1. ¿Kenke kinamiki tijkauasej Jehová ma technauati?

MONEKI tijtlepanitasej Jehová o tijkauasej ma technauati. * Ya techchijchijki, uan yeka kinamiki san ya kiijtos kenijkatsa mochiuas se keski tlamantli (Apoc. [Rev.] 4:11). Uan nojkia kinamiki tijneltokasej pampa san ya tlauel kuali tlanauatia. Ipan nochi xiuitl tlen panotok, maske miakej tlakamej kintekimakatokej uan kipixtokej tlanauatili, san Jehová eli se kuali tlanauatijketl pampa tlauel tlalnamiki, teiknelia, kipia kuali iyolo uan kintlasojtla nochi maseualmej (Éx. 34:6; Rom. 16:27; 1 Juan 4:8).

2. Kej kiijtoua Hebreos 12:9-11, ¿kenke kinamiki san Jehová ma technauati?

² Jehová amo kineki ma tijneltokakaj pampa tijmakasij, ya kineki ma tijneltokakaj pampa nelia tikikneliaj uan pampa tikitaj kej toTata katli tlauel techiknelia. Kema apóstol Pablo kiijkuilok Hebreos, kiijtok moneki tijnekisej toTeotsij ma technauati pampa “yajaya kimati tlen senkistok kuali para techpaleuis” (xijpoua Hebreos 12:9-11).

3. 1) ¿Kenijkatsa tijnextiaj tijkauaj Jehová ma technauati? 2) ¿Tlake tlajtlanili tijnankilisej?

³ Tijnextiaj tijkauaj Jehová ma technauati kema tijchiuaj kampeka nochipa tijneltokasej uan kema amo tijchiuaj tlen totlalnamikilis techiljuia (Prov. 3:5). Tlaj kuali tijmatisej tlake kuajkuali tlamantli kipia, techpaleuis amo ouij ma tijmatikaj tijkauasej ma techyakana, pampa tikitaj kinextia nopa kuajkuali tlamantli ipan nochi tlen kichiua (Sal. 145:9). Kema nojua tlauel kuali tikixmatij Jehová, nojua tlauel tikikneliaj. Uan tlaj tikikneliaj, amo moneki techmakasej miak tlanauatili uan  kiampa tijmatisej tlake kuali tijchiuasej uan tlake amo. Tijchiuaj kampeka timoiljuisej uan tijyolmatisej sanse kej Jehová, kiampa tijmatij tlake kipaktia uan tlake amo kinamiki tijchiuasej (Sal. 97:10). Maske tikikneliaj, uelis kemantika ouij tijmatij tijneltokasej. ¿Kenke tikijtouaj nopa? ¿Tlake uelis kiyekosej ueuejtlakamej tlen Nehemías? ¿Tlake kinmachtia tetajmej tlen David kichijki? Uan, ¿kenijkatsa tenamej uelis kichiuasej kej María, katli elki inana Jesús? Tijnankilisej nochi ni tlajtlanili ipan ni tlamachtili.

4, 5. Kej kiijtoua Romanos 7:21-23, ¿kenke tijmatij ouij tijkauasej Jehová ma technauati?

⁴ Tijmatij ouij tijkauasej Jehová ma technauati pampa titlajtlakolejkej uan amo tixitlauakej. Yeka amo tijnekij tijchiuasej tlen technauatiaj. Kema Adán uan Eva kiixpanokej toTeotsij uan kikuajkej nopa kuatlajkayotl tlen kiniljuijtoyaj amo ma kikuakaj, kinextijkej kinekiyayaj ininselti kiijtosej tlake eli kuali uan tlake amo (Gén. 3:22). Miakej maseualmej nojkia kiampa kichiuaj uan amo kikauaj toTeotsij ma kinnauati, yeka ininselti kiijtouaj tlake eli kuali uan tlake amo.

