“Jehová kipaktia techmachtis ika tlen amo ouij”
“Tijtlatijtok motlalnamikilis para ma amo kimachilikaj [...] tlen moiljuiaj tlalnamikij. Pero ama tikinnextilia motlalnamikilis tlakamej tlen moiknonekij keja konemej.” (LUCAS 10:21)
1. ¿Kenke Biblia kiijtoua Jesús kipixki “miak pakilistli”? (Xikita nopa achtoui tlaixkopinkayotl.)
JESÚS kintitlanki 70 itokilijkauaj ma tlajtolmoyauakaj, yeka kipiaskiaj miakej ininkualankaitakauaj. Eliskiaj katli tlayakanayayaj ipan religión judía, katli tlauel tlalnamikiyayaj uan ixtlamatiyayaj. Kinekiyayaj ma kiitakaj Jesús san kej se kuaxinketl (Mar. 6:3). Uan ma kiniljuikaj itokilijkauaj amo ininpati uan amo ixtlamatiyayaj (Hech. 4:13). Yeka, Jesús kinchixki itokilijkauaj pampa kinekiyaya kimatis tlaj kintlakakilijtoyaj. Kema mokuepkej tlauel yolpakiyayaj, pampa maske amo kuali ajakamej kinekiyayaj kinchiuilisej tlen amo kuali, kichijkej tlen Jesús kinnauatijtoya. Yeka Biblia kiijtoua Jesús kipixki “miak pakilistli” kema kinitak. Uelis ixuetskatoya uan tlauel yolpaktoya. ¿Kenijkatsa kinextijkej itokilijkauaj amo majmauiyayaj uan yolpakiyayaj? (Xijpoua Lucas 10:1, 17-21.)
Ipan Jehová itlanechikol tlauel kuali techmachtijtiualauij, yeka xitlauak techixtomiliaj tlen amo ouij tijkuamachiliaj
2. 1) ¿Kenke Jesús kiijtok itokilijkauaj eliyayaj kej konemej? 2) ¿Tlake kinpaleuik Jesús itokilijkauaj kikuamachilijkej ouij tlamachtili?
2 Jesús kiiljuik Jehová: “TitoTeko Dios tlen titlanauatia ipan iluikak uan ipan Tlaltipaktli. Nimitsueyimati pampa tijtlatijtok ni tlamantli para ma axkimachilikaj tlakamej tlen moiljuiaj tlalnamikinij uan miak kimachiliaj. Uan ama tikinnextilijtok tlakamej tlen itstokej keja konemej”. Uan teipa kiijtok toTeotsij kipaktia kej nopa tlamachtis (Mat. 11:25, 26). ¿Kenke Jesús kiijtok itokilijkauaj eliyayaj kej “konemej”? Pampa amo moueyimatiyayaj. Uan katli tlayakanayayaj ipan religión judía tlauel ixtlamatiyayaj uan moiljuiyayaj tlauel tlalnamikiyayaj, uan Jesús itokilijkauaj kinekiyayaj ma kinmachtikaj kej kichiuaj konemej (Mat. 18:1-4). Yeka, Jehová kinpaleuik ika itonal ma kikuamachilikaj ouij tlamachtili. Uan katli tlayakanayayaj ipan religión judía kichijkej tlen Satanás kinekiyaya, yeka amo kikuamachilijkej tlen tlamachtia toTeotsij.
3. ¿Tlake tikixtomasej ipan ni tlamachtili?
3 Jesús tlauel yolpajki kema kiitak Jehová kinpaleuia katli amo moueyimatij ma kikuamachilikaj ouij tlamachtili. Jehová nojua kinmachtia katli amo moueyimatij ika tlen uelis kikuamachilisej. Ipan ni tlamachtili tikitasej kenijkatsa kichijtok.
TECHIXTOMILIAJ OUIJ TLAMACHTILI
4. ¿Kenke tlauel techpaleuia La Atalaya ika amo ouij tlajtoli tlen techmakatok toTeotsij?
4 Namanok ipan Jehová itlanechikol technextilijtokej tlauel moneki ma titlamachtikaj ika amo ouij tlamantli. Ma tikitakaj eyi. Se. La Atalaya kiijkuilojtokej ika amo ouij tlajtoli. * (Xikita nopa nota.) Ni tlauel kinpaleuia katli amo uelij kuali tlapouaj o amo kuali kimatij nopa tlajtoli tlen ika moijkuiloua. Tetajmej kiijtouaj kinpaleuia ininkoneuaj kuali kikuamachilisej, yeka miakej kititlantokej amatlajkuiloli tlen ika kintlaskamatiliaj toikniuaj katli kiijkuilouaj ni pilamochtsitsij. Se tosiuaikni kiijtoua ika nopa achtoui pilamochtsi amo momakayaya tlanankilis, uan ika tlen kipia amo ouij tlajtoli ayokmo majmaui uan miakpa tlanankilia.
