1. ¿Kenke tikijtouaj nopa tlajtolmoyaualistli kinmakixtia maseualmej ininnemilis?

NOPA tlajtolmoyaualistli kinmakixtia maseualmej ininnemilis. ¿Kenke kiampa tikijtouaj? Pampa ipan Mateo 28:19, 20, TNM Jesús kiijtok “xiakaj”, “xijchiuakaj ma elikaj notokilijkauaj” uan “xikinatsonpoliuiltikaj”. Tijmatij tlaj se akajya kineki momakixtis, achtoui moneki moatsonpoliuiltis. Tlaj se akajya kineki moatsonpoliuiltis moneki kineltokas uelis momakixtis pampa Jesús mijki topampa uan moyolkuik. Yeka, apóstol Pedro kiniljuik toikniuaj tlen achtoui siglo: “Nopa atsonpoliuilistli, [...] nama nojkia inmechmakixtia [...] pampa Jesucristo moyolkuik” (1 Ped. 3:21, TNM). Uajka, kema se akajya moatsonpoliuiltia, nojkia motemachia itstos nochipa.

2. Kej kiijtoua 2 Timoteo 2:24, ¿tlake moneki tijchiuasej katli titlamachtiaj ika Biblia?

² Tlaj tijnekij maseualmej ma elikaj Cristo itokilijkauaj, moneki tijmatisej kenijkatsa kuali titlamachtisej (xijpoua 2 Timoteo 2:24). ¿Kenke? Pampa Jesús kiijtok “xiakaj”, “xijchiuakaj ma elikaj notokilijkauaj” uan “xikinmachtikaj”. Apóstol Pablo kiiljuik Timoteo nojua ma kichiua kampeka tlajtolmoyauas uan kiiljuik: “Intla kej ni tijchiuas, toTeko mitsmakixtis ta uan inijuantij tlen mitstlakakilisej”. Uan nojkia kiiljuik monekiyaya kiitas tlake ueliskia kichiuas uan kiampa kuali tlamachtis (1 Tim. 4:16). Tikinmachtiaj maseualmej pampa nojkia tijnekij ma mochiuakaj Cristo itokilijkauaj, yeka tijnekij kuali titlamachtisej.

3. ¿Tlake tikitasej ipan ni tlamachtili?

³ Sejse semana tlauel miakej maseualmej tikinmachtiaj ika Biblia. Uan kej tikitakej ipan nopa seyok tlamachtili,  moneki tijmatisej kenijkatsa tikinpaleuisej katli tikinmachtiaj ma kipatlakaj ininnemilis uan ma moatsonpoliuiltikaj. Ipan ni tlamachtili tikitasej makuili tlamantli tlen moneki kichiuasej katli tlamachtiaj uan kiampa kinpaleuisej ma moatsonpoliuiltikaj.

4. ¿Kenke moneki timonauatisej kema titlamachtiaj ika Biblia? (Xikita nopa nota).

⁴ Nochi tlauel techpaktia tikinmachtisej maseualmej. Yeka, uelis kemantika tlauel tijnekij tikamanaltisej tlen Biblia. Tlaj tijyakanaj tlamachtili Tlen Tematiltia, kampa techmachtiaj ika Biblia o kema tijmachtiaj se akajya, amo kinamiki tlauel tikamanaltisej. Ma tijkauakaj Biblia ma tlamachti. Tlaj se akajya kineki tlamachtis kej kinamiki, moneki monauatis uan amo kiixtomas miak tlamantli tlen se tlamachtili o se texto (Juan 16:12). * Xijchiua ni tlamantli: Xikilnamiki keski tlamachtili tlen Biblia tijmatiyaya kema ayamo timoatsonpoliuiltiyaya, uelis tikilnamikis san tijmatiyaya tlamachtili tlen tlauel ipati (Heb. 6:1). Monejki panos miak xiuitl uan kiampa tijmatis nochi nopa tlamachtili tlen nama tijmati, yeka amo kinamiki sanima tijmachtisej se akajya nochi tlen tijmatij.

5. 1) Kej kiijtoua 1 Tesalonicenses 2:13, ¿tlake tijnekij ma kikuamachili katli tijmachtiaj? 2) ¿Tlake uelis tijchiuasej uan kiampa katli tijmachtiaj uelis kiijtos tlen kiyekojtia?

