Ipan nochi Tlaltipaktli momoyajtok nopa pornografía. * Nesi ipan televisión, ipan yoyomitl tlen yankuik kistia, ipan uikatl, ipan internet (kampa kitlejkoltiaj tlaixkopinkayomej); ipan películas, ipan pilamochtsitsij, ipan videojuegos, teléfonos, tabletas uan ipan sekinok tlamantli tlen kitekiuiaj maseualmej. Ipan ni tonali maseualmej tlauel kinpaktia kitlachilisej pornografía. Uan yeka nama tlauel miakej kitlachiliaj uan amo kej uejkajkia (xikita nopa recuadro “ Se keski tlamantli tlen pornografía”).

Maseualmej ayokmo kiitaj pornografía kej se tlajtlakoli. Nopa tlamachtijketl Gail Dines kiijkuilok: “Uejkajkia kema nesiyayaj tlaixkopinkayomej kampa momekatiaj amo kuali kiitayayaj, uan nama amo kenijki kiitaj”.

¿Ta tlake timoiljuia? ¿Amo kenijki tlaj tikitas pornografía o mitstlanauis? Jesús kiijtok: “Nochi kuali kuatinij kipiaj inintlajka tlen kuali. Uan se kuauitl tlen axkuali temaka tlen axkuali, tlen axaka uelis kitekiuis” (Mateo 7:​17). ¿Tlake tlamantli kichiua nopa pornografía? Ma tikitakaj kenijkatsa monankilia ni tlajtlanili ika eyi tlamantli.

TLEN IXTLAMATINIJ KIIJTOUAJ: Kema se akajya kitlachilia pornografía tlauel ouij kimati kikauas, ixtlamatinij uan tepajtianij kiijtouaj eli sanse kej kema se akajya kitekiuia crack (se droga tlen kisa ipan cocaína).

Brian * momajtoya kiitas pornografía ipan internet, ya kiijtoua: “Amo ueliyaya nijkaua. Eliyaya kejuak nijtekiuijtoya drogas. Tlauel amo kuali nijyolmatiyaya, yeka nechkokouayaya notsonteko uan niuiuipikayaya. Maske nijchijki se ueyi kampeka ayokmo nikitas, monejki panos miak xiuitl”.

Katli momajtokej kiitaj pornografía amo tleno kiijtouaj. Kitlatiaj tlen kichiuaj uan tekajkayauaj. Yeka, miakej mouejkatlaliaj, pinauaj, tlauel motekipachouaj, mokuesouaj miak tonali uan san kualantokej. Uan kemantika sekij moiljuiaj momiktisej. Sergio, katli mojmostla kitlaliyaya pornografía ipan iteléfono kiijtok: “Nimouejkatlalik tlen nochi maseualmej uan amo nijmatiyaya tlake nijchiuas. Nimoiljuiyaya amo tleno nopati, nechyolkokouayaya notlalnamikilis, nijyolmatiyaya noselti niitstoya uan kejuak nechmasiltijtoyaj. Tlauel nipinauayaya uan nimajmauiyaya, yeka amo aka nikiljuik ma nechpaleui”.

Kemantika nopa pornografía ualnesi maske amo tijtemouaj uan uelis tlauel techtlanauis. Judith Reisman, katli tlauel momachtijtok tlen kinpano katli kiitaj pornografía, kiijtok ininixpa tekichiuanij tlen Estados Unidos: “Nopa tlaixkopinkayomej mokaua ipan inintsonteko katli kiitaj uan kintlanauia, uan uelis miak xiuitl nopaya mokauas uan kemantika sanima peuas moiljuisej ipan nopa tlamantli [...] uan kimatij tlauel ouij kiilkauasej”. Susan, katli kipia 19 xiuitl, kiitak pornografía ipan internet maske amo kinekiyaya, uan teipa ayokmo ueliyaya kikaua, ya kiijtoua: “Nopa tlaixkopinkayomej mokajki ipan notsonteko. Maske amo nimoiljuijtok ipan nopa tlamantli, sanima nikilnamiki. Nimoiljuia uelis amo kema nikilkauas tlen nikitak”.

TLEN TIKITSTOKEJ: Katli kiitaj pornografía tlauel ouij kimatij kikauasej uan tlauel tlaijiyouiaj (2 Pedro 2:​19).

TLEN IXTLAMATINIJ KIIJTOUAJ: “Nopa pornografía kinxeloua katli mosenkajtokej uan ininchampoyouaj” (The Porn Trap [Pornografía tlauel tekajkayaua], kichijchijki Wendy uan Larry Maltz).

Pornografía kichiua amo kuali ma itstokaj katli mosenkajtokej uan ininchampoyouaj pampa...

• ayokmo motemachiaj ipan ininnamik, ayokmo motekaj sansejko uan ayokmo tlauel moikneliaj (Proverbios 2:12-17).

• kichiua ma moiljuikaj san ipan tlen inijuantij kinekij, mouejkatlaliaj uan ayokmo yolpakij kema motekaj iuaya ininnamik (Efesios 5:28, 29).

• san moiljuijtokej kichiuasej tlamantli tlen amo kinamiki (2 Pedro 2:14).

• katli kiita uelis kichiualtis inamik ma kichiua iuaya tlamantli tlen amo kinamiki (Efesios 5:​3, 4).

• katli kiita peua moiljuia ipan seyok maseuali uan teipa uelis kikajkayauas inamik (Mateo 5:28).

Biblia kiijtoua katli mosenkajtokej amo ma mokajkayauakaj (Malaquías 2:16). Katli mokajkayauaj tlauel moyolkokouaj, yeka mokauaj, kiixpolouaj nopa amatl kampa nesi mosenkajtokej uan nopa tlauel kinyolkokoua ininkoneuaj.