5. ¿Tlake kuajkuali tlamantli kipia nopa Biblia Traducción del Nuevo Mundo ika tlajtoli inglés tlen kiyankuilijkej?
5 Ome. Ipan octubre 5, 2013, kiyankuilijkej nopa Biblia Traducción del Nuevo Mundo ika tlajtoli inglés. * (Xikita nopa nota.) Maske miak versículos amo kipia miak tlajtoli, san se tlamantli kiijtosneki uan amo ouij se kikuamachilis. Job 10:1 kipixtoya 27 tlajtoli, nama kipia 19. Uan Proverbios 8:6 kipixtoya 20 tlajtoli uan nama kipia 13, yeka kena kuali mokuamachilia. Se toikni katli motemachia yas iluikak uan miak xiuitl kitekipanojtok Jehová, kiijtoua kema kipojki pilamochtsi Job kiyolmatki kej se katli amo kema kikuamachilijtoya. Miakej toikniuaj nojkia kiampa kiijtojtokej.
6. ¿Kenijkatsa tikita nopa yankuik tlamachtili tlen Mateo 24:45-47 katli moixtonki?
6 Eyi. Namanok kuali tijkuamachilijtokej se keski versículos. Ipan La Atalaya, julio 15, 2013 kuali moixtonki tlen kiijtosneki Mateo 24:45-47. Nopaya kiixtonkej nopa “tlalnamijkatlatekipanojketl tlen nelia temachtli” eliyayaj katli kinyakanaj Jehová itlajtoltemakauaj. Uan nopa “nochi sekinok ipan ichaj” eliyayaj katli motemachiaj yasej iluikak uan nopa “sekinok tlakamej”, pampa inijuantij kinmachtia nopa tlalnamijkatlatekipanojketl (Juan 10:16). ¡Nelia tlauel techpaktia tijyekosej ni tlamantli uan tikinnextilisej sekinok! Ma tikitakaj kenijkatsa Jehová nojkia techmachtia ika tlen amo ouij.
AMO OUIJ MOIXTOMA TLEN TECHPOUILIA BIBLIA
7, 8. Xikijto se keski tlapoualistli tlen kiixnextia se akajya o se tlamantli tlen tlauel ipati.
7 Ipan miak xiuitl tlen panotok, mopatlatok kej moixtoma se keski tlamantli. Uejkajkia moijtouayaya miak tlapoualistli eliyayaj kej tlajtolpanextili tlen kiixnextiyayaj tlen moaxitiskia teipa. ¿Kinamikiyaya kiampa ma kiixtomakaj? Kena. Jesús nojkia kej nopa kiixtonki. Ya kiijtok tlen Jonás uejkauaskia ipan michij iijtiko kiixnextiyaya nopa tonali kema Cristo itlakayo eltoskia ipan tlakoyoktli kema mikiskia (xijpoua Mateo 12:39 uan 40).
Kema timomachtiaj ni tlapoualistli uan tijyekouaj tlen kiijtosneki, tlauel kuali titlaneltokaj
8 Ma tikitakaj seyok tlapoualistli tlen kiixnextia se akajya o se tlamantli tlen tlauel ipati. Apóstol Pablo kiijtok kej Abraham mouikayaya iuaya Agar uan Sara, kiixnextiyaya kej Jehová mouikayaya ininuaya israeleuanij uan katli itstokej iluikak (Gál. 4:22-26). Pablo nojkia kiixtonki kenijkatsa nopa israeleuanij inintlanauatiljuaj kiijtouayaya miak tlamantli tlen kiixnextiyayaj se akajya o se tlamantli tlen teipa moaxitiskia. Kej nopa tabernáculo, teokali, Tonali kema Kiixtsakuayayaj inintlajtlakoljuaj uan nopa Sumo sacerdote (Heb. 9:23-25; 10:1). Kema timomachtiaj ni tlapoualistli uan tijyekouaj tlen kiijtosneki, tlauel kuali titlaneltokaj. ¿Kiijtosneki ni nochi maseualmej uan tlamantli tlen Biblia kiijtoua kiixnextia se akajya o se tlamantli?
9. ¿Kenijkatsa moixtomayaya achtouia nopa tlapoualistli tlen Nabot?