⁵ Katli tijmachtiaj tijnekij ma kiita nochi tlen momachtia mokixtijtok ipan Biblia (xijpoua 1 Tesalonicenses 2:13). ¿Kenijkatsa uelis tijchiuasej? Uelis tikiljuisej nojkia ma kamanalti tlen nopa tlamachtili o ma kiixtoma se keski textos uan amo san tojuantij tikixtomasej. Nojkia ma tijpaleuikaj ma kiita kenijkatsa uelis kichiuas ipan inemilis tlen momachtijtok. Uan ma tijchiuilikaj se keski tlajtlanili tlen kipaleuis ma kiixtoma tlen moiljuia o kiyolmati tlen se texto (Luc. 10:25-28). Uelis tijtlatsintokisej: “Ipan ni texto, ¿tikitak tlake kuajkuali tlamantli kinextia Jehová?, ¿Kenijkatsa uelis mitspaleuis ni tlamachtili? Uan, ¿tlake tijyolmati ika tlen timomachtijkej?” (Prov. 20:5). Moneki tijpaleuisej ma kiikneli nopa tlamachtili uan ma kichiua ipan inemilis tlen kiyekojtia, amo san ma kimati miak tlamantli.

6. ¿Kenke moneki tikintlaneuisej katli kipiaj miak xiuitl tlajtolmoyauaj ma yakaj touaya kema tijmachtisej se akajya?

⁶ Tlauel kuali eliskia tlaj tikintlaneuisej toikniuaj katli kipiaj miak xiuitl tlajtolmoyauaj nojkia ma yakaj touaya kema  tijmachtisej se akajya. ¿Kenke? Tlaj se toikni yaui touaya uelis tijkiljuisej kenijkatsa titlamachtijkej, tlaj tijtekiuijkej Biblia o san tojuantij tikamanaltikej. Tlaj tijnekij kuali titlamachtisej moneki amo timoueyimatisej (nojkia xikita Hechos 18:24-26). Nojkia uelis tijtlatsintokisej tlaj kiita katli tijmachtiaj kikuamachilia nopa tlamachtili. Tlaj amo uelis tijmachtitij se o ome semana, ma tikiljuikaj nopa toikni ya ma yaui. Kiampa sejse semana momachtis uan kiitas tlauel ipati kiampa kichiuas. Amo ma timoiljuikaj san tojuantij moneki tijmachtisej o amo aka uelis kimachtis kej tojuantij tijchiuaj. Xikilnamiki, tlauel ipati kuali tlaneltokas uan kipatlas inemilis.

7. ¿Tlake uelis kipaleuis katli tijmachtiaj ma kipakti tlen kiyekojtia?

⁷ Katli tijmachtiaj moneki kiitas tlauel tiyolpakij kema tikixtomaj se tlamachtili uan timotemachiaj ipan tlen nopaya kiijtoua (1 Tes. 1:5). Kiampa nojkia kipaktis tlen kiyekojtias. Uelis tikiljuisej kenijkatsa tlen Biblia tetlajtolmaka techpaleuijtok ipan tonemilis. Tlaj kiampa tijchiuaj, kiitas tlen Biblia tlamachtia nojkia kipaleuis.

8. ¿Tlake tlamantli nojkia kipaleuis katli tijmachtiaj, uan kenke?

⁸ Kema timomachtisej iuaya, ma tikiljuikaj tlen kinpanotok toikniuaj katli kiixnamijkej se keski kuesoli tlen ya nojkia kiixnamiki. Uan tlaj ipan totlanechikol itstok se toikni katli uelis kipaleuis, uajka ma tikiljuikaj ma yaui touaya kema tijmachtitij. Nojkia, uelis tijtekiuisej tlen eltok ipan jw.org kampa kiijtoua “Biblia kinpaleuik kuali ma monejnemiltikaj”. * Nopa tlamachtili uan videos tlen nopaya eltok, kipaleuis ma kiita nelia yolpakis tlaj kichiuas tlen Biblia kiijtoua.

9. ¿Tlake uelis tijchiuasej tlaj tijnekij katli tijmachtiaj ma kiniljui ichampoyouaj uan iuampoyouaj tlen kiyekojtok?