⁵ Uan maske uelis tojuantij tikixmatij Jehová uan tikikneliaj, uelis ouij tijmatij senkistok tijkauasej ma technauati. Kiampa kipanok Pablo (xijpoua Romanos 7:21-23). Kej ya, tojuantij nojkia tijnekij tijchiuasej tlen toTeotsij kipaktia. Yeka, moneki mojmostla tijchiuasej kampeka amo tijchiuasej tlen amo kuali.

6, 7. ¿Tlake seyok tlamantli ueliskia kichiuas ouij ma tijmatikaj tijkauasej Jehová ma technauati? Xikijto se neskayotl.

⁶ Kej techiskaltijtokej nojkia uelis kichiuas ouij ma tijmatikaj tijkauasej Jehová ma technauati. Miak tlamantli tlen moiljuiaj maseualmej amo eli sanse ika tlen toTeotsij kiijtoua, uan uelis moneki tijchiuasej se ueyi kampeka ayokmo timoiljuisej kej inijuantij. Ma tikitakaj se neskayotl.

⁷ Kanajya tlauel kintetsopaj telpokamej ma mosentlalikaj kitlanisej miak tomij. Kiampa kipanok toikni Mary. * Kema ayamo kiixmatiyaya Jehová, momachtik ipan se kuali universidad, katli nochi tlauel kipatiitayayaj ipan nopa altepetl. Ichampoyouaj tlauel kitetsopkej pampa kinekiyayaj ma kipia se tekitl kampa tlauel kuali kitlaxtlauiskiaj uan kampa nochi kitlepanitaskiaj. Uan ya nojkia kinekiyaya nopa. Maske mosentlalijtoya nopa, kema kiixmatki Jehová uan pejki kiiknelia, kipatlak tlen kinekiyaya kichiuas. Ya ouij kimatki kichiuas nopa. Mary kiijtoua: “Maske kemantika nechpaktiskia nijpeualtis se tekitl kampa tlauel nijtlanis miak tomij, nijmati nopa kichiuaskia amo kuali ma nijtekipano Jehová. Tlen notatauaj nechnextilijkej, kichiua ma nijmati ouij amo nijselis se tekitl. Kema pano nopa, chikauak nikiljuia Jehová ma nechpaleui amo nijselis se tekitl tlen kichiuas ayokmo kuali ma nijtekipano” (Mat. 6:24).

8. ¿Tlake nojkia tikitasej ipan ni tlamachtili?

⁸ Uajka, tlauel techpaleuia kema tijkauaj Jehová ma technauati. Uan katli kipiaj tlanauatili, kej ueuejtlakamej, tetajmej uan tenamej, moneki kineltokasej tlen Jehová tlanauatia pampa kiampa uelis kinpaleuisej sekinok. Ma tikitakaj tlake techmachtia tlen kichijkej se keskij Jehová itekipanojkauaj katli kinmakatoyaj tlanauatili.

9. ¿Tlake tlaouijkayotl kiixnamijki Nehemías?

⁹ Jehová kinmakatok ueuejtlakamej se tekitl tlen tlauel ipati: ma kinmokuitlauikaj itekipanojkauaj (1 Ped. 5:2). Tlaj kiitasej kenijkatsa  tekichijketl Nehemías kinyakanki toTeotsij itekipanojkauaj, uelis kiyekosej miak tlamantli. Nehemías kipixtoya miak tlanauatili pampa kitekimakatoyaj ipan altepetl Judá (Neh. 1:11; 2:7, 8; 5:14). Ma tikitakaj tlake tlaouijkayotl kiixnamijki. Kimatki kenijkatsa maseualmej tlauel tlaixpanotoyaj ipan teokali uan ayokmo kinmakayayaj levitas tlen ika ueliskiaj mopanoltisej kej kiijtouayaya nopa Tlanauatili. Nojkia ayokmo mosiajketsayayaj ipan tonali sábado uan sekij mosiuajtijtoyaj ika siuamej tlen sekinok altepemej. Uajka Nehemías monekiyaya kichiuas se keski tlamantli (Neh. 13:4-30).

