¿Tlake timoiljuiskia tlaj tijkakiskia kiijtouaj “¡Monechkauijtiuala itlamia nochi!”? ¿Timoiljuiskia nopa chikauak kiijtojtok se akajya tlen tlauel kimanauia ireligión uan kiitskitok se Biblia? ¿O kiijtojtok se ueuentsi tentsone katli ijkatok ojtipa, mokentijtok ueueyak iyoyo uan motlajkoilpitok, uan kiitskitok se amatl kampa kiijtoua kenijkatsa kitsontlamiltisej nochi? Sekij momajmatiaj kema kiitaj ni, sekij amo kenijki kiitaj uan sekinok kintlauetskiltia.

Biblia xitlauak kiijtoua: “Ualas itlamia nochi tlen onka” (Mat. 24:14). Ni nojkia kiiljuiaj “Armagedón” uan “ueyi tonal kema peuas nopa ueyi tlateuijkayotl ika toTeko” (Apoc. [Rev.] 16:14, 16). Ipan religiones temachtiaj sekinok tlamantli tlen nopa “itlamia”, tenextiliaj tlen amo kinamiki uan tlen temajmatia. Uajka, ¿tlake kiijtosneki? Biblia xitlauak kiixtoma. Kiijtoua monechkauijtiuala itlamia uan technextilia kenijkatsa uelis timomanauisej. Kuali ma tijkuamachilikaj se keski tlamachtili uan kiampa tijmatisej tlake nopa itlamia. Teipa tikitasej tlake kitsontlamiltisej.

1. TLALTIPAKTLI AMO KITSONTLAMILTISEJ IKA TLITL

   Biblia kiijtoua: “Ta [toTeotsij] kuali tijtlatskiltik ni Tlaltipaktli para ma axmoijkuenis tlen kampa eltok” (Sal. 104:5). Ni uan sekinok textos kinextia amo aka kitsontlamiltis Tlaltipaktli yon toTeotsij (Ecl. 1:4; Is. 45:18).

2. TOTEOTSIJ KITLALIJTOK TLAKE TONALI UAN TLAKE HORA ASIS ITLAMIA NOCHI

   ToTeotsij kitlalijtok se tonali kema asis itlamia nochi, maske sekij moiljuiaj amo. Biblia kiijtoua: “Axaka kimati tlachke tonal uan tlachke hora sampa niualas ipan ni Tlaltipaktli. Axkimatij nopa iluikaeuanij ipan iluikak, yon na niikone axnijmati. San yajaya toTata, kena kimati” (Mar. 13:32, 33). Uajka, “toTata” kitlalijtok ipan “tlachke tonal uan tlachke hora” asis itlamia nochi.

3. ITLAMIA NOCHI AMO KICHIUASEJ MASEUALMEJ YON SE TETL TLEN UETSIS TLEN ILUIKAK

   ¿Kenijkatsa peuas itlamia nochi? Apocalipsis kiijtoua: “Nikitak tlapojtok iluikak uan moketsayaya nepa se kauayo chipauak. Uan yajaya tlen ipan tlejkotoya [...] itoka: Tlen Temachtli uan Melauak. Teipa nikitak nopa fiero tlapiali kinsentiliyayaj nochi tlanauatianij ipan Tlaltipaktli ika ininsoldados para kiteuisej [...] tlen tlejkotok ipan ikauayo chipauak uan para kinteuisej isoldados tlen kitokiliyayaj” (Apoc. 19:11-21). Maske miak tlamantli tlen kiijtoua san kiixnextia seyok tlamantli, tijmatij toTeotsij kinnauatis iiluikaejkauaj ma kintsontlamiltikaj ikualankaitakauaj.

1. TEKICHIUANIJ

   Biblia kiijtoua: “Dios tlen itstok iluikak kiketsas se tlanauatilistli [...,] axkikauas nopa itlanauatilis  ika seyok. Uan axaki uelis kitlanis nopa tlanauatijketl tlen toTeko Dios kitlalis para nochipa. Itlanauatijkayo kintlamiltis nochi sekinok tlanauatianij uan inintlanauatijkayo” (Dan. 2:44). Kej tikitakej, “tlanauatianij [...] ika ininsoldados” mosejkotilisej “para kiteuisej [...] tlen tlejkotok ipan ikauayo chipauak uan para kinteuisej isoldados” (Apoc. 19:19). Maske kiampa kichiuasej toTeotsij kintsontlamiltis.

