kiijtoua: “Kema nikita Jehová nochipa techmokuitlauia nechpaleuia tlauel kuali ma nitlaneltoka. Techpanok tlen amo kinamikiyaya uan nesiyaya amo ueliskia tikijiyouisej. Kema tlauel nimomaijtouayaya, Jehová kisenkauayaya nopa kuesoli kej na amo kema nijsenkajtoskia. Kema nijtlaskamatilia, nimoyoliljuia kenijkatsa nochipa nechpaleuijtok. Uan kichijtok kema tlauel moneki. Nojkia kichijtok ma nikinpia kuali nouampoyouaj, melauak Cristo itokilijkauaj nochipa kinekij nechpaleuisej uan ika tlen kichiuaj kinnextilia nokoneuaj kenijkatsa kinamiki monejnemiltisej. *

”Nama nijmati kenke Jehová kiijtoua ipan Malaquías 2:16 tlauel kikualankamaka kema se akajya kikaua isiua o iueue. Kema se akajya momekatia tlauel amo kuali kichiuilia iueue o isiua. Maske ya panotok miak xiuitl, kemantika nijyolmati niitstok noselti. Kema nechpano nopa, nijpaleuia se akajya uan kiampa nikilkaua tlen nechyolkokoua.” Kiampa Janet amo kintlauelkaua toikniuaj, kej kiijtoua Biblia (Prov. 18:1). *

Janet kiijtoua: “Tlauel nechyolchikaua pampa nijmati toTeotsij ‘inintata tlen iknotsitsij. Yajaya kinchiuilia tlen xitlauak nopa kaualtoauiuaj’. Ya amo kema nechtlauelkauas kej kichijki noueue” (Sal. 68:5). Janet kimati toTeotsij amo kema techyejyekoua ika tlen amo kuali, ya techmaka tlalnamikilistli tlen moneki uan “chikaualistli”, kiampa uelis tikijiyouisej tlen tlauel techtekipachoua (Sant. 1:5, 13; 2 Cor. 4:7).

¿Uan tlaj techtekipachoua tlen amo kuali katli ueliskia techpanos?