Pornografía nojkia tlauel kintlanauia konemej. Brian nojua kiijtoua: “Kema nijpixtoya se 10 xiuitl, nijpantik nopa pilamochtsitsij kampa nesi pornografía tlen eliyaya iaxka notata kema nimauiltiyaya. Ichtakatsi pejki nikita maske amo nijmatiyaya kenke nechpaktiyaya nikitas nopa tlaixkopinkayomej. Uan miak xiuitl nimomatki nikitas pornografía”. Ixtlamatinij kiitstokej kema piltelpokatsitsij kiitaj pornografía nima kinekij motekasej iuaya se akajya, auilnemisej uan tlauel mosisiniaj kema motekaj iuaya se akajya. Nojkia kichiua amo kuali ma kiyolmatikaj uan ma moiljuikaj tlen amo kinamiki.

TLEN TIKITSTOKEJ: Nopa pornografía eli kejuak se pajtli tlen temiktia pampa kinxeloua katli tlauel moikneliaj, kinyolkokoua uan kintlaijiyouiltia (Proverbios 6:27).

TLEN KIIJTOUA BIBLIA: “Uajka ximomakakaj cuenta para inmiktokejya uan ayok xijchiuakaj tlen inmoyolo inmechnotsa xijchiuakaj. Amo xijchiuakaj tlen ueli ika tlen axinmonamik. Amo ximoiljuikaj tlen axkuali. Amo xijtokilikaj tlen fiero tlen kineki inmotlakayo. Amo ximoiljuikaj tlamantli tlen eli se pinaualistli. Amo xijnekikaj inkipiasej más tlamantsitsij mojmostla, pampa tlakamej tlen keja nopa kichiuaj, kiueyimatij tlen kipiaj keja eliskia se dios uan ayok kiueyimatij toTeko” (Colosenses 3:​5).

Tlen tikitstokej kinextia Jehová * kikualankaita pornografía. Nopa amo kiijtosneki amo kuali kiita kema se tlakatl uan se siuatl motekaj sansejko. Jehová kiampa techchijchijki, uan kikajki katli mosenkajtokej ma motekakaj sansejko pampa kiampa moyolpakiltiaj, kichiua nojua tlauel ma moiknelikaj uan uelis kichiuas ma kinpiakaj ininkoneuaj (Santiago 1:17).

Uajka, ¿kenke toTeotsij kikualankaita pornografía? Ma tikitakaj se keski tlamantli.

• Jehová kimati nopa pornografía kichiua amo kuali ma itstokaj maseualmej (Efesios 4:​17-19).

• Jehová tlauel techiknelia uan amo kineki ma titlaijiyouikaj (Isaías 48:​17, 18).

• Kineki katli mosenkajtokej kuali ma itstokaj ininuaya ininchampoyouaj (Mateo 19:​4-6).

• Kineki kuali ma timonejnemiltikaj uan ma tikintlepanitakaj sekinok (1 Tesalonicenses 4:​3-6).

• Kineki ma tijtlepanitaj totlakayo uan ma tijtekiuikaj kej kinamiki (Hebreos 13:⁠4).

• Jehová kimati nopa pornografía, kichiua ma nesi kej amo kinamiki kema omej motekaj sansejko, kichiua ma moiljuikaj san ipan tlen maseualmej kinekij uan tlen Satanás kipaktia (Génesis 6:2; Judas 6, 7).

TLEN TIKITSTOKEJ: Pornografía kichiua maseualmej ayokmo kuali ma mouikakaj iuaya toTeotsij (Romanos 1:24).

Maske Jehová kiampa moiljuia, kineki kinpaleuis ayokmo ma kiitakaj pornografía katli kitlachiliaj. Biblia kiijtoua: “ToTeko tetlasojtla miak uan kipia ueyi iyolo. Yajaya tlauel uejkaua para peuas kualanis. Axkema tlami iteiknelijkayo. Pampa toteko kimati para tojuantij san tielij tlaltejpoktli” (Salmo 103:​8, 14). ToTeotsij kineki ma kinechkauikaj maseualmej katli amo moueyimatij uan kiampa kinpaleuis “ipan tlen ueli tlalochtli kema más moneki” (Hebreos 4:16; xikita nopa recuadro “ ¿Tlake mitspaleuis ayokmo xikita pornografía?”).

Miakej maseualmej kikajkej toTeotsij Jehová ma kinpaleui. ¿Nelnelia kinpaleuijtok? Ma tikitakaj tlake kiijtoua Biblia tlen se keskij maseualmej katli kinpaleuik ayokmo ma kichiuakaj tlen amo kinamiki: “Ama toTeko inmechpajpajki tlen inmotlajtlakoljuaj uan inmechiyokakajtok para xielikaj iaxkauaj. Uan itonal toTeko inmechchijtok inxitlauakej iixpa ipan itoka toueyiTeko Jesucristo” (1 Corintios 6:11). Nopa maseualmej nojkia moiljuiaj kej apóstol Pablo: “Nochi niueli nijchiua ika nopa chikaualistli tlen [toTeotsij] nechmaka” (Filipenses 4:13).

Susan, katli ayokmo kiita pornografía kiijtoua: “San Jehová uelis mitspaleuis ayokmo xikita pornografía. Tlaj tikiljuiaj ma techpaleui uan ma techyakana, tiitstosej titlapajpaktikej uan kuali timouikasej iuaya. ToTeotsij amo kema techtlauelkauas”.