2. TLAUILANKAYOTL, TLASISINIJKAYOTL UAN TLEN AMO XITLAUAK

   ToTeotsij “kiketsa[s] nochi tlateuijkayotl” ipan Tlaltipaktli (Sal. 46:9). Nojkia kiijtoua: “Tlen itstokej xitlauakej itstosej ika temachili ipan nopa kuali tlali. [...] Pero toTeko kinkixtis tlakamej tlen axkitlepanitaj ipan nopa tlali” (Prov. 2:21, 22). Uan Apocalipsis 21:4 uan 5 kiijtoua toTeotsij kichiuas “yankuik nochi tlen onka”.

3. RELIGIONES TLEN AMO KIPALEUIJTOKEJ TOTEOTSIJ YON MASEUALMEJ

   Tlen nopa religiones kampa san tlakajkayauaj, Jeremías kiijtok: “Istlakatij [...] uan nopa [sacerdotes] tlanauatiaj chikauak [...]. Pero ¿tlachke kichiuasej kema asis nopa tonal tlen tlatsakuiltilistli?” (Jer. 5:31). Uan Jesús kiijtok tlake kinpanos: “Kema asis nopa tonal [...], miak tlakamej nechiljuisej: ‘Toueyiteko, ipan motoka tikiniljuijkej tlakamej motlajtol uan tlachke ualaskia teipa, uan ika motoka tikinkixtijkej iajakauaj Axkualtlakatl tlen kalaktoyaj ipan tlakamej, uan ika motoka tijchijtokej miak chikaualneskayotl.’ Uan na nikiniljuis: Xiakaj. Axkema niinmechixmatki” (Mat. 7:21-23).

4. KATLI KICHIUAJ SAN TLEN AMO KUALI UAN TLEN AMO XITLAUAK

   Jesucristo kiijtok “ualajki ipan Tlaltipaktli para kitlauilis inintlalnamikilis tlakamej, pero tlakamej kiikneliaj más tsintlayouilotl kej tlauili pampa fiero tlen kichiuaj” (Juan 3:19). Kema itstoya Noé, toTeotsij kintsontlamiltik tlen amo kualmej ipan Tlaltipaktli. Ipan 2 Pedro 3:5-7, Biblia kiijtoua: “ToTeko uejkajkia kintsontlamiltik tlen itstoyaj ipan Tlaltipaktli ika atl ipan nopa tlauelatl. Uan toTeko nojkia ika itlajtol ya kiniyokatlalijtok nopa iluikaktli uan ni Tlaltipaktli tlen ama eltok para teipa kixoleuas ika se tlitl ipan nopa tonal kema kintlajtolsenkauas tlakamej. Uan yajuantij tlen fierojtikej”.

Nopa “tonal kema kintlajtolsenkauas[ej]” uan nechka kitsontlamiltisej nochi, elis kej kitsontlamiltijkej “Tlaltipaktli” kema itstoya Noé. ToTeotsij amo kitsontlamiltik Tlaltipaktli, kintsontlamiltik “tlen fierojtikej” o ikualankaitakauaj. Kema asis nopa “tonal kema kintlajtolsenkauas”, toTeotsij kintsontlamiltis katli kichiuasej tlen amo kuali uan ikualankaitakauaj. Uan iuampoyouaj kinmanauis, kej kinmanauik Noé uan ichampoyouaj (Mat. 24:37-42).

¡Tlauel kuali tiitstosej kema kitsontlamiltisej nochi tlen amo kuali ipan Tlaltipaktli! Nelia nochi moneki ma kimatikaj tlen nopa “itlamia nochi tlen onka”. Uelis tijneki tijmatis tlaj poliui miak tonali uan tlake moneki tijchiuas tlaj tijneki timomanauis. Ma tikitakaj tlen kiijtoua Biblia.