⁹ Tlaj katli tijmachtiaj iueue o isiua amo momachtia, uelis tijtlatsintokisej tlaj nojkia kineki momachtis touaya. Nojkia, uelis tikiljuisej katli tijmachtiaj ma kiniljui ichampoyouaj uan iuampoyouaj tlen kiyekojtok (Juan 1:40-45). Uelis tikiljuisej: “¿Kenijkatsa tikinixtomiliskia ni tlamachtili mochampoyouaj?” o “¿Tlake  texto tijtekiuiskia uan kiampa tikixtomiliskia ni tlamachtili se mouampo?”. Tlaj tijchiuaj ni, kipaleuis katli tijmachtiaj teipa nojkia kuali ma tlamachti. Uan, kema kipatlas se keski tlamantli ipan inemilis, nojkia uelis tlajtolmoyauas ininuaya toikniuaj maske ayamo moatsonpoliuiltia. Ma tijtlajtlanikaj tlaj kiixmati se akajya katli kineki momachtis Biblia. Uan tlaj kiixmati se akajya, nima ma tijtemokaj nopa maseuali uan ma tikiljuikaj tlaj kineki momachtis, uan ma tijnextilikaj nopa video ¿Kenijkatsa titlamachtiaj ika Biblia? *

10. Kej kiijtouaj 1 Tesalonicenses 2:7, 8, ¿kenijkatsa uelis tijchiuasej kej apóstol Pablo kema tijmachtiaj se akajya?

¹⁰ Moneki ma timotekipachokaj ipan tlen kinpano katli tikinmachtiaj. Yeka, moneki tikinitasej kejuak ya eliskiaj toikniuaj (xijpoua 1 Tesalonicenses 2:7, 8). Katli tikinmachtiaj ouij kimatij ayokmo mouampojchiuasej ininuaya sekinok uan kipatlasej se keski tlamantli ipan inemilis uan kiampa kitekipanosej Jehová. Yeka, ma tikinpaleuiaj mouampojchiuasej ininuaya toikniuaj. Tlaj tijchiuaj kampeka tiitstosej ininuaya, maske amo timomachtisej, tijnextisej tielij kuali tiininuampoyouaj. Nojkia, tlaj tikinnojnotsaj ika teléfono, tikintitlaniliaj mensaje o tikinpaxalouaj se tlalochtli, tijnextiaj nelia techtekipachoua tlen kinpano.

11. ¿Tlake tijnekij ma kipantikaj ipan tlanechikoli katli tikinmachtiaj, uan kenke?

¹¹ Ipan África kiijtouaj: “Moneki tlapaleuisej nochi maseualmej tlen se altepetl tlaj kinekij kuali ma moskalti se okichpil”. Sanse kej nopa tlajtoli, nojkia uelis tikijtosej: “Moneki inintlapaleuil nochi toikniuaj tlen tlanechikoli tlaj tijnekij se akajya ma mochiua Cristo itokilijkaj”. Yeka, se toikni katli tlamachtia kipaleuia katli kimachtia ma kinixmati toikniuaj pampa inijuantij kipaleuisej nojua kuali tlaneltokas uan moyolchikauas. Tijnekij ma kiyolmati tlauel ipati ipan tlanechikoli uan eli kej se tlen tochampoyouaj. Tlaj kiitasej ipan toTeotsij itlanechikol tlauel timoikneliaj, kinpaleuis ayokmo ma mouampojchiuakaj ininuaya maseualmej katli amo kinpaleuiaj ma kiiknelikaj Jehová (Prov. 13:20). Tlaj ininuampoyouaj katli amo kitekipanouaj Jehová kintlauelkauaj, motemachisej uelis kinpantisej kuali ininuampoyouaj ipan toTeotsij itlanechikol (Mar. 10:29, 30; 1 Ped. 4:4).

12. ¿Kenke moneki tikamanaltisej iuaya katli tijmachtiaj tlen kema se akajya motemaktilia uan moatsonpoliuiltia?

¹² Amo moneki timajmauisej kema tikamanaltisej iuaya tlen kema se akajya motemaktilia uan moatsonpoliuiltia. ¿Kenke? Pampa kema tikinmachtiaj sekinok, tijnekij tikinpaleuisej ma kitekipanokaj Jehová uan ma moatsonpoliuiltikaj. Tlaj ipan se keski metstli timomachtiaj kej kinamiki iuaya nopa maseuali uan tlaj pejtok yaui ipan tlanechikoli, moneki kimatis tijmachtiaj pampa tijnekij ma eli se Jehová itlajtoltemajka.

13. ¿Tlake moneki kichiuas katli momachtia tlaj kineki moatsonpoliuiltis?