9 Achtouia, ipan amatlajkuiloli nochipa kiixtomayayaj maseualmej uan tlamantli tlen kiijtoua ipan sekij tlapoualistli kiixnextiyayaj se akajya o tlen moaxitiskia teipa. Ipan 1 Reyes 21:1-16 kiijtoua tlen Acab uan Jezabel. Ya kichijki ma kimiktikaj Nabot uan kiampa ueliskia moaxkatis imil. Ipan 1932, La Atalaya kiijtok Acab uan Jezabel kiixnextiyayaj Satanás itlapaleuijkauaj, Nabot kiixnextiyaya Jesús, uan kema mijki Nabot kiixnextik kema mikiskia Jesús. Ipan 1961 nopa amochtli “Santificado sea tu nombre” ika inglés, kiijtok Nabot kinixnextiyaya katli motemachiaj yasej iluikak, uan Jezabel nopa religiones tlen amo melauak. (Ni amochtli kichijkej ika español ipan 1964.) Nojkia kiijtok kema kitlatsakuiltijkej Nabot kiixnextik kema kintlatsakuiltiskiaj ipan itlamia tonali katli yasej iluikak. Maske kej moixtoma ni tlapoualistli, kinextia Jehová itlanechikol techpaleuijtok kuali ma titlaneltokakaj, ipan ni tonali ayokmo kiampa kiixtoma. ¿Kenke?
10. 1) ¿Kenijkatsa nopa tlalnamijkatlatekipanojketl kinextia kuali tlalnamikilistli kema kiixtoma tlen uala ipan Biblia? 2) ¿Tlake techmachtiaj ipan ni tonali ika nopa amatlajkuiloli?
10 Kej kiixtomayayaj se keski tlapoualistli uelis tijmatiyayaj ouij tijkuamachilisej, tikilnamikisej uan tijchiuasej. Uan pampa ipan amatlajkuiloli san kiampa moixtomayaya, ayokmo nesiyaya tlake techmachtia. Yeka namanok, Jehová kipaleuijtok nopa “tlalnamijkatlatekipanojketl” tlauel ma tlalnamiki. Yeka, nama kiijtoua se tlapoualistli kiixnextia se tlamantli tlen tlauel ipati san kema Biblia xitlauak kiijtoua. Uan ika amatlajkuiloli technextiliaj amo ouij tlamachtili, tlake techpaleuis kuali titlaneltokasej, tikijiyouisej tlaouijkayotl, tikiknelisej toTeotsij uan sekinok kuajkuali tlamantli tlen techmachtia sejse tlapoualistli. * (Xikita nopa nota.)
Nopa tlapoualistli tlen Nabot technextilia se tlamachtili tlen tlauel ipati (Xikita párrafo 11)
11. 1) ¿Kenijkatsa tikixtomaj nama nopa tlapoualistli tlen Nabot, uan kenijkatsa techpaleuia? 2) ¿Kenke ipan xiuitl tlen panotok ipan amatlajkuiloli ayokmo kiijtoua san tlen kiixnextia sejse tlapoualistli?
11 Nama, nopa tlapoualistli tlen Nabot tikixtomaj kej kinamiki uan amo ouij. Ayokmo tikijtouaj kema Nabot mijki kiixnextiyaya Jesús o katli motemachiaj yasej iluikak. Nabot mijki pampa amo kitlauelkajki Jehová. Maske kitlaijiyouiltik se tlanauatijketl, ya kineltokak toTeotsij itlanauatiljuaj (Núm. 36:7; 1 Rey. 21:3). Uajka, tlaj techtlaijiyouiltisej kej Nabot, moneki amo kema tijtlauelkauasej toTeotsij (xijpoua 2 Timoteo 3:12). Tlen techmachtia nochi uelis tijkuamachilisej, tikilnamikisej uan tijchiuasej. Nopa tlapoualistli tlen Nabot techpaleuia kuali ma titlaneltokakaj.
12. 1) ¿Tlake amo kinamiki timoiljuisej tlen nopa tlapoualistli katli uala ipan Biblia? 2) ¿Tlake kinpaleuia Cristo itokilijkauaj kikuamachilisej ouij tlamachtili? (Xikita nopa nota.)
12 Uajka, ¿nopa tlapoualistli san techmachtia tlen uelis techpaleuis uan amo kiixnextia seyok tlamantli? Amo. Maske se keski tlapoualistli kena kiixnextia tlamantli tlen tlauel ipati, ipan amatlajkuiloli amo san kiixtoma tlen sejse tlapoualistli kiixnextia. Mosentlalia kiixtoma kenijkatsa tlen kiijtoua se tlapoualistli kinamiki seyok tlapoualistli uan kiixtoma tlake techmachtia. Kema Biblia kiijtoua Nabot amo kema kitlauelkajki toTeotsij, techilnamikilia Cristo nojkia amo kema kitlauelkajki uan katli yasej iluikak nojkia. Uan katli itstosej ipan Tlaltipaktli nojkia amo kema kitlauelkajtokej toTeotsij. Nopa kinextia Jehová techmachtia ika amo ouij tlamantli. * (Xikita nopa nota.)