10. ¿Tlake kichijki Nehemías kema kiixnamijki tlaouijkayotl?

¹⁰ Maske kipixtoya miak tlanauatili, Nehemías amo kinchiualtik judíos ma kichiuakaj tlen ya kinekiyaya. Ya momaijtok ika nochi iyolo uan kiiljuik Jehová ma kiyakana, uan kinmachtik maseualmej tlen toTeotsij iTlanauatil kiijtouayaya (Neh. 1:4-10; 13:1-3). Nojkia, moechkapantlalik uan chikauak tekitik ininuaya kema kikualchijchijkej nopa tepamitl tlen kiyaualouayaya Jerusalén (Neh. 4:15).

11. Kej kiijtoua 1 Tesalonicenses 2:7, 8, ¿kenijkatsa kinamiki ueuejtlakamej kiyakanasej tlanechikoli?

¹¹ Maske uelis ueuejtlakamej amo kipiasej se tlaouijkayotl kej Nehemías, kena uelis kichiuasej kej ya ipan miak tlamantli. Ueuejtlakamej tekitij chikauak kema kinpaleuiaj toikniuaj. Amo moiljuiaj san inijuantij tlauel ininpati pampa kipiaj tlanauatili, uan kiyakanaj tlanechikoli ika miak tlaiknelili (xijpoua 1 Tesalonicenses 2:7, 8). Kej kamanaltij kinextia kenijkatsa tlauel teikneliaj uan moechkapantlaliaj. Andrew, katli miak xiuitl tlatekipanojtok kej ueuejtlakatl, kiijtoua: “Nikitstok toikniuaj kichiuaj tlen kiniljuiaj kema ueuejtlakamej kinextiaj nelnelia teikneliaj uan kipiaj kuali ininyolo. Nopa kuajkuali tlamantli kinyololinia toikniuaj sansejko ma tlatekipanokaj ika ueuejtlakamej”. Uan Tony, katli nojkia miak xiuitl tlatekipanojtok kej ueuejtlakatl, kiijtoua: “Nijchiua kampeka nijneltokas tlen kiijtoua  Filipenses 2:3 uan tlauel nikinpatiitas sekinok, kiampa amo nimoiljuis na tlauel niueyi o tlauel nopati. Ni nechpaleuia amo ma nieli kej se tlanauatijketl”.

12. ¿Kenke ueuejtlakamej moneki moechkapantlalisej?

¹² Sanse kej Jehová, ueuejtlakamej moneki moechkapantlalisej. Maske san Jehová tlauel ueyi, ya “mouijtsoma” uan kitlanana katli “masitok ipan sokitl tlen uejkatla” (Sal. 18:35; 113:6, 7). Uan nelia tlauel kinkualankaita katli moueyimatij (Prov. 16:5).

13. ¿Kenke ueuejtlakamej moneki kuali kiitasej kej kamanaltij?

¹³ Ueuejtlakamej katli kikauaj Jehová ma kinnauati moneki nochipa kiitasej kenijkatsa kamanaltij. Tlaj amo momokuitlauisej, uelis kikualankanankilisej se akajya o kiyolkokosej (Gál. 5:14, 15; Sant. 1:26). Andrew, katli tikijtojkej achtoui, kiijtoua: “Kema nimoiljuia se toikni amo nechtlepanitak, kemantika nijneki nijkualankanankilis. Pampa nimoyoliljuia ipan toTeotsij itekipanojkauaj katli uejkajkia itstoyaj, nechpaleuijtok ma nimoechkapantlali uan amo ma nimosisini”. Uajka, ueuejtlakamej kinextiaj kikauaj Jehová ma kinnauati kema kinnojnotsaj toikniuaj ika tlaiknelili uan ika kuali tlajtoli, uan nojkia kiampa kichiuaj kema kamanaltij ika sekinok ueuejtlakamej (Col. 4:6).

14. ¿Tlake tekitl kinmakatokej tetajmej, uan kenijkatsa Jehová kineki ma kichiuakaj?