¹³ Se akajya katli momachtia moneki kichiuas se keski tlamantli tlaj kineki moatsonpoliuiltis. Achtoui peua kiixmati Jehová uan kiiknelia, uan nojkia peua kineltoka (Juan 3:16; 17:3). Mouampojchiua ika Jehová uan ininuaya toikniuaj (Heb. 10:24, 25; Sant. 4:8). Teipa, moyolkuepa uan ayokmo kichiua tlen amo kuali (Hech. 3:19, TNM). Nojkia, pampa tlaneltoka, peua tlajtolmoyaua (2 Cor. 4:13). Uan teipa kimaktilia Jehová inemilis uan moatsonpoliuiltia (1 Ped. 3:21, TNM; 4:2). Nelia tlauel tiyolpakij ipan nopa tonali kema moatsonpoliuiltia. Kema se akajya katli momachtia peua kipatla se keski tlamantli ipan inemilis, ma tijyolchikauakaj uan ma tijpaleuikaj nojua kuali ma tlaneltoka.

14. ¿Kenijkatsa uelis tikitasej tlaj se akajya peua kuali tlaneltoka?

¹⁴ Moneki tijpiasej toyolo tlaj tijnekij ma motemaktili uan ma moatsonpoliuilti katli tijmachtiaj. Maske nochi tijnekij nopa, asis tonali kema monekis tikitasej tlaj nelia kineki kitekipanos toTeotsij o amo. Yeka, ¿kichiua kampeka kineltokas tlen Jesús tlanauatik? O ¿momachtia Biblia san pampa kipaktia tlen nopaya kiijtoua?

15. ¿Tlake tlamantli moneki kichiuas katli momachtia Biblia tlaj kineki moatsonpoliuiltis?

¹⁵ Moneki tikitasej tlake tlamantli kipatlatok ipan inemilis katli tijmachtiaj. Yeka, ¿kiijtoua tlen kiyolmati tlen Jehová? ¿Momaijtoua? (Sal. 116:1, 2). ¿Kipaktia kipouas  Biblia? (Sal. 119:97). ¿Nochipa yaui tlanechikoli? (Sal. 22:22). ¿Kipatlatok se keski tlamantli ipan inemilis? (Sal. 119:112). ¿Kinpouilia ichampoyouaj uan iuampoyouaj tlen kiyekojtok? (Sal. 9:1). Uan tlen tlauel ipati, ¿kineki elis se Jehová itlajtoltemajka? (Sal. 40:8). Tlaj tikitaj amo kichiua kampeka kichiuas ni tlamantli, ma tikitakaj tlake kitsakuilia uan teipa ika tlatlepanitakayotl xitlauak ma tikiljuikaj tlake moneki kichiuas. *

16. ¿Kema kinamiki ayokmo ma tijmachtikaj se akajya?

¹⁶ Nojkia moneki tikitasej tlaj nojua kinamiki tijmachtisej ika Biblia se akajya. Ma timotlatsintokikaj: “¿Momachtia iselti nopa tlamachtili? ¿Kineki yas tlanechikoli? ¿Ayokmo kichiua tlen amo kuali? ¿Kipatlatok tlen moiljuiyaya o tlen kichiuayaya ipan religión tlen amo melauak?”. Tlaj tikitaj amo kichiua yon se tlen ni tlamantli, san tlapik tijmachtijtosej. Eliskia kejuak tijmachtis se akajya ma ajki uan amo kineki moxolonis. Tlaj nopa maseuali amo kipatiita tlen momachtia uan amo kineki kipatlas inemilis, amo kinamiki nojua tijmachtijtosej.

17. ¿Tlake moneki kichiuas katli tlamachtia tlaj kineki kichiuas tlen kiijtoua 1 Timoteo 4:16?

¹⁷ Kema titlamachtiaj tijchiuaj se tekitl tlen tlauel ipati pampa tijneki nojkia ma moatsonpoliuiltikaj katli tikinmachtiaj. Yeka ma tijkauaj Biblia ma tlamachti uan tijchiuasej ika temachili uan pakilistli. Tikiniljuisej katli tikinmachtiaj ma mouampojchiuakaj ininuaya toikniuaj, ma mosentlalikaj moatsonpoliuiltisej uan tikitasej tlaj kipatlatokej ininnemilis (xikita nopa recuadro “ Tlen moneki kichiuas katli tlamachtia”). ¡Tlauel tiyolpakij pampa tijchiuaj ni tekitl tlen tlauel ipati! Yeka, ma tijchiuakaj se ueyi kampeka uan kiampa katli tikinmachtiaj moatsonpoliuiltisej.