AMO OUIJ MOIXTOMA TLEN JESÚS TLAMACHTIK
13. ¿Tlake neskayotl tlen Jesús kitekiuik amo ouij tikixtomaj ipan ni tonali?
13 Tlaj tijtekiuis neskayotl amo tijmatis ouij tikixtomas se ouij tlamachtili. Nopa kichiua ma timoiljuikaj kenijkatsa uelis techpaleuis uan asis ipan toyolo. Jesucristo kuali tlamachtiyaya uan tlauel kitekiuiyaya miak neskayotl (Mat. 13:34). Ipan ni tonali, ipan amatlajkuiloli amo ouij moixtontok nopa neskayotl tlen Jesús kitekiuik. Ipan La Atalaya, julio 15, xiuitl 2008, kiixtonki tlake kiijtosneki nopa tlasonejkayotl, mostaza iyol uan nopa matlatl. Nama tijmatij nopa neskayotl kiijtosneki toTeotsij iTlanauatijkayo kichijtok tlauel miakej nojkia ma kitekipanokaj toTeotsij.
Ika neskayotl amo ouij tikixtomaj se ouij tlamachtili, kichiua ma timoiljuikaj kenijkatsa uelis techpaleuis uan asi ipan toyolo
14. 1) ¿Kenijkatsa tikixtomayayaj nopa tlapoualistli tlen nopa tlakatl katli euayaya Samaria? 2) ¿Uan nama kenijkatsa tikixtomaj?
14 Kemantika Jesús kitekiuiyaya tlapoualistli tlen kipia miak tlamantli. Se keski kipiayaya tlajtolpanextili uan ika sekinok san technextilik tlen uelis techpaleuis. ¿Kenijkatsa uelis tijmatisej tlake tlapoualistli kipiayaya tlajtolpanextili uan tlake amo? Kej panotok xiuitl kuali tijkuamachilijtokej ni. ¿Kenijkatsa tikixtomayayaj achtouia nopa tlapoualistli tlen nopa tlakatl katli euayaya Samaria? (Luc. 10:30-37.) Ipan La Atalaya, xiuitl 1924, kiijtok nopa tlakatl kiixnextiyaya Jesús. Uan pampa nopa ojtli tlen Jerusalén katli asiyaya Jericó ixtemoyaya, kinixnextiyaya maseualmej, pampa kema Adán uan Eva tlaixpanokej kichijtiajkej tlen tlauel amo kuali. Nopa tlachtekinij kinixnextiyayaj tlanamakanij, uan nopa sacerdote uan se tlen Leví ichampoyouaj kinixnextiyaya religiones tlen amo melauak. Uan nama, ¿kenijkatsa tikixtomaj ni tlapoualistli? Nama techmachtiaj moneki amo tikinchikoitasej katli euaj ipan sekinok altepemej, uan ma tikinpaleuikaj ma kiixmatikaj Jehová. Tlauel tiyolpakij kema Jehová kichiua kuali ma tijkuamachilikaj iTlajtol.
15. ¿Tlake tikixtomasej ipan nopa seyok tlamachtili?
15 Ipan seyok tlamachtili tikixtomasej nopa tlapoualistli tlen matlaktli ichpokamej (Mat. 25:1-13). ¿Tlake kinekiyaya Jesús ma tijkuamachilikaj ika ni? ¿Kiixnextia se tlenijki sejse maseuali uan sejse tlamantli tlen kiijtoua? ¿O san kinekiyaya techmachtis tlen uelis techpaleuis? Ma tikitakaj.
^ párr. 4 Nopa pilamochtsi La Atalaya tlen kipia amo ouij tlajtoli ika inglés kichijkej ipan julio, 2011. Nama uelis se tlajtlanis ika sekinok tlajtoli kej español.
^ párr. 5 Nopa Biblia Traducción del Nuevo Mundo tlen kiyankuilijkej, teipa kitlajtolkuepasej ika sekinok tlajtoli.
^ párr. 10 Maske ipan amochtli Ejemplos de fe techpouilia tlen kinpanok 14 toTeotsij itekipanojkauaj, amo san kiixtoma tlake kiixnextia sejse tlapoualistli. Techmachtia kenijkatsa uelis tijchiuasej ipan tonemilis.
^ párr. 12 Biblia kipia tlen “ouij para tijmachilisej”. Ni Jehová kichijki ma moijkuilo ipan Biblia ika itonal. Ipan ni tonali, Jehová kitekiuia itonal tlen ika kinpaleuia Cristo itokilijkauaj ma kikuamachilikaj tlen Biblia kiijtoua “tlamantli tlen más ueyi tlen moiljuia toTeko” (1 Cor. 2:10; 2 Ped. 3:16, 17).