¹⁴ Jehová kintlalijtok tetajmej ma kinyakanakaj ininchampoyouaj, uan kineki ma kinmachtikaj uan ma kintlalnamiktikaj ininkoneuaj (1 Cor. 11:3; Efes. 6:4). Maske kintekimakatokej, amo kiijtosneki uelis kichiuasej nochi tlen inijuantij kinekij. Se tonali Jehová kintlajtlanis kenijkatsa kichijkej ininteki, pampa ya kichijtok ma tikinpiakaj tochampoyouaj (Efes. 3:14, 15). Tetajmej kinextiaj kikauaj Jehová ma kinnauati kema kinyakanaj ininchampoyouaj kej ya tlanauatia. Tlen David kichijki uelis kinmachtis miak tlamantli.

15. ¿Kenke tlanauatijketl David uelis kinmachtis tetajmej miak tlamantli?

¹⁵ Jehová amo san kitekimakak David ma kinyakana ichampoyouaj, nojkia kitlalik kej tlanauatijketl ipan Israel. Yeka, tlauel miak tlanauatili kipixtoya. Kemantika amo kuali kitekiuik uan kichijki uejueyi tlajtlakoli (2 Sam. 11:14, 15). Maske kipanok nopa, kinextik kikauayaya Jehová ma kinauati kema kikajki ma kitlalnamikti. Kiiljuik nochi tlen panotoya kema momaijtok uan kichijki kampeka kichiuas tlen kitlajtolmakakej (Sal. 51:1-4). Uan kinextik tlauel moechkapantlaliyaya  kema kikajki tlakamej uan siuamej ma kitlajtolmakakaj (1 Sam. 19:11, 12; 25:32, 33). David motlalnamiktik uan mosentlalik nochipa kitekipanos Jehová.

16. ¿Tlake kinmachtia tetajmej tlen David kichijki?

¹⁶ Tetajmej, xikitakaj se keski tlamantli tlen uelis inkiyekosej tlen David. Kuali xijtekiuikaj nopa tlanauatili tlen Jehová inmechmakatok. Amo xikijtokaj amo inmokuapolouaj uan xijtlakakilikaj kema inmechtlajtolmakasej ika Biblia. Tlaj kiampa inkichiuasej, inmosiua uan inmokoneuaj inmechtlepanitasej pampa kiitasej inmoechkapantlaliaj. Uan kema inmomaijtosej ininuaya, amo xipinauakaj inkiiljuisej Jehová nochi tlen inkiyolmatij. Uan ximosentlalikaj nochipa inkitekipanojtosej Jehová (Deut. 6:6-9). Nochi tlen kuali tlen inkichiuasej elis kejuak se tlamantli tlen inkinmakasej inmochampoyouaj uan inijuantij nochipa tlauel kipatiitasej.

17. ¿Tlake tekitl kinmakatokej siuamej?

¹⁷ Jehová kinmakatok siuamej se tekitl tlen tlauel ipati ipan ininchampoyouaj uan nojkia kipiaj se kentsi tlanauatili ika ininkoneuaj (Prov. 6:20). Tlen kichiuas o kiijtos se tenaj, uelis ikone nochipa kiilnamiktos (Prov. 22:6). Ma tikitakaj nama tlake uelis kiyekosej tenamej tlen María, katli elki inana Jesús.

18, 19. ¿Tlake kinmachtia tenamej tlen María kichijki?

¹⁸ María tlauel kuali kimatiyaya tlen tlamachtiyaya toTeotsij iTlajtol. Tlauel kitlepanitayaya Jehová uan kuali mouikayaya iuaya. Uan kinejki kichiuas tlen Jehová kinauatik maske mopatlak nochi inemilis (Luc. 1:35-38, 46-55).

¹⁹ Tenamej, ¿tlake inmechmachtia tlen María kichijki? Se, ximomachtikaj Biblia uan inmoselti ximomaijtokaj, kiampa nochipa kuali inmouikasej iuaya Jehová. Ome, tlaj monekis inkipatlasej se keski tlamantli ipan inmonemilis, uajka xijpatlakaj uan kiampa inkiyolpakiltisej Jehová. Ximonejneuili ipan ni tlamantli: uelis inmotatauaj nimantsi kualaniyayaj uan inmechkualankanojnotsayayaj. Yeka, kej inmoskaltijtiajkej, uelis inmoiljuijkej kiampa kinamiki kintlalnamiktisej konemej. Uan maske teipa inkimatkej kenijkatsa kineki Jehová xikiniskaltikaj inmokoneuaj, uelis inkimatij ouij amo nimantsi inkualanisej uan inkipiasej inmoyolo, uan uelis nojua tlauel ouij inkimatij kema insiajtokej uan inijuantij amo tlaneltokaj o san tlemach kichiuaj (Efes. 4:31). Kema kiampa panos, kinamiki inmomaijtosej uan inkiiljuisej Jehová ma inmechyolseui. Lydia kiijtoua: “Kemantika moneki nimomaijtos ika nochi noyolo uan kiampa amo nijkualankanojnotsas  nokone kema amo nechneltoka. Kemantika nimokamatsaktiuetsi uan ipan noyolo nikiljuia Jehová ma nechpaleui. Pampa nimomaijtoua, nimantsi nimoyolseuia” (Sal. 37:5).

20. ¿Tlake kuesoli kiixnamikij sekij siuamej, uan kenijkatsa uelis kipatlasej nopa tlamantli?

²⁰ Sekinok siuamej kiixnamikij seyok kuesoli: tlauel ouij kimatij kinnextilisej ininkoneuaj kinikneliaj (Tito 2:3, 4). Kiampa kinpano pampa kema eliyayaj siuapilmej, inintatauaj amo kinnextilijkej tlaiknelijkayotl. Maske kinpanok nopa, amo kiijtosneki nojkia kichiuasej kej inijuantij. Siuamej katli kikauaj Jehová ma kinnauati moneki kinnextilisej ininkoneuaj kenijkatsa tlauel kinikneliaj. Maske uelis ouij kipatlasej tlen moiljuiaj, tlen kiyolmatij uan tlen kichiuaj, kena uelis kipatlasej. Tlaj kiampa kichiuasej, inijuantij uan ininchampoyouaj tlauel yolpakisej.

21, 22. Kej kiijtoua ipan Isaías 65:13, 14, ¿kenijkatsa tiitstosej tlaj tijkauasej Jehová ma technauati?

²¹ David kuali kimajtoya kenijkatsa tlauel kipaleuiskia tlaj kikauaskia Jehová ma kinauati. Kiijkuilok: “Itlanauatiljuaj toTeko eltok melauak uan xitlauak. Kinmaka pakilistli tlakamej ipan ininyolo. Kena, sejse tlamantli tlen toTeko techiljuijtok ma tijchiuakaj eltok keja se tlauili tlen chikauak. Techtlauilia toojui; Nopa miak tlanauatili nechmakaj tlalnamikistli, na niitlatekipanojka, para ma axnitlajtlakolchiua. Tlen kitokilia itlanauatil toTeko kitlanis miak” (Sal. 19:8, 11). Ipan ni tonali nima nesi kenijkatsa itstokej katli kikauaj Jehová ma kinnauati uan katli ininselti monauatiaj. Katli kineltokaj tlen toTeotsij tlanauatia tlauel yolpakij uan itstokej “ika pakilistli” pampa kimatij toTeotsij kuali kinita(xijpoua Isaías 65:13, 14).

²² Kema ueuejtlakamej, tetajmej uan tenamej kikauaj Jehová ma kinnauati, teipa kuali itstokej, ininchampoyouaj tlauel yolpakij uan ipan tlanechikoli nochi kuali mouikaj. Uan nochi nojua tlauel kiyolpakiltiaj Jehová (Prov. 27:11). ¡San ni tlamantli nelnelia tlauel techyolpakiltia!